lunes, 19 de abril de 2021

Piedranidia (Nava)

14 d'Abril de 2021

Nuna selmana de nun parar de trepar, magar de pasar por seutores como la Manzanea, la Puente o el Laboratoriu, pa probar delles víes reequipaes o proyeutar, de les que podremos falar en breve, espero,  tuve la suerte d'acompañar a Richie Patterson pa revisar y sacar semeyes na escuela naveta de Piedranidia.

Perguapa vía Estevia (7a)
 
Ya lloviera dende la última vegada qu'averárame per ellí a esguilar, asína que prestóme echar una güeyadina al seutor, que vese bien conserváu y por suerte nun mui tomáu pola broza. Díbemos acompañaos de Castro, ún de los responsables de caltenimientu de la escuela y equipador de dalguna de les víes.

Un placer apretar un puquiñín en Piedranidia
 
Por suerte, díbemos a sacar semeyes y sabiendo esto Castro, recomendó metese en Estevia un 7a de resistencia mui guapu, nel que pringamos a vista na parte alta, pero que pudimos encadenar al segundu esfrutándola munchísimu, lo qu'anímame a tornar per Piedranidia esta temporada de xuru.

Piedranidia
Croquis modificaos por mi de la escuela d'escalada de Piedranidia, por mor del grupu d'equipadores de la escuela: Piedranidia. Gracies y col so permisu.

 
-------------------------------------------------------------------------

Branu 2017

Entamaben los díes a crecer y los vienres tarde ya daben pa esguilar en condiciones. En plena primavera, al entamu de la temporada na que suelo esguilar más tenía envís por meteme con ganes na escuela naveta de Piedranidia.

Pero como siempre, una cosa ye lo ties pensáu y llueu, otra bien distinta ye onde acabes por dir, cuanto ties un ratín pa trepar. D'esta miente, quedámonos con un par de visitines a esta escuelina na faldera de Peñamayor.

Intentando trepar baxo la lluvia

El primer día, xuntámonos un bon garrapiellu, echámos-y ñarices y tiramos hasta Nava pa ver si llibrábemos y acabamos por dar unos pegues a un 6b+ perrísimu, como ye Piedranidius y a Proyecto Futuro (7a). Yera parte de la paré onde más desplomaba y llibrábemos del orpín continuu.

Llueu de perder la paciencia con unos cuantos pegues, decidimos por tirar hasta les Praeres a echar una botellina y saludar a Bambi, qu'andaba atechadina per cerca'l chigre montuno. Nunca tuviera la suerte de poder vela tan de cerca ya incluso poder acariciala, qu'animal tan hermosu.

Visitina a la bambi de les praeres

El segundu día averámonos per ellí, nun día de calorón Vane y yo, faciendo unes cuantes víes "cencielles" pa reconcilianos cola escuela y encadenando Al fin, el Fin un 6c que fizo apretar enforma.

Darréu, tocaba dar el pegue del día a Sinergia Pura (6c+) pa nun ser capaz nin canteame de la segunda chapa alantre, por mor del dolor de yemes. Ye lo que tien los entamos de temporada, roca caliente y piel blanda, pues p'abaxo.

En fin... dalgún día alcontraremos les condiciones perfeutes pa Piedranidia, cuando nun espatarre de calor y póngase a orbayar y haya que fuxir pa Nava, anque de lo malo, siempre caen unes botellines y escaezse'l mal tiempu.
 
-------------------------------------------------------------------------



22 d'Agostu de 2016

Tornamos a l'actividá per Asturies, intentando algamar la motivación y los resultaos de Xunetu, pero nin tan siquiera somos a tener esa motivación por metese en graos curiosinos. Esta vegada, fuímonos Richar y yo hasta Piedranidia, que la teníemos totalmente abandonada.

Pero nun escoyimos el meyor día, con un calor insoportable que sumáu a que la roca ye peculiar cuanto menos, facía casi imposible menease ensin resbariar colos pies. Ficimos dalgunes víes cencielles de la mandrecha, destacando la Escabechera (6a) que nun tenía probada ya intenté meteme como siempre en Sinergia Pura, pero yera dafechu imposible.

Anduvimos restolando dalgo más a la solombra y probamos dalguna vía, pero pringando en dalgún pasín siempre, poro colamos d'ellí a tomar una botellina sidre porque cuando'l día nun ta pa ello, nun paga la pena matase neses condiciones.


