jueves, 25 de febrero de 2016

La Feriona del Pilar - Peña Los L.lanos (L.luna)

3 d'Ochobre de 2015


Ya perdí la cuenta de les vegaes qu'Abel convidárame a dir dalgún a facer alpina y por un motivu u otru, fue quedando pa prau dende cuantayá. A la fín, un finde d'Ochobre, fuimos hasta L.luna en Llión y más en concretu hasta la Peña Los L.lanos onde esperábanos La Feriona del Pilar.

Ye la primer vegada que métome nel tarrén alpín, sacante de xeres más montunes como'l Picu Urriellu y collacies de la redolada como Torre L'Osu o Carnizosu, onde alcuéntrome como pexe nel agua, xubiendo casi ensin proteición.

Averamientu hasta'l pilar con camín pindiu pero cómodu

Pero en víes d'alpina hai controlar de meter trastos y sobretou metelos bien, al igual d'andar sollerte con montar reuniones con seguridá. Nun yera'l casu d'esta vía, na que les reuniones tan montaes con parabolts al igual que les proteiciones nes plaques... eso sí... too con un toque picante a base d'alloñes considerables.

Nesti sen, ye un placer vese mover a Abel, con una tranquilidá suprema pa navegar nes plaques d'adherencia llioneses y tamién p'acerar si un pasu lu pide y ta forzándose de más. Too esto y muncho más dediqueme a deprendelo nes hores d'escalada de segundu.

La Feriona del Pilar... más info en El Maquis

Eso ye, de segundu, por muncho qu'aprétese en deportiva, l'alpina requier de muncha más esperiencia y ehí hai que ser humilde, paciente y deprender de quien más sabe, asína que dediqueme a portear la mochilina y a apretar en llibre tolos llargos recoyendo los seguros hasta la compaña del collaciu de cordada.

Dicir que pesie a nun llegar casi al 6a, l'adherencia llionesa ye traicionera y yes un finu o pues pasales realmente putes en munchos quintos y tremar como una fueya con eches un güeyu al caberu seguru, asina que sollertes con fiase muncho de los graos.

Primer parte de la Feriona onde concéntrase la mayor parte téunica y dura

En total, tendremos una media horina d'acesu al pie de vía y nel nuesu casu unes 4 hores d'escalada pa superar los 8 llargos de la vía, concentrándose les mayores dificultaes téuniques nos 4 primeros, siendo inclusu nel cuartu onde muncha xente rapela la vía abandonando la vía.

La segunda parte de la vía, podría dicise que ye per más tarrén montañeru navegando per una arista más afilada la cual da opciones de llibrar los pasos más duros, que los hai, pero son mui aisllaos baxando dempués el nivel abondo.

Últimos llargos con pasos sueltos y mayor relaxación na esguilada

Magar de la escalada y el bocata, decidimos xubir hasta lo alto de la Peña Los L.lanos, al menos al cumal oeste, ya que vemos que la peña sigue alantre hacia l'este hacia cotes más altes que güei nun tenemos ganes de conocer.

Coles mesmes, tendremos que recoyer tolos trastos y baxar per una canal podre, a la mandrecha de la vía, nel sen d'ascensión. El descensu nun ye complexu, pero hai que tener curiáu de nun tirar piedres al compañeru, asina que nada de quitar el cascu eh!!

Toca descender a pata tranquilamente

En resume, vía llarga, pa facer munchos metros d'alpina y poner la tiesta nel so sitiu coles plaques, faciendo una actividá perguapa qu'en total llevónos pocu más de 6 hores, eso sí, enllenes de diversión y de munches más ganes pa da-y la próxima vegada de primeru.

Ta llueu!!!

Camudando'l Camín alpinamente

No hay comentarios:

Publicar un comentario