lunes, 12 de diciembre de 2016

Valdenebro - Boos (Soria)

8, 10 y 11 d'Agostu de 2016

Un añu más colo pa Soria a pasar dellos díes, amestando fiestes, tranquilidá y cuando ya me pica too, busco trepar como sea. Esta vegada cola familia ocupada colos miós sobrinos tuve de buscame la vida y aparte de facer bloque nun llugar onde dalgún día espublizaré daqué, probé suerte falando cola xente del café El Refugio d'El Burgo d'Osma.

Por suerte, namái falar con Darío, convidame a pasame a delles hores pela escuela de Valdenebro y ya tuvi la oportunidá de pasar varios díes per ellí y trepar con Oscar, Alex... y más xente de la redolada y bonos conocedores de la escuela.

Ye de recibu falar del bon facer de Darío y compañía, que meten a la xente por esti deporte con "bautismos d'escalada" y la verdá ye que la escuela de Valdenebro-Boos da pa bautismos y pa fondiar colos graos.

Nel mió casu, esta vegada venía lo que se diz fundíu de les apretaes a finales de Xunetu, asína que tenía más interés por caltener un pelín de chispa que por facer daqué curiosu. Asína, qu'a parte de conocer bona xente, pude informame de graos de víes nueves y facer dalguna vía qu'otra, siempre ensín pasar del 6c más menos.

Espero tornar l'añu que vien con más xeitu y ganes pa poneme a apretar en seriu, anque faíseme raro'l tastiu de la roca y nunca soi a faceme a ella como pa meteme en graos altos. De toes formes, ehí queda una especie d'actualización de los croquis y dende equí un saludu tardíu a Oscar, Alex, Darío y demás xente que taba entamando nesto d'apretar na roca.

Valdenebro
Croquis modificaos por mi de la escuela d'escalada de Valdenebro, por mor del llibretu asoleyáu va pocu que podéis ver dalgo actualizáu en Soria Se Mueve. Gracies y col so permisu.

-----------------------------------------------------------------------------

4, 11 y 12 d'Agostu y 6 d'Avientu de 2015

Esti añu 2015, anduvimos como non per Soria y ente torreñu y torreñu fuimos a esguilar daqué a la escuela pente los pueblos de Valdenebro y Boos, y ye, que nun mos cansamos d'esfrutar d'esti prestosu llugar al formáu pel pasu del ríu Sequillo.

L'añu pasáu acabara coles víes del Primario y esti añu tocaba siguir trabayando los demás seutores, poro'l primer día fuimos hasta'l seutor Largo onde ficimos los Penchus, un quintín na parte alta del seutor y baxéme a quitar vieyes feríes como un 6a+ un pelín más baxo.

Dos víes del seutor de la Oveja Muerta y paré principal entera col Primariu, Oveja Muerta y Largo

Cayó a la primera... y eso que tenía mala alcordanza con un pegue con un vuelu bien curiosu de va unos años, asína que coles mesmes paséme a la siguiente que tenía per ehí, que nómase Mejor Pescando... otru 6b que cayó pa la cazuela al primer pegue.

Esti día había más xente pululando per ehí, así que dexéme tres bones víes del Largo, les tres pegaínes pa más alantre y baxamos hacia'l seutor Oveja Muerta. Cuando falo de dellos seutores ye por diferencialos, porque ye la mesma paré dafechu.

Bobi que si eso que ya lu lleva él pa volver pa casa

Na Oveja Muerta, tuviera'l mió segundu abandonu de material nuna vía, ya que vime fuerte y metíme nuna que cotábase de 7b? Esi interrogante ye'l que pon una plizca de sal a metese en víes a vista y l'interrogante yera más p'arriba que p'abaxo y nun fuí a sacar un pasu pa siguir avanzando, así qu'abandone al cantu.

Al día siguiente que fuimos per ellí, con menos tiempu, anduve trabayando en dos víes a la mandrecha d'esti 7b perduru. Una d'elles salió a vista, la 9, tando cotada de 6b y la otra nun fuí a encadenala pero si saqué los pasos camentando que rondara'l 6c de xuru.

