martes, 18 de agosto de 2015

H.uentedé (Llébana) - Torre Salinas

6 de Xunu de 2015

Track: H.uentedé (Llébana) - Torre Salinas


Tamos na ruta propuesta por mí pa esti añu, la cuál dábame dellos dolores de tiesta por mor de les posibles trepaes n'ascensión final. Nel mió interior picábame más xubir la Torre de Lliordes, dellos metrinos más alta que la Torre Salinas, pero siendo ésta tamién más complexa de xubir que la collacia d'al llau.

A la fín, decídome por Salinas al ver dellos reportaxes onde la dificultá paecía ser aselada pela vía normal, dándo-y más oportunidaes a la mayoría del grupu. Asína con too... quedamos 5 paisanos pa intentar ascendela y ún d'ellos, David, novatu nestes xeres col grupu Xuan de la Borrina.

Puntu de partida en H.uentedé (1083 m)

Como siempre, tirar hasta H.uentedé ye una matada mortal, menos mal que nun fáigolo sólu, saliendo de Xixón, Richar, David y yo pela autovia'l Cantábricu hasta Unquera onde almorzamos con Fernan y Benjamín.

Magar de l'almuerzu, tiramos hasta Panes onde garraremos la N-621, que nos llevará pol desfiladeru del ríu Deva, y que fadrános pasar per pueblos cántabros como La Hermida, Potes, Espinama y finalmente H.uentedé, con un trayeutu anubríu en vistes hacia'l macizu Oriental.

Averámonos a los Tornos de Lliordes pente la borrina

Preparámonos en H.uentedé, a la mesma vegada que dalgunos montañeros más y munchos corredores de monte, qu'anden preparando la carrera vertical qu'al día siguiente cellébrase. Nós, a la nueso tiramos direición a la canal del Embudu, más conocida polos Tornos de Lliordes, por mor de les milenta envueltes que xuben hacia la Vega Lliordes.

Fadremos un porcentaxe del ascensu pente la borrina y pente envuelta y envuelta, David, Richar y Benjamín, conocen de primer man el perconocíu positivismu meteorolóxicu que tenemos siempre Fernan y yo... diciendo que dellos cientos de metros más enriba tará espeyáu... y por una vegada acertamos jeje.

Perpasamos la llende borrinosa desanubriendo guapes vistes en tola redolada

Y acertamos y tenemos una de les salides penriba la borrina más maraviyoses y motivantes que nunca viéramos. Quedamos ensin pallabres... los nuesos Picos son increyibles, máxicos... El mar de ñubes tapa dafechu tolos valles y la llende de 1500 m qu'acabamos de superar amuésamos vistes hacia les muries de Peña Remoña y el so pequeñu cordal qu'afonda hacia las Peñas Cih.uentes.

Poníendonos la crema pal sol y baxo un calor perimportante aportaremos al colláu l'Embudu (1960 m) pel qu'entramos a la nomada Vega de Lliordes, onde recíbenos la Torre Salinas, dexando a más d'ún del grupu mudu pola so imponente figura.

Del colláu l'Embudu travesamos tola Vega Lliordes hasta cola mirada atenta de Salinas

Magar de delles miraes... como diciendo... de verdá vamos xubir ehí, siguimos camín caún al so ritmu pela Vega Lliordes, dedicándome a sacar milenta semeyes de la redolada'l Llambrión col reflexu de delles charques o de la presencia de Peñasanta Castiella a lo fonderu la vega.

Aportaremos hasta'l Casetón de Lliordes, del cual comprobamos el so bon estáu, quedándonos quiciás coles ganes d'esi vivac del que faláremos pa completar un finde d'ensueñu nesta vega. Pararemos unos minutinos, llueu de 3 hores de ruta ensin parar, pa garrar fuercies y empobinanos hacia'l colláu Remoña onde veremos a la fín, la ruta d'ascensu a la Torre Salinas.

