viernes, 3 de junio de 2016

L'Altu La Farrapona (Somiedu) - Los Picos Albos

7 Mayu de 2016

Track: L'Altu La Farrapona (Somiedu) - Los Picos Albos


Magar de la Xuntanza Asturvasca d'esti añu toca volver a l'actividá y dempués de revisar la meteo y demás decidímonos por Somiedu, que diba muncho tiempo que nun pisábemos. Pa ello, cuntamos con aventuranos hasta L'Altu La Farrapona, nomáu puertu asturianu de calter ciclista anguaño.

Pa ello, tenemos que garrar l'autovía "Y" en direición Uviéu pa siguir dempués en direición Grau pola As-63, hasta la salida de Cangas del Narcea. Equí tomaremos la As-15, travesando parte del conceyu de Salas y entraremos nel conceyu de Miranda, siguiendo pola As-227 hasta l'entamu del conceyu de Somiedu, Aguamestas.

Entamos la ruta nel Altu La Farrapona (1710 m)

Dende Auguasmestas pasaremos pelos pueblos de Xadriz, La Riera, Recueva y Castru, onde nel banzáu de la Malva, salimos pela SD-1, entamando camín pel val.le Saliencia, pasando per Veigas, Vil.larín, Arbeyales, Éndriga y Saliencia, onde facemos los restantes kilómetros hasta L'Altu La Farrapona, el cual recíbenos con un fríu insufrible.

Tamos falando del 7 de Mayu... pero l'iviernu t'allargándose enforma poro nun queda otra que poner tola ropa que tenemos enriba y salir caminando lo antes posible. Esto fadrémoslo pela pista del PR de los L.lagos, que pasa pembaxo de la Caranga hasta L'Altu'l Col.ladín onde tenemos bona vista del L.lau de la Cueva.

Facemos el camín de los L.lagos de Saliencia

Siguiremos n'ascensu per pistes mineres que n'envueltes tienen de facenos xubir hasta otru altu, perpasando de llau la L.laguna L'Almagrera con bona cantida d'agua, pa siguir hasta topanos de frente cola guapa Veiga Cerveiriz.

Nesta Veiga echáramos un pigazu de restallu va unos añinos atrás, cuando conociéramos esta fastera somedana pente'l Val.le y Saliencia per primer vegada. Esti añu, anque entamaba a calecer el sol, nun taba pa parar de más, asina de magar el vistazu al l.lau Cerveiriz, tirámonos a la so mandrech col envís d'ascender per unes terraces hacia Cebolléu.

Averámonos dende Cerveiriz hasta Cebolléu col Albu Occidental nel puntu mira

Aportaremos a Cebolléu, travesando pindios tramos de ñeveru y dalgunos de caliza caótica, hasta dar vista al xeláu ll.agu de Cebolléu. Nun tuviera la suerte de conocelu, asína qu'unu más pal bolsiellu, anque lo más importante yera alcontrar bien los pasos p'atacar el Albu Occidental, que presentábase cuanto menos gayasperu.

Saldremos con curiáu de la fastera de Cebolléu, bordiando'l l.lagu per una cincha a la so manzorga, con bon altor sobre ésti, pa salir dempués a un collaín, dende'l qu'enfilaremos un faldéu per pindios ñeveros nos qu'hai qu'andar sollerte de nun resbariar y esnalar hasta'l l.lagu.

Aproximación delicadina hacia'l Albu Occidental

Nun fai falta dicir, que güeyu si la buelga de ñeve nun ye fiable o sinon crampones porque en dalguna traviesa si que tenemos un ciertu peligru, por mor de cortase decenes de metros el faldéu, hasta la baxera'l l.lagu.

Una vegada a salvo na base del Picu Albu Occidental, decidimos ascender per un espolón central pente dos pindios ñeveros, intentando minimizar posibles resbariones y anque les semeyes den sensación de verticalidá, los sucesivos pasos pel espolón, nun yeren de más qu'apoyar les manes y controlar l'estáu de la peña qu'agarrábemos.

Decidimos ascender per un contrafuerte con un toque alpinu bien prestosu

A les dos hores clavaes dende que saliéramos de L'Altu La Farrapona, tamos engolaos nel trabe de ñeve que ye'l cumal de 2066 m del Albu Occidental. Les vistes hacia'l L.lau del Val.le son una maraviya asina como del tol val.le, la Penachana y demás cumales al norte.

