miércoles, 8 de febrero de 2017

Monsacru - Otura (Morcín)

21 d'Ochobre y 9 d'Avientu de 2016

Pues unos meses dempués tornamos hasta Otura en dos ocasiones realmente especiales, siendo la primera facer la vía de cuatru llargos Sin Perdón. Pa ello, xuntámonos Alberto, Marie y yo, nuna tarde de tiempu agradable, pero de lluz escasa.

D'esta manera, metímonos a trepar, magar de salir del trabayu, aportando al pié de vía y poniéndonos al llabor lo más apriesa posible. Preparamos trastos y salgo al primer llargu, esperando que'l dolor de pié nun fuera pa muncho.


Faigo'l primer llargu nun tris y sal Marie al ataque nel más duru (6a+) y como ta más fuerte que'l vinagre nun tien mayores problemes, saliendo dempués Alberto y yo, dándome cuenta que ye un llargazu guapísimu con metros y muncha calidá, poro, quiero repetir esta vía de xuru.

Llueu salgo al tercer llargu, de V+, mui curiosín, más navegable que'l primeru y al caberu llargu métese Marie, tamién mui entreteníu, pa montar el rapel y tirar p'abaxo col atapecer amenazando. Otru rapel más, na segunda reunión y hasta'l suelu, pa descender a pata per un camín que nun ye mui evidente pero faise mediánamente bien hasta'l seutor de Mar Antiguo.

Silvia volviendo a trepar con mui bones sensaciones

Y per últimu, el segundu día que torné en 2016 per ellí, fué pa reecontrame con Silvia, la primer pareya de cordada cola qu'entamamos nesto de trepar, dempués d'un cursín de la Fempa allá pel 2009 lo menos.

Llevábemos ensín venos tres años y casi los mesmos ensin trepar ella, pero nun perdió res y merendóse tolos quintos de Capitán Garfio como si nun lo dexara enxamás. Prestó trepar de nuevu xuntos, relaxáu pela mió parte, al sol y cola calma, anque ella tuviera qu'apretar un pelín más.

A siguir esguilando...

Monsacru - Otura (Seutores visitaos)

Croquis modificaos por mi de la escuela d'escalada d'Otura, por mor de Piratas Free y el grupu del facebook d'Escuela d'Escalada del Monsacru. Gracies y col so permisu.


---------------------------------------------------------------   


30 d'Abril, 20 de Mayu, 28 de Xunu, 13, 14, 25 de Xunetu y 30, 31 d'Agostu de 2016

Esti añu Otura tuvo más presencia nel propiu branu y eso que fué de los calurosos sobretou de Xunetu n'adelantre, pero bono como ye una escuela mítica y ta la xente con munches ganes fuimos dellos díes a trepar aprovechando díes pelín menos soleyeros.

Aprovechando pa facer dalguna vía de varios llargos

Los primeros díes aprovechando que yeremos varios, demientres Zori y Richar, que tan entamando nesto a bon ritmu, dáben-y a les plaques de Capitan Garfio, Haritz y yo anduvimos faciendo dalguna dalgún llargu o visitando un seutor pelín escaecíu como Afuega'l Pitu nel que tien d'andar engoláu nel aéreu pie de vía.

Nesos díes prauticamos un pelín los varios llargos y con Alberto fice al fín, Querido Alcalde (6a) y la so compañera dalgo más durina (anque la marquen de 6a) que seríen un clásicu total si saliesen dende'l pie de vía... perbones.

Zori en Mar Antiguo nun día mui provechosu

N'Afuega'l Pitu aparte d'enchufar a vista toles víes pembaxo'l 6a mui prestoses toes, destacando los dos 6a, Matias Conery y sobretou Jackeline Destivelle, que ye fina, fina. Tamién cayó el Principe Valiente, que debió salir a vista, pero llancéme con demasiada confianza y pringué nun primer pegue.

Nel Callejón d'Otura... penriba de Nuberu

Otru de los díes apaecimos pel Callejón, seutor nuevu, equipáu penriba de Il Cavalieri y Nuberu, enriba la canal y de los pocos llugares onde tenemos solombra n'Otura. Ficimos un par de 6a+ perbonos, llargos y perbon equipaos y tamién sacamos un 6b bastante gochu, Tryston, que quitónos les ganes de da-y más al so collaciu Leoncio, con entrada más gocha si cabe.

Por cambiar de terciu, alcordeme de les víes de la parte superior del Monsacru, entrando dende Viapará y fuimos Richar y yo, nun primer día hasta les víes de la Aguya Madalena, baxo'l cumal del picu Monsacru.

Visitando la parte alta del Monsacru


Ellí anduvimos apretando un pocu, faciendo Richar el V+ y 6a a vista, con meyores sensaciones nel Lobo Sigilos y llueu metí-y un peque a vista al Guía del Meicín, la cual salió apretando con un pasu cabrón, pero quedéme na última chapa mirando pa onde coño tirar al nun ver continuidá a la vía.

Cosa rara, qu'una vía bien equipada, quédese asina, ensin saber pa onde tirar, la última chapa con un maillón dizlo too. Les opciones pa descolgase xugándosela un pelín, ye facer una travesía ascendente a la última chapa del 7a (Rayos y Truenos), pero saber qu'anque nun seya complexu, nun permite fallu pol vuelu llateral y llarguísimu.

Richar nel 6a, el Lobo Sigiloso

La otra protagonista como non fue Rayos y Truenos y nun fue d'un día sólu, sinon que nun pude sacar un pasu y dexé un par de cintuques, que tuvi que recuperar al día siguiente. La verdá que con mayor motivación y más finu saqué tolos pasos hasta la cadena... y meti-y otru pegue con envís d'encadene pero nun pudo ser.

Nel seutor Alimoches... con víes mui prestoses y un paré guapísimu

Dexele pa otra visitina esprés y baxamos al seutor Alimoche onde Richar fizo los dos quintos del espolón, mui prestosos y llueu dímonos cero col Maldito Duende, ún de los 6a+ más cabrones que fice nunca... nun hai manera de garrar postura pa salir del techu jeje.

