martes, 29 de noviembre de 2016

Vegarredonda (Cangues d'Onís) - Xerra Los Gurbiñales - Vega d'Enol (Cangues d'Onís)

25 de Setiembre de 2016

Track: Vegarredonda (Cangues d'Onís) - Xerra Los Gurbiñales - Vega d'Enol (Cangues d'Onís)


Ehí tamos, alboreciendo en Vegarredonda, nun cuartu día de patéu pel Cornión. Los planes? Pues, la nueche anterior fuéronse al traste con una bona xarazada que cayera demientres durmíemos, anque al llevantanos vemos que nun fuera pa tanto.

Falamos un ratu, pero fáltanos motivación pa metenos pa los altos. De nueche cenando, colos collacios franceses, demientres yéremos convidaos a un par de botelles de vinu pela compaña y la charra d'estos díes ya decidiéramos casi baxar.

Últimu día de monte dende Vegarredonda (1452 m)

Invádenos la mayor de les galbanes, así que decidimos poner fin a les nueses andances y eso que'l menú yera apetitósu: la Cabra Blanca. Les ñubes que cuerren apriesa pel cielu, tampoco echen un gabitu precísamente pa tener ganes d'aventures.

Coles mesmes, pagamos lo que se debe, despedímonos de Javier Malo y la so señora, pol bon tratu como siempre y tiramos p'abaxo, anque esta vegada envede xubir hacia'l colláu Gamonal, decidimos caleyar un pocu pel valle'l H.ungumia.

Descendemos pegaos al ríu H.ungumia conociendo les sos poces y pequeños saltos

Nun llevamos track, simplemente apeteznos pasiar un pocu, conocer esti ríu y la xerra Los Gurbiñales pa travesar hacia Pandecarme d'una manera distinta. Baxaremos con calma, agüeyando cada pequeña poza, rabión y pequeñu tabayón pel que cuerre l'agua, camentando lo bono d'un bañín en plenu branu.

El llugar ye guapu y el día pel momentu acompaña, asina que disfrutaremos pasando pel guapu mayáu H.ungumia y baxando pel ríu hasta que'l valle empózase un pelín, decidiendo cruciar a la mandrecha'l ríu, alcontrándonos con un tarrén pisáu y una especie de canalina que xube hacia la Xerra Los Gurbiñales.

Xubimos per un senderín primeru y llueu un canalizu hasta'l colláu del Potral

A dicir verdá, nun teníemos pensáu xubir tan rápidu pero metíose'l borrín y nun quinximos afondar muncho más nesti valle del H.ungumia del que sabemos que fórmase ún de los barrancos más xabaces d'Asturies, nun tarrén onde mui pocos son a movese.

Como dixi, xubieremos entos per un senderín mediu pisáu hasta que métese nun canalizu, pel que tenemos qu'usar les manes en dalgún pasín, hasta aportar al colláu del Potral (1400 m), dende onde tendríemos una baxada cenciella hacia la Rondiella.

Metémonos nun tarrén de cuchielles de caliza na xerra los Gurbiñales

Pero bono, ya que tamos equí, decidimos xubir al puntu más altu de la Xerra Los Gurbiñales  y neso metémonos crestiando pel tarrén más gafu qu'alcontré quiciás dende una visita nel Cuera Occidental va milenta años.

Un exemplu del tarrén pel que nos movimos fue que pa facer 500 tardamos más de media hora y nun paramos res, de trepar, destrepar, saltar como si fuéramos Super Mario, de cuchiella de caliza en caliza intentando nun frañar una pata nel intentu d'avanzar per esti crestéu de los Gurbiñales.

Aportamos a los Potrales más cerca del Altu Los Gurbiñales

Arribaremos, dempués de bregar un ratu, a Los Potrales, ampliu colláu onde aporta una valleya dende'l H.ungumia, a la cual teníemos echáu el güeyu como vía d'ascensu, quedándonos mirando pa ella. diciendo que nos mandaría salinos del valle tan ceo.