Xubiendo del aparcaderu hacia'l seutor del Águila

Dende equí, camudamos de seutor cruciando'l ríu hasta l'aparcaderu los coches onde enantes de marchar picóme probar unes víes non marcaes nos croquis que tan a la mandrecha del seutor. A simple vista, rondarán les 3 el 6a y metíme na que paecía más cenciella saliendo a vista y paeciéndome un bon 6a pal grau d'esta escuela.

Dellos mesinos más tarde, apaecimos en plenu puente d'Avientu con un día soleyeru d'espatarrar y diónos por dar un paséu hasta'l seutor más apartáu de toos, el de L'Aguila. Ellí malpenes tenemos 6 víes y tres d'elles vien dures pasando del 7a+  al 7c, asína que si nun tenéis nivel o nun tenéis ganes d'apretar nun paga la pena casi xubir.

Seutor del Águila... perguapu llugar con poques víes

Aún así, xubimos a facer dos quintinos a la manzorga'l seutor, los cuales tampoco ye que seyan gran cosa, siendo'l más guarru de toos el de la manzorga, teniendo la roca dalgo podre, ganando-y por goleada'l so compañeru con un pasín bien prestosu p'aportar a la cadena.

Guapa vista dende L'Aguila de los seutores principales

Ensín más, esti día baxamos hasta'l seutor del aparcaderu otra vegada, onde xustu onde sal el senderu pa xubir hacia L'Águila, tenemos 4 víes nesi llau del paré, onde probé un 6a bien guapu, que tenía a la so manzorga otra vía recién equipada que compartía reunión y que posiblemente anduviese rondando de grau tamién.

Lo que dixera, nun hai visita soriana que nun aprovechemos pa esfrutar de les escueles d'escalada y como non d'un bon vermú con torreños nel Burgo de Osma dempués.... hai que recuperar del esfuerzu siempre.

Venga.... ta llueu

-----------------------------------------------------------------------------
17 d'Agostu de 2014

A la fín, magar de munchísimos pegues a esi 6b+ de Monodedo asesino, que dalguien comentóme un día que más bien rondaba'l 7a, fui a algamalo. Pero como yera d'esperar, nun salió nin al primer pegue, nin al segundu... tuve que meté-y tres pegues pa dar por finalizáu esti seutor Primario.

La verdá que vinimos un pelín tarde y nun tuviemos más ganes d'apretar, poro colamos hasta'l Burgo a esfrutar de los bonos pinchos y vermús que dan nesti pueblu sorianu. Como siempre, tornaremos per equí a siguir pasando les mañanes o tardes nos nuesos díes de vacaciones.


-----------------------------------------------------------------------------
1 de Payares de 2013

Escapada de puente hasta Soria, col envís de pasar unos díes de rises, fartures y si acasu un pelín de deporte, anque más bien poco. Siempre que toi per equí, intento facer una visita a la escuela de Valdenebro - Boos, onde pali pali, siguen ampliando'l númberu de víes equipaes.

Esguilando nel seutor primario

Como tamos de visita, namás fuimos a facer dalguna vía enantes del vermú, así que mis pegues centráronse dafechu n'encadenar Monodedo asesinos, un 6b+ que ta pasándose de la raya ya conmigo, ya qu'a pesar de meté-y hasta 4 pegues nun fuí a facer tolos movimientos del tirón y quedéme ensin ella una vegada más.


Perguapa la roca, pero perfría tamién

Con pocu más, qu'esfrutar un ratín y que tol mundu probase al menos la más cenciella de toles víes, colamos d'ellí al Burgo d'Osma, onde tocaba metese un más que merecíu vermú pa calecer una migayina.

Últimu pegue enantes de colar

Ellí alcontreme, col dueñu del bar el Refugio, un bon montañeru y escalador, que díxome que más bien esa vía rondaba'l 6c o 7a, jeje. Aún así, pasando de graos cosa fina, tendrá qu'acabar por salir de toes, toes.... pal branu tien de cayer.

-----------------------------------------------------------------------------

8 d'Agostu de 2013

Pocu o mui pocu tiempu, tuve esti añu en Soria. Los conflictos llaborales que llévenme a tar de vacaciones indefiníes tan fadiándome pero bien y nin siquiera a tar unos cuantos díes nel pueblu mi pa relaxándome fui esti añu.

