jueves, 14 de mayo de 2015

Tañes (Casu) - Picu La Trapa

25 de Xineru de 2014

Track: Tañes (Casu) - Picu La Trapa


Llevamos dellos díes, casi selmanes, albentestate ante les condiciones meteorolóxiques, poro salimos esti día a facer lo que podamos. Llevo na cartera dalgunes rutes a facer y güei más que nunca sedrán les condiciones les que decidirán.

Nun fai falta munchos camientos y namái que salimos de Xixón pela Autovía Minera hasta garrar el corredor del Nalón, vamos viendo cotes perbaxes con ñeve, poro sabemos que va tar el tema complicáu pa facer dalgo n'altor.

Partimos de Tañes (501 m) en Casu

D'esta miente, travesaremos los conceyos de Llangréu, Samartín del Rei Aurelio y Llaviana, metiéndonos nel Parque de Redes a traviés del conceyu de Sobrescobiu, pasando pel banzáu y pueblu de Rusecu, onde almorzaremos y confirmaremos la imposibilidá de dir a cotes muncho más allá de los mil metros.

Poro, avanzaremos en coche un pelín más hasta aportar al pueblu y banzáu de Tañes, onde con un día borrinosu y dalgo frescu, mudámonos de ropa pa entamar a xubir dende la carretera pente les cais d'esti guapu pueblu, hacia'l valle del riegu'l Pontón.

Xubimos por Misiegues hacia'l colláu Puciellu (896 m)

Namái que facemos les primeres ramples nel valle'l riegu'l Pontón, alcontrámonos colo ñeve continuu y con bonos centímetros na pista. Nel intre, dámonos cuenta que va ser un aciertu intentar encumar el Picu La Trapa de 1138 m.

Camentamos defechu, que cualesquier cota superior diba ser una auténtica tortura. Pali pali, diremos xubiendo valle alantre pasando pol Campanal y les Misiegues d'Abaxu y d'Arriba, hasta aportar a los 896 m del colláu Puciellu al par de la atrautiva fastera oriental del picu Escrita.

Con una ñevada impresionante siguimos pela Rigadiella

En tola ascensión al Puciellu, fuimos a la mesma vegada que'l grupu montaña Ensidesa d'Avilés, que pesie a llevar marañones munchos d'ellos, nun son a danos nin mediu relevu. Paso de quemame y sigo abriendo buelga con tramos na que la ñeve más blando fai que lleguemos hasta la rodiya.

Averámonos hacia la cabera cabaña baxo'l monte la Trapa

Por suerte, ellos colen hacia'l colláu Espines averándose hacia valles de Piloña y nós siguiremos a turnos (Iker, Haritz, Canta y yo) pela Rigadiella y Arbicenti alantre, demientres vemos como'l día xuega esnalando les ñubes y aclariándose y zarrándose a momentos.

Bregada xabaz p'abrir buelga hacia'l cumal de la Trapa

Averarémonos a la base del cordal de la Trapa, onde alcuéntrase la cabera cabaña del Cebollín y d'ellí entamaremos l'ascensión final hacia'l cumal del Picu la Trapa. Tamos falando de xubir per una pala na que la ñeve lléganos hasta la rodiya y el sol pega fuerte poro la ñeve ablanda a cada pasu y los turnos van siendo casi de 5 minutos en 5 minutos.

Cume nel Picu La Trapa (1138 m)

Con bien d'esfuerzu encumamos los 1138 m del picu La Trapa, tachando un vértice más de Casu y dándonos vistes hacia tol parque de Reres, anque como ya digo, el día ta pelín repunante y una boina de ñube tapa los cumales de los montes casinos dexándonos ensin poder acolumbrar ún a ún cuales fueron les nueses conquistes nos últimos años.

Vistes enderredor na baxada hacia'l colláu La Trapa

Viendo que la ñube entra dende Piloña, pel valle'l ríu Infiernu alantre, decidimos xintar aína y entamamos la baxada hacia'l colláu La Trapa, anque enantes d'aportar a elli, desviarémonos a la mandrecha al alcuentru de la cabaña del Cebollín onde tendremos de garrar el mesmu camín qu'usáremos pa xubir.

Tornamos hacia Arbicenti a la gueta del camín de xubida

Baxamos a pinchu hasta'l Cebollín y llueu siguiremos per Arbicenti y la Rigadiella de nuevu hasta Puciellu, onde paez qu'escapamos de la ñube, picándome enforma la guapa pala de la Escrita, pero bono, nun veo a naide con ganes y déxolo pa prau.

Facemos tol descensu con vistes hacia'l picu Cullargayos y al banzáu de Tañes

El restu del descensu fadrémoslu pela mesma pista, na que vemos como l'efeutu del sol déxanos caleyar a tramos ensín rastros de ñeve, demientres la peña Cullargayos y el banzáu de Tañes tomen tol protagonismu nel restu la baxada.

En resume... picu modestu pero que con díes de ñevaes fondes onde cotes más altes tórnense dafechu imposibles, va danos bones vistes durantes los 10,15 km de percorríu y les 5 hores de ruta, teniendo que superar un desnivel acumuláu de 700 m aproximáu.

Que vos preste!!

Camudando'l Camín na ñevadona asturiana

No hay comentarios:

Publicar un comentario en la entrada