La próxima visitina... más y meyor... que siempre hai que dexar dalgo pa otru día.

--------------------------------------------------------------- 

18 de Setiembre, 9, 16 y 18 d'Ochobre de 2015


Aportó la seronda y nun hai llugar como la faldera'l Monsacru pa tar esguilando nos sos parés. Nesti casu averarémonos hasta los seutores d'Otura y más en concretu a la canal de Nuberu y Capitán Garfio onde demientres dalgunos trepen, suelo escapame a probar cosines más dures.

Foron bonos díes, nos qu'enchufé a la fín, con mayor facilidá de la esperada, dempués de milenta pegues en munchos díes, Brutalidad Policial. Dicen dalgunos que si sales per nun se onde sal de 6b+ o si mides dos metros.

Pero pa min, salir pel desplome con una pinza mínima de dreches y una ñapa inesistente casi de manzorga, paezme mui merecedora d'un 7a bien curiosu. El casu ye que nesti día, too salió perfeutu, sentíame fuerte y fuí a moveme perfeutu pa salir del desplome.

Encadenando Brutalidad Policial (7a)... a la fín

Hai víes qu'atragántense pero al final gárres-yos cariñu y too. Pasóme con esta, anque otra cosa ye que vuelva a probala dalgun día jeje. Anda que nun hai víes pa siguir avanzando... por exemplu tol seutor de Nuberu.

Esti seutor, ta reciéntemente reequipáu y aparte equipáronse nueves víes, tan bones como les vieyes y que son una auténtica maraviya, con llargos percorríos de placa nos 30 m aprosimáu. D'éstes, cayeron nun bon día un par de 6b's (Nuberu y Banilla Vainilla) y quedóme nel tinteru Amalia vete a currar a Somalia... un 6b+ mui cachondu con unes primeres 4 chapes tremendes.

Pa otru día...
 
---------------------------------------------------------------  



29 de Xunu de 2015

Casi un añu ensin volver a Otura... la razón pues tampoco ye que la sepa... en branu fai calor y n'iviernu tampoco ye qu'esguilase muncho, asina que'l tiempu pasa y los proyeutos escaécense. Non sólo por mí, sinon por muncha xente ya que Brutalidá Policial, esi 7a como un campanu yendo pol sitiu, taba col pie de vía imposible d'ortigues.

De toes formes, la intención yera trepar con Pau, Haritz y Pangua y César que tamién ficieron actu de presencia dende cuantayá sin esguilar. De xuru, que llevaben sin poner un arnés más d'un añu, ya que dende'l branu pasáu nel que teníen intenciones de xubir al Picu con un guía nun volvieren con nós a prauticar la escalada.

Encadene del 6c a vista... Sweet Jane

El casu ye que con un calor infernal, xuntámonos toos en Capitán Garfio, pa facer quintos a mamplén, sorprendiéndome muncho Pangua que fízose con 3 o 4 víes de V+ con cierta facilidá y muncha seguridá yendo de primeru.

Como siempre, cuando baxó'l calor fice una escapadina pa trepar dalgo nuevo y pa ello, o faigo varios llargos nesti seutor o avérome más hacia Nuberu. Ellí, la vía xemela de Brutalidá Policial, nómase Sweet Jane y sí una xube pela mandrecha de la covacha, la otra xube pela manzorga con un percorríu más continuu que la collacia... que ye cenciella hasta un pasu perduru de bloque.

Pangua y César tornando a trepar por un día

Más que na, quise probala por conocer otra vía y nun llevaba intenciones d'un pegue a muerte col envís de sacar mi segundu 6c a vista. Asína que sin más, falando tranquilu con Pau, fuí aportando de chapa en chapa hasta que tuvi qu'apretar más de la cuenta.

Viendo qu'algamara'l pasu que yo camentaba duru, relaxeme, respiré y seguí p'arriba con enfotu, encadenando otru 6c a vista que costóme muncho menos de lo esperao. Como siempre, colos graos pocu hai que dicir, simplemente trepar y dalo too... si esta vía ye 6c... nun pue ser Brutalidá Policial 6c tamién... pa mí ye un bon 7a, si vamos de frente ensín llibrar a la mandrecha.
. 
---------------------------------------------------------------  

14 de Payares de 2014

Fae abondo que nun apaecemos per Otura y tuvo que ser un avisu de Vicen que diba averase per ellí, lo que motivó qu'Alberto y yo fuésemos hasta'l seutor de Capitán Garfio. La verdá ye que teníemos intenciones de visitar la Manza y aportando más tarde de les 4 pocu tiempu teníemos pa esguilar daqué ya que la lluz ye mui escasa nesta dómina del añu.

Al menos Alberto pudo conocer la escuela y esti seutor en cuestión, faciendo los dos primeros llargos de la mítica Enigma y yo tuvo pegándome polo menos en 4 pegues con Brutalidá policial, la cual cuanto más la intento y per onde yo pretendo sacar el techu tengo claru que ye un bon 7a.

A ver cuando soi a tornar per ellí... y algamo l'encadene tan naguao. Nesti día, al menos faláremos un bon ratu con Vicen, Conchi y Celso que va tiempu que nun veíemos al tar Vicen enfrascáu n'estudiar pa una oposición.

--------------------------------------------------------------- 

9 d'Abril de 2014


Aporta la primavera y tiramos pa llugares onde'l solín caleza, pesie a les baxes temperatures mañaneres. Como non, dir a la faldera'l Monsacru siempre ye ésitu garantizáu, o casi siempre, ya que nesti día, xubiéramos dende'l pueblu d'Otura al seutor cola borrina penriba la tiesta.

Nun día tan mitolóxicu no qu'al tiempu refierse, vamos dir a Nuberu, el cuál xunto col nuesu Xuan de la Borrina, nun va querer quitanos la ñeblina d'enriba, hasta bien pasada la mañana. Aún así, nun quisimos perder el tiempu y entamamos a calecer deos con Festival de Cantos (6a+).

