viernes, 24 de junio de 2016

Lon (Llébana) - Picu H.onfría - Canal de San Carlos

5 de Xunu de 2016

Track: Lon (Llébana) - Picu H.onfría - Canal de San Carlos


Madrugón de traca, pa tirar al nuesu destín de ruta: Lón en Camaleñu. L'averamientu hasta esti pueblín ye llargu y fai que dellos collacios del grupu prefieran pasar la nueche d'hostal o furgona na redolada.

Los probes saldremos pela autovía'l Cantábricu hasta Unquera, pa salir direción Panes, pasando enantes pelos pueblos de Buelles y el Mazu. De Panes garraremos la N-621, que nos llevará pol desfiladeru del ríu Deva, y que personalmente fadráme conocer pueblos astures como Rumenes y a partir d'Urdón pasaremos per La Hermida, Lebeña, Tama y Potes onde unos 5 km pela Ca-185 dexaránmos nel crucie hacia Lon.

Semeya de grupu nel pueblín de Lon (505 m)

Ellí teníemos encargáu l'almuerzu y prestó muncho llegar a mesa puesta, poder tomar un cafetín, zumu y bizcochu pa salir con fuercia a una ruta, que tuvi preparando dellos díes y de la que tenía munches esperances.

Esperances, mediu tronzaes por mor de l'amenaza de truena pa la tardi. Nun ye que seya, nin muncho menos, cagón pa estes coses, pero yeremos un bon garrapiellu y tenía cero ganes de movides d'aparatu llétricu enmediu de los Picos.

Partimos de Lon con un llargu tramu d'averamientu per pista hacia la Picota

Preparaos y mentalizaos salimos pel pueblu p'arriba, pocu más y gánase 100 m de desnivel de la parte baxa a l'alta, metíendonos nuna borrina fonda, que per un llau ye positiva por mor de nun ver tolo que quedaría per delantre y por dir fresquín pero per otru llau, pues nun sé, faite agachar les oreyes y tirar y tirar pela pista ensín mayores ambiciones ni entretenimientos visuales.

Dicir que la pista ye bien llarga y pindia, hasta aportar a la Picota, colláu onde axuntaríase'l camín de xubida col de baxada. Nesti puntu, crucie de caminos tendremos que garrar la pista que sal de frente con tendencia a la mandrecha pa llueu tornar a la manzorga per Andalubia, durante otros 200 m de desnivel hasta un llugar de praos que ye la Cotera d'Hoyu Moru.

Dexámonos al fin de pistes y garramos senderu hacia la claridá del día en Pandiellos.

Ellí, entamará un senderu clásicu de Los Picos, ya qu'anque nun veamos res, albidramos que tamos garrando un espolón, pel que vamos dando envueltes y más envueltes hasta salir a la parte alta d'ésti, alcontrándonos colos primeros impresionantes parés calizos frente nueso.

Esti espolón pertenez a la parte baxa de los Picos Pandiellos, a los qu'accederemos pela canal de los Tornos, demientres vamos dexando atrás un ablucante mar de ñubes. Estos momentos, sólo algámense nos Picos, sufriendo, sudando y superando desnivel... pero la recompensa ye maraviyosa.

Con vistes a les grandes cotes del Oriental averámonos hacia la canal de H.onfría

Magar d'un momentu d'esos zen con vistes hacia la Silla'l Caballu, Grah.ales, Rasa la Inagotable... bordiaremos per un guapu camín mineru, los picos de la Pelá y Sebéi, averándonos hacia'l barrancu de la riega las Blancas, que ñaz cerca del entamu de la canal de H.onfría.

Enantes de garrar la canal, pararemos unos minutinos a descansar a la solombra, ya que llevamos casi 3 hores pindies hores de camín y agora vien l'apretón final. Col afoguín del sol pegando fuerte, garramos H.onfría alantre, entamando pela mandrecha'l ñeveru que baxa, con una pequeña trepada al llateral drechu de la canal.

Metémos-y puxu a la pindia Canal de H.onfría

Llueu avanzaremos per tarrén pindiu de yerba y peña, siendo esti tramu el más abegosu de caleyar, hasta salir penriba del ñeveru. La canal ye guapa enforma, anque dellos miembros del grupu, nun tean pa dicir lo mesmu, yo voi esfrutando a tope.

Les vistes son una pasada y por momentos esti macizu oriental, tan escaecíu por mor de la minería qu'esanició los sos raigaños, namórame pasu ente pasu, pasando de pedreres a collaínos de yerba preciosos, llibrando como meyor podemos los fondos y pindios ñeveros.

Salimos a la parte alta encumando la h.orcada H.onfría (1980 m)

Magar d'hora y media de llucha saldremos a la parte alta de la canal de H.onfría, teniendo'l caberu problema nun pindiu ñeveru que decimos afrontar per un canalizu, con traviesa de ñeveru y pequeñu trepe per roca descompuesta que faínos salir a una rampla hacia los 1980 m de la H.orcada H.onfría.

A la fín, tamos nel oxetivu del día, la H.orcada H.onfría, onde debíamos tomar decisiones sobre como siguir el restu de la ruta, ya que l'amenaza de tormenta llétrica nun mos presta res precísamente, alcordando de xubir el Picu H.onfría y dar por suficiente'l númberu d'ascensiones.

Ascensu al Picu H.onfría per tarrén de terraces y arista final

D'esti xeitu, dexamos les mochiles na h.orcada, quedándose Ana y Charly nella, al tener problemes físicos, demientres los demás, ponémonos a bordiar el paré vertical del Picu H.onfría que cae sobre la h.orcada col envís de garrar un tarrén más afayaizu pel qu'ascender de terracina en terracina.

