viernes, 29 de mayo de 2015

Cueves (Ribeseya) - La Peruyalina - Corona'l Castiellu

1 de Marzu de 2015

Track: Cueves (Ribeseya) - La Peruyalina - Corona'l Castiellu


Hai díes nos que tolo que tienes predefiníu na tiesta sobre una ruta, pue tornase dafechu a la escontra de lo que na realidá ye. Esta vegada nun ye fuera del too asina, ya que sí, yeren montes baxos, casi costeros, pero sabía que diba ser un quebrapates importante y sobretoo... nun tenía nada claro, lo mui, pocu o nada andáu que taríen les siendes que traviesen los montes.

De toes formes, ruta sele o ruta complicada, de lo más guapu que vamos tener nella, sedrá'l so puntu d'entamu: el pueblu de Cueves. El nome ye claro, p'aportar a esti pueblu ribeseyanu vamos travesar caleyando ún de les nomaes maraviyes asturianes.

Una de les maraviyes d'Asturies... ablucante dafechu

lunes, 25 de mayo de 2015

Xivares (Carreño) - Costa de Carreño - Antromero (Gozón)

22 de Febreru de 2015

Track: Xivares (Carreño) - Costa de Carreño - Antromero (Gozón)


Siguimos nesti mes aselao d'actividaes montunes y como nun mos aguantamos ensín salir a patiar, decidimos dir Pau, Haritz, Kíla y yo a conocer la costera de Carreño, comunicándolo nel últimu momentu al grupu xuniéndose a nós, Zori y Richar que necesita probar que tal va esa pata de la lesión.

Pa facer la costera, saldremos de Xivares col envís d'empobinanos pasín a pasu hasta Antromero, onde tenemos la llende con Gozón. Poro, aportaremos a la sablera de Xivares, saliendo como non, per Xixón hacia Veriña, entrando a Carreño per L'Empalme, Carrió, La Granda y en La Piñera, salímonos pasando pela Xana hasta Xivares.

Partimos de la sablera de Xivares en Carreño

miércoles, 20 de mayo de 2015

Busecu (Valdés) - Capiel.la Martín

14 de Febreru de 2014

Track: Busecu (Valdés) - Capiel.la Martín


Siguimos con munchísima ñeve nos montes astures, poro decidimos facer una ruta pel occidente, onde camentamos que los montes de fasteres noroccidentales pueden tar ermos del mantu blancu, al raspiar los mil metros.

Decidimos dir conocer el Capiel.la Martín, ún de los montes más importantes del occidente astur y sobretou del conceyu de Valdés. Pa ello, saldremos de Xixón pela autovía'l Cantábricu hacia L.luarca, parando un pelín enantes a almorzar en Cadavéu.

Partimos de Busecu (460 m)

lunes, 18 de mayo de 2015

Nicolasa (Mieres) - Monte Llosoriu - Picu Siana

8 de Febreru de 2015

Track: Nicolasa (Mieres) - Monte Llosoriu - Picu Siana


Siguimos en plena temporada ivernal, con grandes ñevaes y anque los últimos díes nun ñevó muncho, sí que tuviemos temperatures baxes y nun cola res del paquetón blancu que tenemos nos montes astures.

Les planificaciones del GM Xuan de la Borrina, llévanos a tener un mes de Febreru más aseláu en comparanza colos otros meses y tan sólo tendremos una ruta en tol mes, pasando a tres rutes nel mes de Marzu.

Poro, un domingu de primeros de Febreru, Haritz y yo falamos de salir a la ñeve. El día ta fríu, pero paez que dalgo podremos facer escoyendo pente les cotes baxes de cordales centrales d'Asturies, garrando pa la ocasión el monte Llosoriu.

Partimos de Nicolasa nel conceyu Mieres

jueves, 14 de mayo de 2015

Tañes (Casu) - Picu La Trapa

25 de Xineru de 2014

Track: Tañes (Casu) - Picu La Trapa


Llevamos dellos díes, casi selmanes, albentestate ante les condiciones meteorolóxiques, poro salimos esti día a facer lo que podamos. Llevo na cartera dalgunes rutes a facer y güei más que nunca sedrán les condiciones les que decidirán.

Nun fai falta munchos camientos y namái que salimos de Xixón pela Autovía Minera hasta garrar el corredor del Nalón, vamos viendo cotes perbaxes con ñeve, poro sabemos que va tar el tema complicáu pa facer dalgo n'altor.

Partimos de Tañes (501 m) en Casu

lunes, 11 de mayo de 2015

Xornaes de la Llingua y la Cultura Asturiana (Xixón)

8 de Mayu de 2015

 Esti vienres pasáu tuve la suerte de poder participar nes Xornaes de la Llingua y la Cultura Asturiana, onde dientru de la Selmana de les Lletres Asturianes, organizábense charres, talleres, conciertos pa los escolinos de los siguientes colexos de la redolada del barriu La Calzada en Xixón:
  1. C.P. Atalía
  2. C.P. Eduardo Martínez Torner
  3. C.P. El Lloréu
  4. C.P. Federico García Lorca
  5. C.P. Miguel de Cervantes
  6. C.P. Montiana
  7. C.P. Príncipe de Asturias
  8. C.P. Santa Olaya
  9. C.P. Tremañes
  10. C.P. Xove
Preparando la charra nel salon d'Actos del Atenéu la Calzada

Magar de preparar durante tola selmana, una presentación curiosa pa que los neños y neñes de sestu cursu d'estos colexos deprendiesen daqué, plantéme nel Atenéu Obreru de la Calzada pa dar les charres col acoyone normal d'una primer vegada nestes xeres.

Ellí plantéme con dos mochilones enllenes de material de monte, una cola ferramienta d'escalada y otra con dellos preseos más montunos. Cuerdes, piolé, crampones, fisureros, cintes, friends y demás trastos ficieron de cabecera del escenariu ante la mirada atenta de la reciella.

Llenándose la sala de guah.es de sestu cursu de varios colexos de la redolada

Na primer charra, alcontreme más tranquilu de lo esperáu y conté-yos lo meyor que pude el por qué, de meteme nesta vida montañera, los montes más prestosos d'Asturies y dellos encamientos de seguridá en monte.

Igualmente, falé-yos de los distintos tipos de montañismu y escalada, amosándo-yos l'usu que damos de tolos preseos averaos al monte nos dixebraos momentos del añu, ya seya n'iviernu o n'esguilaes na peña en branu.

Segunda presentación del día... relaxádamente

Tanto na primer charra como na segunda, la hora y media de presentación na que pudieron ver semeyes xunto a dellos vidios esguilando nes escueles asturianes, casi quedóse pequeñu y nun pude dexá-yos entrugar lo que-yos apetecía saber, anque sí que pudieron tocar y ver tol material del escenariu y facer delles entrugues a mou personal.

En xeneral, colé d'ellí con una esperiencia perbona, sintiéndome mui agustu falando de dalgo qu'apasióname dafechu, como ye'l monte asturiano y les milenta posibilidaes que dá pa facer actividaes deportives al aire llibre.

Esperemos que nun seya la última...