-------------------------------------------------------------------------

13 de Xunetu de 2015

En plena xornada de branu, Haritz y yo, averámonos hasta la escuela naveta de Piedranidia, onde quedamos con Dani, del blogue Asturwaterman, pa facer delles víes y pasar una prestosa tarde. Cómo siempre ye un placer esguilar con un fotógrafu pendiente de cada movimientu, ya que les semeyes amuesen tola belleza d'esti deporte.

Haritz y yo intercambiando funciones asegurando y trepando

Piedranidia ye una escuela a la que debería visitar más, ya que la so bayura de graos, siempre na redolada del 6a al 7b, ye perfeuta pa siguir avanzando, asina como'l so esixente manexu de pies y los agarres romos a los que tan pocu avezáu toi.

Apretando nel Principito (cotada actualmente de 6b+)

El mayor problema, pues quiciábes, la llargura del averamientu ya qu'anque aportar a Nava ye rápidu dende Xixón, l'acesu pela pista dende Piloñeta a Piedranidia, faise un pelín pesáu y en tiempu tamién allarga... pero como too... ye cuestión de dexase de tonteríes y dir garrándo-y el pulsu a la so roca tan especial.

Dani con su selfi-pie y Kíla nel pié de vía

Aparte de pasar una tarde agradable, tuviemos dándo-y a les víes de la mandrecha que ronden toes el 6a (Hoponono y Agua de Mar) pa qu'Haritz apretase un pelín y llueu metíme por segunda vegada en Sinergia Pura (6c+) que saldrá otru día con más tiempu y tamién en El Principito, cotada d'entamu de 6a+ pero qu'últimamente dicen los llocales que bien podría ser un 6b+... toi d'alcuerdo... ya que costó l'encadene dos pegues a fueu.

-------------------------------------------------------------------------

22 d'Agostu de 2013
 
Tercer visita a la escuela naveta de Piedranidia y vamos col enfotu de conocer el pequeñu seutor de la manzorga'l paré. Nómase'l seutor de Suki, y tien 4 víes que según los croquis ronden el V, V, 6a+ y 6a, n'orde de la manzorga a la mandrecha.

Otra cosa ye la realidá, ya que si n'anterior visita fízome sudar tinta un 6a (Marinaleda), el supuestu V, nomáu como'l Gochu, tuve que lluchalu, ya qu'aparte de la gocheza de la roca, amestámos-y unos agarres romos y saber movese navegando pela roca y too xunto gloria.

Poker de víes goches en Piedranidia (V, V+, 6a, 6a+)

Los presentes y avezaos a veme esguilar, ya vieron que'l quintín, tenía más bien pocu de quintu, poro camentaron que lo meyor yera facelu en toprope, pa nun xugase nengún marrón. Ficieron bien y dempués de pegase muncho con ella, xubieron unos hasta la cadena y otros hasta onde pudieron, pero baxaron petaos y bien petaos.

Ye increyible como una vía aparentemente tumbada, pue facete baxar como si tuvieres nun desplome brutal por mor d'agarres grandes de pinza y romos a los que nun tamos avezaos na caliza d'Asturies. Les siguientes víes que fui prebando foron a meyor induldáblemente, pasando pol guapu Gochín (V+) y pola Gocha (6a) la cual nun pudieron prebar los demás porque una rama d'un árbol, facía peligrosu volar cola cuerda penriba.

Berto, Sonia y Pepín pegándose col Gochu (V?)

Cola xente cansada y con tres víes a vista nel bolsu, dexéme pal final, col envís de tirar una llábana que movíase peligrósamente penriba la zona d'asegurar, la vía de 6a+, Can Fly. Dicir qu'al final foi casi la que más prestóme facer, ya que tenía un pasín llargu a un bon agarre mui guapu de facer.

Ensin más tiempu, ya qu'al tar encaxonada baxo Peñamayor esta escuela dexa de tener lluz ceo, tuviemos que tirar pa Xixón, pa finar tomando sidre un ratín y como nun mos paeció abondo, tocó tomar dalgún cacharru qu'otru nuna terraza, jeje.

Como siempre acabamos tomando dalgo...

-------------------------------------------------------------------------------

5 d'Agostu de 2013

Dempués de llevar un círculu viciosu, de dir trepar peles tardes nel Cadaval, La Peñona o La Manzanea, facíame falta dir a otra escuela, y que meyor qu'averase a la nueva escuela de Piedranidia en Nava. Amás, con bien de ganes taben Dani, Jandro y Berto de conocer un nuevu sitiu y esti paeció-yos espeutacular.

