jueves, 30 de julio de 2015

Sotres (Cabrales) - Picu Boru - Picu Valdemingueru - Brañiella

17 de Mayu de 2015

Track: Sotres (Cabrales) - Picu Boru - Picu Valdemingueru


Como casi siempre, ruta de Fernan, ruta que va llevanos hacia l'oriente y nesti casu, al macizu oriental de Picos, el d'Ándara. Esta ruta, en parte, fué planiada pa la travesera del añu pasáu, pero por mor d'avisu de truena tuvimos que facer un plan B, dexando los picos protagonistes pa otra vegada.

El casu ye que tábemos con ganes de conocer el nomáu picu Boru, cumal que tien visión direuta dende'l propiu pueblu de Sotres y que caltién nos últimos años una prueba de carreres pel monte, nel día de la fiesta de Sotres.

Partimos del pueblu cabraliegu de Sotres (1030 m)

Partiremos entós dende Xixón, garrando l'autovía del Cantábricu hasta Posada de Llanes onde tomamos direición a Cabrales al traviés del Altu d'Ortigueru, y ya baxar a los pueblos de Canales, Carreña, Poo y a la fin Arenas onde almorzamos una vegada más nel Café Cares.

D'Arenas, tiramos pa Sotres pasando per Poncebos y Tielve, aparcando por suerte nes places esistentes na mesma cai principal del pueblu. Ellí, preparamos mochiles y calzamos les botes y salimos pente les cais hacia la mah.ada de Robru y al primer de los collaos a ganar, el de Navayu.

Ascendemos a bon ritmu hacia'l colláu Cima (1367 m)

El camín ya lo conocemos de la baxada del últimu día, na nuesa primer travesera, pero esta vegada vamos esfrutando cada pasu, conociendo'l colláu Mediu y la so mah.ada, ascendiendo hasta'l colláu Cima y finalmente al colláu Las H.uentes (1568 m) onde entama l'ascensión al Picu Boru.

Averámonos sele hacia la faldera'l Picu Boru

Tamos nel macizu oriental, fastera minera estrozada per esta actividá, pero nesti casu, tol tramu d'ascensión al Boru ye dafechu distintu, con h.oos, pequeñes vegues y too ello amestao al desxelu braniegu con ñeveros llargos anque nun estáu de ñeve xenial.

Sin más, nun podemos facer otra cosa qu'esfrutar del pasu pelos h.ugos de Mantegueru, qu'avérenmos na mesma llende asturcántabra hacia la faldera del Picu Boru, pasando al llau d'un llomba nomada en dellos mapes como Deboru (1895 m), onde cayera va dellos años un helicóteru de rescate.

Tramu final calizu hacia'l Boru

Travesando ñeveros o tramos de caliza, sobretoo na parte cimera del crestéu, xubimos ún tres d'otru, hasta perpasar la cota dosmil, onde asítiase gayoleru'l Picu Boru, oxetivu cimeru del día de 2134 m, siendo más de mil metros direutos d'ascensu dende Sotres en casi cuatru hores.

Cola mayor parte del trabayu fechu, tamos un bon ratín nel cumal esfrutando de les vistes hacia los Urrieles, anque la borrina anda xuguetona per esi macizu y asína tará tol día, quitándonos un pelín de vistes.

Cumal del Picu Boru (2134 m)

Magar del descansu y les semeyes, siguimos cordal alantre, hacia'l siguiente oxetivu que nun ta mui lloñe, el Cuetu Teh.au de 2164 m. Nestos dos topónimos, alcuéntrase ún de los mayores discutinios so la toponimia d'esta fastera nomándose al Boru, Teh.áu y al Teh.au, Boru y así... hasta l'infinitu.

Personalmente, inclínome a pensar que'l Picu Boru ye'l primeru, ya que ye'l que nómase a la vista la xente de Sotres como Boru y posíblemente, el siguiente cumal con mui pocu desnivel pente collaos ye'l Cuetu Teh.au, que bona cayida tien hacia la fastera noroeste.

Facemos pasu pel Cuetu Teh.áu (2164 m)

Como ya dixe, el camín sedrá un paseín de cumal a cumal baxando unos metros tan sólo, suponiendo un hombru ún del otro y l'otro del uno. Poro, nel día de güei, fuí acotando esos llistaos de dosmiles asturianos, dándo-y la importancia que tien caún y pemeque qu'estos dos simplemente lleven llínea de ser parte del cordal que lleva hacia'l cumal mayor... el picu Valdemingueru.

Sin dá-y munches vueltes más, siguimos esti guapu cresteríu per otra reciella de cumes a superar, qu'en dellos mapes nómenles como Picas del H.ou Sin Tierre y n'otros cumes de H.idiellu, anque paezme más averáu a la rialidá las Picas, al tar zarrando col Picu Soriano el H.ou Sin Tierre, tando la riega H.idiellu más lloñe del radiu d'acción d'estos cumales.