Así que mis visites a la escuelina del cañón del Rio Sequillo, quedaron reducíes a una tarde na que averéme per ellí, con Gus y Sonia, y tola familia de Sonia. Por mi parte, lleveme a Kíla y a Bobi pa qu'anduviesen per ellí rabilando y de pasu xugar un pocu colos sobrinos de Sonia.

Sonia nel V del seutor Primario y nel V+ del Largo

Como perbona noticia, tenemos l'ampliación d'esta guapa escuela, con apertures de víes n'otres parés y sobretou cola espublización d'una pequeña guía, la cual unos collacios escaladores cediéronme de bona gana, pa que fotografíase y tuviese nel mió poder.

Como podéis agüeyar nos croquis, tenéis agora cláramente tolos seutores d'esta escuela, con toles víes a esguilar si tenéis nivel pa ello, ya qu'a mí quédenme inda grandes munches delles. Como nota, saber que l'esguile ta prohibíu de marzu a xunu por nidificación d'aves rapaces.

Bobi y Kila y Sonia asegurándome na guapa vía encaxonada del Primario (6a)

Como mala noticia, no deportivu nun fui a sacar res, ya que tuve que consolame namái, col 6a que xube pala chimenea nel seutor Primario. El restu del tiempu, tuve dándo-y pegues a un 6b+ nomáu Monodedo Asesino, el cual acabó cola mio paciencia y coles mios yemes de los deos... pa otra vegada cayerá.

Finalmente, como veréis nos croquis nuevos que vos pongo, vien como escuela de Boos, que ye'l pueblu al otru llau del cañón del Río Sequillo. Ta dalgo más cerca que Valdenebro del cañón, asína que supongo que'l nome sedrá correutu, aún así, como yo siempre vengo dende'l Burgo d'Osma y vengo por Valdenebro voi dexalo así pel momentu.

-----------------------------------------------------------------------------

Actualización 2012

Pel momentu, nes mios vacaciones por Soria, nun tuve'l placer d'esguilar n'otra escuela que na de Valdenebro, cosa que nun quita lo prestosu d'esti llugar y tolo que quédame por prebar, nos pocos díes que tengo al añu pa da-y.

Paré principal de Valdenebro y seutor nuevu ensín prebar

Esti añu, tuve la oportunidá d'averame un par de díes a esti cañón y ún d'ellos foi en plena fola de calor, con Pau. Allá que fuímonos bien ceo, ya qu'a sabiendes de que nun pega'l sol hasta mediudía, pudimos apretar un ratín, encadenando dalguno de los sextos del seutor primariu.

A pesar de ser vies curties, toes tienen dalgún pasín curiosu, que faen apretar fondamente volando nel primer pegue de dalguna d'elles. Polo demás, son víes de fácil alcordanza, poro en cuanto metes na tiesta los movimientos y los agarres, tan pa encadenar.

Esguilando na paré principal enantes de que pegue´l sol

Esti día, nun tuviemos la oportunidá de probar muncho más, que la vía más mítica del seutor largo, que según les nueves cotaciones ronda'l 6a, envede V+ que marcaben los croquis anteriores. Pau, nun par de pegues cola cuerda penriba foi a facela, así qu'en postreres visites tien una xera bien curiosa y motivante.

Esi día, ya nun dió pa más, ya qu'avanzaba hacia nós una fola de calor, que la solombra ya nun yera a aparar, poro tocaba montase nel fornu, perdón nel coche, y dir a refrescanos a base de cerveces nel barriu vieyu del Burgo d'Osma.

Probando'l V del seutor primario

Un día enantes de colar p'Asturies, tuve la oportunidá de tornar por Valdenebro, con un día más sele no calurosu, pudiendo entretenenos con dalguna vía del seutor primario. Esta vegada tocó-yos sufrir lo curtiu y duru de les sos víes al mi hermanu y a Sonia.

Apretando nos sextos de la fisurina

La verdá ye qu'apretaron fuerte, colo que quedaron pelín cansaos pa da-y fuerte nel 6a del largo y tuve que meteme yo dempués de probar un 6a+ a finala. Nel anterior pegue al 6a+ salí volando nel pasu final, que nun se lo que tien pero atragántaseme saliendo pela manzorga, dificultándome'l chapaxe del últimu seguru, colo que si fallo, allá voi, jeje.