Enantes de llegar, ya quedaron ablucaos, xubiendo en coche ensín parar hasta les falderes de Peñamayor, y llueu d'aparar y baxar pel senderu, topáse de frente, con semeyante paré prestó-yos un montón. La verdá ye qu'anque faltá-y munchos pegues a toles víes pa que les víes tean llimpies y afayaices, el pie de vía y l'allugamientu de la escuela son bien guapos.

Un atapecer dende los altos de Piedranidia y el desplome central

Cuando dexamos de ver los progresos na escuela, alcontrando un pequeñu seutor que paecíanos de víes cencielles pero que nun prebamos, y qu'aposteriori ví que nomábase'l seutor Suki de graos afayaizos, preparámonos con calma p'apretar un ratín.

No deportivo, tuvieron los tres apretando con Hoponono (V) dempués de que la ficiese yo. Jandro atrevióse a metese de primeru y pol cantu d'un duru, nun foi a encadenala y Berto y Dani, probáronla en toprope llegando bien hasta la cadena.

Trabayando nel paré cimeru de Piedranidia

Nun ratín, que taben dos de los tres ocupaos, garré a Dani y díxe-y que diba meteme na vía d'al llau, ensín facer muncho casu del grau. Fice dalgo que nunca fice y ye meteme nun grau gordu pa mi, ensín facer tolos que tan por baxo.

Sinergia Pura (6c+/7a) foi la escoyía y na segunda chapa ya amosóme que nun yera la meyor opción pa facela a vista nin muncho menos. Ciertamente, ensín tener nin un 6c a vista inda, apretar a tope nun 6c+/7a col envís de sacala yera una utopía.

Jandro, Dani y Berto en Hoponono (V)

Pero tampoco salió tan mal, ya que poquín a pocu aporté a la cadena, teniendo bones sensaciones pa ella, nun futuru cercanu cuanto menos. La verdá, que lo más difícil d'esta vía, pa mi, ye manexase téunicamente colos pies, que son malísimos.

Más de lo mesmu en cuanto a pies, tien Agua de Mar (6a) nel que tuvieron pegándose los 3 en toprope, teniendo munchísimos problemes pa la entrada a vía. Cuando taben ya bien cansaos, xubila yo de primeru, y la verdá que ye esixente y el segundu chapaxe ye bien duro.

Encadenando con muncho sufrimientu Marinaleda (6a)

Cola xente ya cansadina, quise encadenar dalguna vía nueva, así que metime en Marinaleda que venía marcada de 6a. Pa entamar, la entrada tien muncha miga, ya qu'intentelo pela mandrecha y la primer chapa tan alta, colos romos qu'hai por agarre tirome p'atrás.

Poro, tuve qu'apretar saliendo pela grieta de la manzorga, saliendo colos pies en bavaresa, pela grieta y tirando mui finu, quedando casi en X dafechu hasta'l descansu na grieta diagonal que surca tol paré. D'ellí, la vía sigue continua y apretona hasta la cadena, sofriendo por mor d'eses tres primeres chapes que me ficieron petar enforma.

El próximu día más y meyor espero....

-------------------------------------------------------------------------------

25 de Mayu de 2013

Llevaba con ganes de conocer esta escuela na fastera central asturiana. Y ye que tamién llevo tiempu siguiendo, los trabayos d'equipamientu de Piedranidia, ya que poques vegaes un ayuntamientu enfótase n'aidar a un colectivu d'escaladores a algamar un oxetivu... una escuela d'escalada nel so conceyu, nesti casu en Nava.

El resultáu... pues un llugar guapísimu pa esguilar, pelín fríu n'iviernu de xuru, pero perfeutu p'apretar en branu ya qu'hai solombra onde abellugase pa xintar y descansar. P'aportar a la escuela, hai que salir de Nava, en direición Bimenes, pa desvianos hacia Piloñeta, siguiendo carretera hasta Pra, onde ya tórnase en pista formigonada por Los Porciles, xubiendo bon desnivel hacia Peñamayor.

