lunes, 26 de octubre de 2015

Vega d'Enol (Cangues d'Onís) - Pelabarda - Cordal de Cuadonga - San Vicenti - Ponte Dobra (Cangues d'Onís)

30 d'Agostu de 2015

Track: Vega d'Enol (Cangues d'Onís) - Ponte Dobra (Cangues d'Onís)


Espertamos nel refuxu de Pastores de la Vega d'Enol, magar d'una nueche increyible na que tuviemos na mesade fuera charrando hasta más allá de les doce de la nueche, pa dempués durmir sólos los tres nuna habitación, teniendo tol espaciu del mundiu nes lliteres.

Con calma, recoyemos y preparamos la mochila pa una nueva xornada montañera. Nun sabemos lo que nos espera, ya que llevamos un plan d'entamu y varios planes B, tanto ye así, que fuimos previsores y dexamos ya otru coche nuna posible salida mui lloñe del nuesu destín nel Restañu, onde quedara'l mió coche'l día anterior.

Salimos del refuxu pastores de Vega d'Enol (1092 m)

Si la cena nun fuera mui allá, pol preciu y les posibilidaes, l'almuerzu ye tamién tipu refuxu, poro muncho tienen que deprender estos rapazos de refuxos muncho más aisllaos, onde cénase meyor y l'almuerzu pue tar llimitáu un pelín más pol aprovisionamientu... pero equí... manca la maera.

Ensin más... pagamos lo que se debe... en cerveces ya que tolo demás taba pagáu, despedímonos y salimos hacia Pandecarme, pasando al llau de la guapa Vega La Cueva y del H.ou La Ilesia, onde vemos al fondu'l peñatu de Paré Merín, nel cordal de Cuadonga, onde teníemos una posible escapatoria nesa direición.

Empobinámonos al mirador del Rei, pasando por Pandecarme

Pel momentu, caleyamos sele, viendo que'l día nun pintaba mui allá, anque l'alborecer fuera claru, taben entrando ñubes tres de les Peñes Santes y pintaba feu, tirando a mui feu. Aún así, el primer tramu de la ruta diba ser seguru de toes, toes. Poro, xubimos al Mirador del Rei, onde dimos vista a la baxada del ríu Pomperi dende'l Cantu Limpóu onde nómase Ridimuña, hasta'l ríu Pelabarda.

Los nuesos pasos tienen de llevanos tamién hasta esti ríu y más en concretu a la ponte que lu crucia, sicasí, enantes tendremosqu'aventuranos pela viesca de Pome, llugar máxicu, casi estrañu na qu'al pocu d'entrar piérdese cualesquier tipu de sienda y toca orientase col GPS, empobinándose siempre en baxada y un pelín a la manzorga.

Cruciaremos la viesca de Pome... llugar máxicu y pelín misteriosu

Saldremos de Pome, anque costónos camudar el sen delles vegaes, pela fastera occidental de Pome, onde dimos vista al ríu Pomperi dende lo alto. Nel intre, orientase ye más cenciello y alcuéntrase restos de siendes que van llevanos xustamente al llugar que queríemos conocer: La Mecedura del Pomperi y el ríu Pelabarda.

Tola baxada facémosla baxo una escuridá fonda ya que la negrura de la viesca y el día nun acompañen, pero al aportar a la mecedura, entama a llover como si nun costara, teniendo que poner los chubasqueros y torgando nel puntu, cualesquier posibilidá de llevar nuestros planes hasta'l final.

Topámonos navegando col ríu Pelabarda

Que planes yeren? Pues meyor desvélense pa otra intentona. Darréu toca xubir pela pindia cuesta del Tabláu dende'l calce del ríu Pelabarda hasta casi l'altor de Paré Merín, onde alcontramos la braña la Cubertoria, llevándonos media horina.

 Equí, garraremos agua, na fonte'l Cucián, y ya tendremos claru, cual ye la nuesa ruta ya que nun tenemos otra salida que cruciar de sur a norte tol cordal de Cuadonga hasta la llende de los conceyos de Cangues d'Onís y Amieva na Ponte Dobra.


Entamamos el cordal de Cuadonga xubiendo a Peñes Negres (1083 m)

Dexaremos Paré Merín a la mandrecha y restos de la mah.ada de Pilordoña a la manzorga, pa siguir a un colláin a la mandrecha de les Peñes Negres. Estes peñes son la mayor cota de tol cordal de Cuadonga y nun podía dexar pasar la oportunidá xubiendo en solitariu hasta los 1083 m de la peña más alta.

Nun ye una ascensión cómoda, siendo un llaberintu de peñes calices y broza durante tola ascensión y pa más, el cumal son peñes con cayida hacia'l Dobra y pocu espaciu. De toes formes, ye un bon mirador pa Pelah.ierru onde ta la mecedura los ríos Dobra, H.umh.umia (nesti tramu final nomáu Gusteguerra) y Pelabarda.

El tiempu meyora demientres facemos kilómetros pel cordal de Cuadonga

Del collaín con Peñes Negres, baxaremos demientres abre'l día y el sol quítanos esi fríu, hacia'l valle'l Pisón, onde baxa hacia'l Dobra la Canal de Reculo, aportando más menos a la fastera de Timarru nel cordal d'Amieva.

Nós, siguiremos valle alantre en direición norte, dexando a la mandrecha la viesca de Gusticedi, baxando a tramos mui bien y otros con delles dificultaes pola broza nel camin hasta Urbiandi. Hai que dicir, que la xerra de Cuandonga, caltién un ambiente ganaderu perbonu, que fai que les siendes tean perbien y puédase caleyar a bona velocidá, sacante dalgunos tramos más tapecíos.