Fríu enforma nel Albu Occidental (2066 m)

A la escontra ye imposible dafechu distinguir dalgún monte al sur (Pena Orniz, Calabazosa...) y el vientu fainos percibir una sensación xabaz de fríu, poro decidimos escapar del cumal occidental de Los Picos Albos lo antes posible.

Nun suelo ser mui frioleru nunca, pero güei por momentos nun sentía les manes, escaeciéronseme los guantes y el gorru y echando cálculos pente los 4 graos que marcaba'l coche y los 30 kms por hora nos cumales, tariémos soportando temperatures de -1 o 0 graos... tela.

Facemos la travesía ñevada dende'l Albu Occidental hasta l'Oriental

Ensin munches hestories más que baxar la pala sur del Occidental pela ñeve, pa descender unos cien metros d'altor hasta'l colláu que separa ambos montes, empobinámonos al Albu Oriental con unos cientucincuenta metros de panda que sin problemes encumamos en menos de media hora dende l'Occidental.

Na mítica mesa del Albu Oriental (2103 m)

Esta vegada desdexamos el Picu Rubiu o Albu Central, porque les condiciones diben a pior y siendo'l más complexu con dalguna trepadina, nun apetecía muncho la verdá. Nel Oriental, como siempre, les vistes a pinchu del L.lanegru o L.lagu de Calabazosa son ablucantes... pero seguimos col borrín enriba de tola cuerda del Calabazosa que tantes ganes teníemos de ver.

Asína que tocaba abellugase pente les peñes, pa escapar del vientu y picar dalgo de xintar, demientres les ñubes deciden tirarnos unos copinos de ñeve p'animanos a colar tamién del Oriental. Pelín fartucos de la meteo repunante, facémos-y casu y entamaremos el descensu.

Descendemos del Oriental hacia'l val.le de Calabazosa

Claramente, debemos baxar hacia'l Sur, pero la canalina entre aguyes qu'escoyera años atrás ta estrada de ñeve y lo pindio del tarrén nun aconseya baxar por ella, poro descendemos per un espolón con curiáu hasta aportar a una panda de ñeve qu'empobínanos al colláu col Picu'l Val.le.

Que val.le? Pues el de Calabazosa, al qu'aportaremos magar d'un paséu per una monótona mortera, nel que los continos xube-baxa y un tarrén calcáu, pue ser un llugar difícil en casu de borrina, poro munchu curiáu y orientación y aportaremos finalmente a una sienda que va llevanos estupéndamente al L.lanegru o L.lagu Calabazosa.

Restolaremos siendes hasta'l Val.le Calabazosa onde aportaremos al L.lanegru

El descensu hacia'l L.lanegru ye ablucante dafechu, les vistes en tola vuelta pela mandrecha al l.lagu va ser de lo más guapu de la ruta. D'esti xeitu, el camín faise agradable y mui rápidu pasando penriba'l L.lanegru y baxo la mayada de Calabazosa, enantes de facer una envuelta hacia'l l.lau La Cueva de nuevu.

Tamién, pola mandrecha anque con una vuelta muncho más llarga, bordiaremos el L.lau La Cueva, col envís de parar a xintar na cabaña d'antes de L'Altu'l Col.ladín. El día ta desagradable enforma y nin siquiera al abellugu de la cabaña, hai quien pare pa xintar relaxao, asina qu'antes de quedar xelaos tiramos pa L'Altu La Farrapona, non sin antes echar un vistazu a la so zona de bloque pa visites posteriores.

Enllazaremos sienda pente'l Calabazosa y el L.lau La Cueva

Cambios, calentinos y contentos por sacar alantre una ruta bien guapa con un día gafu, baxamos a Saliencia onde tomamos les merecíes cerveces o caldinos pal fríu nel Albergue de Saliencia, onde facemos planes futuros al ver el bon ambiente y tratu de los responsables.

En resume, ruta clásica na que d'un plumazu conocimos tolos L.lagos de Saliencia y Los Picos Albos nun circular mui recomendable, pa disfrutala namás hai que caminar 5 hores y media, 11,3 km y superar un desnivel acumuláu de 820 m.

Cenciella y disfrutona... con bon tiempu muncho meyor jeje. Que vos preste!

Camudando'l Camín con vistes al Val.le de Somiedu

No hay comentarios:

Publicar un comentario