Cume nel Picu H.onfría de 2065 m

Ensin poner mayor dificultá, qu'aidase de les manes en dalgún puntu, superamos pasu a pasu ganando una guapa arista qu'aportarános a los 2065 m d'esti aéreu cumal, dende'l cual tenemos vistes privilexaes del San Carlos y el Samelar.

Xintando cola calma na H.orcada H.onfría

Tamién tendremos vistes del vecín Altu Los Novillos, el cual déxanos claro que nun tien pasu pente'l H.onfría y él, cortándose l'avance en dos fondes h.orcaes, con una aguya enmediu, el Castillín. Baxaremos pues, hasta la h.orcada de nuevu, onde decidimos xintar con calma y faigo una escapada "rápida" canal abaxo a la gueta d'un accesu al Altu Los Novillos.

Y quien diz rápida, diz casi una hora n'algamar esti cumal, ya que descendimos Richar y yo, ñeveru abaxo hasta que topamos una traviesa clara que dexábanos nun terracéu amestáu de peña y yerba, hasta dar de frente con una vira caliza que paecía dexanos nel cumal.

Xubida pelín espuesta al Altu Los Novillos

Y dexar, dexónos nel cumal, pero hai que dicir que tuvo dalgún pasín espuestu, asína que munchu güeyu si pretendéis siguir esta ruta p'algamar el cumal, ya que lo que paez cenciello, va tornándose en trepes pindios, acabando con una llambria con muncha piedra suelto a mou d'escupidera... lo dicho sollertes.

Saliendo de la vira, caminamos hasta'l cumal de 2032 m del Altu Los Novillos, el cual danos unes vistes asemeyaes al H.onfría, pero con una ascensión más picante. Anque pa picante la trepada per roca podre hasta'l pequeñu cumal norte que fice, col envís de comprobar cual yera más altu, quedandome como taba ya que diome cotes mui asemeyaes... asína que nun xubáis que nun paga la pena.

Cume nel Altu Los Novillos (2032 m)

Con 25 min d'actividá trepadora entamamos el descensu del Altu Los Novillos, llevándonos otru tanto, pero descendiendo un pelín más al sur, con destrepes cenciellos, lloñe de la vira pindia que garraremos pa xubir, poro encamiéntovos a usar el track de baxada pa encumar esti cumal y por supuestu si venis dende la canal de H.onfría con intención de doblete, facer esti primeru, ya que l'ascensu del ñeveru per segunda vegada hasta la h.orcada fízose duro.

Descensu increyiblemente divertíu hacia la Canal de San Carlos

Col grupu xunío y les ñubes paeciendo aguantar ensin tronar penriba de la Morra Llechugales, dedicimos que ye bona hora pa baxar, tirando ñeveru abaxo a la gueta de la Canal de San Carlos, siendo esti tramu d'enllaz una pasada de divertida esquiando pela ñeve coles botes o simplemente baxando corriendo.

Magar d'esti primer tramu de descensu de H.onfría cenciello, tendremos un pequeñu destrepe nun escalón que tan sólo tiene de dificultá alcontrar bien el pasu y ya taremos empobinaos a travesar un ñeverín pindiu hasta'l marcáu senderu de la canal de San Carlos.

Enllazamos cola llarguísima Canal de San Carlos

Nesti traviesu del ñeveru tendremos un par de resbariones, asína que debemos siempre dir atentos a lo que tamos y llueu ya cuando'l ñeveru faise más tendíu, aprovechamos pa descender esnalando hasta'l so final, cuando empatamos col senderu casi en tarrén de yerba llibrando tola enorme pedrera.

Tengo que dicir, que la Canal de San Carlos, ye una auténtica preciosidá, l'exemplu perfeutu de canal de Los Picos, llarga, reuta y abierta, con amplies fasteres de prau, enorme pedreres cayendo de H.onfría o Samelar y a lo lloñe, mui a lo lloñe, el collaú de San Carlos... inalcanzable dafechu.

Damos por finalizada la canal de San Carlos na mayada de Truyedes

Aportaremos a la guapa mayada de Truyedes y nun pueu facer otra cosa que mirar p'arriba, pa les ñubes ya que paece que llibraremos y pal colláu San Carlos casi nun puntu infinitu... qu'exerciciu de paciencia son estes canales de los Picos.

Paciencia, la que tuvimos que tener pa descender pel llarguísimu camín de los puertos de Potes hasta la Picota. Con calma, calor y muncha paciencia, fuimos baxando pista tres pista, travesando primeru la riega Cocildún y más tarde'l ríu Mancorbu como puntos d'interés, hasta dar col mayáu de Osmelián que nun ascensu infumable dexónos na Picota.

Llarguísimu descensu hasta Lon per pistes pente viesques precioses

Tengo que dicir que'l paisaxe yera preciosu, pistes de bon andar pente viesques autótones onde los rebollos crecíen como si fueren felechos... yera increyible tanto verdor y viesca sano, pero les hores pesaben y los kilómetros tamién.

Na Picota, decidimos probar suerte con una pista que paecía dar menos vuelta y descender más direuta hacia Lon y acertamos aportando al pueblu magar de 9 hores y 40 min nos que percorrimos un total de 19 km con un desnivel acumuláu positivu de casi 2100 m.

En resume... si queréis tornar a namoraros d'esti macizu y escaecer un pocu'l so pasáu mineru... el verdor de los praos y el gris calizu espéravos dende les Asturies de Santiyana.

Camudando'l Camín nel Altu Los Novillos

No hay comentarios:

Publicar un comentario