Una pa calecer deos (6a+) y la otra p'apretar un pocu (6b)
Ya la conocíemos de l'anterior visita sin croquis y paeciéranos afayaiza pal calentamientu. Fué raru esguilar ensin ver a tramos el siguiente seguru, pero prestónos aportando hasta la cadena ensín mayores problemes.

La siguiente na que nos metimos fue Heavy Metal, que quedáranos nel tinteru n'anterior visita. Los collacios que taban aquel día dixeran que yera de 6b y nos croquis reciéntemente espublizaos, asína la coten tamién.

Vicen nel descansu de Heavy Metal

Pa nós, quiciás por un pasu en bavaresa, pelín llargu paeciónos más dura que 6b. Ye más, al otru llau del espolón pel que xubimos, hai otra vía, que ficiéramos a vista y cótenla de 6b+. Ya sabemos como va lo de los graos... caún ye caún y K2 una piragüa.

El resultáu... pues primer pegue míu, ensín encadene, dexando una cinta llarga nel pasu clave. Aún así, Vicen nun s'atreve y nun la mete nel bolsiellu. Al segundu pegue míu, ya sí que faigola apretando abondo nesi pasu tan llargu pa mió estatura.

Semeya a les dos víes que ficimos más: 6a+ y 6a+/b

Col solín xubiendo la temperatura, desdexamos delles víes dalgo moyaes y baxamos un pelín más per Nuberu, hacia Sonika, un 6a+ míticu que sigue en dos llargos más bien guapos paez ser. Nós, vamos facer el más difícil (6a+) encadenándolu a vista, ensín mayores problemes qu'esfrutar muncho de la vía.

Llueu, pa finar la tarde metímonos en Ojos de Brujo, un 6a+/b, que nos nuesos croquis, nun m'alcuerdo nin lo que ponía. Aún así, si nun toi equivocáu, Vicen nun fué a sacala y yo encadenela a vista.

L'Aramo escosu de ñeve na primavera

En resume, otru guapu día d'esguilada un pocu a lo llocu cola ñebla y sin croquis actualizaos, poro restolar que vía queremos facer y que seya la qu'albidramos nos croquis ye dalgo difícil d'asegurar, ante tanto reequipamientu.

A día de güei, espublizáronse unos croquis xeniales, coles nueves víes y seutores en Nuberu, La Canal y otru seutor pa pros, nomáu la Repisa. Pal nuesu nivel, encomendamos dir a Nuberu y la Canal, onde hai víes perguapes, llargues y de graos mediánamente plausibles.
---------------------------------------------------------------

13 de Xineru de 2014

Ún d'esos díes de bon tiempu de Xineru, tornamos al Monsacru, pa xubir hasta'l nuevu seutor d'Otura nomáu la Canal. El llugar como faláremos va tiempu ye preciosu y a pesar del solín, nótense los díes fríos de Xineru, y nun ta p'andar pocu abrigáu precísamente.

Magar de la sudada de rigor hasta'l paré, pusímonos a restolar pente los croquis, cuales yeren les víes más cencielles que mos quedaben por encadenar, y contando con un 6a d'entamu llevamos el chascu de comprobar que nun esistía tala vía. 


Caleciendo nun 6a+ nomáu Métrica 12

Así que tocó metese a güevu nun 6a+, yendo primeru Vicen y llueu yo. Vicen nun fue a algamala, y yo si que la saqué a vista sinon toi equivocáu. Ye una vía llarga como ye davezu nesti seutor y pelín rara faciendo trayeutu al traviés d'un espolonín pidiendo movese a un llau y a otru según el cursu de la vía.

Vicen nun quiso da-y otru pegue a Métrica 12 pal encadene, ya que nun-y prestó l'ambiente que tenía nos pasos d'un llau a otru y dexóla pa otru día con más confianza. Poro, metímonos na siguiente vía, que según la pintada na caliza, nomábase Mi Rondel, o dalgo pol estilu.

Vicen encadenando'l 6b col nome de Hirondelle

Ensín más, paezme qu'entamé yo, aportando hasta la cadena, dempués de dalgún pille qu'otru. Ye una via llarga con un tramu d'aniciu tumbáu y llueu ponse la cosa tiesa, al travíes d'un canalizu con agarres de pinza grandes los cuales pétenme y muncho.

Tanto, que nos tres intentos que-y dí, nun fuí a encadenala, por mor d'un chapaxe espuestu. Pa quedar empataos, Vicen sí que fué a encadenala al segundu pegue, quedándome yo col tastiu amargu de nun ser a facela nel día de güei... pa otru quedará.

Como siempre... d'esti seutor nun pongo croquis, porque nun tan espublizaos n'interné per naide. 

--------------------------------------------------------------- 

7 de Xineru de 2014

Un día más, col añu recién entamáu, tocaba dir a trepar y pasar la mañana al sol, n'Otura, na escuela d'esguilada del Monsacru.Sigo ensín una motivación fonda, así que préstame dir a los seutores a pasar la mañana sin mayores esixencies que tar al aire llibre y nun quedar en casa muertu d'ascu.


Nello tuviemos, Vicen, Celso, Kíla y yo, acompañaos esta vegada por Fabiu y el so fíu Xune. La verdá que fue un día tranquilu abondo, anque por suerte, dióme por probar una nueva vía, reciéntemente equipada a la manzorga d'Enigma.

Fabiu esguilando nos V's de Capitán Garfio

Anda nel mesmu xeitu que'l primer llargu d'Enigma, pero con menos canalizos sacante del final, perguapa y mui d'encomendar pa xente aniciándose, ya que rondará'l IV+, al menos nós asina dexámoslo, comparando con Enigma.