Del Casetón xubimos al colláu Remoña (2025 m) onde estudiamos posiblidaes

Tamos en Xunu y quedan ñeveros enforma, poro tenemos cierta preocupación ya qu'aventurámonos a venir ensín crampones nin piolé pa esta ruta, camentando que quedaría menos ñeve, pero nun ye así y dempués de superar más de 150 m de desnivel dende'l casetón al colláu Remoña pararemos a decidir baxo l'ablucante paré del Tiru Pedabeh.u, caberu cumal del cordal de Remoña.

Más menos, tenemos enfrente les dos posibilidaes que conocemos d'ascender la Torre Salinas. La normal percorre un evidente canalizu, estráu de ñeve nesti día. Falamos y falamos Fernan y yo, prestándonos res intentalo per ellí, ya que vemos una ribaya pergrande d'accesu a la terraza de salida del canalizu.

Ruta normal a la Torre Salinas

Sabemos d'accidentes nos últimos días en ñeveros, por mor d'esbarrumbe de pontes de ñeve. Poro, decidimos tirar pela arista SE aunque seya más complexa y aérea. Nel intre, Benjamín, contentu col so llabor, decide que prefiere esperanos nel colláu Remoña, xintando y descansando.

Richar y David, aventúrense detrás nuesa, llevándonos Fernan per un sistema de terraces amiestu de caliza y yerba, col envís de llibrar el primer espolón de l'arista SE. Asína lo fadremos hasta ver que la muria faese vertical al fondu y que sólo nos queda una h.orcadina pela que salir a l'arista cimera.

Decidímonos pola arista... ya que'l ñeveru presenta complicaciones

El pasu hacia esta h.orcadina, será un terracéu amestáu, con dalgún pasin vertical y sofitándose en dalgún tapín yerbosu que nun presta muncho, pero resuélvese sele y dexando los nervios pa prau o al menos, eso intentamos que Richar y David faigan.

Aportamos a la h.orcadina, cómoda enforma y ellí David y Richar ven la cresta que-yos espera hacia'l cumal... un cumal qu'aldovínase lloñe, mui lloñe. David, nesti puntu prefier abandonar ya que nel trepe a la h.orcadina ya tocó les sos llendes y nun quier pasalo mal.

Trabayamos la parte más aérea de l'arista SE de la Torre Salinas

A vegaes, los que llevamos xente al monte alendamos cuando la propia presona decide per sí mesmu que nun continua. Tú, pues ver a dalguien pocu avezáu a estes xeres nel monte pero tas nuna situación na que nin quies animar, nin quies desanimar... esperes a ver si él mesmu decídese a non continuar y entós convénceslu de que ye una bona decisión.

Richar, seguirá'l siguiente trepe qu'úpanos a una fina cresta con bon ambiente a ambos llaos, lo cúal bloquea a Richar y enantes de mayores embarques decide destrepar hasta David. D'esta mena, tamos Fernan y yo sólos, una vegada más, como tantes nos últimos años y la verdá ye que fué ensín querelo, pero tomaron bones decisiones tanto David como Richar.

Apretamos el culu esnalando hacia la cume de Salinas que vien tormenta

Tan sólo hai que dicir, que dende que salimos del colláu Remoña a la cume de la Torre Salinas, tardamos casi una hora y media y dende que dexamos "a salvo" na h.orcadina a David y Richar, quedáben-yos una hora de continos trepes y destrepes aéreos, siendo esta arista mui entretenida pero espuesta y sin dengún descansu hasta los caberos cien metros al cumal.

Como negociar l'arista? Pues los h.itos vos llevarán hasta la h.orcadina y equí tendrá qu'apaecer la nuesa capacidá de restolar cual ye'l meyor camín, averándonos a unes cayíes per una fastera una vegada y a otres otra, ensín dificultaes grandes nos trepes pero sin con patiu casi siempre.


