lunes, 18 de mayo de 2015

Nicolasa (Mieres) - Monte Llosoriu - Picu Siana

8 de Febreru de 2015

Track: Nicolasa (Mieres) - Monte Llosoriu - Picu Siana


Siguimos en plena temporada ivernal, con grandes ñevaes y anque los últimos díes nun ñevó muncho, sí que tuviemos temperatures baxes y nun cola res del paquetón blancu que tenemos nos montes astures.

Les planificaciones del GM Xuan de la Borrina, llévanos a tener un mes de Febreru más aseláu en comparanza colos otros meses y tan sólo tendremos una ruta en tol mes, pasando a tres rutes nel mes de Marzu.

Poro, un domingu de primeros de Febreru, Haritz y yo falamos de salir a la ñeve. El día ta fríu, pero paez que dalgo podremos facer escoyendo pente les cotes baxes de cordales centrales d'Asturies, garrando pa la ocasión el monte Llosoriu.

Partimos de Nicolasa nel conceyu Mieres

Esti monte que bien pudiera nomase tres conceyos como tantos n'Asturies fai llende nos conceyos de Mieres, Morcín y Riosa, saliendo nel nuesu casu dende'l barriu de Nicolasa al llau del pozu mierense del mesmu nome.

Asína que saldremos de Xixón pela autovía minera hasta Mieres del Camín, pa tirar en direición Uviéu, saliéndonos hacia'l pueblu d'Ablaña, siguiendo les indicaciones del pozu Nicolasa. Pasáu'l pozu, dexamos el coche nun "picaderu" jeje y salimos per carretera hasta'l crucie pente Conforcos y el Yenu La Tabla.

Xubimos con una ablucante capa de ñeve hacia Conforcos

Nel nuesu casu xubiremos hacia Conforcos y namái entamar a caleyar llevaremos la primer sorpresa al topanos de frente con un corzu perseguíu por Kíla, baxando los dos a fueu pela pista y llevándonos un bon sustu Haritz y yo.

Magar de les rises, siguimos alantre pela pista metíendonos de llenu no que nómase como monte Llosoriu. Pocu tiempu tendremos de caleyéu relaxáu ya que magar de superar cien metros d'altor dende qu'entamáremos la ñeve cubre tola pista obligándonos a abrir buelga por turnos.

Pasaremos pela mandrecha de les cabañes de Conforcos y fadremos milenta envueltes nel camín, demientres la borrina y un día pelín gafu sigue acompañándonos nel nuesu andar. Kíla va pasándolo teta y pel momentu corre como una lloca pela ñeve.

Ascendemos con dificultaes hacia'l colláu La Vara

Magar d'una horina de camín, aportaremos a los 800 m d'altor na Mayá la Vara, onde diremos viendo'l final de la pista nel colláu baxo'l Picu Cueva'l Payigu. Nesi col.láu, podremos tirar hacia'l col.láu la Vara o xubir direutos per Viescarrionda hacia'l cumal del Picu Llosoriu.

Nun sedrá cenciellu y si llevamos más d'hora y media bregando na ñeve, esta cabera parte sedrá na que más fondura de ñeve tendremos. Aún así, como tenemos la ñeve ventiada podemos avanzar mediánamente bien, anque Kíla nun lo pasa tan bien, pegándose pelotes de ñeve nos pelos de la barriga.

Garramos l'arista final hacia'l Llosoriu

Kíla con dos quilos colgando a mou de perendengues na barriga, Haritz y yo, facemos el prestosu crestéu final hasta'l vértice del Llosoriu raspiando los 1000 m d'altor. Siguimos ensin ver absolútamente nada y tira un vientín fresquín que nos fae escapar d'ellí cuanto antes.

Cume nel xeláu Monte Llosoriu (994 m)

Colamos del cumal contentos, faciéndose duros los 5 km abriendo buelga durante dos hores, pero aportónos l'esfuerzu un monte guapu, que suponemos muncho más guapu si viésemos dalgo más d'él, pero de toes toes, los nuesos pasos pela arista pasando al llau de delles peñes diónos la impresión d'un cumal bien prestosu.

Ensín mas, facemos la mesma baxada per Viescarrionda y como vamos mui bien de tiempu, decidimos siguir cordal de Gallegos alantre col envís d'encumar otru picu con vértice xeodésicu, el Picu Siana.

Baxamos pel cordal de Gallegos hacia'l de Siana

Pa ello, descenderemos hacia la Col.lada Pozalbal, pa siguir demientres el día dispónese a abrir, hacia Peña Rigá, onde apaecen marques de dellos pequeños percorríos. De Peña Rigá, baxaremos hacia la campa Rañaoriu bordiando'l picu Rañaoriu pela manzorga.

Ascendemos al vértice del picu Siana enriba de Mieres del Camín

Cola ñeve blando y el sol allumando facemos el cumal del picu Siana de (694 m), con vistes hacia Mieres del Camín embaxo nuesa. Entá quédanos una llarga baxada, asína que nun perdemos munchu tiempu mirando pa picos como la Gua o L'Escobín y entamamos el descensu.


Baxaremos pel Llanu la Tabla hacia Nicolasa de nuevu


Baxaremos dexando la Campa Roíles a la mandrecha, hasta aportar envuelta tres envuelta hacia'l valle de Conforcos baxando primeru pel Yanu la Tabla y cruciando la riega la Tabla con vistes hacia'l pozu Nicolasa.

Con casi 4 hores y media de ruta, casi 13 km de ruta y casi 800 m de desnivel acumuláu pente la ñeve dafechu, garramos de nuevu'l coche pensando en dir a tomar un merecíu vermú en Xixón, ya que como ruta mañanera tuvo más que bien.

Que vos preste!

Despedímonos col Pozu Nicolasa en tierres mineres

2 comentarios:

  1. Un paseu prestosu pol valle del mi nacimientu, n´el caseriu de Brañacastañar, sitau debaxo el Yanu la Tabla.

    saludos

    ResponderEliminar
    Respuestas
    1. Gracies Xistras pol comentariu... préstame saber que ñacisti pa esa fastera asturiana. Entiendo como bon conocedor de la zona que la toponimia del picu Siana ye la correuta y el vértice que nel IGN pon Roíles... ye'l picu Siana en verdá. Roíles son les cabañes d'embaxo non?

      Eliminar