jueves, 24 de noviembre de 2016

Peña Careses (Siero)

10 Xunu y 6 de Xunetu de 2016

Avanza'l branu con díes así repunantucos, nos qu'hai qu'andar filando fino pa poder trepar en dalguna escuela. Mal tiempu pal occidente, tamién pal oriente, pal sur... asína qu'hai qu'afinar per dalgo céntricu y lo más al norte posible... pa Careses.

Nes últimes visites, nes que tuviéramos probando la reequipación del sector Satisfaction, casi tocáremos toles víes pero quedaran munches ensin encadenar asína que llevaba esi envís pa estos díes así sueltos.

Encadenando la Seta (6c)

El primer día, tuviéramos Alberto y yo un ratín en la Faviola, repitiendo pela mió parte el Protón (7a) como si na y tamién Joder con el V+ (6b+) la cual acabó siendo un bon retu p'Alberto que fué a facese con ella dempués de 4 pegues y munchos ánimos.

Llueu colamos pa Satisfaction y col tiempu empiorando, fuí a encadenar la Peseta (6c) que ye un bloque prauticamente pero con un llance llargu pa mi estatura. D'equí ya tocó colar y tornaríemos otru día a poles víes de la mandrecha.

Un bon día d'escalada... contentu

La siguiente visita diba trayer los encadenes más prestosos d'esti seutor, La Seta (6b+) y el Acorazado Potemkin (6c) qu'agora comparten tol díedru d'entrada a vía y cauna sal per una parte del desplome con vuelu llateral y pasos raros pero mui guapos cuando-yos pilles el puntu.

Al final cayeron y probé'l Don del Águila, qu'abultóme rara, rara na so parte final, colo que tocó dexala pa otru día y ver veremos cuando tornamos per equí. De xuru que nel iviernu, con un día soleyeru ye una bona opción.

Careses (Seutores visitaos)

Croquis modificaos por mi de la escuela d'escalada de Peña Careses sacaos de les páxines de Puntu ColloráuGrupu Montaña El Maquis y del blogue El Regodón. Gracies y col so permisu.


----------------------------------------------------------



1 y 14 de Payares y 10 d'Avientu de 2015

Finamos l'añu intentando nun facer muncho'l ridículo meneándonos peles escueles d'escalada d'Asturies y nesti casu, aprovechando'l reequipamientu del seutor Satisfaction tornamos dende más d'un añu a Peña Careses.

Dacuando, escaecemos delles escueles ensin motivu y eso que tengo munches hestories pendientes nesta escuelina na que siéntome como en casa, por mor de sacar el mió primer 7a. A dicir verdá, el primeru de los díes qu'apaecimos per ellí, fuimos de toma contautu d'Haritz y tuviemos esguilando na Faviola, repitiendo'l Protón al primer pegue como si ya nun costare.

Alberto na ruta de los pioneros.... alpina, alpina

Ye lo que tien tener una vía dafechu mecanizada, sabes cuando hai qu'apretar y entá nun perdí tanto nivel como pa nun sacala cenciello jeje. Esi mesmu día, tuviemos escucando a sabiendes de que taba reequipándose Satisfaction y ya vimos rellumar delles chapes col aumentu de motivación.

La siguiente visita ya centróse en Satisfaction, faciendo namás que la Ruta los Pioneros, ya qu'entá nun taben los nuevos croquis y anduve faciendo'l fatu pente 6c+ per un llau y per otru, quedando con una reventada curiosa.

Seutor Satisfaction recién reequipáu

Na última visita, fuí col animal de Diego y tuviemos tamién na Ruta los Pioneros (6a) prestándo-y muncho a él, cosa que'l día anterior nun fuera asina con Alberto y Haritz, pa pasar llueu a Caravana de Hormigas (6a+), Atenea (6b) y Un spit para morir (6b).

Aquel día concidiéramos con Castro, ún de los reequipadores, agrandiéndo-yos el trabayu y quedando pela mió parte pa terminar de dexar en condiciones el seutorín de la Z, que tien delles víes reetresformaes con una reequipación dalgo dudosa.


