Track: Sotres (Cabrales) - Cuchallón de Villasobrada - Vega Urriellu (Cabrales)
Un cambiu de trabayu va dame dellos díes de llibertá semipagao, poro falo con Fernan y colamos pa Picos a facer actividaes interesantes. Lloñe de peganos xataes ensín xacíu, camentamos que lo meyor ye intentar actividaes quiciás más complexes téunicamente pero que nun obliguen a percorríos escesívamente llargos.
D'esti xeitu, vamos escoyer la calidá envede la cantidá nes rutes a la gueta d'esos Ortzamendiren Sua,esos montes que tienen un picor pal montañeru, una atraición imposible d'aparar hasta que nun seyas a algamalos.
Otru añu más, escoyeremos de campu base la Vega Urriellu, contando con que nesta dómina del añu, el refuxu tará menos masificáu y podremos esfrutar de mayor comodidá qu'en meses estivales. Pero enantes d'aportar al refuxu vamos facer de camín la nuesa primer ruta, que tien de llevanos a conocer un cumal pelín escaecíu nel macizu central: El Cuchallón de Villasobrada.
Partimos de la curvona de Sotres (937 m)
P'aportar a los sos dominios, tendremos de salir dende Sotres de magar d'un almuerzu n'Arenas. Como siempre fadremos el míticu camín dende Xixón pela autovía'l Cantábricu hasta Posada, xubiendo al Altu H.ortigueru y baxando per Canales, Po y Carreña.
Dexaremos la furgo de Fernan n'Arenas y siguimos con calma hacia Poncebos, pa garrar la carretera a Sotres pasando per Tielve, alcordándonos de les nueses andances de la Travesera. Col coche aparcáu na curvona, preparamos trastos y salimos per enésima vegada hacia las Vegas de Sotres.
El día ta murniu, anque tenemos la esperanza de que col pasu'l tiempu vaya abriendo. Asina, fadremos camín sele, garraremos agua na fonte de las Vegas y metémonos nel senderu qu'asciende hacia'l valle Las Moñetas, escoyendo nesti casu'l que xube hacia'l Pozu Las Moñetas.
Facemos camín dende las Vegas de Sotres pel Valle Las Moñetas
Hai que dicir, qu'a grandes rasgos, esisten dos formes de cruciar Las Moñetas: pel llau de Peña Castil o pel llau del Pozu Las Moñetas. Y quien separa más menos ambos trazados?... Pues el Cuchallón de Villasobrada.
Tou esto, ye teoría, porque na práutica esti valle ta estráu de h.itos y de siendes que xunen ambes partes del valle y ye dafechu una llocura, pudiendo perdese'l trazu de sienda con muncha facilidá y si hai borrina muncho güeyo.
Con estes premises, Fernan y yo, navegaremos pelos h.oos de las Moñetas, averándonos hacia'l Pozu Las Moñetas hasta pocu antes de la entrada a la Vega Carrazosu onde dexamos la sienda principal y empobinámonos hacia'l H.ou L'Arena, pasando pela Becerrera y la mah.ada Las Moñetas onde alcontramos munchos vivacs fechos baxo grandes peñes.
Salimos de la borrina non sin dificultá hasta topanos col Cuchallón
Pasaremos pente los h.oos de l'Arena pela mandrecha y el de los Machos pela manzorga hasta asitianos baxo la impresionante aguh.a que cae a mou de contrafuerte del Cuchallón. Nel intre, nun viéramos res pa dengún llau y un mugor sobromanáu ficiéranos sudar como nunca, pero la suerte
del que la busca y l'alcuentra, fizo qu'allugáramos a descansar baxo l'aguh.a, viendo'l paré per onde tendríemos de restolar un puntu feble pel qu'ascender a esti Cuchallón.
Tuviéramos más de 4 hores ensin parar pente'l borrín y agora tamos al sol pero con un vientu fríu, racheru y molestu que nun sabemos lo que pudiera condicionar nun cumal tan aéreu. Tenemos material (arneses, cuerdes y dalgún aparatu) pero coses que suelen pasar decidimos xubir a pelo.
Vía d'ascensu al Cuchallón de Villasobrada
Ascenderemos pela espece de canal-llera pente'l contrafuerte y la proa que ye'l Cuchallón y anque paeza que más al fondu pudiéramos tener menos desnivel de paré col cumal, tan sólo tenemos la cara norte como llugar d'accesu ensín esguilar per un paré vertical.
D'otra miente, nun ye que vaya dexase facer ensín lluchar, ya que-y entraremos per dos canalizos verticales, Fernan pel de la manzorga y yo pel de la mandrecha, teniendo meyor trepada y menos espuesta la de la manzorga, teniendo yo que facer travesía d'un a otru al final con varios pasos complicadinos y peligrosos.
Primer tramu de canalizos (GÜEYU... garrar el de la manzorga) y terraces posteriores
Como saber que vas bien o vas mal nuna ascensión en los Picos, na que tienes referencia d'ascensu en llibre sin material? Pues, si alcuentres un cordino del que rapelar, ye que vas bien y eso topámoslu na salida del canalizu de la manzorga y si te topes con un clavu como pasóme a mí na Torre L'Osu l'añu pasáu, entós ye que vas mal y pues acabar pior, jeje.
