lunes, 16 de mayo de 2016

Ambingue (Ponga) - Picu'l Cuniu - Semeldón

2 d'Abril de 2016

Track: Ambingue (Ponga) - Picu'l Cuniu - Semeldón


Una vegada más, torno a poner una ruta que tenía na carpetina de pendientes, por contra d'una ruta de calendariu y otra vegada tornamos pal oriente, poro salimos de Xixón garrando l'autovía'l Cantábricu, col desvíu davezu a Cangues d'Onís onde almorzamos los seis atrevíos del GM Xuan de la Borrina.

Llueu siguimos pela N-625, pasando pelos pueblos de Cañu y Tornín, cruciando'l puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga nesti casu, desviándonos pela As-261.

Semeya de grupu n'Ambingue (435 m)

Nesta carreterina facemos dellos kilómetros hasta Sellañu, onde sal la As-339 pela que xubiremos hasta'l crucie cola Po-6 la cual llevarános a la fín al nuesu puntu de partida: Ambingue. Con un día soleyeru enforma y bon aparcaderu, preparámonos pal ataque a una ruta que va quedar n'alcordanza pola bayura de llugares guapos y entreteníos pasos del percorríu.

Saldremos pa la parte alta del pueblu, con un pelín d'enguedeyu pente les pindies cais, hasta topanos con un depósitu d'agua, onde ya garramos la pista que tien de llevanos hasta'l Porrón onde facemos una envuelta camudando totalmente'l sen de la nuesa marcha.

Averámonos hacia'l Pasadoriu (900 m) con unes vistes de restallu

Dicir que nestos primeros instantes de la ruta supérase un desnivel tremendu y pa cuando aportamos al Pasadoriu, un mirador increyible de La Llambria de frente, pero tamién del Pierzu bien cerquino o de les Peñes Santes más lloñe, vamos cola llingua fuera.

Fueron dalgo más de 450 m de desnivel nuna hora, faciendo casi tol desnivel direutu del día, pero entá quedábamos muncha tela que cortar. Nesti guapu colláu, baxo'l Porru La Escrita, vamos entamar un llargu faldéu baxo la xerra'l Furacu y penriba del valle Viores, hasta aportar al colláu de Fonticielles (965 m).

Entamamos l'ascensu hacia los altos de la xerra'l Furacu

Pasáu Fonticielles, entamaremos el tramu más abegosu de la nuesa ruta, por mor del amiestu de peña calizu, escayos, broza y sobretou pola ñeve baxo que nun mos dexa pescanciar rastros de sienda o pasu davezu per esta fastera.

Con esto quiero dicir que nun me paez que fuéramos pela meyor traza, pero siempre garrando una viesquina de carrascos como referencia, deberémos travesala pa faldiar baxo'l porru'l Furacu, ensín ascender al crestón calizu anque tengamos cerquino los collaos de la Maeda o L'Espinu.

Faldéu con bien de ñeve baxo les caberes cotes como'l porru Furacu o'l picu Tameces

Nel de L'Espinu (1210 m) camentamos la posibilidá de crestiar per Tameces, pero nun mos presta muncho cola ñeve tan blando y decidimos faldialu aportando a la fín al colláu'l Cuniu (1208 m), el cual espéranos con un potente trabe de ñeve y l'ascensión final al Picu'l Cuniu.

Con un pequeñu esfuerzu final, encumamos el Picu'l Cuniu de 1264 m, dende'l que vemos casi les cases más altes de Vallimoru y tola ablucante redolada dende'l parque de Reres, al de Ponga, Amieva, El Cornión... increyible.

Cume nel Picu'l Cuniu (1264 m)

Pero cola suerte que tenemos nos últimos tiempos, metióse la ñube y púsose fríu enforma, así que lo que pintaba una xinta casi con siesta, tornóse en vámonos que toi quedando xeláu. El descensu fadrémoslu hacia'l colláu de Piedrafita, con una primer parte de cresta fina, na que tenemos qu'andar sollertes pa llibrar los pasos por mor d'una bona capa de ñeve.

Llueu entraremos na fastera de Llagosciegos onde espéranos el nomáu Porrón, un enorme diente calizu que si nun tuviera onde Cristo perdió'l zapatillu, ya tendría una bona esguilada n'alpina... personalmente nun m'apetez cargar con trastos hasta ellí, jajaja.

Pasamos per Llagosciegos hasta'l colláu de Piedrafita

Plantámonos nel colláu Piedrafita (995 m) onde lloñe d'acabase la ruta, entama la obra d'arte d'esti percorríu que tamos faciendo gracies a collacios, como los de Las Claras, que siempre anden a la gueta de siendes y caminos escaecios dende cuantayá.

La baxada sedrá cenciella hacia los restos de la mayada de Piedrafita, quedando pelín embobaos, coles argayaes que baxaron dende los Canalones de los Tornos. Dexamos atrás, los últimos restos de ñeve y metémonos no fondero'l valle, alcontrándonos con una bona senda que dira pasando pente  preciosos exemplares de faya.