----------------------------------------------------------
31 de Marzu de 2014

Na escalada, hai dellos tipos que pueden dásete o non, y a mí, los desplomes nun se me dan. Garré-y el gustu a la placa y la verda, cuando la cosa ponse tiesa y tira p'atrás nun soi a dar lo meyor de mí.

Poro, nun queda otra qu'entrenar y dir a esguilar onde les coses nun te presten tanto, como les plaquines de ñapa y dacuando un descansín. Nes víes que desplomen, nun esisten pa mi, los descansos, anque tea media hora echando magnesiu, jaja.

En fin, anque nun seya desplomada tol tiempu, el seutor la Z, tien víes d'esi tipu, con munches barrigues y un techu que nel intre, nun ta siendo mui bono pa la tiesta, ya que l'alexe y vuelu llargu llateral del últimu seguru a la reunión, nun ta dexándome algamar la confianza naguada.

Dos son les víes, que comparten esa salida a reunión. Cazafantasmas (6b+) y el Recreo (6b) y les dos, salen bien hasta esi puntu nel que ties que llibrar el techu pela manzorga con pasos llargos pa mí, y llueu facer travesía col últimu seguru nel quintu coñu.

Tien coyones que dempués, metámonos ensín querer nun 6c que comparte final cola Z, y veamos muncho más cenciello salir a reunión. Tanto que dende ella, tiré dempués hasta la de Cazafantasmas, y pude llimpiar de yerbes y mierda, el cazu d'embaxu la reunión, dando un pelín d'esperanza pa conocer y sacar esi pasu pa les dos víes.

En xeneral, día d'entrenu, de conocer el desastre d'equipación y des-equipación polo que puede vese pelos croquis esistentes, los cuales nun coinciden mui allá cola realidá de la escuela. Pel momentu, nun ficimos nengún encadene más, pero tengo la sensación, de que'l próximu día coles coses clares saldrán si somos a echá-y un par pa salir d'esi techu.... anque'l vuelu da munchu respetu.

----------------------------------------------------------

9 de Marzu de 2014

Güei ye un gran día, de los que presten, ya que tas faciendo qu'a dalguien-y se meta'l merucu de trepar nel cuerpu. Dempués d'un día de bloque nel roco de Llugones, saliendo d'ellí sin poder garrar la cuchara pa xintar, llevamos a Charly a Careses a catar un pelín la caliza.

Charly probando sus primeres víes en roca

Xuntámonos unos cuantos ellí (Alberto, Gus, Diego y Charly, más Sonia y Ana a tomar el solín), y entre ver a uno, asegurar a otru y enseñar a Charly y a Diego, pues nun esguilé res, pero bono, estos díes son así, presten igualmente o más.

Alberto y Gus, faciendo un par de V+ bien guapos

Namái repetí Joder con el V+ (que ye un 6b+ jaja), muncho más cenciello de lo que yera a alcordame, ya que les víes desplomaes siguen ensín ser lo mío precisamente. De lo bono, d'esta repetición, ye que pude poner a Diego a pegase enforma con ella, ya que ta más fuerte que'l vinagre.

Repitiendo'l 6b+ de la Faviola y poniendo a Diego a apretar

Charly tuvo xenial, pero necesito llevalu a otra escuela con graos más cenciellos, pa que pueda deprender en condiciones, demientres Gus y Alberto, tuvieron faciendo demasiaes víes na Faviola, pa llueu intentar Tracción Rota en la Z... pero ya tan muncho más cerca d'ella.

----------------------------------------------------------

21 de Febreru de 2014

Un día más, Vicen y yo, averámonos hasta Careses pa siguir trabayando vía a vía. Esta vegada, nun día soleyeru, pero fresquín, decidimos xubir a la Z direutamente, pero quedámonos pelín pillaos nun par de víes o tres, más bien, a la mandrecha de la Z y Satisfation.

Mirando croquis d'antaño y anguaño, somos a camentar que trátase de la Bañera. Nos vieyos así paez marcalo y nos nuevos nun apaecen, pero al llau ta la travesía de Jonás, que si podemos ver que ta xústamente al llau.


Como non, metímonos nes víes, y más menos xubimos per onde podimos, ensín encadenar nada, pero prestándonos aportar hasta la cadena. Pudiera decise qu'hai dos, o tres víes y según los croquis seríen de 6a+ a la manzorga y 6b+ a la mandrecha, quedando quiciás la variante nuesa d'entrar pola mandrecha y salir pela manzorga d'un grau intermediu.

