Track: Yanos (Ayer) - Cuetu Cuchu
La última vegada que tuviéramos el placer de dir de monte con Simón, dexáramoslu en plena Travesera del 2012-2013, camín de Poncebos con Rebe y Pau y ésta fazaña, costára-y xunto a entamar el so propiu viaxe empresarial ensín tiempu pa dir al monte.
Más d'un añu dempués, sacara una migayina de tiempu pa facer al menos, la so ruta, la qu'escoyera xustamente pa l'anterior temporada. Con esi enfotu, averarémonos hasta'l pueblu ayeranu de Yanos, del que tenemos l'envís d'ascender al Cuetu Cuchu, Cuchu o Cuetu ensín más, que ya lu sentí con dellos nomatos.
Salida del grupu en Yanos (Ayer) a 564 m
Asína que, una vegada más vamos pal conceyu d'Ayer magar de la ruta davezu dende Xixón, pela autovía minera hasta Mieres del Camín. Ellí garramos la A-66, hasta'l desvíu al corredor del Ayer pola As-112 pasando per Morea, L'Escuyu, Los Estrul.lones y Cabanaquinta onde almorzamos y siguimos pela AS-253 pasando por L.levinco, Entepenes, Col.lanzo parando en Yanos enfrente d'un merenderu onde aparcamos.
Llueu de los preparativos, salimos penriba'l pueblu pegaos a la riega de Yanos, siempre per cómoda pista pasando pel Cabornu, Los Prancos, Preu'l L.léu y Preu'l Ríu, onde fadremos una llarga envuelta a la manzorga topándonos con una guapa fonte, onde bien pudiera allugase una xana.
Xubiemos per pista durante un bon tramu hasta cruciar la riega Los Yanos
Siguiremos envuelta hacia Llanafermos, onde fadremos otra hacia la mandrecha, empobinándonos pente'l Cotu Felgueres y el Val.lín y dando per primer vegada vista hacia'l Cuetu Cuchu. Primeru, per senderu y llueu per pista, ascenderemos fuerte pasando penriba'l Patateru, llevándonos al pocu per camín empedráu hacia la parte alta del valle de Yanos.
Nun hai que dicir, lo llargu d'esti tramu, ya que cuando entramos nel tramu de camín armáu, llevamos 6 kms de pista y casi dos hores d'ascensión ensin parar. La ruta fuera de lo que teníemos en mente, ta garrando pinta de llevanos a tener un día esixente y más si contamos col calor fondu que tamos sofriendo.
Siguimos ascendiendo con les primeres vistes al Cuchu
Pasaremos baxo'l sol per Carricia, xubiendo pel monte Ocozios hacia a l'amplia collada Rueses a 1209 m, dende la que vemos como una pista de formigón da pasu a casi tou tipu de coches. A dalguna de les moces del grupu, casi-y dan ganes de baxar per ella al primer pueblu jeje y non la culpo ya que l'esfuerzu ta siendo fuerte.
Aportamos al col.láu Rueses (1209 m) teniendo guapes vistes a les Peñes Negres
De Rueses, unos van garrar el camín más llargu hacia'l colláu x (m), dando un rodéu per un tarrén más sele y otros nun sé bien por qué, vemos una canal perguapa, na que sin querer vamos metíendonos hacia ella, primeru per pista y llueu garrando un senderu hasta que tenemos que travesar una viesca de carrascos que pónenmos en delles dificultaes.
Dende equí, ya saldremos canal alantre viendo que la nuesa opción, más curtia, va ser muncho más dura y a lo postreru más llarga que la de los collacios. D'esti xeitu, xubiremos pali pali, aportando toos al colláu con una sudada descomanada y dalgunu de nós con munchu cansanciu.
Garramos la canal que fadrános sofrir enforma hacia'l colláu
Arista final hacia'l cumal del Cuchu cola vista puesta na fastera de la foz del Alba
Cume del Cuetu Cuchu (1651 m)
Como suel pasar muches vegaes, alcontrámonos con un cumal enllenu mosquines, faciéndose dafechu imposible aguantar munchu tiempu ellí. Poro, baxaremos hacia'l colláu Fierros (1435 m) onde sentámonos media horina a la solombra a esfrutar d'una merecida xinta.
Siguimos descensu hacia'l col.láu Ceós pa restolar la baxada pela xerra'l Pino
Llueu, siguiremos descendiendo per una panda hasta la braña del Carduchu, pa pente los mayaos de L.lampas pasar per pista hasta'l col.láu Ceós (1316 m) onde pudiéramos aportar al camín d'ascensu en Rueses.
A la escontra, preferimos restolar per un senderu qu'en delles envueltes tien que facenos baxar de la cumera de la xerra del Pino más hacia'l valle penriba'l Pico'l Caidero. Cola vista puesta nuna cabaña, baxamos campu a traviesu perdiendo'l senderu p'alcontralo más baxo dándonos cuenta que facía una envuelta más llarga hacia la cabaña defechu.
Magar d'un tramín más abegosu alcontramos un guapu senderu de baxada
Alcontráu'l senderu, fáise más evidente y esfrutaremos d'una baxada con pasinos pegaos al Quentu La Mayaína, pa garrar más tarde pembaxo del colláu la Pozona, cada vegada meyor camín tresformándose en pista.
Baxaremos penriba de Penducarril hasta la Col.lá L'Hórreu
Esfrutando de la baxada y col atapecer petando a la puerte, aportamos a la Col.lá L'Horreu, onde tendremos dellos esmolecimientos por garrar la meyor pista, ya que nesta cabera parte de la ruta salen milenta pistes en toles direiciones.
Con varios erros y dalgún aciertu, somos a dir guiyándonos col gps de pista en pista pa empalmar el camín más direutu hacia'l pueblu de Yanos, pasando primeru peles brañes del Morón y llueu pel Picu'l Morón, enriba ya de Yanos.
Descensu final a Yanos en varies envueltes pel Morón
Aportaremos a la fín al coche tres de 8 hores de ruta, anque hai que dicir que los tramos d'ascensu fueron más llentos por mor del desnivel y que nun tamos toos na meyor forma del añu. Aún así, podría rebaxase como muncho nuna hora y picu y tar nesti cumal un bon ratu bien paga la pena.
En resume, ruta mui guapa, llarga en percorríu (16,5 km) y con un desnivel acumuláu fuerte (1400 m) que diónos la oportunidá d'ascender esti Cuetu Cuchu o Cuetu ensin más, como díxome un paisanu al baxar con Kíla al pueblu de Yanos.
Que vos preste....
Camudando'l Camín cola felicidá d'andar pelos montes ayeranos
No hay comentarios:
Publicar un comentario