lunes, 23 de febrero de 2015

Sanisteban (Miranda) - Picu L'Urru

21 de Setiembre de 2014

Track: Sanisteban (Miranda) - Picu L'Urru


Primer ruta de la temporada 2014-2015 y como ye vezu, intentaremos entamar con dalgo sele, ensín complicaciones y que nun seya mui esixente físicamente. Restolando pente les rutes d'esti añu, tengo nel llistáu munchos cumales que ya fice, poro toca alcontrar siempre dalgún cambeu coles anteriores visites.

L'ascensión escoyida ye al Picu L'Urru na xerra Manteiga, pero esta vegada fadremos una ruta más curtia non como l'anterior vegada con Simón que ficimos tola xerra Manteiga dende Valbona. Nesti día, vamos atopar camín dende'l pueblu de Santisteban tamién nel conceyu Miranda.

Entamamos nel pueblu Santisteban (728 m)

P'aportar al pueblu, saldremos de Xixón pela autovía "Y" en direición Uviéu y siguimos dempués en direición Grau pola As-63, hasta la salida de Cangas del Narcea, onde tomaremos la As-15, pasando pelos pueblos de Salas de Bárzana, Santiagu la Barca y Requeixu, pa entrar a la fín nel conceyu de Miranda, travesando los pueblos de Cutiellos, Pumarada, San Bartolomé, L'Hospital, Llaureiru y Llongoria onde empobinarémonos pola As-227, travesando Samartín de Llodón, San Cristóbal, Fontouria, Silviella, Courias y a la fin, Balmonte onde desayunaremos

Magar del almuerzu nel hotel Cela, siguimos carretera alantre al llau del ríu Pigüeña hasta'l desvíu a la mandrecha pela X que tien de llevanos a conocer los guapos pueblos de Vigaña, Castañera, Cigüedres, Vil.lare y finalmente Sanisteban, nun percorríu alloriante y colgáu en dellos tramos de carreterina.

Ascendemos per pista pasando las col.ladas Cimera y Fondera hacia Borniz

Salimos entós de Sanisteban a 728 m, perdiéndonos por culpa'l gps qu'anda perdíu dafechu nesta primer ruta del añu. Nun sé, si tamién tien problemes cola vuelta al cole montañera como nós, pero la verdá qu'anduvo tol camín al debalu.

Tirando de sentíu común, debemos garrar tol valle del regueru L'Abedul, que tien de facenos xubir per cómoda pista hacia las Col.ladas, primeru la Cimera y llueu como'l so nome indica la Fondera, averándonos dempués hacia la fastera de Borniz.

Del Altu Borniz xubimos al col.láu La Espina (1173 m) siguiendo hacia'l monte Urru

Fadremos una amplia envuelta dende la col.lada Fondera hacia la mandrecha conociendo los praos de Borniz, caleyando al llau d'una muria pela que ciérrase'l camín un pelín con escayos gafos que faen les delicies de los pantalones curtios.

Llueu alcontrarémonos con una cabañina y xubiremos cenciello hacia L'Altu Borniz nel qu'abrense les vistes, durante'l nuesu ascensu hacia'l colláu La Espina (1173 m). Dende equí, veremos el nuesu oxetivu y tola guapa muria que ye la Xerra Manteiga, dende l'altu'l Pozu hasta'l propiu picu L'Urru.

Alcontrámonos con un infiernu d'árgomes hacia'l col.láu Muracu y nel ascensu al Urru

De la Espina empobinarémos pela manzorga d'una gran cabaña remocicada con escudu y too y ascenderemos hacia la parte final del nuesa xubida. Na faldera del monte L'Hurru, alcontrarémonos coles primeres dificultaes... la fastera llamargosa de la Val.lina'l Rel.lallu y dempués tol Urru estráu d'escobes hacia'l col.láu Muracu.

Na anterior visita, aportamos al cumal per tola cresta y alcuérdome d'una baxada pelín gafa coles árgomes hacia'l Rel.lallu, pero lo d'esti añu ta fuera de tou control. Fué un auténticu infiernu pegase coles árgomes, sabiendo qu'había senderu namái porque los pies van llibres al pisar, pero aún así ta zarráu dafechu de media cintura p'arriba.

Cume nel Picu L'Urru (1530 m)

Del Muracu, lloñe de llibrar la pior parte del argomal, tocónos tamién sofrir del col.láu hacia'l cumal del Picu L'Urru. Hai que dicir, qu'esti caberu tramu d'ascensión ye más abegosu no que se refier a alcontrar un bon senderu.

Hai más d'ún y suelen perdese fácil, asína que nun queda otra que ñavegar como meyor podamos, de claru en claru, pente mediu d'esta viesca d'arbustos tan duros como incómodos de superar. Finalmente, aportaremos al cumal de L'Urru, dempués d'una bona llucha, na que salimos unos más y otros menos mancaos.

Tornamos baxo l'amenaza de la lluvia hacia Santisteban

Magar de media hora nel cumal, ensín tener un bon día de vistes pesie a cuntar con un solín prestosu tola ruta, tenemos que colar pel mesmu camín de xubida ya que les ñubes amenazaben y muncho. Asina que descendemos baxo l'orbayu, durante un pequeñu tramu hasta La Espina y llueu con calma tornamos hasta Sanisteban, aportando unes 6 hores dempués del entamu.

Ensín más que cuntar d'esta ruta, namái que'l percorríu de 12 kms y los 825 m de desnivel acumuláu, toca reflesionar sol abandonu, el desaniciu de l'agricultura y les actividaes ganaderes en munchos de los conceyos asturianos, quedando'l monte pa la broza tornándose na perda de les antigues siendes usaes durante cientos d'años n'Asturies.

Tan sólo tenemos que ver cómo camuden nunos pocos años dellos montes y darémonos cuenta como les quemes controlaes que siempre ficiéronse yeren más que necesaries pa caltener pastos, siendes y pasos al traviés de la nuesa xeografía.

Nesta ruta ficimos un vértice xeodésicu y cota más alta y "prestosa" de Miranda: Picu L'Urru (1530 ms)

Ver progresos en: Retos montañeros

2 comentarios:

  1. Hola Berto, empiezo a ver la ruta como la planteas y mirando el mapa veo que atacas la cumbre por la izquierda, me decía si me descubrirías algo mejor que lo ya conocido, pero veo que no, está igual de "gocho"
    Una cumbre que hay que conocer, pero tiene su inconveniente con les urcies..
    Ahí me encontré en una ocasión con dos lobos que caminaban delante de mi y yo estaba solu.
    Un saludo

    ResponderEliminar
  2. Hola Monchu... nun hai tramu fácil...ye un dolor travesar esi enguedeyu d'urcies. Cuando xubí dende Valbona tola cresta alantre... pues bono, dibes llibrando dalgo meyor, pero la verdá que dende'l col.láu la Espina va dir tornándose imposible si nun hai un incendiu o dalgo pol estilu.

    Lo de los llobos... que quies que te diga... nun sabría nin como reaccionar.

    Un abrazu

    ResponderEliminar