Lo que camentamos el seutor La Bañera y la Vibora (6b) en La Z


Cuando les encadenemos daremos la nuesa versión final, pero nel intre nun quisimos cansar más y recoyimos trastos (la reunión nun tien descuelgue, solo argolla) y fuimos pa la Z, con ánimu de nun lianos con croquis y esguilar en condiciones al fín.

Entamamos pel 6a de tracción rota, pa calecer y magar de facela ambos, fuimos pelín más a la manzorga a investigar un pocu. Hai un reunión estupenda nueva, con una vía tan sólo, la Víbora (6b) que vien nos croquis antiguos, pero'l V+ (Senderos de Gloria) ta desaniciáu por completu.

En definitiva, 6b a vista pa mí, nuna vía de placa téunica pero mui guapa y Vicen líase col crucie de manes y queda ensín encadenala. Dexámosla pa otru día, tirando pa les víes más mítiques de la Z y llegamos a comprobar que del croquis nuevu y vieyu nun coincide nada dafechu.

Vicen faciendo la Variante La Z (6a+)


Pelín de mal rollu con estes coses, poro decidimos nun forzar la máquina metíendonos na Variante de la Z (6a+), que sirviónos nel paséu pela fisura diagonal, pa ver que del croquis nun coincide res. Envede 5 reuniones sólo hai 3, poro val más fiase de lo que vese, porque pue llevar a enmarronase enforma.


Va un tiempu, ya tuviera metíu yo en xardinos al meteme en Cazafantasmas (6b+) y la verdá ye que tuviéremos abondo nel día de güei, y decidimos colar pa casina y siguir investigando como van les víes otru día.

----------------------------------------------------------

2 de Febreru de 2014

Entamamos el 2014 tirando pa Careses, a ver si somos a dir ganándo-y tarrén a esta escuela y más en concretu al seutor de la Z, ya que El Aprendiz y la Faviola, tan ya completaes, al menos por mí. Aún así nesti día, averámonos Pau y yo, a seguir metíendo a Diego y Pilar nesta d'esguilar.

Como llevaron a Nel, tampoco pudieron facer munches coses. Pero al menos, pegáronse en dalgunes víes y sobretou conocieron les víes llargues del Aprendiz, na cual fice'l IV+ n'autoprotección que me faltaba.

----------------------------------------------------------
 
6 d'Avientu de 2013

Siguimos col bon tiempu y aprovechando un vienres nel qu'hubo descansu pa tol mundiu, fuimos hasta Careses, que bien fadría más d'un añu que nun díbemos esguilar ellí. Aparte, fizo un día estupendu, pa que Diego, Pilar y Nel, vinieren con nós, a probar esto de la escalada.

Gus y Paula, trabayando pa que los nuevos trepen per primer vegada

Como siempre fuimos hasta la Faviola, onde Gus y Pau, ficieron les primeres víes, pa que los demás pudiesen trepar en toprope, y saber que ye eso, de ponese un arnés, unos gatos d'escalada, facer l'ochu y demás hestories que van alrodiu d'esti mundiu d'esguilar pelos parés.

Natalia y Pilar esguilando y Nel atentu pa la so ma

Siendo sinceros, a los dos dióse-yos perbien, faciendo tres víes tumbaes caún de la Faviola en toprope, ensín que-yos tuviésemos que coyer, y Diego, metióse a la más cenciella d'elles de primeru, sacándola tamién ensín problemes.

Diego y Pilar dándo-y a dalguna vía en toprope

Dempués llegaron coses más dures, al menos pa Diego, que fíce-y sufrir un pocu colgáu de víes de mayor dificultá, nun vaya ser que camiente, qu'esto ye venir y triunfar, jaja. En fín, pasáronlo en grande y nel mesmu día, ya sabíen que yera un deporte perfectu pa facer xuntos y llevar al neñu.

