viernes, 29 de diciembre de 2017

L'Altu la Farrapona (Somiedu) - Picu Blancu

26 de Payares de 2017

Track: L'Altu la Farrapona (Somiedu) - Picu Blancu


En toles rutes, siempre comento cual ye'l nuesu puntu de partida y como se llega hasta'l llugar, pero nesti día nun pudimos llegar hasta la Farrapona pola xelada na ñeve, jeje. De toes formes, ya sabéis que dende Xixón tenéis que garrar l'autovía "Y" en direición Uviéu pa siguir dempués pela As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entamando camín pel val.le Saliencia, pasando per Veigas, Vil.larín, Arbeyales, Éndriga y Saliencia, onde facemos los restantes kilómetros hasta L'Altu La Farrapona o dellos cientos metros enantes, jeje.

Partimos del Altu La Farrapona (1707 m)

jueves, 30 de noviembre de 2017

El Fielato (Ayer) - Fuentes - Cuerda L'Eyu - Tonéu

28 d'Ochobre de 2017

Track: El Fielato (Ayer) - Fuentes - Cuerda L'Ayu - Tonéu


Ruta del GM Xuan de la Borrina propuesta por Haritz, al que-y llegó un pelín d'oyíes que ya la tenía na tiesta dende cuantayá. Ye dicir, teníala pendiente en mou ivernal, pudiendo atalantar nel intre, que yera un auténtica xatada pero con un calter imporante d'esfuerzu y dependiendo les condiciones casi d'aventura.

El casu ye que pal grupu, ye una auténtica barbaridá facer esti cordal del Ayu (Eyu) n'ivernal, pero sí que ye una bona ruta ensin ñeve pa conocer unos cuantos dosmiles ayeranos. Poro, empobinámonos hasta'l Fielato, al entamu del Puirtu Braña, pa intentar percorrer dende'l Picu Fuentes hasta'l Tonéu tola cuerda L'Ayu.

Partimos d'El Fielato (1268 m)

miércoles, 15 de noviembre de 2017

Peña Cabecín (Casu)

Branu 2017

Los que me conocen bien, saben de la mió afición a conocer escueles d'escalada más perdíes, menos frecuentaes pola mayoría los escaladores y onde poder tar bien a gustu. Hai que dicir qu'esti añu, adentréme muncho nel mundiu esguilador, conociendo a munchísima xente y trepando y pasando bonos momentos con tola xente.

Poro, pesie a moveme munchos díes nes grandes escueles de Teberga y Quirós, nun quita pa fuera dellos díes a una escuela a la que-y tenía ganes enforma: Peña Cabecín. Nun vos suena? Pues ye lo normal, ya qu'esta escuelina ye conocida como la Marea, pero a dicir verdá les parés tan na Peña Cabecín y na so faldera ta'l pequeñu pueblín de Cabecín.. asína que vamos da-y el nome que se merez.

Accesu hacia la escuela del Cabecín

Va años, ya intentáremos trepar nesta escuela y nun fuéramos más que de paséu nun día gafu, alcontrando casi de milagru dalgunos de los seutores na fastera principal de la escuela. Otru día de primavera d'esti añu, volvía a dar un paséu con dellos collacios alcontrando un seutor non reseñáu y dándo-y la vuelta dempués a la peña pa conocer Les Cueves, Máximo, Truli y el Rasta, ya inclusu xubir hasta la Cuevona.

A la fín, un mes más tarde, volvimos per ellí un sábadu pa trepar durante la mañana nel seutor del Truli, onde alcontrámonos con unes cuantes víes cencielles con una escalada peragradable, catando a la fín esti requexu de caliza casina, anque frecuentada pola xente de L'Infiestu.

Canalizu de baxada pente'l Rasta y Máximo

Aquel día, tan sólo pudimos meté-y man a esti seutor y quedóme hasta un 6b+ perrísimu por encadenar, pero púnxose a orbayar y tocó descubrir un pueblu y un chigre que naide debe perdese enxamás: el del Tozu.

La verdá, ye que quedamos namoraos del pueblín y del chigre, con una terraza a mou de merenderu onde si'l día acompaña tien de ser una maraviya ver l'atapecer. Ya nun falamos de la xente que lu lleva y del bon ambiente qu'había pente la xente vieyo del pueblu y la xente foriata.

