martes, 27 de diciembre de 2016

Aguya Madalena (Morcín)

7 d'Ochobre de 2016 

Pues ya llovió dende que tenía na tiesta facer esta vía del Monsacru y tampoco ye que fuera l'únicu ya que Dani tamién taba emperráu. Asína qu'un vienres tarde, quiciás pelín pillaos de tiempu, quedamos pa facela xuniéndose a nós Marie, que nun pierde oportunidá d'esguilar tolos díes que pueda.

Aportamos a Viapará primeru Marie y yo, ya que Dani y Vero diben a por una furgo y diben tardar un pocu más y no que vienen y non, vamos caleciendo un pocu faciendo un 6a+, pa llueu convidar a Marie a probar un proyeutín de 7a que tenía nesti seutor, Rayos y Truenos.

Seutor de Aguya Madalena

Ya la tenía a puntu pa encadenar pero nel 6a+, duelme'l pié y paso olímpicamente de probala ya que sé como se les gasta col trabayu de pies, colo que va doleme un montón pa sacar los pasos, dexándola pa prau y animando a Marie, que ye una máquina, a da-y caña.

Lo que nun sabía yera que diba fallar nel chapaxe anterior al pasu clave y con dos metros de cuerda na man, llevándonos un sustu de tres pares de coyones. Dempués d'entruga-y si taba bien y baxar les pulsaciones tiró p'alantre como una campeona y chapó pa metése nel xardín de plenu y tar un bon ratín pegándose col pasu.

Enmarronando a Marie nun 7a que tengo de proyeutu

Por muncho, que-y indicaba como yo lo facía, nun yerar a amañase na mió forma y xubió más menos como pudo pa salir hasta la siguiente chapa y a posteriori a la reunión. Pa cuando la descolgué hasta'l suelu, ya teníemos toos los nervios más tranquilos pero'l deu de Dani nun dexó d'apretar el botón de la cámara nel vuelu sacando esta increyible semeya en plenu vuelu.

Volareee.... Achtung!!!

Una vegada que tamos toos preparaos, presentaos y relaxaos, ponémonos a facer lo que teníemos pente les manes: la vía Roberto Madalena a la Aguya del mesmu nome. Ye una vía de 4 llargos anque l'últimu per terrenu más podre y de baxa cotación casi nun paga la pena facelu rapelando meyor de la tercer reunión.

Croquis de la Aguya Madalena

Entama Dani col primer llargu de V+ aprox, que ya ficiera yo va tiempu, hasta la primer reunión con cuerda de deportiva, ya que la vía ta equipada entera en deportiva y si somos dos pues nun tenemos qu'andar con dos cuerdes d'alpina como ye'l nuesu casu.

Nun tien na d'especial pero a Dani tovía atragántese-y tovía los temes de cabeza y ye que na escalada, el mayor músculu y el más entrenáu qu'hai que tener ye'l cerebru. Nun somos na, si nun vamos bien de cabeza pero al final aporta a reunión y danos pasu a xubir como tiros hasta ellí.

Cosíos a semeyes nel primer llargu de Dani

El segundu llargu cotáu de 6a, faígolo yo y entres pasos mal contaos ya toi colgáu de la reunión, ensin mayores problemes. Ye quiciás el llargu más cortu y la verdá ye que nun da pié a erros, la vía va por onde va, así qu'apretar en dos pasinos y a la saca.

El tercer llargu tóca-y a Marie, así que trabayu de cuerdes y tira p'alantre col llargu de más metros y nel que más hai que navegar pasando a un llau y otru d'un diedro, pero que resuélvese ensin mayores contratiempos.

Segundu y Tercer llargos llideraos por Berto y Marie

Llueu, tiramos Dani primeru y yo dempués que voi metiéndo-y priesa al home y por pocu, nun me mete una patada pa que vaya más sele jeje. Xuntámonos na última reunión, montamos el que creíamos primer rapel y según va baxando Dani ve que llega bien hasta'l suelu con dos cuerdes de 60 m, así que ye una bona opción pa facer la vía en menos de dos hores y baxar rapidín con un rapel bien plantáu.

Perguapa vía y disfrutona... contentos

Cola tarde atapeciendo y bastante fría, vamos recoyendo y de camín hacia Covarriella, onde tenemos los coches, flipamos coles semeyes que nos fizo Vero y les de Dani, cuando andábemos nes víes de deportiva.

