lunes, 19 de septiembre de 2016

Puerto de Santa Inés (Soria) - Castillo de Vinuesa

5 d'Agostu de 2016

Track: Puerto de Santa Inés (Soria) - Castillo de Vinuesa


Como tolos branos y semanes santes, intento facer una escapadina per Soria, al alcuentru de los dosmiles sorianos. Una vegada más tuve compaña, Miguel y Río, que seríen los agasayaos con una rutina pela xerra de Cebollera.

Entamaremos la ruta nel puertu de Santa Inés, onde asítiase una estación ivernal d'esquí, aportando a ésta dende'l pueblu de Vinuesa, enmediu de los estensos pinares madereros que dan-y calter a esta fastera soriana.

Más menos, el percorríu p'aportar al Puerto de Santa Inés, sedría dende'l Burgo de Osma, salir direición Soria pola N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero y Vinuesa, onde garraremos la SO-830 hasta'l propiu puertu de 1754 m.

Partimos del Puerto de Santa Inés (1756 m)

Preparámonos nel puertu, viendo que nin en plenu Agostu, nestes xerres dexa d'azotar el vientu, teniendo nel nuesu entamu de ruta, una sensación térmica perbaxa, con ñubes esnalando penriba nuesa que nun dexa que'l sol seya a calecer los nuesos cuerpos.

El camín ta claru, pista d'esquí p'arriba a la vera de los remontes, hasta metenos en plena viesca, que con bon senderu tol tiempu tien d'empobinanos a la pelada cumera del picu Buey de 2034 m, onde nun hai quien pare nin a sacar cuatru semeyes.

En media horina tamos nel cumal del Buey (2036 m)

Descenderemos del Buey, pa garrar tola cuerda hacia'l sur, pasando al llau de la seca Laguna de Buey y siguiendo per tarrén peláu hasta adientranos na viesca, onde alcontramos un pelín de tranquilidá pal col vientu fríu que tamos sofriendo.

La ruta nun tien pérda, siguiendo cordal alantre, hasta qu'estí afílase un pelín, hasta aportar a la base del Castillo de Vinuesa, onde aparte de ponese pelín pindio, toca dir restolando fitos pente los árboles, afrontando los últimos metros con dalgún sofitu coles manes pente les peñes hasta garrar l'arista final.

Empobinámonos al Castillo de Vinuesa adulces

Na realidá, el Castillo de Vinuesa, ye una arista plana con delles peñes que faen de cumal y a elles empobinámonos, topándonos con un preciosu bloque, que decidimos trepar per una fisura, terraciando dempués con un pocu de cayida hasta'l propiu cumal de 2083 m.


Entretenida trepada al Castillo de Vinuesa

D'otra miente, dicir que nun fai falta facer esta trepada, ya qu'apórtase caminando al buzón pel sur, pero viera semeyes del bloque y tiréme p'arriba siguiéndome Río y xubiendo pel otru llau Miguel qu'andaba mancáu magar d'una cayida en bici entrenando y tovía resentíase del costazu.

Cume nel Castillo de Vinuesa (2083 m)

Magar d'una ratín de peña en peña nel cumal, decidimos guetar un abellugu del vientu, pa picar dalgo ya intentar asoleyar, anque'l sol paez calecer de mentira dafechu. Llueu de tar recuperaos, siguimos hacia'l Sur un pelín pa salinos del cordal del Portillo de Pinochos y meténos un pocu nel de Cebollera hacia'l Este.

La idega ye descender hasta un marcáu colláu a 1915 m y garrar un pindiu descensu hacia los Hoyos de Iregua, pasando penriba de les riegues que formen el ríu Iregua. El sitiu ye bien guapu, con parés enllenos d'utres que cayen dende'l Castillo de Vinuesa y viesca en tola faldera, qu'amestáu a tar empozaos fai que per primer vegada hasta pasemos calor.

Descendemos hacia la xerra de Cebollera

Perpasaremos un par d'enormes vegues que de xuru en primavera sedrán a formar hasta llagunes y tenemos d'ascender con bona inclinación hasta'l refuxu de Cazadores, qu'alcuéntrase pieslláu enforma, como pa poder metése en casu de necesidá de vivaquéu.

Dende'l refuxu, ascenderemos per camín ampliu hasta tornar a la cuerda del cordal, percorriendo los mesmos pasos nel sen contrariu hacia'l Buey. Como nun vamos, mal d'hora, decido bordiar el Buey pel Este, col envís d'averame hacia'l colláu cola Peña Negra.

Más descensu hasta los Hoyos de Iregua y xubida hacia'l cordal de nuevu


Según vamos avanzando, el tarrén tórnase pelín abegosu, con pedreres, tarrén irregular y muncha broza, polo que-y comento de quedar nuna peña descansando, demientres voi d'una carrera hasta la Peña Negra.

Asína lo facemos y tiro ensín mochila corriendo y saltando de peña en peña, hasta meteme dafechu na cumera de la Peña Negra, la cual ye bien divertía, con peñes reondes peles que ye una gozada trepar y saltar d'una a otra hasta encumar los 2023 m.

Bordiamos el Buey empobinándonos hacia la Peña Negra (2023 m)

Dicir qu'a lo tuntu, esta Peña Negra, tien unes vistes curiosines de tol puertu Santa Inés y sobretou de tola vertiente rioxana d'esta cordalera Ibérica. Faise tarde y salgo a escape hacia la posta onde taben los collacios y casi nun soi a alcontralos pente la viesca y dos o tres lleres asemeyaos... dos voces y arregláu.

Xuntos entamaremos un descensu pel valle, pente'l Buey y la Peña Negra, siempre a la manzorga de la riega qu'entrega les sos agües al regueru del Puerto. El descensu, será albentestate, siguiendo lo meyor caleyable y más menos de claro en claro llibrando monte baxo molesto, hasta metenos na viesca baxa más llimpia.

Descensu pelín xabaz pel valle hasta la pista maderera que xube al puerto

Saldremos a la fín, con más esfuerzu del esperáu a una pista, que nun sele ascender tien de dexanos nel Puerto de Santa Inés, magar de 4 hores y 45 min de ruta, 15.2 km de camín y un desnivel acumuláu de 865 m, lo que fué más que suficiente pa una mañanera y pa facer bien de fame pa la xinta que nos esperaba en Recuerda.

En próximes visites... siguiremos conociendo montes sorianos...

Camudando'l Camín en cualesquier llugar... Soria esta vegada

2 comentarios:

  1. Por ahí pasamos en nuestra ruta transiberika, pero a pesar de ser otoño hacia bastante mejor tiempo.
    Y la trepada al Castillo de Vinuesa entre los bloques.
    Un poco de todo.
    Un abrazu.

    ResponderEliminar
  2. Pues prestóme... paecióme un monte curiosu... pero tar n'agostu y tirar esi vientu fríu... manda güevos. Estes xerres Urbión, Cebollera, La Demanda... que fríu se pasa.

    Un abrazu

    ResponderEliminar