En fin, tamos baxo'l cumal, pero aún así tovía regalonos otru tramu de trepaes gafientes durante unos diez minutinos, que lloñe de facenos gracia, púnxonos de mala hostia casi, porque metiósenos dafechu la borrina y tocaba salir d'ellí por pates.

Altu Los Gurbiñales (1490 m)

Facemos la semeya de rigor y echamos un vistazu al bote que fai de buzón, alcontrando una tarxeta del Trasgu Andayón qu'anduviera per ellí en Xunu, lo diz la cantidá de xente que pasa per ellí. Un saludu a Rogelio y Alfonso si ye que lleen esti blogue, jeje. Si dalgún día alcuérdome llevaré-yos la tarxeta pel club.

Polo demás, el tiempu pasa, más aina de lo camentáu y a dicir verdá, ya decidiéramos va bona que tocaba despedíse con una farturina, asína que tiramos pela directa na baxada. Eso si, de primeres, albidramos una canaliza al norte del cumal que paeciónos afayaizu, pero lo que de primeres descendíase bien tornóse nun destrepe pelín espuestu.

Descensu pelín complexu hacia Les H.uentes

A metá de canaliza, el paré cortase y tuviemos que facer una travesía per unes llambries a la manzorga pa tornar de nuevu a la mandrecha pero una especie de sedu que diba dexanos na mayada Les H.uentes, onde dellos arbolinos y una cabaña dan abellugu a unes cuantes vaques.

Dicir que dende equí, intentamos baxar hacia la Vega la Piedra, restolando dalgun puntu feble como pudiera ser la que nos amuesen los collacios de los de las Claras col Seu del Cuevón, pero col borrín fondu que teníemos enriba yera imposible y más ensin un track.

Baxamos pela Cuenye Los Povos hacia la Rondiella

Asina, que de les H.uentes vamos garrar la Cuenye Los Povos pela que baxamos per un prestosu camín que diba llevanos más atrás de los deseyáu, pero qu'al fin col día que se punxera, dexávanos ensín problemes na Rondiella, onde ya nun díbemos tener namás que siguir un camín mil vegaes fechu.

D'esti xeitu, baxaremos la Canal de Canrasu lo más apriesa posible, pasando como siempre pela Vega La Piedra, siempre intentado alcontrar un resquiebra nos parés per onde descender otru o ascender a los Gurbiñales otru día.

Baxamos hacia la Vega d'Enol pasando per Pandecarme

De la Vega La Piedra, tiraremos camín abaxo hasta la Vega'l Güertu, pasando pel aparcamientu de la H.uente Verdayes, pa xubir a Pandecarme y dende ellí tirando pela pista relaxadamente hasta la Vega d'Enol onde taba esperándonos la furgo dende va 3 díes y picu.

En resume, llugares abegosos d'andar pela Xerra Los Gurbiñales, pero son tan parte del Cornión como los cumales más altos, teniendo un puxu y una hestoria ganadera que bien paga la pena conocer, ya que los accesos a estos mayaos pueden ser una aventura.

A los datos voi ya que pa facer 8,1 km y ascender 275 m de desnivel acumuláu y descender unos 650 m nos tiramos unes 4 hores y cuartu, lo cual nun ta na mal pa tan pocu percorríu, así que pa metese per estes xerres baxes de los Picos hai qu'andar con güeyu que non siempre ta'l peligru nos altores.

Ta la próxima...

Camudando'l Camín cola Peñesanta d'Asturies

2 comentarios:

  1. Eso, más trabajo que lo que aparenta y para rematar la borrina. No hay sitio fácil, y escapar no es de cobardes.

    Un abrazu

    ResponderEliminar
    Respuestas
    1. Taba esperándonos una farturina guapa en casa Niembro jeje. Y el día nun daba pa más.

      Eliminar