jueves, 5 de febrero de 2015

Castello (El Franco) - Costa d'El Franco - Porcía (El Franco)

2 de Setiembre de 2014

Track: Castello (El Franco) - Costa d'El Franco - Porcía (El Franco)


Otra entrega más d'una ruta costera nel occidente, siendo esta vegada'l conceyu d'El Franco el que va danos un día soleyeru, anque entamásemos con dalgo de borrina nos nuesos primeros pasos. Estes rutes costeres lo meyor ye faceles en travesía, ya que si metemos una ida y vuelta pel mesmu camín o dalguna variante interna va ser cansáu y pocu atrautivu.

Sobremanera, si intenamos tornar al puntu d'entamu pel "míticu" camín de Santiago, que sedrá míticu nun se bien pa quien, porque a mí personalmente paezme un coñazu y munches vegaes con pocu interés pal caminante y sinon, sólo hai que ver esti tramu costeru del occidente que va pela mesma N-634.

Partimos del pueblu del Castello (73 m)

Pa la travesía contamos col mió pa, qu'aprovechando que pasamos unos díes n'Ortigueira, acompañónos hasta la sablera de Porcía pa dexar el nuesu coche y depositónos nel pueblu del Castello, na llende del conceyu Cuaña y El Franco.

Equí entamaremos per carretera pasando al llau del camping del Castello, del cuál nun tenía ni idega de la so esistencia y diremos empobinándonos hacia la costa al alcuentru de dos guapes sableres o más bien pedreres la del Castello y pocu más alantre la de Cambaredo.

Pasamos peles playes de Castello y Cambaredo

P'aportar a les pedreres, averarémonos al traviés de los campos del Villal y de secute pel Cerco de Xuanón no que ye una típica rasa costera del occidente. La del Castello, paez una sablera más visitada per bañistes que la de Cambaredo, la cual según los cartelos indicativos ye mui afayaiza pa los pesquinos.

Magar de les vistes a cantiles y playes siguimos hacia la siguiente rasa, la de las Áligas y pocu dempués la de Senra, xusto enantes de baxar hacia la playa quiciás más carauterística d'El Franco, la de Pormenande.

Xubimos hacia la Senra aportando a la sablera de Pormenande

Nesta playa aparte de tomar el vermú al sol, cuando ta'l chigre abiertu, fízose durante dellos años una nueche folk y hai que dicir que'l llugar ye guapu enforma pa un conciertín d'esti tipu. Nun tuve la suerte de tar nesta, pero nel conceyu faese la más mítica d'Asturies na alameda de Porcía, na que si que tuve un par d'años.

Dexaremos Pormenande y xubimos hacia otra rasa que tien de llevanos hacia'l pueblu de Viavélez, pero enantes pasaremos pel barriu d'A Trouxa onde alcontraremos el palaciu de los Jardón, perpasandolo pel norte, viendo más a lo lloñe de lo que prestaba, esta casona tan impresionante.

Arrodiamos pel norte el Palacio de los Jardón nel barriu A Trouxa

Los Jardón paece ser que fueron bonos benefautores de dellos pueblos del occidente como Ortigueira, que ye'l pueblu mió ma, onde les escueles fueron donaes, asína como'l parque y caltienen una ablucante quinta enfrente d'ésti, bien cuidada y que bien pagaba la pena visitar.

Sacante d'estes hestories de xente rico, siguimos pasando pela parte alto de Viavélez hasta aportar a l'Atalaya onde tenemos bona vista de la bocana'l puertu, xixilada per dos guapos faros de los que vimos en plenu temporal ser perpasaos peles xabaces foles.

Baxamos al Porto de Viavélez onde tomamos el vermú

Baxaremos hasta'l Porto, onde Kíla decídese a pegar un bañín pa enfrescar un pocu. Nun ye que faiga un calor fondo, ya que'l vientu ye a amatagar muncho esti sentimientu, pero tamién a nós apeteznos parar un ratín y tomar unes cerveces pa enfriar el gargüelu.

