viernes, 15 de abril de 2016

Belerda (Casu) - El Visu La Grande

12 de Marzu de 2016

Track: Belerda (Casu) - El Visu La Grande


Seguimos nel añu de buscame la vida con rutes alternatives pal grupu. Esto ye pol altor de les propuestes de calendariu, poro toca restolar en blogues, montes pendientes y demás hestories p'alcontrar lo siguiente del collaciu Xistras nel Visu La Grande.

Paecióme una ruta de muncho interés, asína que con esi envís saliéramos de Xixón bien ceo pela autovía minera, saliéndonos al corredor del Nalón como ye vezu, travesando Llangréu, Samartín del Rei Aurelio, Llaviana y almorzando nel chigre de Rusecu en Sobrescobiu.

Partimos dende Belerda (646 m) cola cota ñeve baxísima

Magar del cafetín, siguimos alantre travesando'l conceyu de Casu, pasando pelos pueblos de Tañes, El Campu, Sotu y La Foz, onde desviámonos a la mandrecha nel crucie pa dir hasta'l guapu pueblín de Belerda, dende'l que vemos la ñeve cubriendo tola redolada montuna.

Preparámonos con tolo posible: crampones, piolé, marañones... y ya de ropa nin falamos. Si'l pueblu raspia los 650 m d'altor, nun tardaremos nin 200 m más de desnivel n'alcontrar les primeres falisgues de ñeve nel nuesu camín hacia les cabañes de les Cerezales.

A les poques rampes topámonos con altores de ñeve brutales

A partir d'entós, el camín alcuéntrase con unos 50 cm de ñeve, que cada pasu ye una auténtica tortura. Los marañoneros, deciden usar esa ferramienta básica pa estos paquetones de ñeve y los demás vamos abriendo buelga por turnos con munchu esfuerzu.

Tan sólo la esperanza de qu'a más altor tea la ñeve más duro ye lo únicu que nos fai siguir alantre. Demientres, Richar, Haritz y yo, vamos turnando la cabecera del grupu, ya que "the marañoner group" nin mos aiden pasando delantre nueso pa facenos buelga.

Entamamos a ver ciertu peligru d'ábanos pola acumulación de ñeve hasta L'Incós

Toca trabayar duro y asina facémoslo, averándonos hacia la Collá Incós pasando baxo la Peña'l Casar, la cual fainos andar sollerte con una visera perpeligrosa que podía desendolcar nun ábanu sol camín. Pasamos por turnos, ya que'l sol va faciendo efeutu y nun mos presta la dimposición de la so posible cayida llevándonos por delantre.

Aportaremos a Incós, onde tomamos un merecíu descansu, xintando, bebiendo y falando del posible estáu de la ñeve, de la carga que tien el monte y de les posibilidaes d'ésitu de la ruta prevista. Nin siquiera dende equí, somos a acolumbrar el nuesu destín: El Visu la Grande, ya que nel intre tenemos namás a vista'l Picu Cuervu que continua n'arista hasta'l Visu.

Ascendemos hacia l'hombru qu'avérase al Picu'l Cuervu onde vemos purgues recientes

Salimos pente dellos carrascos y espineres, per pindiu tarrén, pero pa xubir l'ánimu alcuéntrome con ñeve más duro pel qu'avanzamos y abro buelga con facilidá, esfrutando de cada pisada que doi, tanto que traigo a tol grupu cola llingua fuera.

Aportaremos bien ceo a un hombru superior, onde agüeyamos el Visu La Grande y el cumal del Picu Cuervu, dende'l cual vemos el rastru d'un ábanu, pembaxo del cual tenemos de pasar. Nesti guapu llugar, tornamos a falar, decidiéndome personalmente a siguir anque fuera sólu, quedándose tan sólo Haritz y Dani que nun lo ven claro.

El mayor problema que veo ye'l pasu baxo l'argayu ñeve ya que coincide con una fastera mui pindia de reres y nel sitiu, aciertu, ya que tenemos que fozar pa salir penriba d'un escalón enantes de salir a una de les falderes de ñeve más guapa y compacta pela que tuvi la suerte d'abrir buelga na mió vida.

Xubimos faciendo envueltes per onde notamos meyor l'estáu de la ñeve

L'estáu de la ñeve? Perfeutu pa crampón pa dir cola seguridá de saber usalos. Pero somos munchos nel grupu y nun tol mundiu tien esa esperiencia, poro prefiero que xuban con curiáu pela pendiente atentos a la buelga que voi faciendo, nun vaya ser que tengamos un disgustu.

D'esti xeitu, vamos faciendo una ascensión preciosa, na que metemos un par d'envueltes pa nun cortar la placa de ñeve, ya que vimos nun momentu, qu'había un claru cambiu del estáu de la ñeve a más blando, saliendo pasu a pasu hacia l'arista, cerquino del cumal del Picu'l Cuervu.

Agora sí, tenemos delantre nuesa tola arista que tien de llevanos al Visu La Grande y entá ta perlloñe... pero al empar ye preciosa. Pali pali, dirán aportando a la nuesa posición tolos miembros del GM Xuan de la Borrina.

