miércoles, 30 de septiembre de 2015

Colláu H.ermosu (Valdión) - Traviesas del Llaz - Mueñu - Caín (Valdión)

6 de Xunetu de 2015

Track: Colláu H.ermosu (Valdión) - Caín (Valdión)


Tercer estaya de la Travesera 2014 - 2015 siendo ésta la más esperada por mí, la que más estudié y la que más respetu dábame y nun fueron ensin xacíu los mios esmolecimientos, anque non por mí, sinon pol restu de los collacios de ruta.

Alborecemos nel Colláu H.ermosu a 2067 m y si'l día anterior anduve restolando ramples nomaes torres pol so desplome so les canales como las de las Colladinas, nel día de güei ascendemos unos pocos metros pa facer la semeya d'entamu de ruta na Torre H.ermosu (2117 m)

Partimos de la Torre H.ermosu (2117 m)

Equí tendremos les vistes más deseyaes pal espertar d'un montañeru, dende les vistes hacia'l macizu del Cornión coles Peñes Santes, hasta les cercanes y guapes peñes Cih.uentes, col Frieru como cota más ablucante dende la nuesa posición.

Col mochilón de travesía, averámonos hasta la collada'l Llaz baxo los acongoxantes parés que cayen dende la Torre Peñalba a la escontra total de los poco metros qu'ascendemos hasta la Torre'l Llaz de 2143 m.

Con increyibles vistes caleyamos hasta la Torre'l Llaz (2143 m)

Con otra pequeña cota más nel bolsiellu, entamamos la ruta de verdá de güei, echando una güeyada hacia'l nuesu oxetivu, el pasu baxo les Torres del H.ou La Llera y penriba de la Torre'l Mediu. Pero p'aportar hasta esti pasu, qu'aporta a la canal de Mueñu, tendremos que superar las Traviesas del Llaz.

Estes travieses, malnomaes de Pamparrosu ya que'l Pamparrosu cai dafechu hacia'l H.ou Grandre, son un amiestu de pasos áereos de pedreres y terraces yerboses, que tomen el nome del Llaz, xeleru qu'aguanta casi tol añu na segunda traviesa de pedreru.

Metémonos na primer traviesa del Llaz... la más acoyonante

Entamaremos cola primer traviesa, la qu'anque ye mui cenciella ye la que más mieu da, al ser una auténtica cuspidera a una cayida d'unos 100 m d'altor. Encomiendo a garrar el senderu central de la pedrera qu'anque seya más inestable que'l de la parte baxa da muncha más seguridá.

Dicir, que personalmente nun me paeció nin muncho menos difícil, ya que tan sólo hai delles peñes más grandes que dificulten el pasu y ellí debemos tar sollertes. Polo demás, si sentímonos seguros nel nuesu pisar esta primer traviesa namái será caleyar sele pel pedreru hasta'l descansu hacia la segunda traviesa.

La segunda... col propiu llaz... un auténticu ñeveru colgáu

Nesta primer traviesa, Bittor ya amosó les sos duldes pa con esti tipu de tarrén. Ya llevaba camentando baxar per Asotín y desviase d'esti tipu d'actividaes más aérees de Picos, pero la verdá ye que fuimos animándolo a que nun diba ser pa tanto y quiciábes tábemos más guapos callaos, ya que pasó un mal día realmente.

La segunda traviesa ye la del Llaz, el cúal nesta dómina del añu paez un auténticu glaciar, pero pesie a lo colgáu del ñeveru, pudimos travesalu pembaxo la ñeve y llíbrase perbien, dándo menos sensación de cayida al embocase la pedrera per un canalizu hacia la riega Mermeh.u.

Siguimos terraceando con vistes al preciosu valle de Valdión

Magar de la segunda traviesa, tendremos un sistema de terraces que diremos superando con menores problemes, teniendo dellos hombros nos que descansar y relaxanos coles vistes al valle de Valdión y como non a tol macizu del Cornión.

Pali pali, vamos superando pasos, unos con mayor sensación de vacíu y otres con menos, pero siguimos avanzando yendo per delantre Fernan y César y quedándome yo con Bittor pa guiyalo nes distintes trepaes, destrepaes y pasos llaterales.

Tramu más complexu téunicamente de les travieses

Con casi tres hores de camín y baxo la vertical de la Torre La Celada, tendremos que superar el pior de los pasos. Nel intre, tendremos de facer un trepe llateral n'ascensu per un tarrén voláu y amestáu, nel que si la inseguridá de Bittor ya yera grande pasa a ser dalgo que me pon nerviosu a mí tamién.

Siendo sinceros, temí que tuviéramos un disgustu, pero bono con munchu curiáu algamó'l pasu y eso que les formes de movese nun fueron les más segures nin correutes. D'equí, pasamos a un canalizu que lloñe de travesar y siguir alantre, decidimos destrepalu con pasos llavaos y agarres xustinos, xustinos.