Cuevona y trepando nel Truli

Con estes blimes, taba claro, que tenía que volver un finde enteru y pa ello garramos les furgos y plantámonos nel Tozu tol finde, cenando nel chigre un par de díes estupendamente. Nun tengo más que bones pallabres pal tratu que nos dieron y la única pega, nun tener un llugar más afayaizu nel pueblu onde asitiase de furgonetéu, ya que na mesma plaza paez que moléstase un pelín a los vecinos.

No que la escalada se refier, probamos víes el primer día nel seutor Cuevines, onde me paez que ta la mayor calidá y tamién dureza de la escuela y l'últimu día, con un calor ya pelín insoportable,  pasamos la mañana nel Rasta, na que probamos un par de 6b's duretes de coyones, na mandrecha'l seutor.

El Tozu... un pueblín con encantu y un chigre de primera

Ensín más, quedé con ganes esti branu de pasar en grupu un finde ellí, pero bono... ocasión tendremos porque como digo, la escuelina y el bon ambiente nel Tozu, fai que pague la pena ensin dubia.

Peña Cabecín
Croquis modificaos por mi de la escuela d'escalada del Cabecín, por mor del GM Vízcares y  Piratas Free. Gracies y col so permisu.

viernes, 10 de noviembre de 2017

H.uentedé (Llébana) - Hacheru - Peña Vieya - Vidrio - Áliva

22 d'Ochobre de 2017

Track: H.uentedé (Llébana) - Hacheru - Peña Vieya - Vidrio - Áliva


Día de recuentros, con collacios, col monte, coles carreres, conmigo mesmu... Y nun ye quiciabes siquiera fuera la ruta que pensaba que diba devolvéme la ilusión por dir de monte, ya que a la Peña Vieya ya xubiera nuna travesera, pero siento que l'actividá que fice tornó a llenáme como nun me llenaren anteriores salides pel monte.

Poder amestar l'esfuerzu, la soledá y el disfrute personal de la carrera pel monte, con xuntame más tarde cola xente del GM Xuan de la Borrina (Benjamín, gracies por animate, nunca falles) y cola mió xente del Baskonia a los que téngo-yos un apreciu brutal, fué una pasada.

Alborecíemos, Kíla y yo, nel aparcaderu de Potes, dempués d'una xornada d'escalada en La Hermida col envís de dir empobinándonos hacia H.uentedé. De camín, tuve a bien parar un ratín a almorzar nel hostal Remoña n'Espinama y de pasu a mercar un bocata pa la ruta.

Dende H.uentedé vista de lo que vamos xubir corriendo

jueves, 19 de octubre de 2017

Tuíza Riba (L.lena) - Pasada'l Siete - Cuetu Les Cabres - Les Merines

1 d'Ochobre de 2017

Track: Tuíza Riba (L.lena) - Pasada'l Siete - Cuetu Les Cabres - Les Merines


Una vegada más alcontrámonos nel pueblu montañeru astur por definición, al menos na fastera central d'Asturies: Tuíza Riba. Como aportar hasta equí? Pues como siempre, llegamos dende Xixón pela As-66 hasta Campumanes, pa siguir pasando pelos pueblos de Sotiel.lo, Espineo, Los Pontones, Teyeo, Rospaso,Tuíza Baxo y Tuíza Riba.

En Tuíza, magar del almuerzu en Campumanes, preparámonos la xente davezu del Xuan de la Borrina, cada día menos y xente nuevo que vienen a probar como va eso de dir con un grupín como'l nueso de monte.


Partimos de Tuíza Riba (1235 m)

domingo, 8 de octubre de 2017

Cuevas de Mar (Llanes)

Branu del 2017

Un par de díes tornamos a la escuela d'escalada de Cuevas de Mar en Llanes, como non, enantes de que zarren l'accesu a los perrinos y puea bañame con Kilina. Tamos en tiempos de trepar muncho nel roco y na roca, siendo esti branu de xuru'l que más esguilé nes escueles asturianes.

Esguilar muncho sí, sacar semeyes o vidios decentes va ser que non. Así que fadremos un pequeñu repasu escrito de los munchos díes, durante los meses más soleyeros, que pasé esguilando con bonos collacios que fice durante los entrenos nel roco y les tardes de sol, roca y birres.

Cuantayá tuviera per Abril, estrenando estos dies llargucos trepando en Cuevas y centrárame, aparte de montar víes pa los collacios en ver si yera a encadenar Los Templarios (7a), la cual tirábame un pasu atrás, sobretou por mieu a picar suelu.