Ún de les coses bones de dir con Fernan, aparte de lo esperiencia, ye la facilidá que tien pa ver los pasos más cenciellos y ye que mi canalizu entamaba meyor pero diba garrando verticalidá poniéndose'l tema peligrosu, demientres que Fernan garró'l más pindiu y encaxonáu de primeres pero daba más posibilidaes de salida a la manzorga pa llibrar bloques y salir p'arriba... hai que saber mirar y pa eso tien un güeyu entrenáu Fernan.
Superaos unos 30 m de trepada, pasamos a un tramu de terracéu per roca podre, nel que vemos lo vertical d'esti picu si tiramos dalguna sin querer, esnalando la peña como si nun costare. Perpasamos esti tramu y aportaremos a una placa d'adherencia como poques fice na mió vida en alta montaña en llibre.
Tremenda placa d'adherencia y arista fina hacia'l cumal
Falamos d'unos 15 m d'altor nos que tendremos que trepar más menos en S, mediante travesíes de pies con agarres de manes mui xustos. Tan xustos que sólo esisten les preses necesaries pa salir p'arriba, asemeyándose más a una vía de deportiva qu'a un pasu de trepe nun cumal de Picos.
Como non, magar d'afitar mui bien cada pasu, cada ñapina y cada agarre qu'usamos, alcontrámonos nel focicu con un anillu del que poder rapelar na baxada... llástima que dexáremos too nes mochiles. Colos nervios bien templaos dempués de la placa, treparemos sin problemes al cumal, curiando tamién de nun tirar peñes nos trepes ya que ta podre enforma.
Cumal mínimu del Cuchallón de Villasobrada (2412 m)
5 hores d'actividá púnxonos no más alto d'esti Cuchallón de Villasobrada y si tien 2412 m d'altor tan sólo debe tener 3 metros cuadraos onde poder movese ya que tolo demás ye aire alredor. El vientu tampoco anima muncho a quedase más tiempu, asína que facemos la semeya de cume ensín meneanos y p'abaxo que tenemos un telar fino pa destrepar la placa y el canalizu.
Nun voi comentar que lo meyor p'ascender esti picu ye xubise un arnés y un par de cordinos auxiliares de 30 m pa quitase dos destrepes abegosos porque cae de caxón. Pero si nun los tienes, pues toca pegase cola plaquina finísima y si pa trepala ye esixente pa destrepala más aún, así que güeyu anque una posible resbariada nun sedría mortal pudiendo parar nes terraces con suerte.
Vistes dende'l cumal del Cuchallón (Navarros, Campanarios, Vieh.a, Morra, Torre L'Osu...)
A la escontra, namás entrar nos canalizos hai que poner tolos sentíos a furrular, porque cualesquier fallu ye sinónimu d'un fostión d'ordagu. De toes formes, dicir que'l canalizu de Fernan yera más noble que pol que xubí yo y negóciase bastante meyor de lo que pensábemos na xubida.
Sanos, salvos y mui a gusto cola ascensión descendemos pela pedrera hasta les mochiles y taremos un bon ratu, bebiendo agua, xintando y descansando d'una actividá potente a un cumal, que nel centru del valle Las Moñetas, tien unes vistes de 360 graos mui, mui guapes dende'l Cordal de H.uan de la Cuadra cola Peña Vieh.a detrás, a Santanas, Navarros, Morra, Torre L'Osu, Carnizosu y Peñe Castil ... casi na.
Descendemos con curiáu del Cuchallón.. sollertes a la placa y garrar bien el canalizu
Baxo un sol tímidu, ponemos les mochiles al llombu y xubimos hacia la collada Bonita, onde recíbenos, aparte d'unes raches gafiendes de vientu, el nuesu collaciu de siempre, el Picu Urriellu. Albidramos posibilidaes, miramos el reló y decidimos que ya tuviera bien, ya que llámanos testar la Torre las Colladetas, pero non con estes ventoleres.
Poro, demientres vemos rapelar de la cara Este del Picu a unos escaladores, vamos descendiendo pela descarnada pedrera de Collada Bonita hasta'l colláu La Celada, onde tomaremos la canal homónima que tien de llevanos sin más problemes hasta'l refuxu d'Urriellu, teniendo tiempu pa descansar, llavanos un pelín y tomar unes cerveces enantes de la cena.
Tramu de la collada Bonita hacia la Vega Urriellu... imposible cansar d'estes vistes
Casi demasiáu tiempu tuviemos, sobretou viendo que ye ún d'esos díes nos que nun hai quien pare fuera na Vega Urriellu, ya qu'al fríu por mor del vientu, el Nuberu tuvo a bien, meter de nuevu la borrina y el orpín, pa que nun hubiese otra cosa que facer que charrar cola xente al llau de la estufa.
En resume, ascensión perguapa y potente con posibilidá de facese nel día pelas Moñetas dende Sotres, quedándose pa nós nuna travesía de casi 9 hores, 12 km y un desnivel acumuláu de 1950 m, anque lo verdaderamente importante son les dificultaes y concéntrense toes nos trepes de la fastera norte del Cuchallón de Villasobrada.
Que vos preste... y si lo repetís... güeyu!!!
Camudando'l Camín cola sur del Picu Urriellu... un clásicu
No hay comentarios:
Publicar un comentario