Ensin tiempu nin pa una cerveza, despedímonos hasta la próxima, quedándonos con más ganes de facer víes de varios llargos y dir meyorando n'alpina... más info y les semeyes a mayor tamañu nel blogue del collaciu Dani Asturwaterman.

Marie disfrutando per Asturies

domingo, 25 de diciembre de 2016

La Peñona (Xixón)

18 d'Agostu, 4, 6 d'Ochobre de 2016

Cuando crees que la Peñona ya nun da va más, siempre sorpréndte esta pequeña escuela y el so mayor finxu, la propia Peñona, da pa sacar un par de víes más nun pañu roca, qu'agora sí, ya nun da pa más, ta completu.

Al mayor esponente de la escalada na Peñona, Abel, incansable equipador y aperturista de bloques, sumámos-y esta última temporada a Miguel Poch que descubrió esti llugarín y punxose a finiquitar los últimos requexos de roca que-y quedaben a la Peñona.

Que significó esto? Pues que dempués de dar por terminada esta escuela, encadenando toles víes, tuve que volver a probar les víes nueves, alcontrándome con dos nueves: Grillu Camochu y El Retacu que rondarán el 7a y una variante de salida direuta del Reto que pudiera sumá-y un plus a la vía aportando tamién al 7a.

Volviendo a apretar na Peñona


Ya sabéis que l'estilu equí ye mui bloquero, entos vos alcontraréis con preses minimes y unos apretones de cuidáu, colo que cualquier pasu en cualquier vía d'Asturies que pasare per preses d'este estilu andaría nestos graos, pero equí son 4 chapes namás.

En tres díes d'Ochobre, cuando les tardes van amatagando y la lluz escápase cola entrada la Seronda, tuve per ellí, probando les víes y sacándoles pali pali. Grichu Camochu ye una vía, con un pasu increyíblemente duru a una presa ínfima, solo apta p'auténticos fanáticos del ñapéu y nesos m'alcuentro, jaja.

Abel, colos sos dedarros nun yera nin a sentila jajaja. Coses de la escalada, pa unes coses bien y pa otres, andar más finu de deos da más xuego pa estes preses tan pequeñes. Polo demás, cayó nun par o tres de pegues, ya que si-y metes munchos más desmontes la pelleya.
Solucionando Grillu Camochu

Llueu la otra nueva el Retacu, ye menos guapa pa mín, más aleatoria y con más posibilidaes según estilos.  Pue llanzase de frente y a distintes preses, pero nun quita que seya guapina, pero non tanto como Grillu que tien los pasos totalmente obligaos y eso préstame muncho nes víes.

Tamién salió, en tres pegues, namás que saqué-y el métodu más curiosu pa min. Anque lo dicho tien varies alternatives a distintes preses con un llance de fe y agarrase a lo que se pueda y tirar p'arriba como un burrín.

Lo demás ya ye rizar el rizu, con que si nun pilles esa o la otra sal más duru. La peña ya nun da pa más y ta cosida a bolts pa sacar víes y movimientos, asina qu'a disfrutala pero pa mi idega qu'hai que dexar les coses como tan con estes víes y que la xente xuegue y aprete enforma.

Apretando nel Retacu

La sorpresa fué la salida direuta del Reto, que de ser 6c+ saliendo de frente pudiera metese nel 7a y que costóme más de lo camentáu, cayendo nel últimu movimiento lo menos en 3 pegues distintos, sale durina, mala de pies y hai qu'apretar como un chifláu.

Polo demás, la única nota negativa quiciás al enfotu por sacar movimientos y llinees nesti pedazu de roca, ye la estrallimpieza de preses p'algamar el Retón (7a+) que queda desvirtuáu de los sos movimientos iniciales y que tanto costó sacar, afinando los llances, pegándose a la paré d'unes ñapes insufribles y garrando la calidá suficiente pa llanzar y quedase d'una pinza malísima.

Fueron munchos pegues, sacando los movimientos y afinándolos pa cotala de 7a+ pero bien pudiera ser 7b, pa dir vela agora y comprobar qu'hai preses cepillaes hasta la fartura, que nunca lo fueron y ye que la roca na Peñona ye mui blandina y suel tar mui puerca jeje.

Hasta más ver... escuelina xixonesa

La Peñona (Sectores visitaos)
 
Croquis modificaos por mi de la escuela d'escalada de La Peñona, por mor del blogue Pura Escalada Asturias y Piratas Free. Gracies y col so permisu.