La próxima vegada, tengo munches cosines na tiesta. Una ye encadenar esti 6a+, y probar munches otres qu'inda nun tuve ocasión de dir dándo-yos preste, asina como catar un pelín el seutor nuevu d'enfrente.... a ver si tengo la posibilidá.

Dándo-y un pegue a un 6a+/b? nel seutor llargu

Valdenebro
Croquis modificaos por mi de la escuela d'escalada de Valdenebro, por mor de Alvaro Lafuente y de les últimes reequipaciones marcaes a pie de vía. Gracies y col so permisu.


----------------------------------------------------------------------------------------------------------------- 

Yera nidiu que con tol equipu mercáu, nun se me diba escapar a mi la oportunidá de da-y a la escalada en Soria. Ya tuviera nel roco del Burgo de Osma y esti branu tamién torné a él, pa da-y a toles víes como ta mandáu, y asína foi ya que fíceles toes de primeru. De toes formes, el sitiu ye bien afayaizu pa pasalo bien un ratín y animar a otra xente a prebar el deporte de la escalada.

Valdenebro (Soria)

Pero sabiendo que nun diba conformame col monolitu solo, tuve restolando per interné y alcontré un blog con delles víes nun pueblu bien averáu al Burgo y por supuesto al mio pueblu tamién, asína que falar col mio collaciu Miguel, bon aficionáu al monte y la escalada, y acabar yendo yera dalgo más que fecho.

Como llegar a les víes ta desplicáu nel blog que vos dexo embaxo de los croquis que tamién tienen colgaos na web. Nun va ser la cabera vegada que tea colgáu per ellí, poro intentaré la prósima llevar el gps y colgar el camín y marques d'onde anden les víes esáutamente.




Croquis y sectores sacados del blog de Alvaro Lafuente - Misterclaimber

Hai que dicir que nun ye la meyor escuela d'esguile posible, ya que xente avezáo como yo, a grandes escueles n'Asturies con munchos tipos de víes y graos, pue alcontrase nun problema, si tien qu'entamar a calecer músculos en víes de V+, así de primeres y a vista, ya que mi grado pol momentu nun anda muncho más allá, o eso camiento porque nun intenté namás potente. Tou s'andará.


Miguel Recu peleándose cola vía 10 del sector El largo (V+)

Asína que-y tocó abrir la primer vía a Miguel que llevaba un tiempín sin esguilar, poro sofrió de coyones pa sacala, pero a la fin, pudimos los demás esfrutar d'una vía llarga pero prestosa pa pegáse na roca. Personalmente, tirando cola cuerda penriba, nun ye lo mesmu ya, necesito enllazar de primeru pa dala por fecha, asína que pa la prósima vegada tocaráme facela de primeru y quitámela de la llista. De segundu nun tuve mayores problemes, anque si que fízose llarga, quiciás porque nun paré nin p'alendar.

Nesta vía tovieron pegándose delles persones más (mi hermanu, mi prima, Rafa,...) y pudieron ver que la roca nun tien na que ver col rocódromu y que cuesta muncho alcontrar agarres, ver el siguiente pasu a dar, etc... aparte que nun yera cenciella precísamente pa xente non avezada a la escalada.

Magar de les prebes, tocaba da-y a la siguiente vía tamién de grao V+, pero con una salida complexa, de muncha fuercia anque perguapa, asína que foi l'elexíu y dempués d'un primer pegue nel que nun alcontré l'agarre dafechu, a la segunda vegada saqué l'entamu, y a partir d'ehí, ya solo paciencia, tranquilidá y dellos descansos en dalgún balconín, ficieron qu'enllazase tola vía de primeru, quedándome un tastu bien dulce d'estes víes de Valdenebro.


Recién pasada la entrada complicadina de la 11 del Largo (V+)


Pasín de tirar a güevu tamién


Ya va quedando menos pal final


A la gueta de la reunión, onde coño taba??


Reunión a la fin, V+ llargu, llargu

Dempués d'estes semeyes de la vía 11 del seutor El Largo, solo resta tornar la prósima vegada pa facer otres tantes, y de xuru que repetir de primeru estes dos: 10 y 11 Seutor El Largo, ya que pagan la pena.

No hay comentarios:

Publicar un comentario en la entrada