lunes, 22 de febrero de 2016

Espinaréu (Piloña) - Xerra d'El Sellón

13 de Febreru de 2016

Track: Espinaréu (Piloña) - Xerra d'El Sellón


Aportó l'iviernu a Asturies, tarde, pero aportó a la fín y con ello inestabilidá meteorolóxica y dificultaes pa restolar que fastera d'Asturies ye la meyor p'aventurase. Si a esto, amestámos-y que la escoyeta de rutes de la mayor parte del grupu, fuese a grandes altores esti añu, pues tengo que sacame del bolsiellu más d'una ruta alternativa al calendariu d'aniciu.

Pa esti finde en cuestión, teníemos una ventana de bon tiempu hasta'l mediudía o un pelín, asína que descartábemos cualesquier ruta del occidente o sur, por entrar el frente per ellí y sobretou por fuertes ventoleres. Con estes premises, apetecíame tornar pal conceyu de Piloña, que pesie a nun tener grandes altores, sí que tien un tarrén montuno perinteresante con grandes accidentes xeográficos sobretou de calter hidrolóxicu.

Nesi sen, averámonos hasta Espinaréu, non pa metenos nes fondes foces del ríu Infiernu, pero sí col envís de conocer un pelín meyor tol valle dende una posición privilexiada como ye la xerra d'El Sellón, xerra que da nome a un camín real que percorre de norte a sur dende Tarna a L'Infiestu siendo una de les grandes víes de comunicación d'antaño.

Preparaos pa caleyar n'Espinaréu (274 m)

Pa conocer esti camín, como ya dixe, saldremos dende Espinaréu, al qu'aportaremos magar del viaxe dende Xixón pela minera empatando cola autovía'l Cantábricu del ramal d'Uviéu,hasta salir na salida de Nava. Na nacional N-634 travesaremos el conceyu de Nava entrando nel de Piloña hasta parar na capital, L'Infiestu onde almorzaremos tranquilamente.

Llueu del cafetín, salimos de L'Infiestu pela PI-4 hasta aportar a Espinaréu, onde aparcamos los coches na plaza la ilesia al llau del máxicu texu. Preparaos, partimos pente les cais d'esti guapu pueblu, nel que sorprende'l procuru na restauración de les cases y el bon estáu de munchos horros y paneres, hasta garrar la mesma carretera pela que vinimos, durante 750 m saliéndonos a la manzorga pel crucie hacia Ferrán.

Normalmente, suélese acceder al camín del Sellón al traviés del pueblu de San Vicenti, pero como siempre, intentamos facer una ruta circular con entamu y fin nel mesmu pueblu, poro vamos aventuranos per siendes que nun sabemos mui bien como tan anguaño. 

Metémonos pal monte al traviés de les cases de Ferrán

Una vegada que tamos en Ferrán, perpasaremos les cases siempre pela pista formigonada más a la mandrecha hasta dexar atrás la cabera d'elles, viendo a la nuesa manzorga unes antigües instalaciones d'una cantera.

Xustu nuna curva a la mandrecha, veremos como sal un camín valle alantre, descubriendo la incógnita que tenía pa esta ruta. Con más tranquilidá, sabiendo qu'al menos tenemos blimes pa un ascensu pel valle de Fonte de Riegu, vamos avanzando bien con tramos más llimpios y otros dalgo más zarraos.

Fadremos camín, más menos hasta l'altor del colláu Gobia a unos 500 m, onde'l valle acaba zarrándose de broza y debemos escoyer dalguna de les varies traces de sienda que traviesen el valle, saliéndonos a la parte alta siempre pela mandrecha.

Salimos a la parte alta del Monte La Roblosa pa crestiar hasta'l cumal

Llueu de salir de Gobia alantre, tendremos vía llibre pa caleyar per tarrén medianamente llimpiu, teniendo grandes vistes tanto al norte col Sueve como al sur, con tol conceyu de Casu, cansándome casi de contar tolos cumales qu'arrodien estos valles dende'l Vizcares hasta'l Facéu.

Dicir que si pal norte tenemos lluz y sol, el sur fainos camentar qu'hasta les tropes de Mordor tan rearmándose. La cosa pinta fea, asína qu'apuramos el guapu crestéu que fainos esnalar penriba del monte La Roblosa hasta'l cumal de la Peña Los Güervos onde ta'l vértice xeodésicu.

Monte La Roblosa (826 m)

Los diez miembros (humanos) más los tres perros sacámonos la semeya de rigor y coles Peñes Santes despidiéndose pente les ñubes colamos d'ellí pasando pel picu La Roblosa (835 m) cumal más altu d'esta especie de tayuelu que ye la parte alta del Monte La Roblosa, faltándonos el Llanón de 805m

La verdá ye qu'hai poca diferencia y quedámonos col del vértice como puntu de referencia por tener un cumal más cómodu, pero tovía quedábanos por ascender al más altu de tola xerra d'El Sellón, asína que tocaba siguir alantre.

Damos zapatu camín real del Sellón alantre

Baxaremos al colláu La Verde onde garramos el camín real del Sellón, pel qu'avanzase a toa mecha y más viendo la que se nos vien enriba. Nel intre, el vientu entama a azotar con fuercia, asína qu'entainaremos el nuesu pasu hacia la muezca Perón que danos pasu pente los picos del Cabezu y el Cantu Les Cadenes.

D'ellí topámonos con un guapu grupu de caballos y unos entamaremos l'ascensu al Picu La Ceniza, qu'anque pegáu al propiu camín, fainos lluchar col vientu p'algamar el so pequeñu cumal de 889 m, llugar más altu del Sellón.

Ascendemos al Picu la Ceniza (889 m)

Demientres xubíamos unos cuantos a esti picu La Ceniza, los demás tiraben pa la collada Sellón (807 m) a buscar un llugar onde xintar el bocata, pero nel tiempu que tardamos en llegar púsose a llover a esgaya, asína que tuviemos qu'abortar misión.

Colos chubasqueros y tolo que teníemos a man, ya qu'aparte de llover el vientu tornó del suroeste a noroeste poniéndose fríu enforma, poro baxamos a escape pasando pel Portiellu y Ente los Cuetos hasta entrar en L'Omedal pela Bolera.

Ellí garraremos pista asfaltada, qu'anque pudiera paecer que los más 3 km de camín que nos restaben diben ser un coñazu, nun fue asina ya qu'esta carretera que cláramente tan sólo yera una pista años atrás va per llugares preciosos arrodiaos tol tiempu de viesca autóctono.

Baxaremos de la collada Sellón hacia'l valle d'Espinaréu de nuevu

Asina que con bon ánimu, al que xuntóse'l tiempu dexando de llover un ratín, baxaremos de L'Omedal en delles envueltes dexando de llau los crucies a Fresnéu primeru y Rozapanera dempués, pa siguir casi en llinea recta pasando per L'Envernal hasta aportar a Espinaréu de nuevu.

En resume, ruta que si madrugamos, podemos convertila nuna mañanera estupenda pa xintar en cualesquier chigre d'Espinaréu o de Piloña en xeneral, anque nosotros llegando dalgo tarde quedamos nel portal de la Ilesia con unes cerveces del chigre.

Por dar unos datos, fueron casi 11 km con una ascensión acumulada de 830 m nun total de 5 hores y media, por tanto con bones posibilidaes de fartura a posteriori jeje.

Que vos preste!! 

Camudando'l Camín per Piloña

No hay comentarios:

Publicar un comentario en la entrada