El casu ye que va tiempu, que ta trabayando xente, nun desplome enorme a la manzorga de Capitán Garfio. Tienen que salir graos bien duros, y esta nueva vía, sirve d'accesu a él, poro nun vos asustar por ver cuerdes afitaes, ya que la vía, ta perbien equipada y con una reunión nueva, anque nun se vea dende baxo.

Celso nun guapu IV+ recientemente equipáu al llau d'Enigma

Tamién daría accesu, esta nueva, a otra vía de dos llargos de 6c y 6b, qu'antes sólo podíase llegar pel cable dende la segunda reunión d'Enigma. Pero como nun teníemos ganes de metenos en varios llargos quedará pa otru día.

Asína que, Vicen, mientres Fabiu quedaba con Xune y Celso xintando, tiróse a pol 6a+ de Nuberu que te pegáu a la cueva, algamándolo al fín y yo metí-y un pegue a Brutalidad Policial, que sigue sin salir pol pasu llargu pa mi estatura, pero como siempre aporto a la cadena, nun m'importa intentala siempre que voi, ensín dexar material.

Vicen encadenando a la fín el 6a+ de Nuberu

Polo demás, otru día tranquilín, a la espera de tornar a sentime en bona forma p'apretar ya intentar si se puede, xubir un escalón más nesto de la esguilada deportiva.

---------------------------------------------------------------

27 d'Avientu de 2013

Otru gran día de sol, enantes del fín d'añu, poro aprovechamos pa dar una vueltina hasta'l Monsacru, al perconocíu seutor de Capitán Garfio, n'Otura. Apocayá, nun llevo grandes sensaciones p'apretar de más, asína que l'envís ye facer dalguna vía, tomar el solín y pasar la mañana.
 
Pau y Celso faciendo al empar una vía

Taremos un bon ratu nes víes de placa, esguilando Vicen, Pau, Celso y yo, pa cuando llega la hora de xintar, Pau, quédase con Celso y Vicen y yo, colamos a la cueva, onde quiero al menos da-y un pegue a Brutalidad Policial (6c/7a) y Vicen va a pol 6a+ que quedára-y nel tinteru'l día anterior.

Yo asegurando a Vicen baxo l'atenta mirada de Kíla

Al final, un pegue caún y el mesmu resultáu: res. Vicen falló práuticamente nel mesmu llugar, y sacó sobráu'l restu la vía y a mí, el pasu del techu, sigue quedándome perlloñe. Paezme increyible, qu'haya xente que seya a cotala de 6b+, cuando yo personalmente, nin m'avero mínimamente a los bonos agarres.

En fín, a siguir trabayándola...

--------------------------------------------------------------- 

4 d'Avientu de 2013

Otru miércoles al sol del paru, y dempués d'una ñevada bien curiosa, tocaba dir a esguilar a la fastera d'Otura de la escuela d'escalada del Monsacru. Alborecemos con un día perfríu, pero confiamos que'l paré sur del seutor Nuberu, seya l'allugamientu perfeutu pa pasar una mañana de luxu.

P'allá que vamos como siempre Vicen, Kíla y yo, y según vamos xubiendo a esti seutor, vemos que'l solín calez y que nun vamos pasar el fríu que pasamos na visita a los seutores d'Alimoche y Madalena, va una selmanina.

Kíla col Aramo ñeváu tres d'ella

Ye más, Nuberu al tar metíu nuna canal, t'abondo protexíu y nin siquiera'l vientu fai baxar les temperatures. Nunca nun esguiláremos equí, y andamos mirando varios croquis pa identificar les víes, por mor del nuesu xeitu conservador nes primeres visites.
Nun somos a pescanciar bien les víes, ya qu'hai nueves que nun apaecen nos croquis y enriba les que si tenemos tan equipaes con chapes ferruñoses y paez que nun mos dan muncho ánimu a faceles, poro a la escontra de lo que nunca facemos, metémonos nes nueves ensín saber grau dengún.

Vicen nel 6a+ de calecíu muscular

A lo xole, entamamos pola manzorga'l seutor, ye Vicen el primeru en metése y por suerte, facemos un viote llarguísimu, que cotamos como 6a más menos. Llueu aportaríen un par d'escaladores más y dícenmos que nos croquis que tienen, pelín probes nel móvil, pon de 6a+... vamos dexalo así.

D'esti vía, polo visto, salen otres dos, un 6b y un 6b+, anque nun toi seguru del too, si esi yera l'orde d'esquierda a drecha. Nós, llevamos cuerdes de 70 ms, y nun mos atrevemos a siguir, quiciás otru día taría bien intentales.

El siguiente en pringar nel primer pegue fuí yo... y como entá nun llegaran los que teníen croquis, metíme nun marroneti de los que faen hestoria. Aún así, unes cuantes pillaes y fuí a sacar tolos pasos, hasta la cadena.

Yo caleciendo tamién nel 6a+

Xustu de la que toi baxando apaecen, entrugámos-yos y dicen que 6c+... mui rico, si llego a sacala a vista, sería lo más difícil que ficiera. La vía al igual que l'anterior ye preciosa, rondando los 30 ms y de placa y adherencia brutales.

Vicen que nun quier frayase muncho, ya intentala en toprope, con dalguna pillada qu'otra y p'abaxo a pola siguiente. Ya sabemos que tien un grau de 6b y viendo que'l 6a+ primeru, paeciónos más baxo, tiramos a por ella con xeitu, y sacámosla ensín problemes a vista los dos... otru viote perguapu.

Ambes víes, teníen otru llargu de continuu, que rondaben 7a y 7a+ respeutivamente. Tuviemos el privilexiu, de ver a ún de los escaladores sacar a vista enllazando los llargos de 6b y 7a+, demientres recoyíemos pa colar... ablucante.

Vicen nel 6a+ apretón, nomáu Pica Pica

Pero enantes de marchar, coles fuercies un pelín xustes ya, dímos-y a una vía que si teníemos nos croquis, al llau de la nuesa querida cueva pente Nuberu y Capitán Garfio. El croquis ponía de 6a+, y tenía dellos pasos en travesía, hasta metese nun desplome con salida pelín llarga.

