jueves, 12 de marzo de 2015

Següencu (Cangues d'Onís)

18 d'Ochobre de 2014

Intentando sacanos la espina de la visita a Vil.lanueva la Tercia, escapámonos Pau y yo nun día soleyeru hasta la escuelina canguesa de Següencu. Nun la conocemos y atopámonos con que tien un seutorín d'Iniciación con cuatru IV+ que puen tenenos bien entreteníos tola mañanina.

Asína qu'aportamos a Cangues d'Onís pa siguir hacia Cuadonga, desviándonos namái salir de Cangues hacia'l desvíu de Nedia y Següencu. Xubiremos pela guapa carretera con bones vistes hacia los Picos hasta travesar ambos pueblos.

Vistes dende la escuela de Següencu hacia los montes de Ponga

De Següencu siguiremos tres de les marques del Mirador, hasta abandonalu de frente dexando'l so desvíu hacia la mandrecha. Un ratín más llevarános a descender pindiamente primeru y llueu ascender un pelín hasta un colláu onde podremos dexar el coche.

Preparamos los trastos y baxamos un pelín pela pista que sigue alantre, hasta ver los seutores a la nuesa manzorga y garrar un senderín bien prestosu hacia'l Picón. Esti paré, ye'l seutor más vistosu y dende él tirando a la manzorga podríemos dir hacia'l Cainejo.

Descubrimos pel camín los seutores de Següencu (Proyecto, Cainejo, Picón e Iniciación)

Nós, siguimos per un senderín marcáu hacia la mandrecha hasta un h.orcaín, onde perpasamos la fastera'l monte viendo enriba nuesa'l seutor d'Iniciación. Ellí, alcontrámonos con un pié de vía, bastante cómodu y cuatro víes medianamente verticales que van llevanos a esguilar más en mou alpinu con diedros y pasos raros que les típiques plaques d'escuela deportiva.

Nel seutor Iniciación esfrutando d'unos cuartos resultones

Tranquilamente, metémonos vía a vía, hasta sacar les 4 a vista per mi parte y encadenar dos d'elles a vista tamién Pau, quedándo-y les dos primeres ensín da-y preste ya que la verdá ye que cuesta un pelín pillá-y el puntu a los diedros y les llibraes de bloques en dellos pasos.

Pasamos al guapu paré d'El Picón onde dame tiempu a facer un V+ increyible

Tola mañana asoleyando, da pasu a la xinta y como siempre a la desgana de dempués, pero aún así, apetezme muncho probar al menos dalguna vía del Picón. P'allá que vamos y métome na más cenciella, O Galego (V+) que bien pudiera tar más lloñe del 6a.

Despedímonos de la escuela viendo'l seutor Cainejo

La verdá ye que la vía ye una pasada, llarga, tiesa y con un pasu a la vera la reunión, qu'amestáu al cansanciu de tola vía fai que lléguese cola reserva al encadene. Namái baxar de la vía, tanto Pau como yo, tamos un pelín fartucos del calor que tamos pasando, poro ponémonos a recoyer con calma.

Ensín más, con tolos trastos a la espalda, colamos dexando pa otru día'l restu de víes y seutores, llevándonos como puntu más a favor d'esta escuela... les vistes a los montes de Ponga (Tiatordos, Llambria, Pierzu...) y lo tranquilo de tar esguilando en tarrén montañosu dafechu.

Camudando'l Camín agüeyando Picos dende'l pueblu de Següencu

Següencu
 
Croquis modificaos por mi de la escuela d'escalada de Següencu, por mor de Piratas Free y la páxina d'Entretenimiento Vertical. Gracies y col so permisu.
 

No hay comentarios:

Publicar un comentario