Por suerte, viniera Javi del roco a trepar con nós, portando un panic que vínomos al pelo, pa poder montar la tercera chapa y poner una cintuca llarga qu'afalagaba'l chapaxe dende un bloqueu invertíu y dende ehí ya tocaba pegarse dos dinámicos curiosinos con vuelu llateral pero con otru xeitu al tar protexíos.

Al final, cayó pal bolsiellu nel primer pegue magar del montaxe y siguimos faciendo víes con tola tranquilidá pero ensin probar namás apretón. El día púnxose un pelín repunante y tocó dexar de trepar por mor d'un vientucu fríu pocu afayaizu pal mes d'Abril.

Un segundu día, namás salir de trabayar, tocó tirar con una collacia a dase'l primer bañín del añu, esguilar un puquiñín faciendo milenta graos tranquilinos y aprovechando que ta entamando nesto de la escalada que se fuera fogueando.

Como casi siempre, cuéstame salir de la zona de confort y cuando pongo'l chip d'esguilar sele y montar víes a otra presona, ya nun soi a meteme a probar na duro... pero vamos... suel ser un clásicu nos mios díes d'escalada.

Pero bono... nun too ye apretar a fueu... hai díes nos que disfrútase de la compañía más que de la propia escalada y esti fué unos d'ellos.

Cuevas de Mar (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue Escalada en Llanes, Entretenimiento Vertical  y de Piratas Free. Gracies y col so permisu.


 ------------------------------------------------------------------------- 

jueves, 5 de octubre de 2017

Güeyinos del Diablu (L.lena)

2 de Setiembre de 2017

Track: Güeyinos del Diablu (L.lena)


Web del Trail: Güeyinos del Diablu 2017

Clasificaciones: Clasificaciones 2017  


Casi 6 meses dempués, vuelvo a meteme nuna carrera pel monte y faigolo cola mió primer maratón. Nun camentaba tar nin preparáu, nin entrenáu pa facer una carrera d'esta llonxura, pero taba pagao y tenía ganes de conocer el percorríu, asina que tirámonos a la piscina en doble tirabuzón y que fuera lo que tuviera que ser.

Namás que con dos o tres entrenos llargos de más de venti kilómetros, ya intentar correr tiraes curties pero rápides casi tolos díes, dende Agostu, diba a la maratón. Dicir que dir de monte, como otres vegaes, tampoco fizo d'aida pa tener al menos el vezu a les fuertes ascensiones.

Con too, plantéme na salida con ilusión, anque sin grandes espectatives. Lloñe quedaba esi bon estáu de forma, que caltuve dende les Seronda Trails hasta les primeres carreres curties del añu, sobretou hasta la de Cabeza L'Arcu, onde camiento que manqueme daveres.

Enantes de salir de Tuíza Riba


Llueu, vendríen dos carreres importantes como la Cangues Mountain y Puerta Muniel.los onde corrí dafechu llesionáu. Poro, tábemos equí pa zarrar la temporada trailera como lo ficiéramos l'añu pasáu nel Quebrapates.

Dende bien ceo, axúntome colos collacios del Asgaya Team pa recoyer dorsales y pillar el bus pa Tuíza Riba. Ellos ya vienen con bon entrenu de más maratones y de nun parar de correr en tol añu, lo que dame cierta envidia, pero tranquilidá pa intentar segui-yos el ritmu y que me faigan un pocu de llebre de cara a nun salir como un bestia.

Ponémonos de pareya Illán y yo, tomando la salida con tranquilidá, parando incluso a saludar a Noe y Wifre, como presta tener collacios animando. Aportaremos al Meicín, en pocu más de media hora, con un ritmín que fáiseme hasta llentu, poro decido intentar poner un pocu d'allegría na xubida hacia'l Puertu Cerreos.

Pasando pente l'Alto'l Palo y los puertos de la Val.lota

En tou momentu, va controlándome Illán, frena un pocu que queda muncho, pero aún así vamos ganando posiciones, aportando al puertu sobre'l 30 más menos. Nel intre, vien el tarrén que más mieu me daba, llargues vegues de transición, onde toca correr de verdá pero pa sorpresa la pata va respondiendo más o menos bien.

Aportaremos al Alto'l Palo, con bones sensaciones, xintando daqué y tiraremos pa ún de los tramos guapos del día: El crestéu per Penatolóbriga y la Magrera. Otros años, garrábase la pista de la Val.lota pa descender dempués hacia'l Meruxal, pero esti añu, aumentaron desnivel con esti crestéu pero muncha guapura nel percorríu.