Cumal de la Torre Salinas (2446 m)

A les 3 de la tarde pasaes plantámonos nel cumal, baxo l'amenaza de tormenta, nel que vemos penriba del Coriscáu como llueve y truena, apurándonos a salir d'esi cumal de 2446 m cuanto antes. Sacaremos les semeyes oportunes hacia la Torre de Lliordes y d'Olavarría y salimos cagando virutes hacia baxo, alcontrándonos con h.itos que paecen venir de la ruta normal.

Pensamos que facer, ya que tenemos les mochiles na h.orcadina, decidiendo baxar pela normal ya que la truena vien a por nós y nun queremos tar con centelles nesa arista nin de broma. Descenderemos apriesa, empobinándonos como albidrábemos hacia'l ñeveru al qu'averámonos curiando cada movimientu que facemos.

Escapamos de la truena pela ruta normal a topar el tremendu ñeveru

Aportamos al canalizu destrepando y como camentábemos la ribaya ye tremenda, teniendo que buscar un trampolín onde poder saltar al ñeveru. Probaremos que nun tea mui duro la ñeve, ya que'l ñeveru ye pindiu y saltamos ún tres d'otru, baxando dempués esquiando hasta la parte baxa d'esti onde faese sele'l desnivel y podemos desvianos hacia les terraces que dan a la h.orcadina, onde tan les nueses mochiles.

Menos mal que Richar y David, ficiéronmos el favor de baxánosles, porque la verdá ye que l'esfuerzu pela cresta fué grande y llevábemos más d'hora y media ensin probar una gota d'agua. Xuntos, descendimos hasta'l colláu Remoña onde Benjamín relatónos lo bien que lo pasó acolumbrando cada pasu que díbemos faciendo nel ascensu... non siempre esfrútase más faciendo les actividaes... veles puen llenar igualmente.

Saltamos al pindiu ñeveru pa baxar esnalando hasta'l colláu Remoña

Magar d'unos minutinos pa xintar, ya que la truena paez que quiso quedase nos montes d'enfrente, ye dicir, el cordal cantábricu. De Remoña, hidrataos y fartucos baxaremos la curtia pero prestosa canal de Pedabeh.u hasta la cabaña de Pedabeh.u onde garramos agua na so fresca fonte.

Dende la cabaña, diremos despidiéndonos de les vistes a la Torre Salinas, cumal que creyóse como puntu más altu de Picos d'Europa, o al menos eso creyía Casiano de Prado, hasta qu'ascendióla y dióse cuenta que'l milenta montes yeren más altos hacia'l Llambrión... vaya chascu debió llevar jeje.

Descendemos pela canal de Pedabeh.u

Dellos senderos baxarán hacia la pista que vien de Valcabáu y el puertu Pandetrabe, la cual garramos con cansanciu dexándonos llevar hacia una mar de borrina que sigue nel mesmu llugar onde dexámosla pela mañana.

Colamos cansaos hacia H.uentedé, pero contentos, con una ascensión perimportante y lo que ye meyor, con bones decisiones tomaes en tolos puntos de la ruta, ya que con un añu tan xabaz de ñevaes, los Picos nun tan p'andar a lo xole.

Baxamos per pista hacia H.uentedé pasando pelos ivernales de las Berrugas

Los nuesos pasos llevaránmos a travesar un guapu h.ayéu en Bustantivu, pa dempués pasar al llau de la h.uente la H.aya enantes d'arribar a los ivernales de las Berrugas onde ya quedarános facer una envuelta hacia l'aparcaderu de H.uentedé.

En resume, tremenda ruta circular pelas Peñas Cih.uentes, que durante casi 9 hores y 15.5 km díonos pa conocer un pelín meyor esta fastera de los Urrieles, anque como coste tengamos los 1615 m de desnivel acumuláu, evitable en parte si desdexamos l'ascensión a Salinas.

Que vos preste....

Camudando'l Camín pente la borrina de Picos

No hay comentarios:

Publicar un comentario