lunes, 11 de enero de 2016

Muriel de la Fuente (Soria)

5 d'Agostu de 2015

Otru de los llugares onde dir en Soria a esguilar ye na redolada de la Fuentona de Muriel y más en concretu al llau de la pista que xune los pueblos de Muriel y Abioncillo, al par del ríu Abioncillo y por tanto nun sitiu bien guapu.

Como veis na semeya, plantámonos nel pié de vía... con un campu base que ya-y prestaría a los himalayistes. En fin... coses de familia y de tar nel pueblu, que xuntámonos toos y pases un día de sol, xinta familiar, trepes un pocu y báñeste nel ríu, lo cual dempués d'un día muncho calor ye mui d'agradecer.

Pié de vía... o campamentu base más bien

Falando d'escalada, tuviemos sobretou nel seutor Pirámide, ya que siendo tantos, pente'l pegue d'ún y el de l'otru, va pasando'l tiempu y cuando te quies dar cuenta, ye la hora de tomar una cerveza bien pasada la tarde.

La mayor parte de los pegues tuvieron centraos nel V nomáu como De todo menos dinero y en Cálida Trinchera, un IV+ llargu, perfeutu pa quitar mieos a los escolinos nesto de la escalada. Miguel y Río, tuvieron el so bautismu escalador nestos parés y nun lo pasaron mal del too, la verdá.

Pau y Sonia trepando en De todo menos dinero (V)

De todo menos dinero fué encadenáu de primeru por Pau y Sonia, lo cuál prestóme muncho ya que ye bono volver a atrevese a facer víes de primeru y tamién el IV+, facilín, facilín y mui prestosu pa facer dellos metros.

Personalmente, anduve intentando forzar el pocu grau d'esta escuela sacando a vista Dedica Acción (6b), La que has liao, Pudito (6b) y Abioncillo no es tan sencillo (6b+), aparte de les otres pa montar la vía pa los demás.

Miguel na so primer vía en Calida Trinchera (IV+)

Esta segunda visita, volvió a ser una maraviya y el grau baxu de la escuela, fai cenciellu que xente que nun ta d'esguilar atrévase a probar y qu'aficionaos ensin munchu grau, pueden fartase de facer una vía tres d'otra hasta reventar de cansanciu.

Volveremos de xuru...

Muriel de la Fuente
 
Croquis modificaos por mi de la escuela d'escalada de Muriel de la Fuente, por mor de Montañeros Burgaleses. Gracies y col so permisu.
 


-------------------------------------------------------------------



3 d'Abril de 2015

Nes visites a Soria a pasar unos díes, siempre intentábemos esguilar pa nun perder muncho la forma y como non, les nueses trepaes centrábense na escuela de Valdenebro-Boos, cerquino del Burgo de Osma, non mui lloñe del mió pueblu, Recuerda.

Pero, quiero remembrar qu'esta escuela nel cañón del ríu Sequillo, ta regulada por añeramientu nos meses de primavera más menos (Marzu a Xunu), asína qu'esti añu decidímonos a restolar pente páxines web al alcuentru d'una escuela onde poder trepar y pasar un día tranquilamente.

Llugar preciosu pa pasar el día y esguilar con calma

Asina que, con un tiempu maraviyosu, Pau y yo fuimos hasta'l espaciu natural de la Fuentona de Muriel, y más en concretu, al pueblu de Muriel de la Fuente, onde sal una pista a la manzorga que lleva hacia'l pueblu d'Abioncillo, yendo paralela ésta al percorrer del ríu Abión.
Con bon firme na pista, aportamos al pié de vía col mesmu coche, pero siendo decentes, podemos dexal al empar d'un antiguu refuxu de forma raruna. Llueu, caleyaremos 3 minutos a lo más pa llegar al pié de vía, anque lo dicho si queremos dexar trastos la pista pasa al llau de les víes.

Trabayamos nos seutores Río y Australian Blonde

Pau y yo, al aportar a la escuela quedamos ablucaos col sitiu tan guapu que tamos conociendo, camentando de xuru pal branu, tornar ellí col bañador, pegándonos un chapuzón nel ríu magar d'unos pegues.

La escuela, en términos xenerales, ye de grau amable con máximu de 6b+ me paez y una vía prestosina pa guah.es de III+, que puen facer neños con playeros de trekking pa deprender a descolgase y demás.

Camudando'l Camín en Muriel de la Fuente

Nós, entamando hasta por esi terceru, fuimos dándo-y a les demás vies del seutor Río, sacando a vista toes dexándome un 6b ensin probar porque ya yera la hora de xintar. Magar de picar daqué, siguimos col seutor Australin Blonde, dexando les parees onde había que trepar un pelín p'aportar al pié de vía pa otru día.

Poro, asegurando al par de Kíla, que bañábase nel ríu y venía a secar al prau, tamién dimos preste a unes cuantes vies más, toes elles llargues y grau aseláu, siempre bien equipaes y con ciertu toque alpinu nel so percorríu.

Nun se pué pedir más... de xuru que tornaremos en branu pa siguir faciendo víes... una tres d'otra.

No hay comentarios:

Publicar un comentario en la entrada