Probando la primer vía d'esta escuela, el Fresal (V)
Aparte de tar perbien indicáu, cuando'l desnivel de la pista asela, veremos el cartel de la escuela y unos metrinos más alantre, tendremos sitiu pa dexar el coche, ensín molestar res. Llueu garramos mochiles y p'abaxo pel senderu hasta alcontranos coles parés y abonda basoria. Paez ser, qu'enantes yera un vertederu esta fastera ya qu'hasta un coche foron a tirar... que gocha ye la xente.

Aún así, el llugar como ya dixe, ta baxo una guapa viesca autóctona, tien un bon pie de vía pa pasar el día y onde ta pelín más complexu, hai la posibilidá de tar afitáu a una cuerda, poro perfeutu dafechu en tolos sentíos.

A la preba del Fresal, Sonia y Pau

No que deportivamente falando refíerse, al ser el primer día d'escalada de la temporada primavera-branu, personalmente tengo menos confianza de lo normal, pero prestome muncho escaecer el bulder y tocar roca.

Entamamos pel V de la esquierda (El Fresal), que resultó ser una ayalga pa tolos tipos d'agarres y na que los sos primeros pasos, tienen que facénos llibrar una salida vertical, con un par de barrigues, pa dempués facer una trepada cenciella, pero mui prestosa hasta la reunión.

Dempués de sacala a vista, anque non con bones sensaciones, tuvieron Sonia y Pau apretando en top-rope, costándo-yos salir, llegando Sonia hasta la salida de la barriga dura y Pau, magar d'un vuelín al rompese una ñapa, algamó la vía hasta la cadena. Agora a entrenala de primera.

Sonia esguilando y Pau asegurando

Llueu tocó dir a prebar l'otru V, xustu al llau contrariu de la paré. Ellí, hai dos víes compartiendo descuelgue: Hoponono (V)  y Agua de mar (6a). Primeru fice Hoponono, paeciéndome más cenciella que l'otru V, será que soi más de placa que de verticalidaes, jeje. 

Tanto Pau como Sonia, tamién cola cuerda penriba, foron al primer pegue hasta la cadena, así que les sensaciones nun foron solo míes nesi sen. Dicir qu'esta vía, como ya dixe tien una pequeña terracina, onde movese p'asegurar, pero ta perfeutamente equipáu, por si queremos aseguranos a una cuerda afitada al paré.

A pesar de que daben meyor día, a cachinos tiraba un airín que dexábate xeláu, poro cuando apaeció'l sol un pocu, aprovechamos pa xintar y descansar un ratín. Demientres tamos xintando, tamos oyendo un ruxerux, el cual somos a pescanciar penriba nuesa, en mediu'l paredón, onde acolumbramos un abeyeru de bones dimensiones.

Dos semeyes de Pau en Hoponono (V)

Magar de la xinta, decido da-y un pegue al 6a d'Agua de Mar, viendo que les yemes de los deos, inda tan demasiáu blandos d'andar nel roco, jeje. Cómo abrasaben les ñapes, pero prestome pola vida sacar esti 6a a vista, con dalgún movimientu bien guapu na parte baxa, compartiendo'l final col V y con una abeya furiosa.

Esta abeya y que tamos en Nava, dános l'únicu emburrión que faltábanos pa dexalo pa otru día y baxar a la capital naveta, a tomar sidra, jeje... dando por piesllada, esta primer visita a la escuela naveta de Piedranidia.


Nun va ser la última, ya que presta y muncho, ver l'avance d'esta escuela, que nun solo reduzse al seutor visitáu, sinon que tien a la manzorga dellos parés, nos que tan trabayando pa desendolcar munches y dures víes a simple vista.

4 comentarios:

  1. Ya va apeteciendo salir a la pared para ver si todo lo apretado en invierno en el roco ha servido para algo jejeje...

    Un abrazo.

    ResponderEliminar
    Respuestas
    1. Y que lo digas.... esti añu tengo proyeutos na cabecina y tengo qu'entamar fuerte pa poder facelos, jeje

      Un abrazu

      Eliminar
    2. 76 y 55 votos no está nada mal. Me han sorprendido los 700 del ganador. Sigo normalmente su blog, pero no me parecía para tanto.
      Mañana a Mallorca.

      Gero arte. Un abrazu.

      Eliminar
    3. Hasta mañana, nun se sabe quien gana. Pero dalgunos paezme a mí, que ficieron trampes, porque sinon... De toes formes, presta que faigan concursos asína.

      Pasalu perbien Fernan.

      Besarkada bat

      Eliminar