Llueu dellos apretones más, pa salir de dalguna barriga y salió a vista por mi parte, quedándo-y pa otra a Vicen, que se-y atragantó la salida del primer desplomín, anque al siguiente aprete ya salió ensín problemes.

Bon día d'escalada con 3 víes a vista de 6a+ a 6b, y un pegue mui prestosu a 6c+, al que quiciás echándo-y un pelín de güevos, pudiera sacase a vista... pa otru día, de xuru que cae.

---------------------------------------------------------------

27 de Payares de 2013

Día perfríu'l qu'escoyimos pa dir conocer otra parte de la Escuela d'Escalada del Monsacru. Lo más normal ye dir a la fastera del pueblín d'Otura, pero tamién más riba d'esti pueblu, en direición al Aramo y xusto embaxo les cotes más altes del Monsacru hai seutores equipaos.

Cumales del Monsacru
Lo más normal nesta fastera ye dir facer l'aguya madalena, onde hai una vía de 3 o 4 llargos, equipada en deportiva y que cómo nun vamos namái que Vicen y yo, nun-y vamos dar nel día de güei pa nun dexar a Kíla munchu tiempu solina.

Averámonos primeru al seutor de l'aguya Madalena

Sicasí, vamos dir d'igual mena hasta ellí, al alcontrase nel mesmu paré dalguna vía de deportiva d'un llargu solu. Magar de xubir per Riosa hasta l'área recriativa de Viapará, siguimos por una pista hasta'l colláu de Covariella, onde dexamos el coche y averámonos per un camín hasta l'aguya Madalena. 

Vicen preparáu p'asegurar y esguilando en Como eres tan guapa (V+)

Según lo qu'albidraba'l tiempu, tendría de pegar el solín y aguantase bien de fríu, pero hai ñubes que vienen y van, faciendo perdifícil esguilar a gustu cuando esnalen delantre'l sol. Con sensaciones mui males, fuimos a facer a vista Como eres tan guapa (V+) y Lobo Sigiloso (6a), y nun ye que fueren difíciles, nun lo tenemos nin claru, ye que nun sentíemos los agarres y así malamente.

Kíla a lo suyu

El casu ye qu'encadenamos les dos y fuimos a mirar que tal yera'l primer llargu de la Roberto Madalena, paecíendonos cenciella y quedándonos munches ganes de facer la ruta entera pa otru día. La verdá ye que nun tamos de trepar con tantu fríu, y nun había manera d'entrar en calor nin el cuerpu nin les manes.

Vicen en Lobo Sigiloso (6a) y nel primer llargu de Roberto Madalena (V+)

Cuando dexamos el coche nel colláu, marcaba 2 graos y nun creyemos que xubiera muncho la temperatura. Coles mesmes y asoleyando un pelín más, colamos hasta'l seutor Alimoches, más averáu al coche, siendo la cuenta pa escapar aína cuando fáigasenos tarde.

Damos un pasín hasta'l seutor Alimoches

Metémonos a trepar, tirando nesti seutor un airín que déxate tiesu, y facemos los dos V's de la manzorga: El vuelo del Condor y la Choza de Oscar. Comparten reunión y resulten más menos, igual d'entreteníos, dándo-y un pelín de gracia esi patiu que tien a la manzorga.

Conociendo'l seutor Alimoches con La choza de Oscar (V) y Vera (V+)

Pa despedínos, ficimos otru V+, Vera, qu'aparte de muncho más guapu que les otres dos, dexónos con ganes de prebar la so vía collacia, Maldito Duende de 6a+. Poro, habrá que tornar per equí, otru día, con menos fríu, ya que'l sitiu ye guapu pa pasar una bona mañana ya inclusu un día d'escalada.

Güei, metimos nel bolsiellu, 6 víes pente'l V y el 6a, qu'ensín sentir los deos, paeciéronmos muncho más difíciles de lo que serán na rialidá.

---------------------------------------------------------------

11 de Payares de 2013


Coles pates cansaes inda, de la ruta del día anterior en Casu, quedo con Vicen col envís de conocer un nuevu seutor na escuela d'Escalada del Monsacru. Defechu, esti nuevu paré t'allugáu en plena canal a la mandrecha de los seutores más míticos enriba del pueblu d'Otura.

El llugar ye guapísimu, anque l'ascensu ya seya dende Capitán Garfio, o dende'l camín que va pal repetidor, ye duru, duru asemeyándose a una canal de Picos, lo cual da-y un toque increyible esguilar nesti requexu del Monsacru.


Xubiendo a la canal d'Otura...

Eso sí, aconseyo llevar ropa pa mudase, ya que la sudada xubiendo a ritmu, ye asegurada. Que nun vos pase como a mí, que nun lleve nada y tuve que dexar secando la ropa y quieras o non, en Payares, si nun da'l solín tol raru, pásase fríu.

No deportivu, dicir que los croquis aportáronmelos en mou "top secret", mil gracies Ricardo, jeje. Poro, nun voi espublizar na al respeutive, namái comentaré les víes que ficimos y cuando los equipadores cuélguen-yos en dalguna páxina, pondré los míos modificaos como siempre.

Un V y otru V+ pa dir caleciendo

Como non, siguimos col nuesu métodu, d'aniciar en cualesquier escuela de nueva visita, poles víes más cencielles. Pel momentu, nos añinos que llevo esguilando, va resultándome y préstame les primeres visites pola vida, ensín apretar a lo xole dende'l primer día.

D'esta miente, metímonos a la preba d'un V y V+ que comparten reunión, col que garrámos-y el tastu a la peña. Nel día de güei fuí faciendo yo casi toes les víes primeru, dexando-y a Vicen les cintes pa encadenales tamién.

