jueves, 28 de abril de 2016

Taxa (Teberga) - La Berza - Picurredondu

19 de Marzu de 2016

Track: Taxa (Teberga) - La Berza - Picurredondu


Siguimos con rutes alternatives al plan de calendariu pa esti añu y los nuesos pasos tienen de llevanos a conocer un par de cotes nomaes por dos motivos: la primera ye'l Picu La Berza que ye puntu más altu de Grau y la segunda ye'l Picurredondu, monte guapu astur y vértice xeodésicu de Teberga.

Poro, saldremos de Xixón pel camín davezu hacia'l valle del Trubia, primeru pela autovía Y griega, garrando n'Uviéu l'autovía que va pa la Espina, saliéndonos nel desvíu hacia'l Trubia, travesando los conceyos de Santu Adrianu y Proaza, siendo nel pueblu de Caranga Baxu, onde tomamos direición a Teberga entrando n'él pol pueblu d'Entragu, hasta parar na capital tebergana de La Plaza.

Grupu reducíu en Taxa, guapu y altu pueblu (972 m)

Magar del almuerzu, tornamos un puquiñín hasta Entragu, onde garramos la Te-3 pasando pelos pueblos de Bárzana, Santianes, Campiel.lu, Urria y a la fín ,Taxa, quedando ablucaos del altor d'esti pueblu y del so guapu allugamientu.

Según tamos colos preparativos, ya tenemos una reciella perros enrededor nuesa con toles intenciones de facenos compaña nel nuesu camín. Asína que pocu más y somos más canes que presones pa esta ruta qu'entamará caleyando peles cais de Taxa hacia'l barriu La Prida.

Aportamos al colláu Cabaniel.las (1294 m)

Alcontramos bien de ñeve dende'l primer momentu y asigún vamos ascendiendo per pistes hacia'l Caleiru y posteriormente hacia Cabaniel.las, l'altor dirá medrando y empozaremos dalguna pisada hasta la rodiella.

Nun hora clavada taremos nel colláu Cabaniel.las a 1294, dende onde damos vista a la Veiga'l Prau y el Picurrredondu bien lloñe de la nuesa posición. Tamién acolumbramos les ñevaes llombes del Picu La Corona, hacia'l cual empobinámonos camentando que ye'l picu La Berza.

Ñeve en bon estáu n'aproximación al Picu La Berza

Al nuesu erru, tamién llévanos un recién buelga que nun duldamos en siguir hasta qu'a ciertu altor y mirando'l gps doime cuenta que tendremos de baxar un colláu y ascender de nuevu hacia La Berza, otra llomba dellos metros más alta que la Corona.

A dicir verdá tien más xacíu, empobinase al traviés del valle hacia la Pousá'l Sol y dende ellí ascender al Picu La Berza (1437 m) pa nun xubir y baxar metros de más. Nós, equivocámonos y llueu del esfuerzu d'abrir buelga en dos ascensiones (La Corona y La Berza) encumamos la cota más alta del conceyu de Grau.

Picu La Berza (1437 m)

Diez minutinos nel cumal ye abondo, pa ver que les ñubes que vienen dende'l noroés nun tienen bona pinta, poro decidimos siguir camín, faciendo de nuevu, el descensu y ascensu a la Corona, pa continuar caleyando per tola cuerda de la Pena Sumichadoriu.

Dende lloñe tenemos presente'l Picurredondu como l'últimu finxu del día y naguamos porque'l día seya a aguantar hasta'l so cumal, onde tenemos entá la intención de xintar, enantes d'acomentar la retirada.

Facemos camín sele hacia'l Picurredondu

Cola compaña fiel de Kila y los sos dos collacios, vamos abriendo buelga y adelántome a bon ritmu, dexándo-yos el camín fechu y teniendo un bon ratu pa tar sentáu nel vértice xeodésicu colos mios esmolecimientos.

Cumal del Picurredondu (1414 m)

Al pocu van llegando los demás collacios del grupu, teniendo'l tiempu xustu pa xintar con cierta calma, enantes de que les ñubes métanse dafechu y tengamos que salir d'ellí a escape, albidrando que nun máximu de media hora va tocar moyase.

Descendemos con munchísima ñeve del Picurredondu hacia'l Llanu'l Vicenturu

El descensu pela fastera sur, la cual tien ñeve enforma y fainos perdifícil nun meter la pata hasta'l cadril casi. De toles maneres, somos a baxar apriesa y plantámonos nel Llanu'l Vicinturu, onde asitiase una guapa cabaña.

D'esti llugar hestóricu, Vicinturu (VI centuria) toca siguir camín abriendo buelga hasta aportar a la cabecera'l valle del ríu d'Urria, al llau del cual baxaremos viendo esapaecer la ñeve hasta tener una pista formigonada baxo los nuesos pies.

Baxamos hacia Urria per cómodes pistes y carretera hasta Taxa

Bordiaremos el picu Redemicha pel sur y siguiremos pista hacia Urria, desviándonos nel nuesu casu en la Chanera per caminos hacia Taxa, pero paga la pena dicir que ye meyor acabar dando a la carretera porque los caminos pierden continuidá y hai que travesar praos p'acabar na carretera d'igual mena.

Pa cuando aportamos a Taxa, pingando dafechu, llevamos un total de 5 hores y media de camín, nes que percorrimos 12.6 km y superamos un desnivel de 825 m, lo que nun suel ser la media nuesa pel monte, pero col día gafu que daben llibramos y bien.

Ta la próxima...

Camudando'l Camín con dos collacios tremendos

No hay comentarios:

Publicar un comentario en la entrada