Baxamos hacia una traviesa más cenciella averándonos al nuesu destín... la Torre'l Mediu

Enantes d'esti pasu, llevábemos casi 3 hores y cuando finamos del destrepe del canalizu y de baxar dellos metros más per un tarrén yerbosu, sumábemos en total una hora, amestándo-y a los minutos de tensión nel trepe llateral y nel destrepe del canalizu, la necesaria parada pa baxar pulsaciones e hidratase ya que la tensión que soportó'l nuesu collaciu fizo que tuviera que beber agua enforma.

Personalmente, tamién necesita descansar un ratín de responsabilidá, cosa que pude facer dempués de siguir les travieses, agora sí, sin mayores problemes hacia la h.orcadina que pasa penriba la Torre'l Mediu, cumal que ficimos Fernan, César y yo, magar de pocos minutos de caleyar sin mayores problemes..

Facemos una guapa vira que llévanos al pasu hacia Mueñu y hacia la Torre'l Mediu (2058 m)

Ye perinteresante la posición na que nos alcontramos, pudiendo agüeyar grandes cotes del Central, como la Torre Cerredu, Cabrones o les crestes de Dobresengros y Cuetos del Trabe, penriba de canales tan guapes como la del Agua, Ría o Dobresengros.

Descanso coles vistes, ya que nunca nun lo pasara tan mal pero un compañeru de ruta, como esti día, ya que lu ví mui na llende de les sos posibilidaes y prometíme nesti día, nun volver a intentar convencer a naide de facer dalgo que pue-y quedar grande enforma.

Travesamos nel descensu delles riegues hacia la canal del Mueñu

Ensín más, tornamos de los 2058 m de la Torre'l Mediu hasta la posición onde quedó garrando aliendu Bittor y entamamos el descensu, per una vira cenciella y bien marcada pa garrar una canalina que tien de llevanos poquín a pocu hasta superar otra vira llateral de un contrafuerte que cae dende les Torres de La Llera.

Superáu esta pequeña envuelta, ganaremos la canal del Mueñu, la cual tuviemos la suerte de perconocer durante 5 hores d'ascensión dende Caín hasta la Puerta de Mueñu. Aquel día sofríeramos enforma pa xubila y güei díbemos sofrir abondo pa baxala, ya que'l cansanciu acumuláu, el calor y la tensión y nervios pasaos, diben pasar factura enforma.

Descenderemos Mueñu baxo un sol cafiante

El descensu, llueu de descansar y xintar nel únicu llugar onde alcontramos solombra, fué como camentábamos, llargu y penosu y dende los 1720 m onde garramos la canal hasta los 450 m d'altor de Caín, pasamos la verdá qu'un pequeñu infiernu.

Poro, caún al so ritmu, dicir qu'a tramos decidí garrar les lleres y tirame corriendo per elles con tal d'avanzar más aína, fuimos baxando pasando pela esaniciada mah.ada del Mueñu o la meyor caltenida de los Praos de Castru, onde taba a la yerba demientres nosotros nun yeremos nin a dar casi un pasu más col calor qu'apretaba.

Sin muncho más que cuntar d'esta canal repetida por nós, ya que lo que teníemos na tiesta yera descender por Arzón, pero la falta d'agua, la fatiga acumulada y sobretou les condiciones nes que baxábemos nun taben pa más aventures, aportamos a Caín col parte mélicu repletu.

Aportamos a Caín como nunca de cansaos y deshidrataos

César con mancaures nos pies, yo diréutamente reventáu de les plantes, Fernan tocáu de la espalda y Bittor deshidratáu dafechu, teniendo que metese dos Aquarius namás llegar p'alcontrase una migayina meyor... ya que llevaba más de 4 litros bebíos nesta ruta... increyible lo qu'aguantó y la batalla que tuvo que llibrar consigo mesmu.

En resume, estaya nun tan llarga como otres d'esta travesera (10,5 km y 9 h y 20 min) y con tan sólo 620 m d'ascensión acumalada, pero na que durante les distintes travieses y tol descensu acumuláu de 2260 m, tuviemos qu'esforzanos físicamente y sobretou mentalmente como mui poques vegaes... asína llegamos a Caín... estrozaos dafechu.

Menos mal, que como siempre la hospitalidá caineh.a, l'interés montañeru de los sos paisanos, una remoyada nel Cares, una duchina caliente, una cena abudante, les cerveces... en fín... tar en Caín ensin más priesa qu'esperar al día siguiente pa tornar al monte, fai qu'escaézase tolo pasao.

P.D: Prometo visitar los enguedeyaos pasos que'l bisnietu del Caineh.u fízome saber a la gueta d'esa primer ascensión al Cuetu Ciegu... yera imposible nun intentar conocer esa fastera del Central... anque seya por respetu a la so insistencia, jeje.

Camudando'l Camín colos oxetivos caineh.os marcaos

2 comentarios:

  1. Muy guapa Berto, veo que se os hizo dura!! Yo tengo pendiente esa travesera y ya varios amigos la hicieron, a ver si pa otru añu cái. Tu veo que ya tienes objetivos nuevos.
    Un abrazu

    ResponderEliminar
  2. Muncho calor Monchu... y con tensión más se bebe... al final pelín deshidrataos llegamos. Pero ye una actividá guapísima.

    Un abrazu

    ResponderEliminar