Berto probando Tracción rota (6a) y yo con Cazafantasmas (6b+)

Cuando colaron con Nel y xintamos dalgo los demás, xubimos enantes de qu'atapeciése hasta la Z, onde Gus y Berto, diéron-y a Tracción Rota (6a) sin suerte y yo metíme en Cazafantasmas (6b+), na qu'esfruté munchísimu hasta'l techu final, onde nun supe mui bien como salir y tuvo que quedar pa otru día.

Una pena... pero valióme, pa tener más ganas entá de tornar a esti seutor, onde hai unos graos perbonos, p'apretar y meyorar ún de los munchos puntos débiles que tengo na escalada, los desplomes.

Despedímonos col Retriñón ñeváu

----------------------------------------------------------

Actualización 2012

Siguimos visitando esta escuela sierense, onde ye un placer pasar el día asoleyando, y sinon que-y lo digan a Kíla, que dempués de corretiar pente los seutores, échase unos pigazos que ya nos prestaría a los demás facer con tanta felicidá.

Otra de les coses guapes que facemos nesta escuela, ye introducir un pelín na escalada a dellos collacios, que nunca nun pusieron un arnés nin engoláronse d'una paré, pero que dempués de probalu, acaben siendo asiduos al grupu, jeje.

Tol grupu con Kíla

No que se refier a les nueses xeres, Pau quitóse d'enriba la Placa nel seutor Aprendiz, la cual atragantábase por mor de la separación de les chapes y como tuve entrenando l'autoprotección, aprovechó pa meté-y con ganes y esfrutar d'un estra de seguros pa encadenala perfácil.

Nel seutor La Faviola, personalmente repetí con cierta facilidá esi primer y únicu 7a de la mio vida, El Protón y Pau, va entrenando en top-rope delles víes, que nun futuru tienen qu'acabar cayendo como ta mandáu.

Como novedá, en Careses, averámonos hasta'l seutor de la Z, onde fice a vista Tracción Rota, un 6a guapísimu, que dióme munches más ganes de prebar les distintes víes d'esti seutor, que ta xustu enriba de la Fabiola.




Hestoria na Peña Careses 

La Peña Careses ta nel conceyu de Siero, y p'aportar a ella lo meyor ye salir de la Pola Siero pa la carretera que va pa la Vega Sariegu. Nesta carretera siguiremos alantre hasta'l pueblu de Careses onde tomamos un desvíu señaláu pa una casa rural, "Peña Careses".

Con ello, siguiremos les indicaciones per varios cruces hasta la propia casa rural, onde detrás tendremos un caleyu onde dexar el coche ensín molestar. Llueu hai que siguir hasta una casa roxa, pela que pasaremos pel patiu d'ella, pa garrar el camín, que xubirá hasta la peña.


Guapísimes vistes dende esta peña

Esta escuela d'escalada ye mui pocu conocía y alcontramos víes mui prestoses tanto de placa, como desplomáu, con variedá de graos pal desfrute de cada ún. Pel momentu tan solo catamos un par de sectores, teniendo'l seutor de L'Aprendiz d'elles víes llargues de grau IV y l'otru seutor, La Faviola, tien abanicu pente'l V hasta'l 7a, colos que tuvimos trabayando duru.


Seutor de la Faviola

La mayor parte de los díes, tuviemos tranquilamente Paula y yo, acompañándonos casi siempre Vicen, Conchi y Celso. Un pocu gracies a esta escuela, Vicen recibió de regalu de cumple, tol equipu d'escalada y a Conchi y a Celso, nun-yos quedó otra que metése de llenu nesti mundiu tamién. Celso tien 4 añinos y por eso nun sal nes semeyes, pero ya esguila p'arriba que mátase, jeje.


Esguilando en Careses

Otros díes, tuvieron con nós, Silvia y Toni, Gus y Sonia, Pangua,... y tol mundiu-y paeció esta escuela una auténtica ayalga pa los meses iverniegos del añu. Alcordáivos: To prohibíu esguilar pente los meses de Febreru y Xunetu (incluyíos) por nidificación


Vidios (2011)



Semeyes (2011)

6b+ mui bloqueru na Faviola



Pegándome col mio primer 7a



Paula currando nun V+ de la Faviola



Vicen en varies víes de la Faviola

Pangua dándo-y duru


Gus y Sonia apretando

No hay comentarios:

Publicar un comentario