N'Urbiandi, decidiremos mirar el mapa y desdexar dellos tracks que tenía preparaos per Tresllué, xubiendo un pelín hacia'l Llanu Les Espineres, dexando la canal d'Urbiandi a la nuesa manzorga. Da muncho que pensar toes estes canales que baxen al Dobra so la posibilidá de baxada... dalgún día habrá qu'intentar conoceles.

Vamos aportando a cada pasu a meyores siendes sobretou a partir de Breceña

El Llanu les Espineres, sedrá'l nuesu últimu puntu altu a 879 m y baxaremos ensin parar per guapos llugares como'l Porru H.ulagua, meyorando muncho'l camín sobretou a partir del monte Breceña. Baxaremos dempués pela Cueste Breceña hacia Ñah.uentes, teniéndonos que parar en Sulapeñe, ya que Charly y yo, nun podiemos dar un pasu más, por mor d'un dolor de pies descomanáu.

Llevábemos casi 6 hores de ruta, nes que durante una hora entera tuviemos baxo la lluvia, sumáu a la paliza del día anterior y un calor inhumanu que llevamos sufriendo na cabera parte de la ruta, fizo que necesitáramos media hora tiraos baxo la sombra y sin botes.

Entamamos al fin la baxada hacia'l ríu Dobra

Ta claro que tengo problemes nes plantes de los pies, llevo sufriéndolo dende la Travesera y lo que quédanos de ruta nun va ser meyor precísamente, ya que tendremos más pista y siempre en baxada pa recalentar más les plantes.

Son les 3 y media de la tarde y empobinámonos hacia'l Dobra garrando en Ñah.uentes un entamu de pista rodao en xubida, para llanear pel GR-105 hasta la Collada, onde acompáñemos bones vistes a picos de Ponga y Casu y entamamos el descensu hacia los mayaos de Payares, onde'l GR tira pa Següencu y nós debemos abandonalu.

Averámonos a San Vicenti per un seu increyible de caleyar

Fadrémoslu con una envuelta a la manzorga baxando con desnivel perfuerte pela H.abariega, L'Acebal y El Carrizal, pa pocu a pocu, dexar de baxar tan fuerte y per camín ampliu y entamar una traviesa pel Pozu Caneyu qu'acaba tresformándose nun seu tan guapu como eslomeciente pa nós, ya que díbemos col pilotu colloráu.

Casi nun teníemos agua, el calor yera perfuerte y el cansanciu ya yera descomanáu. Siguimos seu alantre y Carlos tien que parar porque casi ye a marease, xusto al altor de la cayida sol seu de la Xerra Los Cubeyones.

Magar d'una paradina, pasamos el tramu más aeréu del seu y finámoslu na viesca de H.elguera, onde pasamos al descensu final hacia la Olla San Vicenti, el cual ye enforma pindiu y sin un senderu bien marcáu, pero podremos negocialu bien, ya inclusu siguir rastros de sienda que llevaránmos a antigües construiciones y a la fín al baruyu xente qu'habia na Olla San Vicenti.

Baxada pindia hacia la Olla San Vicenti

Nunca viera tal cosa... quiciabes soi de los pocos asturianos que nun conoz esti requexu oriental d'Asturies, pero quedé ablucáu cola capacidá que tienen los asturianos de tresformar una ayalga ñatural d'Asturies, nuna piscina pública de cualesquier conceyu... aquello paecía una romería de prau.

Sacante d'esto... llegamos tan n'arba de les nueses fuercies que diónos igual ponenos en porrica, llantar el bañador y peganos el bañu más especial que me dí en munchísimu tiempu. Cuantayá nun esfrutara d'un bañu tan prestosu y con tantu nivel de recuperación mental y físicu.

Fadremos en chancles la sienda de la Olla San Vicenti a la Ponte Dobra

Con más de media hora de relaxación y spa na Olla, decidimos que yera bona hora pa dar fin a esta aventura de fin de selmana. Garramos los trastos y col bañador moyáu y les chancles ficimos los 40 minutos de camín, coles botes ataes a la mochila.

Fuera de cualesquier capacidá de crítica, esti paséu paeciónos guapu, con más posibilidá de bañu, que pesie a ser más de les 6 de la tarde, seguía apeteciendo magar de caleyar siquiera 5 minutos. Pasaremos pel colláu Sangrinos, La Becerrera y el Requexu enantes d'aportar a la Ponte Dobra, onde al pocu de pasar per esti monumentu aportamos al aparcaderu del chigre onde dexáremos el coche munchisimes hores enantes.

En resume, ruta preparada como escapatoria que dexónos, aparte de frayaos, con un tastiu a gran xornada per fasteres ganaderes del Cornión, onde los mayaos, les canales que cayíen al Dobra y los requexos calizos tuvieronmos entreteníos durante 21,6 km, 9 h y 40 min y 870 m de desnivel acumuláu.

Una gran travesía... que vos preste

Camudando'l Camín na Olla San Vicenti

2 comentarios:

  1. Que bona ruta, Berto. Perguapa. Faen falta dos coches, pero ye facil algamalo. Peñes Negres téngolu pendiente. Na seronda l´añu pasau qusimos facelu pero garronos un dia de ñublu zarráu que cuasi quedamos allí. Pa otra vegada voy recomendate baxar al ponte Pelabarda pel camín de Següencu dende la vega la Piedra. Pome ye perguapu, pero a mi prestome más baxar per allí.
    Un saludu

    ResponderEliminar
  2. Pues sí, tenía'l to track de la baxada por Pomperi... pero nun conocía Pome. Como les miós intenciones diben per otru llau, quédome cola opción tuya pa otra vegada. La verdá que'l tiempu fué'l que nos fizo decidir un plan u otru. La Travesía final fué tremenda... una auténtica maraviya. Un saludu

    ResponderEliminar