Despedímonos de Viavélez, pueblu hermanáu na so estructura con munchos del occidente astur y como non con Ortigueira y siguimos hacia otra prestosa rasa estrada de maizales, como ye vezu en munches rases occidentales.

Xubimos per Mernes hacia Valdepares

Los nuesos pasos pente enormes praos, unos con collecha y otros non, nos empobinarán hacia'l pueblu de Mernes, p'averanos hasta casi la carretera nacional en Valdepares que da nome a tola parroquia, onde cabo'l pie de la capiya de San Polayo paramos xintar nunos banquinos baxo la solombra d'un árbol.

Dende equí siguiremos per carretera hacia'l barriu de Fonfría conociendo tamién otru palaciu menos grandiosu que'l de los Jardón, pero cola so hestoria como ye'l de Fonfría, qu'aseméyase na so costrucción al de Mouguías, coles lloses de teyáu y unes pequeñes almenes penriba les muries esternes ya interiores xunto al teyáu del palaciu.

Topámonos col palaciu de Fonfría nel nuesu caleyar al Cabo Blanco

Tamos finando la ruta, pero inda quédanos quicabes el mayor de los espeutaculos no qu'a lo costeru tien de ser, con guapos cabos y cantiles de bon altor. A éstos, apórtase dende Fonfría pela rasa de Courias primeru, hasta'l ablucante cabo Blanco onde alcúentrense dellos restos a mou de castru celta.

Tornaremos a la rasa costera al traviés d'Os Trigales, siempre con vistes a casi'l nuesu gran finxu montañeru del día, el vértice de l'Atalaya, bien cerquino ya del final, na entrada a la sablera de Porcía y al desendolcu final del ríu del mesmu nome.

Averámonos nel tramu de cantiles más guapu hacia l'A Talaya

Esfrutaremos pasin a pasu, con vientu fuerte, pero calecíos per un branu que cada añu aporta más tardíu a Asturies colando más tarde si ye posible. Poro, tar en Setiembre ya inclusu n'Ochobre con estes temperatures cada añu ye más normal.

Ensín más, siguimos camín agüeyando a cachinos l'Atalaya y a otros dando-y vuelta a la tiesta pa esfrutar del guapu Cabo Blanco, hasta dar con una casa y pocu dempués col vértice decoráu de l'Atalaya, dellos metros penriba de la mar.

Caberu finxu nel camín... el vértice de l'A Talaya (37 m)

Nel intre, descansaremos un ratín, echaremos mil semeyes y delles rises, hasta seguir camín hacia la sablera de Porcía, onde tenemos el nuesu puntu final del día, que nun va ser otru qu'un bon bañu, anque con tanta xente tenga de ser ensin Kíla.

Nun mos queda otra que bañala con nós, garrada de la correa, col envís de que naide pueda molestase ya que les partes más apartaes de la playa tan tamién con bien de xente y el cartelo de prohibíu perros ta enfrente nuesa, demientres dámonos un bañín.

Baxamos a Porcía a danos un bon bañu pa finar la ruta nel aparcaderu

De toes formes, turnámonos y a la fín, los tres tomamos un bañu d'esos que te presten como pocos en tol branu, quedando namái que secase un pelín y xubir pel camín qu'asciende hacia l'aparcaderu onde dexáremos el coche delles hores enantes.

En resume, ruta costera durante casi 12 kms y pocu más de 4 hores y media, superando una ascensión acumulada de 375 ms, poro ye un paséu guapu tomándolo con más o menos calma y bañándose en delles sableres según el día qu'escoyamos.

Que vos preste...

Camudando'l Camín na costa d'El Franco

Nesta ruta dimos preste a un vértice xeodésicu costeru del conceyu d'El Frano: A Talaya (37 m)

Ver progresos en: Retos montañeros

No hay comentarios:

Publicar un comentario en la entrada