viernes, 29 de mayo de 2015

Cueves (Ribeseya) - La Peruyalina - Corona'l Castiellu

1 de Marzu de 2015

Track: Cueves (Ribeseya) - La Peruyalina - Corona'l Castiellu


Hai díes nos que tolo que tienes predefiníu na tiesta sobre una ruta, pue tornase dafechu a la escontra de lo que na realidá ye. Esta vegada nun ye fuera del too asina, ya que sí, yeren montes baxos, casi costeros, pero sabía que diba ser un quebrapates importante y sobretoo... nun tenía nada claro, lo mui, pocu o nada andáu que taríen les siendes que traviesen los montes.

De toes formes, ruta sele o ruta complicada, de lo más guapu que vamos tener nella, sedrá'l so puntu d'entamu: el pueblu de Cueves. El nome ye claro, p'aportar a esti pueblu ribeseyanu vamos travesar caleyando ún de les nomaes maraviyes asturianes.

Una de les maraviyes d'Asturies... ablucante dafechu

Y ye que pa conocer esta ablucante cueva que da pasu al pueblu de Cueves, saldremos de Xixón pela autovía'l Cantábricu hasta Lloviu, onde tiramos hacia la capital Ribeseya, p'almorzar y siguir camín hacia la cueva del Pozu'l Ramu, siguiendo carretera alantre pela Güertona, Sardalla, Tezangos, La Boquera y enantes de la Cuevona, dexaremos el coche nel aparcaderu d'accesu a Cueves.

Prepararémonos y salimos hacia la Cuevona, quedando nel mió casu totalmente ablucáu de la belleza de formes qu'hai nesta cueva. Ye de les poques vegaes que la man del home, ameyora dalgo, cola bona illuminación que fai esfrutar de cada columna, estalagmites y estalagtites dalguna con formes increyibles como la especie d'alien que paez cayer hacia'l suelu a xintar al que pasa pembaxo.

Salimos de Cueves (25 m)

Dicir que pa meyorar quiciás la ruta, convenía namái salir del pueblu siguir les indicaciones de la ruta al monte Moru, algamando así, nun facer la ida y la vuelta, pel mesmu valle y faciendo tol cordal alantre pela parte más alta.

Per nós, con tal xenial entamu, paez que vamos esnalando penriba d'una ñube, travesando esti guapu pueblu y garrando'l camín que pegáu al ríu Seya y en tramos a la vía'l tren, hasta empobínanos hacia'l valle del Xinestral del Castiellu, onde esiste una ruta de molinos d'agua con posibles visites guiaes.

Pasiamos pela ruta los Molinos
 
Una vegada metíos nel valle, caleyaremos entreteníos, visitando los más averaos al camín, sacando dalguna semeya de les típiques estructures con canales d'agua d'accesu al molín y dalguna semeya robada por dalgún ventanu hacia la maquinaria interior.


Nestos camientos, travesaremos la viesca que de primeres, ye d'ocalitos ameyorando col avance hacia una preciosa viesca autóutona de castañales y fayes guapes enforma, hasta aportar, nun entepechu dende'l ríu, hasta'l pueblu de Tresmonte.

Como dixi enantes, lo meyor diba ser xubir hacia'l monte Moru dende Cueves... pero ye lo qu'hai y va tocanos percorrer dalgún kilómetru per pista asfaltao, que precísamente xube hacia l'area recreativa, saliéndonos nuna envuelta a la manzorga, per una pista de tierra.

Ascendemos per pista hacia la cumera del cordal

Percorreremos esta pista averándonos pasín a pasu al nuesu primer finxu del día... La Peruyalina, un pequeñu cuetu de 498 m onde asítiase'l vértice xeodésicu d'esti cordal. La cabera parte hacia'l cumal fadrémosla saliéndonos de la pista, per un senderu qu'engólanos nesta cume estrada de broza.

Cumales de la Peruyalina (498 m) y l'Altu la Lliendre (508 m)

Con bones vistes hacia los montes de Reres (Tiatordos, Llambria, Pierzu, Maciédome...), decidimos colar de la Peruyalina y dir a xintar a un monte más cómodu como ye l'altu la Lliendre de 508 m, que tan sólo tenemoslu separtáu pel colláu Valdefuentes.

Magar de la xinta, siguimos hacia'l siguiente colláu, el de la Xenosa, pero nel hombru más altu xustu enantes de baxar al colláu, atopamos un cortafueos que baxa a pinchu hacia una pista y ye dafechu perfeutu p'acortar camín de baxada per pista.