Facemos camín pelas Picas del H.ou Sin Tierre

Diré xubiendo una a una, con pocu valir montañeru tamién hasta aportar a la cabera y más alta con dalgo de vexetación na cumera. Equí, alcuéntrase tol grupu descansando cuando llego hasta ellos llueu de cotar les demás piques.

Nin siquiera tengo que falar muncho colos demás, pa qu'a dalgunos-yos apeteza conocer el picu Valdemingueru o lo que más nos presta a Fernan y a mí, que ya tuviéramos va unos años n'invernal, el cresteríu qu'arriba hasta ellí

Trepes y destrepes de secute hacia'l picu Valdemingueru

Sin munches hestories, póngome un cabeza, colos cincu "atrevíos" y el primer problema vendrá nuna verruga, pela cual tendremos que destrepar con un toque mui vertical anque con bloques pa baxar a mou escalera.

Magar d'esti primer destrepe, tendremos otru más finu per una placa pa siguir hacia una aguh.a de calter mui curiosu, na que facemos travesía penmediu d'ella de la mandrecha a la manzorga, pa destrepala de secute y entamar un tramu más cenciellu hasta'l cumal del picu Valdemingueru.

Cume nel Valdemingueru (2264 m)

Les semeyes de rigor darán pasu a tornar pel mesmu camín, teniendo que pasar los mesmos trepes y destrepes a la escontra, camudando dafechu cualesquier visión anterior de los pasos. Ensín mayores problemes aportaremos a la cabera Pica del H.ou Sin Tierre, onde tan esperándonos el restu del grupu dende va una hora y ye que paecía que taba más cerquina, jeje.

Nun tan mui esmolecíos, ya qu'echaron hasta una siestina nesti día tan guapu y déxenmos apretar el bocata y esfrutar de l'actividá tan curiosa fecha, pa siguir camín esta vegada hacia'l Picu Soriano, col envís de completar una circular de cumales del H.ou Sin Tierre.

Continuamos hasta'l Picu Soriano (2200 m), cierre del H.ou Sin Tierre pel Este

Xubiremos los dos cumales d'esta fastera del h.ou, nomándose Soriano al más baxo d'ellos de 2200 m y puede que'l primeru seya la Pica Los Campos, qu'agasayánmos con bones vistes sol llagu d'Ándara, anímandonos a dexar de xubir tachueles abandonando los altores pa conocer una nueva canal de Picos, la de Brañiella.

Descendemos del H.ou Sin Tierre a la boquerón de la canal de Brañiella

Pa ello, baxaremos al fondu del H.ou Sin Tierre per un ñeveru y pasaremos pela faldera del picu Boru hasta la boquera d'entrada al canalón de Brañiella. Namás que la vemos, quedámonos prindaos d'ella, al menos los namoraos d'esti tipu de formación en Picos.

Quedámonos encantaos con Brañiella, pero nun va dexase domar cenciello, tendremos de trabayala bien, intentando nun resbariar nes pedreres, nes qu'aprovechamos la piedrina menudo pa esnalar, pero caltenemos la tranquilidá nos tramos de piedra más grande.

Alternamos tramos de pedrera, de ñeveru... y travesíes yerboses con pelín de patiu

Nun será sólo los pedreros o los tramos de yerba pindios lo más complicáu. Lo pior vendrá na escoyeta nos pasos de ñeveru, nos qu'alcontraremos posibles pontes con munchu peligru de frañar y mandános a lo fondo del canalón.

Poro, en dalgún puntu, alcontrarémonos hasta "seracs" en mediu de Brañiella, cortándonos el pasu pelo fondo'l canal y teniendo que facer travieses pelos llaterales con pasinos pelín abegosos por mor de la yerba llargo.

Abandonamos Brañiella empobinánonos al Robru y a Sotres a posteriori

Perpasaremos esti tramu de traviesa a la mandrecha de la baxada del canalón y baxaremos a la riega del Robru de nuevu, pa terminar la parte final del nuesu camín esquiando pel ñeveru, desviándonos de Brañiella a un collaín bien marcáu pente dos peñes.

El senderu marcáu dende'l colláu llévanos pali pali hasta la mah.ada del Robru, xusto pembaxo d'un pequeñu mirador con un bancu pa sientase que viéramos nel ascensu. Dende equí, namái quedaríanos baxar hasta Sotres pela pista pa poder refrescanos con sidra nes terraces de los chigres cabraliegos.

En resume, ruta bien prestosa con tolos picantes de cualesquier actividá per Picos, como ye'l calter calizu de los cumales, trepaes, aéreos, ñeveros, pedreres, canales perguapes... y sólo pol módicu preciu de 9 hores y 20 minutinos de ruta, 12,5 km de percorríu y 1400 m de desnivel superáu.

Animáivos...

Camudando'l Camín per Cabrales

1 comentario:

  1. Muy guapa Berto, conózcolo bien, esa crestería al tengo dos veces en el blog y me encanta con esos trepes y destrepes.
    Un abrazu

    ResponderEliminar