martes, 10 de marzo de 2015

Vil.lanueva la Tercia (Los Argüeyos)

12 d'Ochobre de 2014 

Hai díes nos que val más quedase en casina y nun movese de la cama o al menos nun ser tolo optimistes que deberíeremos na qu'a la meteoroloxía se refier. Tamos, nun día típicu nel que según les previsiones p'Asturies va tar feu, d'orbayu y pa Llión bien pudiéramos tener un día guapu o al menos que nos dea pa pasar el día mediánamente bien.

Poro, tirámonos a lo xole pa la fastera Los Argüeyos en Llión, cerquino de la llende con Asturies, toos sabemos que lo mesmu ta orbayando en Campumanes ya inclusu nel Puertu Payares y tres kilómetros adientru tenemos un solín estupendu, tando bien a gustu pegaos a les paredes sur de les escueles llioneses.

Con esi ánimu, tiramos a conocer Vil.lanueva La Tercia parando como non a almorzar en casa Ezequiel, metiéndonos una fartura mañanera de pastes y bizcochos como ta mandáu, Pau, Haritz y yo. Más tarde llegaba'l grupu B o más bien R... de resaquísima: Gus, Alberto y Natalia, que más-yos valía siguir de folixa de sabadu nueche.

Increyible paré'l de Vil.lanueva La Tercia

Una vegada qu'esos cuerpos mediu se recuperaron con un almuerzu potente, tornamos hasta Vil.lanueva y dexamos el coche al llau de la vía'l tren, entamando'l camín hacia los más qu'evidentes parés d'esta escuela llionesa.

El día taba murniu, pero según previsiones tendría d'abrir y quedar en ñubes y claros. Asína, pegámonos el paseín que paez tar al llau, pero lleva casi media horina de rampa tendía hasta los seutores: Competición, Alzheimer y Cëuse, yendo nós hasta'l más pequeñu... el d'Alzheimer.

Dellos seutores con una pinta ablucante

Dicir que'l camín nun entamó bien del too precísamente, amestándose'l malestar de los tres folixeros al restallu d'un pastor eléctricu que pegóme enforma... pa su puta madre. Asína que colos nervios templaos ya, jeje... aportamos al seutor col día poníendose a pior... mal rollu.

Ya que fuimos, métome na vía más cenciella del seutor que ye de tercer grau, col bon nome de Sólo para la Élite, jeje. Tres chapes pente una placa moyada y tire pa onde tire nin atopo siguiente chapa nin siguiente reunión... el cabréu y el marrón aumenta.

Menuda gran visita a la escuela... toca montar una reunión de fortuna y baxame teniendo que trepar per detrás pa recuperar la susodicha reunión magar de recuperar les propies cintes. Pa enriba, entama a xarazar dándome ganes de nun tornar a esta escuela na puta vida... y ver veremos si vuelvo.

Toca retirada.... xarazando fino

Pente mediu de varies rises, caleyamos baxo la lluvia, col envís de colar d'equí lo antes posible, secanos y tirar pa casa Maragato a tomar vinu y cerveza como si non costare, con preba de los meyores embutíos y quesu de la fastera... dalgo positivu había que sacar.

La verdá ye que nin pongo croquis nin doi una reseña seria de la escuela... porque nin siquiera nos dexó catala y la primer impresión nun pudo ser pior col marrón de la falta de reunión o de chapes na vía más cenciella del seutor.

La próxima vegada más y meyor... porque a pior nun se puede dir... si ye qu'hai próxima.

No hay comentarios:

Publicar un comentario