Na baxada, pónse Illán a tirar y siguimos adelantando posiciones, esfrutanto munchísimu del descensu pela Caviyera, un guapu camín empredráu que traviesa una viesca de les d'ensueñu, que nel futuru espero facer conocer al grupu montaña.

A bon ritmu pela Veiga Candioches

Aportaremos a Teyeo, onde tenemos el primer avituallamientu en mou pueblu, con casadielles y demás dulciayaes, qu'aporten enerxía, pero cayéronme dalgo pesaes. Ésto notelo muncho, na pindia ascensión que sal de Teyeo hacia Xomezana y ye qu'anque paezan piquinos de nada nel perfil, esti tramu intermediu del maratón marca y muncho la carrera.

Más menos, los pasos por cada pueblu lleven a travesar d'un valle a otru y toquen pindios ascensos y baxaes rápides y equí na baxada hacia Xomezana, ye onde veo que nun soi a siguir a Illán. Ye'l kilómetro 25 y decidimos separanos, ya que ta faciendo un carrerón y va ensin cadena, poro toca aceptar que vamos bregar en solitariu pa finar la carrera.

La mió cara, nun ye mui bona, llego blanquín a Xomezana, vuelvo a intentar xintar daqué pero nun m'entra res, falo con Sergio, que va controlando al so pa, que tamién corre y digo-y que voi siguir hasta Zurea, que si veo que nun voi, quédome a esperalo nel pueblu y baxo con él.

Xustinos, xustinos arribamos a meta

Siguimos carrera alantre y pongo el mou "evitar calambres" tirando de bastones y lo que me sorprende ye qu'anque veo que voi cargáu de pates, la novedá ye que'l piramidal nun paecía que tuviese faciendo efeutu como nes carreres de Marzu. Voi cargáu de cuadriceps de les baxaes sobretou, pero de xemelos y parte posterior de les pates voi bastante bien.

Finalmente, llego a Zurea con meyores sensaciones y esta vegada sí que soi a xintar daqué: frutos secos, frixuelos riquísimos, chocolate y paez que me vengo un pelín arriba. En Zurea alcánzame Fran y tiro con él tol enllaz hasta'l Val.le Zurea, onde entama la mui temida ascensión hasta Brañavalera, cuando ya llevamos 33 km.

Fran va como un titán y decido baxar ritmu, nun vaya ser que venga'l tío del mazu, anque realmente nun fizo falta, ya que'l calor y lo pindiu del senderu va amatagándome hasta tener que parar polos temidos calambres.

Nun llevo nin la metá de la xubida y voi totalmente fundío físicamente, teniendo que parar a esperar que se me baxen los cuadriceps del pescuezu lo menos. Aún así, voi tirando intentando siguir a la xente que me va garrando, pero cuando algamo ritmu, les pates vuelven a dicir que non, que calambre al cantu y a parar.

Unes birres pa cellebralo na Pola

Enxamás sufriera nuna carrera d'esta manera, pero ye lo que toca, ponemos el mou "aportar a meta como sea" y somos a facer cumal na Pena'l L.lagu pa entamar un penosu descensu hasta Brañavalera onde garramos agua, entrugamos por sales y cola rempuesta negativa, siguimos descensu hacia la Pola L.lena.

Un descensu de 8 km, que bien pensé que nun diba ser nin a correr, pero fui garrando un ritmín trotecochineru que caltúvome más menos nes posiciones que llevaba, hasta arribar a Otero, onde a falta de 3 km nin siquiera paré nel avituallamientu.

Menos mal que la propia baxada per camín, dexábanos na mesma Pola y nun había dengún kilómetru llanu d'asfaltu qu'acaba por machucate. Poro, llueu de caleyear un pocu animáu pola xente, entré na recta final, onde munchísima xente glayaba hasta'l puntu de saltáseme les llárimes y llegar emocionáu enforma.

Fízose durísimu... pero fuimos a sacalu alantre!! Un placer alcontrame con collacios como Noe, Wifre, Gael, Sergio, Kath y Ana que taba más emocionada que yo cuando llegué y que viniera d'animar a los de la ultra en Pena Ruea.