Esfrutando del paisaxe del valle de Piedrafita

Nun paez que pase muncha xente per esti valle ya, pero con un pelín de vista y sentíu de la orientación, nun se pierde'l camín en dengún momentu. Bien ceo, el camín ponse paralelu a la riega de Piedrafita, que toma l'agua de la Fresnedales y a lo baxo, ceraca de la mayada de los Tornos, del barrancu de Vallampu.

Según vamos descendiendo, los llugares tórnense más y más guapos, entemeciéndose l'agua col mofu de les peñes y árboles en milenta saltos d'agua peles que tenemos que cruciar delles vegaes. Nun sé dicir, cuantes vegaes, paezme qu'unes diez lo menos, tuviemos que cruciar el ríu Piedrafita o dellos afluentes.

A cada pasu l'agua ya'l mufu de la peña y la viesca faen el llugar impresionante

Magar de dos hores de guapura descomanada aportamos a la mayada de Semeldón, onde mécense los ríos de Piedrafita y el Semeldón que vien dende la foz de Saolla pocu más allá de Vallimoru. Nesti puntu, quédome pensando lo que me prestaría siguir ríu alantre hasta'l pueblu de Vallimoru, pero entá quédanos ruta per delantre... otra vegada sedrá.

Pasamos peles antigües instalaciones de la industria maderera que sacaba los troncos al traviés del ríu Semeldón hasta Sellañu y metémonos na Foz del Ríu Semeldón, onde a los collacios del GM Xuan de la Borrina, espéra-yos la cabera sorpresa del día, con un senderu bien prestosu que fadrá les delicies de los presentes.

Facemos con curiáu de nun cayer al ríu los pasinos llaterales de la sienda

Poques vegaes baxará con tanta fuercia'l ríu Semeldón, pero nun vamos quedar ensín intentalo al menos. Llueu de dos vistazos y de Kíla p'alantre y p'atrás que nun lo ve claro, garro a Kíla y pasamos los dos, yendo detrás tol grupu poquín a pocu.

La verdá ye que nun tien na, un pocu de curiáu pa nun cayer al ríu y pocu más. Téunicamente nun son difíciles y pali pali, van llibrándose los pasos más averaos al ríu, siendo perentreteníos, hasta que toca xubir altor, con una trepada per una canal dalgo descompuesta.

Anque con un pocu tensión esfrutamos como neños na foz del ríu Semeldón

Siempre guiyándonos poles marcas azulines, siguimos camín a bon altor sobre'l ríu y equí ye onde tenemos d'estremar les precauciones, porque la broza ta metiéndose nel senderu y nun se vé mui allá onde pisamos, a lo que súmase qu'en dalgún puntu, dalgo argayó'l tarrén y tórnase peligrosu'l desbentíu.

A dalgunos casi se nos fizo curtiu esti tramu tan picantón, pero otros veníen con cara d'en menudu sitiu nos metistes Berto, jeje. Una vegada qu'aportamos a la ponte metálica, entama lo que sería'l PR de Sellañu a Semeldón y ya les coses tranquilícense munchísimu.

Parte más abierta de la foz del Ríu Semeldón

El PR, qu'alcuéntrase en perbon estáu, paezme una gran ruta pa esfrutar d'esti ríu y un paseín bien tranquilu enantes de metese una bona fartura en Sellañu por exemplu. Nós, cola tranquilidá de sabenos nel final de la ruta, vamos charrando animádamente pel camín que pasín a pasu amplia la so caxa, hasta poder dir en pareya falando.

Nel intre, el camín dixébrase en dos, baxando unu pa Sellañu y el nuesu, a la manzorga, garrando sen ascendente hacia Ambigue, fadíandonos un pelín ya que ya llevábamos una bona soba enriba. A reseñar nesta parte del camín hacia'l pueblu, la Peñe Pondiu, enfrente nuesa con un claru camín, que paez morrer nuna covacha na so base.

Ascendemos finalmente hacia Ambingue de nuevu col Picu Pierzu como cimeru protagonista

Cola vista puesta na cara norte del Eiger, perdón del Picu Pierzu, daremos preste a ún de les rutes, que camiento va quedanos n'alcordanza, por mor de los milenta tarrenes que transitamos: pindies cuestes, amiestu calizu con ñeve, ñeve fonda, valles ablucante, fayeos, riegues a cruciar, senderos colgaos penriba d'un ríu.... tremenda ruta.

En resume... rutón ponguetu, como non, que fízonos percorrer nes sos 7 hores y media de duración, 14 km y ascender 1120 m de desnivel positivu acumuláu, lo cual queda n'anéudota si repasamos tola belleza que pudimos conocer y que nun soi siquiera a cuntar con pallabres nin con semeyes.

Camudando'l Camín en tierres ponguetes

2 comentarios:

  1. La bajada por el valle de puedrafita y el primer tramo del semeldon. Es precioso muy poco transitado. Recorrido per guapo que hicimos hace años.

    ResponderEliminar
    Respuestas
    1. Pues sí... siempre andáis investigando rutes pocu transitaes y munchos nos aprovechamos d'ello... con bona voluntá eh! jeje

      Eliminar