Baxaremos del cordal per un cortafueos hacia la Forcada

Gracies al cortafueos, aportamos a la pista que tien de llevanos hacia la carretera que baxa a Tresmonte dende pueblos parraliegos como la Sinariega, Cayarga, Misariegos o H.uentes y más en concretu damos a la Forcada (339 m), dende onde enllazamos col ascensu al siguiente cordal.

Esti cordal ye'l que vemos siempre que vamos de Lloviu hacia les Arriondes a la nuesa mandrecha, pareyu al ríu Seya y con un picu con mui bon presencia que nun ye otru, que la Corona'l Castiellu, puntu más altu del cordal y el nuesu últimu h.itu del día.

Entamamos l'ascensu al cordal pareyu del ríu Seya

Entamaremos ascendiendo hacia la fastera oriental per una pista que xube hacia unes antenes y ellí tendremos una vista preciosa de los meandros del Seya y de cordales como'l del Mofrechu y detrás el de Cueva Negra.

De les antenes, toparemos un senderín que nun vamos perder en tol crestéu hasta'l final del cordal y que tien de llevanos per tarrén amestáu de caliza y cotolla a facer dalgún cumal qu'otru como'l de la Tiesa.

Crestiamos per un senderu perguapu hacia la Corona'l Castiellu

D'esti primer puntu altu del cordal, siguiremos hacia'l picu L'Hombrón, tornándose más crespu y más calizu'l crestéu. Magar de pasar pembaxu L'Hombrón aportaremos al Colladiellu onde camudaremos la fastera occidental pela oriental, pasándonos nel últimu tramu d'ascensu a la Corona'l Castiellu al occidental de nuevu na trepada final al cumal.

Asina, encumaremos la Corona'l Castiellu de 547 m, puntu más altu d'esti cordalín de calter costeru, que llevónos per un prestosu senderu onde paecía que nun díbemos tener más que broza y cotolla nel nuesu avance.

Cume na Corona'l Castiellu (547 m)

Darréu de facer otra pequeña xinta, restolamos toles posibles baxaes, ya que tornar cordal atrás hasta La Forcada, diba ser una paliza tremenda, pero tenemos que dicir que diba ser una opción llarga pero más cenciella.

Con esto, quiero dicir, que'l que siga'l nuesu track va facelo baxo la so responsabilidá, ya que nós albidramos una posible baxada per una canal pindia y herbosa y decidimos tirar per ella a ver que nos alcontrábemos.

Entamamos el descensu pela fastera occidental per una pindia canal

De primeres, ficimos ensin mayores problemes la baxada d'esta canal, pasando a una carba pela que fuimos llibrando cotolles y peña por igual, hasta qu'a metá de baxada el tarrén ponse tiesu y les cotolles ocupen tolos pasos posibles y pa enriba, púsose a orbayar y prestaba pocu descender peles playes de yerba.

Con esti panorama y mediu enriscaos, decidí xubir de nuevu al non alcontrar pasu seguru y enantes de ponese'l tarrén pindiu, salímonos hacia la manzorga, garrando de puntu de referencia un arbol solitariu y una pedrera detrás d'esti.

Alcontrándonos con un infiernu en vida... de cotolles enormes

Una vegada qu'algamos la pedrera baxamos un pocu per ella hasta topar otra faza de cotolles de dos metros, que facíen imposible siguir los senderos que yeremos a albidrar. Equí, como comprenderéis la llucha fue dolorosa, pero fuimos pali pali a perpasar el cotollal y salir a la viesca d'embaxo.

Pela viesca dimos a una cabaña esbarrumbada y d'ella garramos una pista maderera que diba llevanos con dalgún erru qu'otru hasta'l crucie de la riega la Xinestral y d'ellí al pueblu de Tresmonte, onde pudimos aselar un pocu y descansar un bon ratu.

Aportamos a Tresmonte desfechos físicamente y tovía queda tol valle

Magar de salir de Tresmonte, pondremos el pilotu automáticu pa tornar a caleyar tol valle de la riega Xinestral, anque esta vegada con mirar pal suelu ya teníemos abondo, como pa esfrutar de los guapos molinos que xurden al pasu l'agua la riega.

En resume, ruta llarga, dura y con un tramu perabegosu de perpasar, que dexónos reventaos nes 9 h y 20 min que tardamos en facer 19,2 km y n'ascender un desnivel acumuláu positivu de 1295 m, que pa ser xerres baxes casi costeres ye una xabazada.

Camudando'l Camín na ruta Los Molinos de Xinestral del Castiellu

No hay comentarios:

Publicar un comentario