Un abrazu pa toos... al final llegar el 38 na primer maratón ye pa tar arguyosu.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Lastra, Maeve, ...) 

martes, 3 de octubre de 2017

Vixidel (Teberga) - Picu Baxinas

17 de Setiembre de 2017

Track: Vixidel (Teberga) - Picu Baxinas


Entamamos temporada montuna y un añu coincide'l finde cola maratón d'escalada de Quirós, asína que toca restolar nel llibretu de montes pendientes p'alcontrar daqué afayaizu per esta fastera. Esta vegada vínome a la tiesta conocer el valle de Cualmundi dende Vixidel y de pasu xubir al picu Baxinas.

P'aportar al pueblu de Vixidel, como saldríemos de Xixón pela Y griega hasta Uviéu onde tomaríemos l'autovía hacia Grau, desviándonos pal valle'l Trubia, perpasando los conceyos d'Uviéu, Santu Adrianu y Proaza.

Partimos del pueblín de Vixidel (704 m)

viernes, 15 de septiembre de 2017

Travesera Picos 2016 - 2017

Del 8 al 11 de Xunetu de 2017

Track: Travesera Picos 2016 - 2017 


Otru añu más, afrontábemos el final de la temporada 2016-2017 nel GM Xuan de la Borrina y como non, facíemoslo cola nuesa mítica Travesera per Picos. Tengo que dicir, que nun fue'l meyor añu de monte, sobretou na parte final de la temporada y la Travesera diba ser el remate final.

La verdá, ye que cuando les coses déxense un pocu al debalu, pues acaben por pasar coses así. La mió desmotivación nel monte, dexaron los preparativos de la Travesera pa demasiáu tarde y llueu por mor del lleno nun refuxu, tuve que camudar los planes.

Bayurosu grupu nel entamu de la Travesera en Poncebos

jueves, 14 de septiembre de 2017

Vegarredonda (Cangues d'Onís) - Caleyón del Frances - Aliseda - Ariu - Canal de Trea - Cares - Poncebos (Cabrales)

11 de Xunetu de 2017

Track: Vegarredonda (Cangues d'Onís) - Frances - Aliseda - Ariu - Trea - Cares - Poncebos (Cabrales)


Cabera estaya de la Travesera Picos 2016 - 2017 cola que damos puntu final al calendariu de rutes del GM Xuan de la Borrina pa esti añu montañeru. Tamos en Vegarredonda asitiaos dempués de que nun pudiéramos acabar la estaya anterior en Vega d'Ariu como teníemos planeáu.

Ante nós, tenemos una xatada perimportante hasta Poncebos, poro pelín enantes de les 8 la mañana, ya tamos con tou preparáu y col banduyu llenu del almuerzu pa entamar la xornada. Silvia, Haritz y yo, tendremos de travesar bona parte de la fastera norte del Cornión pa embocar hacia la canal de Trea y llueu percorrer la sienda'l Cares hasta Poncebos.

Partimos del refuxu de Vegarredonda (1460 m)

jueves, 31 de agosto de 2017

Caín (Valdión) - Canal de Mesones - H.usantu - Vegarredonda (Cangues d'Onís)

10 de Xunetu de 2017

Track: Caín (Valdión) - Canal de Mesones - H.usantu - Vegarredonda (Cangues d'Onís) 


Tercer estaya de la Travesera del GM Xuan de la Borrina y equí siguimos el grupu reducíu de tres miembros. Magar d'una nueche de birres, vinu, cena... y durmir como bardiones, llevantámonos con munchísimu ánimu.

Aparte, miramos pal cielu, que tirara agua con rabia durante la tarde y vemos ñubes y claros, dándonos munchísima esperanza pa la ruta que queríemos facer. Personalmente, llevántome motiváu a tope, contando con qu'al fin, pueda salir de les travesíes y del patéu, amestándo-y un toque picantín al día con dalguna ascensión curiosina.

Entamu de ruta en Caín (453 m)

viernes, 25 de agosto de 2017

H.ou Los Cabrones (Cabrales) - H.orcada d'Arenizas - Canal de Dobresengros - Caín (Valdión)

11 de Xunetu de 2017

Track: H.ou Los Cabrones (Cabrales) - H.orcada d'Arenizas - Canal de Dobresengros - Caín (Valdión)

Segundu día de la Travesera Picos 2016 - 2017, na que dempués de la soba que nos pegamos el día anterior ascendiendo pela canal de Sabugu hasta Amuesa, tan sólo les nueses fuercies dieron pa facer la travesía pente'l H.ou Los Cabrones hasta Caín baxando per Dobresengros.