Másimu grau del día con Territoriu Mineru 6a+ y la Ponte 6a+

Magar de calecer nos quintos, fuimos a apretar un pelín más primeru nun 6a+ desplomadín na so parte final, que cola llargura llégase a petar un pocu, y llueu metímonos col otru a la manzorga de los quintos, más del mio estilu con ñapes y placa d'adherencia.

La mañana diba pasando y averáronse hasta ellí, un par d'escaladores más, colos lladríos davezu de Kíla, anque como siempre finó por tar hasta xintando de la so man. Na parte final del día, pa quedanos a gustu, turnámonos les primeres trepaes, pa nun tardar nin en quitar los gatos. 

Finiquitamos con Sky Extremo 6a y dos V+ a la manzorga d'ella
 
A fueu, fuimos a facer otru 6a perguapu y acabar con dos V+, anque l'últimu d'ellos, nun me prestó demasiáu, ya que pesie a ser curtia, nun tenía un métodu claru p'algamar el pasín duru, paeciéndonos quiciás dalgo más de V+ por mor de les ñapes usaes pa salir p'arriba.

En definitu, ablucante llugar y ablucante día, poro va ser que tar al paru, tien les sos coses bones... esguilar un llunes pela mañana, jaja. Colamos coles mesmes, pela canal p'abaxo, despidiéndonos de los otros collacios y con 7 víes nueves a vista nel bolsiellu.

---------------------------------------------------------------

9 de Payares de 2013

Como ya diba yo camentando, tamos en tiempu d'aselar una migayina los nuesos oxetivos. Nun se va poder tar xubiendo grau ya intentando víes complexes pa mí, cada día que voi a esguilar, poro tamién el cuerpu necesita esfrutar en víes más cencielles y nun sofrir tanto.

Celso, Berto y Natalia nel paré y Vicen asegurando al nenu
Un bon exemplu d'ello, fue'l día que pasamos nos seutores d'Otura, más en concretu en Mar Antiguo. Digo los seutores d'Otura, porque esta escuela hai qu'entamar a nomala como'l Monsacru, ya que van equipándose requexos pa esguilar bien guapos, n'otros llugares d'esta montaña santa astur.

Asegurando nun día fresquino nel seutor Mar Antiguo


Como Mar Antiguo, téngolo dafechu completáu, dediqueme a esfrutar colos 6a's d'esti seutor, col envís de que Pau, que ya tien tolos V's encadenaos, entrenase ún tres d'otru pa dir garrándo-yos un puquiñín de collor.

Nesi sen, nun pudimos tener un día meyor, ya que Pau algamó la cadena en toles víes, y darréu tocará trabayales de primera, cola tiesta puesta nun nuevu 6a na so llibreta y lo más importante, tornar a sentir bones sensaciones na escalada, que ye lo más importante.


---------------------------------------------------------------


2 de Xunu de 2013

Al fín, un puquiñín de bon tiempu... y onde seca la roca primeru... pues n'Otura. Nes parés meridionales del Picu Llanu Los Bues y el Cantu La Sierra, la caliza suel secar bien ceo y eso que cuando tábemos xubiendo en coche aínda taba l'asfaltu húmedu.

Gran día d'escalada nel seutor Capitán Garfio, xuntándonos un bon garrapiellu xente: Celso y Vicen, Gus, Sonia, Berto, Natalia, Ana y Pau y yo, apaeciendo más tarde inclusu Pangua, dempués de correr una xubida vertical de montaña en Llaviana.

Como siempre, d'entamu, metióse tol mundiu a lluchar coles llargues víes de placa de la mandrecha, demientres Pau y yo, queremos garrar confianza caún no suyo: Pau na escalada de primera y yo, metiendo trastos n'autoprotección en Martes de Campos (V).

Berto, Celso, Sonia y Pau, apretando nes plaques del Capitán Garfio

Paezme qu'al final, nin unu nin otru algamó'l resultáu queríu, ya que yo tengo que trabayar la parte superior de la vía, pa facela totalmente n'autoprotección y ella, sigue sin tener demasiáu amor a los diedros. Poro, fuímonos tamién pa les placones de la mandrecha'l seutor de Capitán Garfio.

Ellí, taba tola xente, apretando vía tres vía, nes que los pies son muncho más importante que les manes, deprendiendo munchísimu a esguilar tol mundiu, sobretou Berto, qu'anduvo faciendo quiciás la so primer vía de primeru, llarga, llarga y de placa.

Segundu llargu de sensación de morir (6b+) qu'encadenamos Vicen y yo

Magar de que Pau, recuperase sensaciones col primer llargu de Capitán Garfio (V+), demientres la xente descansa y xinta, metémonos Vicen y yo, a pol segundu llargu de Sensación de Morir (6b+), que teníemos por encadenar de la última vegada que colgámonos d'una reunión.

A por él fuimos, xubiendo yo'l primer llargu y asegurando a Vicen nel primeru y na apertura del segundu, qu'a sabiendes de como yera l'últimu pasu, sácalu ensín mayores problemes. Dempués tocóme a mí, da-y preste, pero al ser más pequeñu, tuve que llanzar al cazu d'esquierdes final, envede chapar dende baxo como Vicen. Al final, pa la saca los dos y a picar dalgo nel pie de vía.

Instante de xinta y aselamientu nel pié de vía

Sigue pasando la tarde y agora va tocame otra vegada colgame d'una reunión intermedia, pero esta vegada va ser con Pau. La intención ye entrenar un pocu tol tema de les reuniones, poro xubo'l primer llargu y abellúgome na incómoda reunión, demientres Pau, da-y candela con Pangua de reporteru gráficu a esi primer llargu.

Foi un momentu de rises, porque tábemos a la mesma vegada, cuatru cordaes percorriendo'l paré como llargatexes, jeje. Magar d'apretar hasta la reu, tuviemos ellí colgaos, midiendo Pau les sos fuercies como pa facer de primera'l segundu llargu, pero finalmente, preferimos dexalo pa prau y rapelar los dos hasta'l pie de vía, entrenando un puquiñín más y ganando confianza nes reuniones. 

