miércoles, 17 de febrero de 2016

La Puela (Ayande) - El Buñu

6 de Febreru de 2016

Track: La Puela (Ayande) - El Buñu


Tamos nun día de visita a la Puela, capital d'Ayande pa conocer al nenu de Pangua y Rebe, pero aparte poné-y cara y velu durmir, momentu nel que descansen los pas, Pangua y yo, fuimos dar un paseín pa facer fame.

P'aportar a la Puela, saldremos de Xixón pela autovía A-66, pa garrar la de Grau hasta'l final, onde empobinámonos siempre hacia Cangas del Narcea pela As-15 hasta unos pocos kilómetros enantes de la capital, onde cruciamos la ponte L'Infiernu, garrando la As-14, pasando pelos pueblos ayandeses de la Ponte L.linares y Ruvena, hasta arribar a la capital del conceyu.

Salimos de la Puela (537 m)

Magar d'un pinchín de tortiella nel café Victoria... namái que tenemos que percorrer les cais de la Puela hacia l'Este, p'acolumbrar el monte d'El Buñu enfrente nueso. D'esta manera siguiremos cai alantre hasta topanos con un tramín de carretera na As-17 hasta desviános al pié de la riega de Mouras.

Xubimos hacia'l pueblín de Ferrói

El camín garramos, balizáu dientru del Camín Primitivu de Santiago, va llevanos n'ascensu hacia'l pueblu de Ferrói, el cuál travesaremos con calma, hasta salir a la parte alta d'ésti, dende onde garramos un guapu tramu de pista per los Penedones primeru y llueu Las Colmenas.

Ascensu con una fuerte ventolera hacia'l Monte d'El Buñu

Con vistes al vértice xeodésicu d'El Buñu, pasaremos pela Fonte'l Mediu, empobinánonos pocu dempués pa la carretera que baxa hacia Las Corcolinas. Nesti tramu, deberíemos tener perbones vistes, pero quedámonos con una xabaz ventolera que fainos entainar camín hacia la pista que desvíase hacia'l Buñu.

El Bueñu (901) m cola Sierra de Fanfaráon detrás

Casi a la carrera pasaremos pel vértice de 901 m, echándo-y un vistazu a montes conocíos nesta fastera como'l Panl.lón o tola sierra de Fanfaraón cola so cota de mayor altor, el Cimeiru, rutes nes que siempre la mala suerte nun mos traxo nin les meyores temperatures nin el tiempu más estable.

Baxamos per embarrizaes pistes pel L.lanu la Serra

Apúranos el tiempu y decidimos baxar pela Serra casi al trote, pasando la Campa L'Arenal o más bien el barrizal y el Viguieru, enantes de facer curva pente dellos pinos nel L.lanu la Serra, onde ya descenderemos hacia les cases de Valbona pela Cuesta San Pedro.

Pasaremos per Valbona pa descender al ríu La Puela

Travesaremos la carretera, topándonos con delles cases más, penmediu de les que garramos, en Ca La Pena un PR que baxa direutu a la Puela, trespasando un guapu fayéu que baxa hasta la vega del rigu la Puela, entrando pocu dempués a la par de la piscina y los colexo nel centru de la Puela.

En resume, un agradable paséu pel que conocimos durante un par d'hores la redolada de la capital d'Ayande faciendo, aparte de fame, 9 km con un desnivel acumuláu d'unos 620 m... otru día más.

La Puela n'Ayande

2 comentarios:

  1. Zona que desconozco montañeramente hablando. No esta mal la idea de darse un paseín por los montes cercanos y luego fartar en La Allandesa (por ejemplo)

    ResponderEliminar
    Respuestas
    1. Siempre ye un bon plan si señor... y xubir al Panl.lón con ñeve presta muncho. Cota más alta d'Ayande pero ya lleva pa tol día si vamos dende la Puela. Un abrazu

      Eliminar