Track: Ezkarai (Ezkarai) - Sagastia - Turza - Ezkarai (Ezkarai)
Hai dos tipos d'escesos nel mundiu montañeru, tan los de les rutes del día anterior (más de 1600 m de desnivel acumuláu y 24 km) y tan los de les cellebraciones posteriores del día anterior (tar de folixa hasta más allá de la una la nueche).
Pues asína nos llevantamos el domingu de Xuntanza Asturvasca, cola resaca de la cena-folixa y coles pates cansaes de la xubida al Cuculla. Aún así, los planes tan pa cumplilos o pal menos intentalo, poro magar d'otru estupendu almuerzu tornamos otra vegada hasta l'antigua estación de tren d'Ezkarai.
Entamamos camín dende la antigua estación d'Ezkarai (840 m)
Ellí, despedímonos de Bea y Josean que volvían p'Arratia y el restu del grupu, salimos esta vegada de la propia estación hacia l'entamu del GR-93, que sal al llau del Río Oja y xube per un senderu que traviesa pocu más enriba la carretera que xube al colláu de Bonicaparra.
Ascenderemos pel GR-93 travesando'l fayéu de Garzalarrea
Xubimos con ciertu cansanciu y pocu xeitu pa sufrir, asina que pocu a pocu diremos quedándonos atrás ya que Pau, nun va nada fina. Ayeri, pesie al catarru completó una gran ruta, pero güei nun-y van les pates y el cuerpu en xeneral ye presa hasta d'un pelín fiebre.
El camín ye guapu enforma y esfrutamos de cada pasu
D'esta miente, siguimos ascendiendo col esfrute fondu del fayéu de Garzalarrea, empobinándonos poquín a pocu haci'l colláu de Sagastia, onde si tuviésemos un día curiosu, tendríemos vistes hacia los montes del cordal de la Demanda y a la so cota máxima, el pico Cuculla o relixósamente San Lorenzo.
Con pocu más de 400 ms d'ascensión charramos un ratín en Sagastia sobre que facer y decidimos non ascender denguna cota, ya que'l finu orpín fai qu'apeteza bien pocu más esfuerzos. Poro, continuaremos cola opción de baxar pol mesmu GR-93 al so pasu pol pueblu abandonáu y reciéntemente rehabilitáu de Turza.
Facemos puntu más altu nel colláu de Sagastia (1275 m)
Caleyaremos entos hacia'l colláu y refuxu de Bonicaparra, pero al pocu tiempu de pista Pau, siéntese dafechu mal y preferimos descender pela carretera col envís de que dalguien nos recueya y nos baxe hasta Ezkarai.
Nun lo algamamos hasta que l'orpín camuda a orbayu y dellos coches entamen a baxar del puertu de pasar la mañana, comiéndonos una kilometrada fina pol asfaltu con mil envueltes de carretera. Viéndolo asina, muncho más abaxo, valíanos más siguir col restu'l grupu hacia Bonicaparra y Turza ya que'l GR baxa enfiláu hacia Ezkarai dende'l pueblu.
Descenderemos per Bonicaparra y el pueblu rehabilitáu de Turza
Con too y con ello, tuviemos tiempu a duchanos y baxar a facer dalguna merca nes tiendes deportes d'Ezkarai, mientres el restu del grupu baxaba baxo una lluvia más intensa. Siendo sinceros, nun fue'l meyor final pa un finde mui prestosu na Rioxa, pero col tiempu y coles gripes nun se pue facer nada.
De toes formes, póngovos los datos de la ruta completa aunque nós nun fuéramos a facela, ya que con un bon día y ganes de dalguna alternativa a ascender, puede quedar bien curiosu esti pequeñu paséu pela redolada d'Ezkarai, nel que ficimos 13.3 km y 500 m de desnivel nun total de 4 h.
No hay comentarios:
Publicar un comentario