Como ye tarrén perconocíu por mí y por toos, namái que voi dexar delles semeyes, teniendo parte del percorríu per Dobresengros nesta entrada o un repasín a tola redolada del H.ou Cerredu nes ascensiones al Tiru L'Osu y compañia.

Partimos del refuxu de Vegarredonda (1460 m)

martes, 22 de agosto de 2017

Poncebos (Cabrales) - Canal de Sabugu - Amuesa - H.ou Los Cabrones (Cabrales)

8 de Xunetu de 2017

Track: Poncebos (Cabrales) - Canal de Sabugu - Amuesa - H.ou Los Cabrones (Cabrales)


Tamos en Poncebos, preparaos, ilusionaos, cargaos coles mochiles y con muches ganes de pasar cuatru díes pelos Picos. Los planes A... preparaos, los planes B... nel bolsiellu por si les mosques y los planes C... na tiesta dempués de dellos años patiando, lo cual va dándonos una migayina d'esperiencia.

A lo que vamos, magar d'un madrugón curiosu y de dellos enguedeyos a la hora de quedar, arrcamos cola furgo hacia Cabrales, pel camín clásicu de l'Autovia'l Cantábricu, Posada, Altu H.ortigueru y Arenas nel conceyu Cabrales, onde como ya dixi na entrada resumen... almorzamos toos xuntos.

Partimos de Poncebos (251 m)

viernes, 4 de agosto de 2017

Colláu Angón (Amieva) - Cantu Cabroneru

11 de Xunu de 2017

Track: Colláu Angón (Amieva) - Cantu Cabroneru


Seguimos con niveles de suerte ablucantes pal final de temporada del GM Xuan de la Borrina. Nesti casu, les nueses intenciones diben por conocer el nomáu traveséu de Peña Beza más l'ascensión al Cantu Cabroneru, pero como ya nos pasara na Travesera del añu pasáu, tuviemos qu'abortar la xera por mor del borrín.

Aún así, axuntáramonos un bon garrapiellu xente del grupu y con bon ánimu, entamamos a caleyar dende'l colláu Angón, onde ya tuviéramos va unos añinos p'ascender la guapa Porra Valdepinu. N'aquella ocasión tamien percorriéramos la trillada sienda del Arcedianu que si nun la conoces y ties bon día, ye agradable de patiar.

Cartelu del conceyu d'Amieva n'Angón (823 m)

P'aportar al aparcaderu d'Angón tenemos qu'aportar a Cangues d'Onís pel camín davezu dende Xixón y siguir pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Al entamu del pueblu, sal una pista a la mandrecha, qu'empobinarános durante un llargu tramu hasta'l colláu Angón a 823 ms d'altor. Ellí como ya dixe, saldrá la sienda l'Arcedianu qu'aporta hasta Oseya de Sayambre.

Averándonos pel Arcedianu a Saubu

miércoles, 26 de julio de 2017

Tuíza Riba (L.lena) - Práu L'Albu

4 de Xunu de 2017

Track: Tuíza Riba (L.lena) - Práu L'Albu


Hai díes, nos que paga la pena quedase en casa o camudar los planes que ties d'entamu. Pero a los que nos presta dir de monte, nun sabemos de malos díes, nun sabemos de negatividá y siempre tenemos na tiesta la idega de xubir y a ver que pasa.

Que pasó esta vegada? Pues que ficimos tola ruta penmediu d'una borrina fonda y anque fizo dellos amagos de querer abrir pelos altos, nun fuimos a ver el sol en tol día y namái que lu sentimos calecer el pelleyu en contaes ocasiones.



Partimos dende'l refuxu del Meicín (1210 m)

miércoles, 19 de julio de 2017

San Andrés (Uviéu) - Guanga - Plantón - Grandamiana - Villanueva (Santu Adrianu)

20 de Mayu de 2017

Track: San Andrés (Uviéu) - Guanga - Plantón - Grandamiana - Villanueva


Paez ser que ta moda la ruta los tabayones de Guanga, lo cual ye mui d'agradecer ya que paezme una ruta cenciella y mui divertía de facer. Dígolo, porque la casa conceyu d'Uviéu a petición de Somos, quier facer d'esta ruta un atrautivu turísticu.

Personalmente, siguiendo coles entraes de los collacios Cienfuegos, Los de las Claras... faigo mi particular visión d'esti sistema de saltos d'agua, que puen facer les delicies de los senderistes nun día de calor pesáu como'l que tuvimos nós.

Preparaos na ponte sol ríu Trubia (X m)