Esfrutamos d'un crestéu hacia'l Visu la Grande épicu dafechu

Unos más relaxaos y otros con dellos nervios pol ascensu y ye qu'hai que dicir, que sobretou na parte baxa, la faldera yera mui pindia y sigún díbemos ganando altor, pegar un resbarión podría ser una baxada de más cien de metros d'altor hasta ser a parar, con suerte.

Nun llugar cómodu, aprovecho la ocasión pa "obligar" a tol mundiu a ponese los crampones. L'arista aparte d'increyíblemente guapa, ye perafayaiza pa avezase a caleyar con ellos con seguridá, asina qu'anque llévanos casi venti minutos, hasta que tamos preparaos, paga la pena pa siguir avanzando hacia'l Visu.

Sigo a la cabeza con Kíla, vamos divirtiéndonos, ya que nos últimos tiempos nun esfrutaba así del monte, dedícome a sacar semeyes del grupu demientres siguen la buelga. El día ye perfeutu y l'arista anque llarga ta faciéndose bien, superando dellos resaltes que lloñe de difíciles faen el percorríu más atrautivu si cabe.

Faise llarga la cabera panda hacia'l cumal del Visu la Grande

Magar de pasar dellos minutos d'arista, pasamos pel collaín de la Xistra (1513 m) y metémonos na cresta final del Visu La Grande, que faínos pasar los caberos problemes téunicos, con dalgún crestéu más finu penriba d'unes peñes.

Llueu sólo nos quedaba la pala final del Visu la Grande, anque hai que dicilu, fízose llarga enforma. Eso sí, tocaba salise hacia'l sur ya que la cornisa que presentaba al norte nun yera de lo más apetecible pa desprendese con ella.

Llego'l primeru con Kíla y dedicámonos a animar al restu del grupu que caún col so ritmu, va aportando con una cara enllena felicidá al cumal de 1707 m del Visu la Grande, que nesti día, fué lo más grande del mundiu, al menos pa esti humilde grupu de monte.

Semeya de grupu nos 1707 m del cumal casín

Camiento que caún a la so manera, lo sofrío y lo esfrutó como mínimu por igual, así que soi'l primeru que llévase tolo positivu d'apretar un pelín a la xente pa que conozan ascensiones como esta, anque d'otra miente tengo'l gustu de contar nel grupu con xente, que si nun lo vé, tien la suficiente fuercia pa dase la vuelta con calma y dicir qu'otru día sedrá.

Más de media hora merecida echamos nel cumal, hasta que ponse un pelín fríu y decidimos descender, pero per onde... esa ye la cuestión. Llevaba preparaes dos opciones y la primera diba ser mui llarga pela Cabritera, asína que decidimos baxar pela arista de les Garllupes.

Descendemos hacia l'arista de les Garllupes per pindios pasos

El problema d'esti descensu ye de primeres, baxar per una cara norte, na que sí yeren necesarios dafechu los crampones, por mor del fuerte desnivel de les primeres ramples, onde como non, la ñeve ta dalgo más dura.

Llueu tendremos una llarguísima arista, na que diremos sortiando cualesquier problema qu'alcontremos per una fastera u otra, ya qu'en dellos llugares afílase o alcontrámonos con grandes peñes.

Descendemos enterrándonos pente la ñeve hacia'l mayáu de X...

Según vamos baxando la ñeve va tresformándose y l'altor d'ésta entama a ser un problema al fundinos hasta'l cadril en dellos pasos. De toes maneres, vamos baxando y baxando desnivel hasta superar un tramu perpindiu nunes peñes carauterístiques, onde ya camudamos de faza n'arista col envís de baxar hacia Les Vallines.

Lloñe de paecer que la llucha terminaba, nesti mayáu algamaremos la pista que nos tien de devolver a Belerda, pero a cambeu, tendremos ñeve blando y un camín que nun baxa res hasta munchísimos metros n'adelantre, la que va desgastando les poques fuercies que restaben nel cuerpu.

Esta pista, que faldea'l Cantu Valmayor, va pasando peles cabañes de Roces, Porciles, Ducentes, Bories y Tabláu onde facemos al fin la envuelta na qu'entama de verdá'l descensu hacia Belerda, pasando pela Corona y la Cuestancia.

Facemos el tramu final de pista bordiando tol xerru de X... hasta Belerda

Pocu enantes del pueblu, alcontrámonos con Haritz y Dani, que teníen ganes d'estirar les pates magar d'unes cerveces y paramos a charrar un pelín con ellos, hasta que'l fríu éntranos pel cuerpu y seguimos alantre con ganes de mudanos de ropa, ya que la temperatura a la solombra ye bien baxa.

Pa cuando dalgunos tamos calentinos y con ropa llimpio, tovía hai xente del grupu que nun llegara, por mor de la pesadez de la pista y de lo llarga y dura que fué al final esta ruta. Los datos falen por si solos: 13,5 km de percorríu, 1325 m de desnivel acumuláu y un total de 8h 35 m con ñeve casi dende'l primer pasu hasta l'últimu.

Una auténtica paliza...

Camudando'l Camín a guelpe de crampón y piolé

No hay comentarios:

Publicar un comentario