Trabayando varios llargos con Pau en Vía Lactea

La xente va cansando, casi llevamos tol día apretando y personalmente, toi reventáu de pies de tar colgáu, asína que tocaba quitar ferralla, quitar el trastéu nes reuniones y esfrutar apretando nuna vía d'un llargu y tenía que ser... Brutalidad Policial, de la cual, hai milenta versiones so la cotación d'esta.

Dende 6b+ pasando por 6c y 7a... lo cual ofende ya qu'acabamos de facer un 6b+, ensín problemes y les tentatives tanto de Vicen como míes son ermes d'ésitu nesta otra. Y non por un pelo, por munchos pegues más que necesitaremos pa sacala.

Alcontrámonos con Vicen na reunión, jeje

Lo más divertíu ye que nel últimu llibru d'Escalada Deportiva n'Asturies, el segundu llargu qu'acabamos d'encadenar, márcalu de 6c... lo mesmu que Brutalidad Policial, pa mexar y nun echar gota. En fín, les graduaciones son así... siempre habrá dalguien te dirá que ye un pasu, que si tal que si cual... será un pasu, pero mi estatura nun me fai llegar al agarre bono y pa mi esta vía, ye de 6c p'arriba pero bien... 7a de xuru.

Trabayando en Brutalidá Policial (6b+ o 6c o 7a?)

Les intentones??? Pues la verdá qu'esperanzadores, ya que Vicen esta vegada tuvo a puntu de llegar arriba, anque fuera n'artifical cosa que la cabera vegada nun fuera así y yo, nestos pegues, algamé la cadena, dempués d'unes cayíes nel pasu clave... así que tocará meté-y a muerte pal próximu día.

Les técniques??? Pues Vicen paez llegar al agarre buenu, cruzando dende l'invertíu de dreches y yo tengo que tirar d'una téunica defechu contraria, ya qu'uso una ñapa de dreches mala, pa xubir pies a fueu y rebotar toles vegaes que faigan falta d'esquierdes al agarre bono... una brutalidá de movimientu.

Pa la visita siguiente... más y meyor 

---------------------------------------------------------------
Actualización 2012

Equí sí, n'Otura sí que pueu perder la cuenta de les vegaes que tuve esguilando nesta escuela de Morcín. Nun hai secretos, ye un sitiu perfeutu pal iviernu, pola so dimposición sur, porque con qu'haya cuatros rayinos de sol, tas ensín camiseta como si fuera branu... en fin, por too.

Vistes de la Foz dende les parés d'Otura

Aparte que, pasámoslo perbien nos sos pies de vía, siempre con ambiente escalador y perruno, too sea dicho, así que Kíla pásalo xenial tamién colos otros perros y sacando dalgo de xintar al que se tercie, jeje.
Munchos fuimos los que tuviemos per ellí esti añu, trabayando nes sos víes... anque hai que da-y les gracies a Pepín poles semeyes.... una amuesa, les d'este 6b perguapu, recién equipáu en Mar Antiguo.

Primeros pasos de placa del 6b nuevu en Mar Antiguo

No deportivu, pues Pau, sigue avanzando ya qu'esta escuela-y presta muncho, poro tien tolos V+ de Mar Antiguo ventilaos y ya a piques de sacar su primer 6a. Tamién andamos, preparándonos colos varios llargos en Capitán Garfio de cara a una inminente ascensión al Urriellu, esti branu.

Pasu clave del nuna barriga con ñapes pequeñes y un llance d'esquierdes

Personalmente, nel seutor de Mar Antiguo, tengo encadenaes toles víes esistentes, col preste increyible de sacar Ramapithecus (6c) como creo que tien de ser, ensín invertíos averándosese a la vía de la mandrecha, poro garrandose de les ñapes y colocándose de pies finu, finu.


Caberu apretón pa salir del techín colocándose bien

Aparte, nun va muncho ficiéronos un gasayu, al equipar una vía nueva, a la esquierda de la propia Mar Antiguo. Ye perguapa, xubiendo per una placa, que magar d'una fisura ponmos nun descansu nel qu'hai que filar finu, p'alcontrar la secuencia de manes penriba d'una barriga.

Pau prebando la vía en toprope y quedándose mui cerquina de la cadena

Dempués de garrar una ñapa de dreches, llance d'esquierdes a un cazu y d'ehí, pasamos a otru descansu, hasta salir d'un techu pela manzorga y colocándose perbien, ya que sinon va tiranos abaxo sinon andamos sollertes.

Guapísimes les semeyes de Pau nesta vía (6b)

Asína que, con Mar Antiguo completu, les visites pela mio parte, centraranse en delles víes de Capitán Garfio que me queden por facer. De les prebaes, tengo por encadenar el segundu llargu de Sensación de Morir (6b+) que tanto Vicen como yo, llegamos hasta riba, pero nun la encadenamos y mi segundu intentu de 7a, na cuevina de Capitán Garfio.

Saliendo p'arriba del pasu clave como ta mandáu

La vía, prebámosla Vicen y yo, y llegué hasta la cadena, dempués de caeme nel pasu clave. Pal mio tamañu, ye un pasu durísimu, ya que nun llego al agarre llateral, que da pasu a sacar la vía. Habrá que trabayalo, xubiendo pies a dolor y de xuru que con dalguna ñapa infima pa poder rebotar, así que será más cercano al 7a qu'al 6b+ pa mi altor.

Perguapa vista del valle de los conceyos de Morcín y Riosa

La próxima vegada... a ver si sacamos dalgo curiosu

 -----------------------------------------------------------------------------

Hestoria na escuela de la Otura (Morcín)

El pueblu d'Otura ta nel conceyu de Morcín y p'aportar a esti guapu pueblu, hai que garrar la autovía Y pa continuar pola A-66 pasáu Uviéu hasta la salida de Sotu Ribera, na que garraremos la N-630 pa llueu tomar el crucie a Riosa pola As-231.

