viernes, 10 de abril de 2015

Rocódromu del Molinón - Dock39 (Xixón)

6 y 9 d'Avientu de 2014, 17 de Febreru, 20 y 22 de Marzu de 2015

Durante esti llargu iviernu fueron munchos los díes qu'entrenamos en rocos. Unos díes fuimos al de Mataxove, otros a Llugones ya inclusu dalgún día fuí hasta la Felguera a mediudía a da-y un puquiñín de caña al cuerpu.

Pero la novedá d'esti añu, fué'l roco del Molinón montáu pola empresa top30 y nomáu Dock39. Hai que dicir que ye una especie de sala de xuegos pa neños, onde organícense cumpleaños, hai chigre y dan cursinos d'iniciación, asina que con eses premises díbemos conocelu.

Alberto na cueva de bloque

Los primeros díes tuviemos más na sala de bloque, una cueva que préstase a facer travesíes y bloques de pocos movimientos. Nun soi mui fan d'esti tipu de cueves, nes que la colchoneta nun dexa salir sentáu como debiera y aparte con tan poca altura, los bloques nun pasen de munchos movimientos siendo duros namái por acabar en techu más qu'otra cosa.

Magar de resolver nos tres primeros díes tolos bloques propuestos, a los siguientes díes pasámonos a los paneles n'altura. Nun sé mui bien dicir, cuala ye l'altura d'estos dos mini rocódromos, quiciás unos 7 metros y mediu a lo más, pero pueu dicir que dan muncho xuegu.

Faciendo les curties pero téuniques y bloqueres víes

Equí, sí que hai munches víes marcaes y toes elles mui bloqueres al nun tener más percorríu. La verdá, qu'estes sí qu'engancháronme más que la cueva de bloque. Amás, tienen l'aparatín esi d'autoaseguramientu y anque vayas impares nun ties porque tar paráu en dengún momentu pudiendo probar en toprope toles víes que quieras más o menos.

Pali pali, nos díes que fuí algamé un montón de víes, munches d'elles ficieronme sudar abondo y tan en contina renovación proponiendo víes nueves. La verdá ye que los mozos que trabayen nel llocal son bien agradables ya indíquente nueves víes, anque nun seyas un cliente diariu.

Los dos tablones n'altura del Dock39

En resume, como préstanos a toos dir a pasar una tarde o mañana y el preciu nun ye descomanáu del too, supongo que diremos munches vegaes más. Eso sí, sigo echando en falta que n'Asturies apuéstese per una sala d'escalada con un puntu de vista menos lúdicu y más profesional en cuanto al entrenu.

Camiento, que munchos de los aficionaos a la escalada tiraríemos como llocos a una sala d'escalada, empobinada al entrenamientu específicu de la escalada, con ximnasiu, fisios, clases d'estiramientos, respiración, métodos d'escalada y por supuesto rocódromu y sala de bloque.

A lo meyor esa yera una bona empresa a sacar adelantre, con sólo dase cuenta que'l 90% los escaladores tamos apuntaos a un ximnasiu y aparte pagamos bonos de rocódromu o entraes nel día a día... tenelo too xunto sería inmeyorable. 

No hay comentarios:

Publicar un comentario en la entrada