miércoles, 28 de septiembre de 2016

Recuerda (Soria) - Morales - Cabeza Rivilla

10 d'Agostu de 2016

Track: Recuerda (Soria) - Morales - Cabeza Rivilla


Últimu de mis paseos pela redolada de Recuerda en Soria, nel qu'esta vegada diba averame corriendo a un monte con vértice xeodésicu nomáu la Cabeza Rivilla. Como siempre tengo tiempu nos díes qu'ando per ellí y yo suelo madrugar, pues llevo preparadines cosuques pa dir conociendo los montes con vértice más averaos al pueblu.

Saldremos de Recuerda, provincia de Soria, en direición Este, per una pista agora asfaltada, qu'empobínase hacia las Bodegas de Recuerda. Este conxuntu de bodegues escavaes na tierra ye un bon atrautivu del pueblu, si se supiera xestionar, ya que la visita, cata y picar dalgún productu de la tierra sería una bona idega a llevar alantre.

Camín asfaltáu hacia les bodegues de Recuerda

Personalmente, siempre me prestó baxar al frescu de la bodega, el golor a vinu, son coses cuanto menos curioses. Dexaremos el cruce hacia les bodegues y siguiremos, agora sí, de frente per una pista de tierra con una pendiente continua y mui tendía pa poner les pates a vivir si vamos corriendo como yo.

Alcanzaremos la cota 970 m na fastera de Valdeley y entamaremos un descensu cómodu nel que podemos soltar pates y dexanos dir a bon ritmu hacia Morales. En menos de media horina, faigo los 5,4 km que separen Recuerda de Morales y empobínome a un tarrén más desconocíu ya qu'esti camín del Cid téngolo bien presente nos miós entrenos.

Camín del Cid que xune los pueblos de Recuerda y Morales

Una vegada que tamos en Morales nun garraremos el camín que sal nel crucie a la nuesa mandrecha o tornaríemos hacia la fastera sur de Detrás la Muela de Recuerda, poro xubiremos unos pocos metros hacia'l pueblu y saldremos a la mandrecha esta vegada pegaínos a la riega de Valdepozuelos.

El camín dirá bifurcándose garrando siempre'l ramal de la mandrecha, hasta topanos con una cuesta curiosina que pondrános a prueba la resistencia, topándonos nel nuesu camín colos corrales de la Covatilla.

Entamamos a garrar altor hacia los cerros siempre per bon camín

Dende ellí, entamaremos un ascensu pelín más pindiu hacia los altos, pasando pente dos pequeños "hocinos" que formen les riegues de Vegafría y Brias. Nesti tramu, diremos metíendonos a una fastera onde va dellos años un incendiu arrasó con muncha de la población de sabinas y enebros y na qu'entá podemos alcontrar ermu tol paisaxe.

Según percorro estes tierres alcuérdome de tar echando un gabitu na estinción de los incendios, pasando'l hidroavión penriba nueso, lluchando coles llames y alcuérdome tamién de les condiciones miserables de xente que xuégase la vida apagando incendios y otros que dedíquense a provocalos por intereses particulares.

Siguimos navegando pelos altos hacia la Cabeza Rivilla

Siguieremos ascendiendo pela Majada Honda, hasta la fastera de Montalva, onde si tenemos tiempu paga la pena baxar al sur hacia la foz de la ríu Brias, onde asítiase escondía la Sima de Brias, nun ye cenciella d'alcontrar, nos mapes sólo pon per onde ta, pero'l llugar esáutu ye difícil si nun yes bon conocedor d'esta fastera y quiciás seya meyor así. Yo tuve va dellos años y ye una cueva ablucante, asina que dalgún día volveré con calma.

En Montalva, camudamos de rumbu Sur a Oeste, dirixéndonos al puntu más altu, onde pente árboles y alcontrando dalguna mayada en ruines na so base, tenemos la Cabeza Rivilla, una cota pelín más alta que las demás y con vértices xeodésicu de 1145 m pero que malpenes destaca na redolada más que cualesquier otra llomba.

Puntu más altu de la Cabeza Rivilla (1145 m)

Güei, el día ta fresquín y non castiga'l calor poro, pesie a parar munchu tiempu, intentado igüar la cámara que fastidiáraseme, llevo unos tiempos decentes corriendo y decido apretar un pocu más na baxada.

Pa ello, tírome campu a través, pesie a lo pindio, hacia'l camín que xune Galapagares con Paones, pa desvíame al altor de la puente cola riega Vegafría a la mandrecha, ascendiendo per pindiu senderu, dexando la Peña del Buitre y la foz de Vegafría a la mandrecha tamién.

Averámonos per detrás de la Muela hacia Recuerda con bonos ritmos en baxada

Conozco esti camín de dir en bicicleta y tírome a bona zancada esfrutando de los falsos llaneos y descenso pronunciáu una vegada que cruciamos el barrancu de Valdeaguilera. Son d'esos díes que sólo fáltame llevar musiquina pa dir más gayoleru, pero préstame andar sollerte a los animales y dacuando salen al pasu, llebres, curcios y como non dalguna perdiz.

Casi sin dame cuenta, toi na espalda de la Muela, monte que munches vegaes xubí corriendo pa entrenar y pícame ascendelu, pero calculo que llevaré una media maratón ya y va ser abondo, poro sigo a bona carrera per pista, averándome adulces a Recuerda, siempre cola vista del Castillo de Gormaz de fondu.

En resume... un pocu más de conocimientu montañeru, senderista o traileru d'esta fastera soriana qu'espero dir descubriéndovos reportaxe tres reportaxe. Nesta mañana, salieron 21 km de percorríu en pocu menos de 3 hores, con un desnivel acumuláu d'unos 500 m positivos.

Camudando'l Camín per Recuerda

No hay comentarios:

Publicar un comentario