Dempués travesaremos los pueblos de Les Maces, La Puente y pasáu La Foz, tenemos el crucie hacia'l pueblu d'Otura, siguiendo una carreterina estrecha qu'en continua xubida va averános a esti pueblín, nel falderu del Monsacru.

Vicen asegurando a Celso, Vicen y Berto nel sector Mar Antiguo

L'aparcaderu nun ye mui ampliu, pero si somos un poquín curiosos seremos a meter dellos coches ensín tocar la carretera, anque a lo llargu de la xubida al pueblu de Llanos, suel haber más requexos onde azotalo.

La escuela consta de 4 seutores, a los qu'aportase xubiendo pel pueblu hacia la mandrecha, hasta'l final del pindiu camín formigonáu onde tiraremos a la esquierda, saliéndonos a metá camín, hacia les parés p'aportar a los seutores de Capitán Garfio, Afuega'l Pitu y Nuberu y siguiendo hasta'l final daremos con Mar Antiguo.

Sonia asegurando y Gus, Dani y Pau trepando na parte drecha de Mar Antiguo

Mar Antiguo, ye un seutor de víes cortes de placa d'adherencia, mui prestoses, con graduación pente'l IV y 6c, poro esti seutor ye una pasada pa los que quieren iniciase, anque muncho güeyu col nivel que gastamos, qu'al ser placa tumbada, les caídes son de raspar totalmente.

Ye'l seutor nel que más tuvimos el grupu collacios que solemos esguilar y sobre tou Pau y yo. La verdá ye que siempre pasamos mui bonos ratos, anque tamién hai que dicir que si pega'l solanu, nun hai quien pare, asína qu'en tola escuela, siempre llevar bien d'augua.

Pel momentu, tengo toles bien feches menos un 6c de placa, que me tien pola cai de l'amargura, ya que los agarres son invertios y de ñapes y los pies son práuticamente inesistentes... dalgún día cayerá, jeje.



Seutor de placa del Capitán Garfio

L'otru seutor que visitamos nómase Capitán Garfio y ye una auténtica pasada. Tenemos víes llargues dende'l IV al 7a, pero'l grau ye lo de menos. Equí lo que presta ye trepar n'adherencia, durante muncho ratu, pudiendo inclusu con cuerda de 70 ms, xunir un par de llargos, nes tres víes de la mandrecha.

Goku, perdón Pau nuna guapa vía nel seutor de Capitán Garfio

Ye'l llugar perfeutu, pa da-y a los varios llargos. Como exemplu, Vicen y yo, metímonos a probar tol asuntu de reuniones ya que sabíemos la teoría, pero lo meyor ye ponelu en práutica. Mui interesante probar la vía, Enigma, ya que la primer reunión, anque pueda xunise hasta la segunda ye mui cómoda pa probar cosines.

Esi día, tirámonos un par d'hores na paré, con tola tranquilidá del mundiu, pa facer los 4 llargos que tien la vía. Primeru, metíme los dos primeros xuntos (IV+ y IV) hasta'l cable de seguridá, onde camudamos xeres y Vicen fizo'l tercer llargu (V+) nel que la salida asusta un pocu, pa finiquitar yo l'últimu llargu de 6a.


Abriendo'l primer llargu d'Enigma, pa deprender cosines na reu

Nun tengo más que bones pallabres pa esti seutor y esta escuela, na que puédese esguilar tol añu y que pa los pininos de la escalada, dános satisfacción tras satisfacción, a ca día que probamos les distintes víes.

Los otros dos seutores, Nuberu y Afuega'l Pitu, tan por descubrir, pero de xuru que nes siguientes visites pondrános a preba'l nuesu bon facer na escalada.

11 comentarios:

  1. Muy chulo, Berto. ¡Vaya como le dais!

    ResponderEliminar
    Respuestas
    1. Gracies Jose, ehí ties una escuela estupenda pa siguir dándo-y a la escalada.

      Un saludu

      Eliminar
  2. Hola Berto, como me presta veros por ahí, en Otura y e un de los pocos sitios donde yo practiqué un poco la cuerda, y concretamente el sector Mar Antiguo es donde mas veces estuvimos.
    Eso si, con sol por la tarde pa achicharrar!
    Un saludo

    ResponderEliminar
    Respuestas
    1. Jaja, si que-y pega fuerte'l sol n'Otura, ya vi a xente con sombrilles y too a pie de vía, jeje.

      Monchu, anque-y dieses pocu a la cuerda, paezme que nun te fizo falta nunca pa les grandes ascensiones que ties por ahí... y de les que tengo una envidia sana tremenda, jeje

      Un abrazu

      Eliminar
  3. Vete aprendiendo que hará falta.!!!!!

    Un abrazu.

    ResponderEliminar
    Respuestas
    1. A partir d'agora llevo tolos cacharros pa entrenar l'alpina en víes de menos de V+ aprox. Hai qu'entrenar duru y tener experiencia cola autoprotección.

      Un abrazu Fernan

      Eliminar
  4. La nuesa tierra tien la maxa de los sos paisaxes, la so xente y qu'anque seya una tierra que ta quedando probe nun-y falta amor. Saludos.

    ResponderEliminar
    Respuestas
    1. Nello tamos Adivín, conociendo la tierra poquín a pocu y con ello amándola un pocu más cada día

      Eliminar
  5. Berto cawen to, llamame que hacemos una sesión de fotos oooh!, acabo de publicar en el blog , si te mola mándalo a los de piratas porque yo no atino con el contacto jajaja. Venga nos vemos!.

    ResponderEliminar
  6. tito, desearos a todo el grupo un feliz año nuevo y que pronto nos veamos.Saludos

    ResponderEliminar
    Respuestas
    1. gracies Tito, ya me comenten que pronto tendrás a los neños corriendo pel monte jaja. Bon añu que vien y que sea muncho meyor, porque sinon habrá que salir a pegar tiros ya.

      Un abrazu

      Eliminar