jueves, 25 de agosto de 2022

Marabiu (Teberga)

20 d'Agostu de 2022

Dempués de volver per Cuanxú, llueu d'un añu ensin tastiar la so pulidísima roca, ficimos un viaxe de carreteres perdíes astures hacia Teberga, parando a sobar en Yernes, nel conceyu de Tameza. Dempués, viendo les temperatures que nos veníen, decidimos siguir hacia Teberga col envís d'esguilar en Marabiu, llueu d'unos cuantos años tamién, ensin pasar pela escuelina.

 
Pateín hacia'l seutor d'Alimoches

La idega yera conocer el seutor d'Alimoches así que tomamos un almuerzu nel guapu aparcaderu al llau de la ermita Santana y caleyamos hacia'l seutor apriesa, enantes de que'l sol ficiera actu de presencia. Tardamos un pelín en situanos mirando los croquis y decidímonos a probar una variante de la vía Alimoches que marcaba'l croquis como 6c, viendo que la línea yera bien guapa.

Vistes increyibles de tola llínea del cordal del camín de la Mesa

Ellí que metíme, sacándola a vista, pero tengo que decir qu'ente lluchar con una yedra castrona y apretar de coyones faciendo la travesía y saliendo del techín, tuve que tar na guapa placa d'arriba, reposando un bon ratín con una petada curiosa jajaja.

Perguapos collores de la roca caliza del seutor Alimoches

Llueu tocaba-y el turnu a Anna, que siguió los mios pasos, faciendo meyor que yo la salida del techu, pero liose un pocu colos pies pa salir y colgó, faciendo'l restu la vía como si na. La pena, fue que'l sol entamó a facer actu presencia y nun pudimos dar dengún pegue más a esta vía nin a denguna otra, aparte que teníemos prisa pa baxar a Entragu, al vermú con conciertín.

Anna na variante d'Alimoches
 
Como yera d'esperar tuviemos tola mañana sólos, ensin ver namái qu'a montañeros, porque los escaladores nin apaecer per esta escuela tebergana. Más tarde, pudiéramos comprobar que taben toos pa los seutores de Gradura n'Entragu, como suel pasar siempre, así qu'apuntaremos Alimoches en Marabiu, como seutor perfeutu pa tar tranquilinos esguilando pela mañana.

Perguapu seutor d'Alimoches en Pena Gradura
 
El restu del día, pasámoslo ente vermú con collacios, bañín nel banzáu con Kíla, un peguín fanáticu na esplanada a la solombra y echar un gabitu nel Esguila la Nueche, organizáu pela Aguja de Sobia, onde pudimos echar unes rises y esfrutar de los más fanáticos del aparcaderu d'Entragu, apretando col frontal y baxo la lluz de los focos na Esplanada.

Marabiu
Croquis modificaos de Marabiu por mor de  Piratas Free. Gracies y col so permisu.



-------------------------------------------------------------------------

 11 de Setiembre de 2016

Llevántome un domingu nel aparcaderu llibre d'Entragu y saco la tiesta pela puerte de la furgo d'Haritz y veo la mesma imaxen en caún de los personaxes qu'arrevolotien d'un llau a otru, empobinándose la mayoría hacia los baños: RESACA!!!

Eses cares y esos cuerpos ameyoren dempués d'una mexada y llavase un pelín, pa dempués garrar perres y dir tomar un café al primer chigre qu'alcuéntrase. La nueche fué llarga, pasaes les 5 y media la mañana, poro les intenciones de trepar al día siguiente son les xustes.

Soi de los primeros en llevantame, metiéndome un café con Orlando y collacios, colos qu'echo delles rises hasta que voi ver que fai la xente. Pa cuando vuelvo al aparcaderu, la xente va esperezándose y me doi una reválida almorzando con Pepa y Jose nun chigre de la Plaza.

Wifre y Marie trepando en delles víes

De la que tornamos, la xente ta mediánamente organizada y alcuéntrome con que tenemos una nueva collacia d'escalada: Marie. Esta neña, que ta faciendo Erasmus d'Inxenería Civil en Mieres, ta con ganes de trepar y somos los únicos anormales que van dir a la paré con semeyante estáu resacosu y col calor que dan pal día.

Pues allá vamos, decidiendo dir hasta Marabiu, faciendo les milenta envueltes hasta los puertos, menos mal que ye guapísimu esti llugar, porque marease yera la cuenta. Aportamos enfrente la ermita Santana y tirámonos hacia los Bloques, que ye l'únicu sitiu que conozo de Marabiu.