-------------------------------------------------------------------  

jueves, 22 de diciembre de 2016

Carbes (Amieva)

1 d'Ochobre de 2016

Hai díes nos que val más aceptar la situación y puntu. Llevántome un sábadu contentu, polo bien que lo pasé'l día anterior na espicha bloquera del Indorwall, pero cansadísimu ya que fueron hores blocando y blocando ensin parar y tamién tomando cerveza.

Al día siguiente, quedara col grupu d'escalada pa pasar otru gran finde y p'allá que nos vamos Kíla, Haritz y yo, pa llueu xuntanos con Zori y Richar en Cangues d'Onís onde durmieren el día anterior, col envís d'almorzar y ver si garramos un pelín de puxu pa pasar el día.

Richar y Haritz trepando en delles víes

Organizámonos, mercamos xinta pal día y tiramos pa Carbes n'Amieva onde teníemos ganes de facer otru día d'escalada dempués del bon tastu de l'anterior visita. Allá aportamos y vamos hasta'l segundu seutorín de Les Pedroses magar de ventilar toles víes n'Abril.

Zori y Richar per un llau y Haritz y yo pel otru, entamando como non pelo más cenciello, encadenando un par de quintucos pa calecer, dándome cuenta que la pelleya los deos ta na llende, ye más soi a ver como téngola a puntín d'abrise.

Semeya artística y un artista

Nun m'alcuerdo, si pente pitos y flautes fáisenos tarde y decidimos picar daqué pa trepar dempués con más ganes o si fuí a probar siquiera'l 6a+ de la mandrecha d'estos dos quintos, pero llueu de la xinta entróme tal baxona que nun fuí a facer muncho más.

Arrastréme como pude per tres quintucos más de tarde y casi durmíame asegurando. El mió cuerpu ya nun daba pa más y taba pidiendo un respiru, poro encadené un últimu 6a, pa qu'Haritz pudiera entrá-y con ganes y les cintes puestes y lu dexé.

Campu base tremendu na pista d'accesu al seutor

Al día siguiente tenía carrera en Sayambre y como non, superaba alégremente la media maratón y sólo pensaba que diba durmir nuna tienda campaña y que diba pasales más putes que Caín. Sin más, dexé de trepar, aseguré lo que pude a Haritz y nos fuimos a montar el tenderete nes altures d'Amieva pa poder cenar a la lluz del frontal.

Delles cerveces y sidra dempués, rendíme na tienda con Kíla, qu'apegóse a mí pa dar calorín y fuímos a descansar pente vaques cencerriando y caballos castrones averándose a la tienda. Al día siguiente en Sayambre y sorprendéntemente, entamaría un nuevu xeitu de correr nes carreres, yendo en seriu y tirando fuerte.

Despedida dando la chapa

Carbes (Seutores visitaos)
 
Croquis modificaos por mi de la escuela d'escalada de Carbes, por mor de Piratas Free y Entretenimiento Vertical. Gracies y col so permisu.


 ------------------------------------------------------------------------------

miércoles, 21 de diciembre de 2016

Marabiu (Teberga)

11 de Setiembre de 2016


Llevántome un domingu nel aparcaderu llibre d'Entragu y saco la tiesta pela puerte de la furgo d'Haritz y veo la mesma imaxen en caún de los personaxes qu'arrevolotien d'un llau a otru, empobinándose la mayoría hacia los baños: RESACA!!!

Eses cares y esos cuerpos ameyoren dempués d'una mexada y llavase un pelín, pa dempués garrar perres y dir tomar un café al primer chigre qu'alcuéntrase. La nueche fué llarga, pasaes les 5 y media la mañana, poro les intenciones de trepar al día siguiente son les xustes.

Soi de los primeros en llevantame, metiéndome un café con Orlando y collacios, colos qu'echo delles rises hasta que voi ver que fai la xente. Pa cuando vuelvo al aparcaderu, la xente va esperezándose y me doi una reválida almorzando con Pepa y Jose nun chigre de la Plaza.


Wifre y Marie trepando en delles víes

De la que tornamos, la xente ta mediánamente organizada y alcuéntrome con que tenemos una nueva collacia d'escalada: Marie. Esta neña, que ta faciendo Erasmus d'Inxenería Civil en Mieres, ta con ganes de trepar y somos los únicos anormales que van dir a la paré que semeyante estáu resacosu y col calor que dan pal día.

Pues allá vamos, decidiendo dir hasta Marabiu, faciendo les milenta envueltes hasta los puertos, menos mal que ye guapísimu esti llugar, porque marease yera la cuenta. Aportamos enfrente la ermita Santana y tirámonos hacia los Bloques, que ye l'únicu sitiu que conozo de Marabiu.

Somos un montón de xente, asína que vamos turnándonos más menos por graos p'atacar les víes y como ye vezu, dedícome a facer namái lo que nun tengo encadenáu, sacando un 6c y un 6b, entre otres na mandrecha del seutor.

Metíu nun 6a de fisura más perru que la hostia y Richar apretando

Sicasí, nun entamaremos mal, dempués metímonos a les víes de más a la manzorga, con un 6b+ qu'atragantóseme nun pasín, sacándolo al segundu pegue, demientres que Marie lluchólu y sacólu alantre amosando una calidá esguilando suprema.

Llueu siguió cola masterclass nun 6a de fisura durín, durín que tamién bregó finamente pa salir p'arriba como ta mandáu. Otra vía, que se fué al segundu pegue confirmó que taba entrándome una baxona perimportante.

Demientres, tocó xintar dalgo, ver a los demás esguilar nes distintes víes y acabé encadenando les víes fallides y otru quintín de regalu, pero ya nun daba pa muncho más y los dolores nel pié diben acrecentándose según pasaben les víes esguilaes.

Marie dexándonos col culu torcíu de como esguila

Con un calor brutal y con toles cantimplores seques, tocaba colar de Marabiu, dexando'l restu del seutor pa otru día y yéndonos con bien de ganes a echar una cervecina. Nesti casu, decidimos parar en Villanueva, que ya facía tiempu que nun pasábemos per ellí a da-y a la Cotoya.

Dende entós, Marie pasó a ser una collacia más y acompañónos en dellos díes trepando per Asturies.

Marabiu
Croquis modificaos de Marabiu por mor de  Piratas Free. Gracies y col so permisu.


jueves, 15 de diciembre de 2016

Aviaos (Valdepiélagu)

8 de Setiembre de 2016

Otru ablucante finde que nos xuntamos tola gandaya de furgoneteros ensin furgoneta de camping per Llion, apoltronándonos en Boñar el día d'Asturies. Manda coyones que colemos del país a la gueta de sol, roca y un enorme camping vacíu onde poder tar de comedia hasta les 5 la mañana ensin molestar a naide.

Pié de vía pa peques trepadores y pa paisanos resacosos

Así fué esti branu, a media oportunidá de colar per ehí, salimos corriendo así que dempués de trabayar el día anterior, salimos a fueu caún a la hora que puede pa tirar hasta Boñar, onde esa tarde-nueche pocu más fadremos que montar tiendes, mercar la cena y tar de tranquis pel camping con Kíla andando a la so puta bola ensin mayores problemes.

Víes de tolos graos pa tol mundiu

Al día siguiente, magar de desmontar tol chiringuitu, tiramos pa la escuela d'Avios, onde aparte d'asoleyar dúramente per momentos, pudimos trepar víes de munchos tipos, poniéndonos a tonu un V+ de placa col nome del Che que vaya tela.

Adherencia fedionda llionesa con graos infumables de V+ jaja

Ensin más fuímos turnando vía tres vía, ensin pegame con nada potente y ye que tábase demasiáu bien nesti cómodu pié de vía y el calor nun aidaba a metese a gastar fuercies de más. Que meyor que xubise la siella de camping y la ñevera con cervece y sidra hasta la escuela.

Pié de vía domingueru enforma... con siella y ñevera portátil

Pa lo demás... ya sabéis... Mastercard... pero siguen esistiendo coses que nun se paguen con dineru.

Aviaos (Seutores visitaos)

Croquis modificaos por mi de la escuela d'escalada de Aviaos sacaos de Escalada en León. Gracies y col so permisu.

lunes, 12 de diciembre de 2016

Valdenebro - Boos (Soria)

8, 10 y 11 d'Agostu de 2016

Un añu más colo pa Soria a pasar dellos díes, amestando fiestes, tranquilidá y cuando ya me pica too, busco trepar como sea. Esta vegada cola familia ocupada colos miós sobrinos tuve de buscame la vida y aparte de facer bloque nun llugar onde dalgún día espublizaré daqué, probé suerte falando cola xente del café El Refugio d'El Burgo d'Osma.

Por suerte, namái falar con Darío, convidame a pasame a delles hores pela escuela de Valdenebro y ya tuvi la oportunidá de pasar varios díes per ellí y trepar con Oscar, Alex... y más xente de la redolada y bonos conocedores de la escuela.