Somos un montón de xente, asína que vamos turnándonos más menos por graos p'atacar les víes y como ye vezu, dedícome a facer namái lo que nun tengo encadenáu, sacando un 6c y un 6b, entre otres na mandrecha del seutor.

Metíu nun 6a de fisura más perru que la hostia y Richar apretando

Sicasí, nun entamaremos mal, dempués metímonos a les víes de más a la manzorga, con un 6b+ qu'atragantóseme nun pasín, sacándolo al segundu pegue, demientres que Marie lluchólu y sacólu alantre amosando una calidá esguilando suprema.

Llueu siguió cola masterclass nun 6a de fisura durín, durín que tamién bregó finamente pa salir p'arriba como ta mandáu. Otra vía, que se fué al segundu pegue confirmó que taba entrándome una baxona perimportante.

Demientres, tocó xintar dalgo, ver a los demás esguilar nes distintes víes y acabé encadenando les víes fallides y otru quintín de regalu, pero ya nun daba pa muncho más y los dolores nel pié diben acrecentándose según pasaben les víes esguilaes.

Marie dexándonos col culu torcíu de como esguila

Con un calor brutal y con toles cantimplores seques, tocaba colar de Marabiu, dexando'l restu del seutor pa otru día y yéndonos con bien de ganes a echar una cervecina. Nesti casu, decidimos parar en Villanueva, que ya facía tiempu que nun pasábemos per ellí a da-y a la Cotoya.

Dende entós, Marie pasó a ser una collacia más y acompañónos en dellos díes trepando per Asturies.

-------------------------------------------------------------------------

5 de Setiembre de 2015

Entramos en setiembre d'esti branu n'Asturies y son les fiestes del pueblu mió ma, n'Ortigueira en Cuaña, pero como tenemos tol día per delantre vamos dar una vueltina hasta Teberga, onde xubiremos a los puertos de Marabiu col envís de baxar hacia Grau y siguir hacia l'occidente per tierres pelín desconocíes pa mí.

En Marabiu, anque nun ta'l día pa tirar voladores, respeta al menes, asína que vamos conocer una migayina la escuela d'escalada de Marabiu y pa ello tendremos un cómodu accesu per pista y cuesta baxo hasta garrar un senderín que déxanos nel seutor de los Bloques onde son abondosos los quintos y sestos... perfeuto.

En Marabiu con vistes a Pena L.lana y Gradura

Dexamos los trastos nel cómodu pié de vía y siempre abrigaos, porque muncho calor nun fae precisamente, entamamos pela mandrecha con La Placa (V+) na qu'hai qu'andar con curiáu si desviámonos un pelín a la mandrecha ya que la roca ta dalgo suelto.

Dempués vendrán La Fisurina (V) y la Oreja (6a), más guapa esta última, anque siempre alcordáivos que nun día sin sol, el tastu de la roca ye más bien frío en Marabiu ya que tamos altos. Lo siguiente ye un 6c nomáu Uf!!, pero ye d'estes víes forzaes y nun me presten nada.

Dellos seutores como Alimoche, Tarzán, Los Bloques....

Desplícome... nun me presta nada y non porque nun seya a sacala, sinon porque son d'estes víes que múeveste un metru a un llau u otru y páseste a la d'al llau. Vamos, que ta metía con calzador y ye un sin sentíu facela.

El casu ye que dexela pa otru día, porque movíme un pelín hacia'l 6a y ya nun ye 6c nin de broma, asina qu'otru día garraré la llinea de chapes, encadenarela y nun volveré a esguilala enxamás, ya que camiento qu'al menos tien d'haber una bona distancia entre víes... al menos que puedes meneate un par de metros a cada llau pa buscar soluciones.

Esguilando un puquiñín anque ensín matase muncho

Ensin más, despedime con otru V+ (Novatos) y como'l día nun quería abrir nestes tierres teberganes, xintamos y decidimos que yera hora de dir tomar el vermú per Grau. Coles mesmes recoyimos garramos el coche y entamamos viaxe pela fastera central-occidental d'Asturies averándonos poquín a pocu hacia'l noroccidente.

Ye un sitiu que gustóme, Marabiu, siempre me paeció un llugar guapísimu tanto pa dir de monte como pa esguilar nesti primer día, asína qu'espero tornar per estos parés y siguir sacando víes poquín a pocu... asína que ta la próxima.

No hay comentarios:

Publicar un comentario