Ye de recibu falar del bon facer de Darío y compañía, que meten a la xente por esti deporte con "bautismos d'escalada" y la verdá ye que la escuela de Valdenebro-Boos da pa bautismos y pa fondiar colos graos.

Nel mió casu, esta vegada venía lo que se diz fundíu de les apretaes a finales de Xunetu, asína que tenía más interés por caltener un pelín de chispa que por facer daqué curiosu. Asína, qu'a parte de conocer bona xente, pude informame de graos de víes nueves y facer dalguna vía qu'otra, siempre ensín pasar del 6c más menos.

Espero tornar l'añu que vien con más xeitu y ganes pa poneme a apretar en seriu, anque faíseme raro'l tastiu de la roca y nunca soi a faceme a ella como pa meteme en graos altos. De toes formes, ehí queda una especie d'actualización de los croquis y dende equí un saludu tardíu a Oscar, Alex, Darío y demás xente que taba entamando nesto d'apretar na roca.

Valdenebro
Croquis modificaos por mi de la escuela d'escalada de Valdenebro, por mor del llibretu asoleyáu va pocu que podéis ver dalgo actualizáu en Soria Se Mueve. Gracies y col so permisu.

-----------------------------------------------------------------------------

sábado, 3 de diciembre de 2016

Valdegüesa (Boñar)

31 de Xunetu de 2016

Mal tiempu per Asturies y a puntu de colar de vacaciones pa Soria andábemos neses feches y como non, dalguien tuvo la brillante idega d'averanos hasta Llión a la gueta del sol, de calecer y de poder pasar el día trepando tranquilamente.

D'esti xeitu llevantámonos y tiramos pa Llión... vaya cares

Zori decidió qu'a Valdegüesa qu'había munches víes cencielles y p'allá nos fuimos y a primera vista ya te das cuenta qu'hai de too. Víes dures desplomaes, víes dures de placa, víes más llargues y bordillos que ye pa onde tiramos y más en concretu al seutor Pensamientos Impuros.

El paré ye pa cagase... Kíla piensa lo mesmu

Nun conocía la escuela y prestóme muncho, con un pié de vía cómodu y hasta podíase colar pa la solombra cuando nun se podía aguantar más. Como siempre, primer visitina y toca facer metros y metros, esguilando cuartos ensín matase nin media.

La escuela ye ablucante... y hasta tenemos un pelín de solombra

Aportamos Haritz, Kíla y yo los primeros y metémonos a trepar cola calma, pa llueu dir llegando dempués Zori y Richar que pónense a la par turnándonos les víes y poquín a pocu, cosiendo'l nuesu cachu de paré de cintes.

En esto llegó Diego, Pilar y Nel que nun mos viéramos cuantayá

Más tarde entá, apaeció per ellí, Diego, Pilar y Nel que facía munchos meses que nun mos veíemos y pillába-yos de pasu enantes de dir xintar cola familia, poro pasaron a saludar y de pasu facer unes viuques y que Nel xugara un pelín con Kíla y trepara otru ratín tamién... mui bien por ciertu.

Y pelín más tarde la familia Asturwaterman al completu cola cámara como non

Y como yera'l día de les sorpreses más tarde apaeció tamién Dani Asturwaterman cola familia, muyer, fiu y perru, jajaja... al completu total. Como ye vezu, sacó la cámara y les semeyes guapes que paez que faenmos meyores escaladores salieron de Nico, Vero o Dani... porque Jake pel momentu nun sabe d'ello... sinon tamién.

Trepando de lo más relaxáu del mundiu

Asina, entre rises, déxame esa vía, llimpia tu la otra y demás hestories, fueron pasando les hores y el sol fué a más, nun pudiendo aguantar más nes hores más centrales y despidiéndonos de la primer visita a Valdegüesa con unes 11 víes... eso sí... ensin pasar de V+... les coses seliquines.

Esfrutando d'un domingu cualquiera nun llugar cualquiera

Y como somos asína y nun damos puntada ensin filu, pues de les cerveces nel pueblu con Dani y familia pasamos a colar hasta l'húmedu en Llión... con dos tolanos bien puestos y hasta la nueche tuviemos a cañes y pinchos Kíla, Haritz, Zori, Richar y yo... menudu branu.

Camudando'l Camín per Llión

Valdegüesa (Seutores visitaos)

Croquis modificaos por mi de la escuela d'escalada de Peña Careses sacaos de la Páxina de Montaña Leonesa de Cristino Torío. Gracies y col so permisu.



----------------------------------------------------------