miércoles, 10 de noviembre de 2021

Priañes (Uviéu)

4, 6 d'Ochobre de 2021

Casi un añu dempués, tornábemos per Priañes al seutor Principal, onde motívame dalgo más la esguilada. La verdá ye que la idega, yera aprovechar les tardes enantes del cambéu d'hora y dir llimpiando un pocu les víes más cencielles que díbemos probando.

Ensín más punxímonos manos a la obra y en dellos díes, pudimos dir tachando'l segundu llargu de Patos Salvajes (6b+) bastante perra pa esi grau, Casacas Azules (6c) del mesmu palu y una mui pocu visitada Pies Planos (7a)

 Seutor Principal de Priañes

Como non, tamién probamos delles víes más, dalgunes de primer llargu bloqueres como La Ley del Deseo, otres de segundu llargu como'l Vuelo del Alimoche o víes que nun me dieron más, como la Columna de Hercules que quedarán pa visites a posteriori.

Priañes (Seutores visitaos)   

Croquis de la escuela d'escalada de Priañes, por mor de Piratas Free. Gracies y col so permisu.

------------------------------------------------------------------ 

22, 28 de Payares de 2020

Munches fueron les tardes apretando per Priañes a primeres del branu. Tábemos recién salíos de la pandemia y obligábame a dir un día a la selmana a entrenar a Priañes, nel seutor menos agraciáu visualmente, anque bon sitiu pa ponese fuerte enforma.

Tuviera delles selmanes yendo a da-y pegues a Bramae, un 7c como un templu, anque en dalgunos croquis apaeza de 7b+. Ye una vía cabrona, mui aleatoria, a nun ser que vayas mui sobráu nel grau, asína que fuimos ganándo-y tarrén hasta tenela mui cerca, pero en dalgún puntu del camín, decidí escaecela y entamé a trepar per Morcín de continuu.

Bramae en prebes... taba pa ello

El resultáu, fue positivu, ya que pude meté-y una fulminada curiosa a seutores como Figares u Otura nel seutor de Nuberu, llevándome munchos sétimos más baxos que tenía pendiente. Nun fue hasta'l mes de Payares, nel qu'averéme un par de findes tranquilos a trepar a Priañes, al seutor cimeru, muncho más guapu visualmente col solín y el rigu Nora al llau.

Esta vegada, centrámonos un pelín en facer víes menos hostiles y llevámonos un par de 6cs guapos como Calma Total, Huecos Nora y tamién apretamos más de lo camentáu pa sacar Conocimiento de Causa un 7a, bien guapu, pero nel que metí un par de chancletazos de llibru, costándome hasta 4 pegues pa encadenala.

Pasando díes al solín per Priañes alantre

Habrá que volver, a siguir sacando cosines, ya qu'anque Priañes atrás nun me motiva res, alantre, el llugar ye más afayaizu visualmente y alcuéntrome un pelín más cómodu que nes víes tan desplomaes de la parte d'atrás.
 
Aparte, qu'a la compañera de cordada, quedó-y pendiente Conocimiento de Causa, nun día totalmente fanáticu, en que-y metío pegues ensin xacíu, munchos dellos perbonos, pero nun hubo suerte a la fin... asína que toca volver antes del cierre. 
 
------------------------------------------------------------------

27 d'Ochobre de 2017

L'Iviernu paez qu'entraba con ganes y los díes y llugares onde poder trepar pali pali, ca día yeren menos. Asína que toca dir a la gueta de requexos onde la humedá y la lluvia nun faigan pingar les preses de los parés.

Ún d'estos llugares ye Priañes, onde'l desplome del seutor secretivu, fai que se pueda trepar con ciertos niveles d'orbayu. La verdá ye que nun me motiva'l sitiu demasiáu, prefiriendo'l seutor principal, pero hai que motivase y escalar en tou tipu de roca y d'escalada.



Nesti casu, xuntámonos unos cuantos pa echar un rises y probar el míticu Calentón (7a) que ya probara cuantayá. Fae 4 años, nun tuve munches ganes de lluchala pero agora que venimos d'entrenar munchísimu blocando, sabíamos que la vía podía salir mediánamente rápidu.

Poro, fuimos turnando los pegues y al tercer intentu, metímosla nel bolsu, quedando ensin munches más ganes d'apretar nos desplomes infames d'esti seutor de Priañes, nos que dalgunos dicen qu'hai bones víes... nun se yo, jaja... habrá que probar más.

Déxovos el pegue d'encadene del Xabalí Prietu (Black Jabalí) con dedicatoria y caxa sidre ganada


29 d'Agostu, 1 y 11 de Setiembre de 2014

Nesta escuela durante'l branu sufrí la mayor de mis frustraciones pa col "malditu desplome" y ye que soi un inútil importante en víes llargues y desplomaes. Fáltame resistencia y esguilar muncho más apriesa ya que los descansos nestes víes nun esisten.

Perguapu llugar cabu'l ríu Nora

Los mios vezos na escalada son dafechu inútiles en víes d'esti estilu y tengo de facer por camudar, esos intentos de descansu y esos movimientos n'estáticu, que tán solo válenme pa petar enforma y perder la poca fuercia que tengo.

Intentando movese nel desplomáu paré de Priañes

El resultáu d'estes conclusiones fueron tres díes de pegues continos a un 6b (No frost), algamándolu'l tercer día sabiendo de memoria los pasos y esguilando más rápidu de lo que préstame na realidá, poro habrá que siguir entrenando pa non tar enmarronáu con este tipu de víes y de graos.

------------------------------------------------------------------

31 d'Ochobre de 2013

Pues dempués de tomar el solín na Manzanea, nel día d'ayeri, güei tiramos a pasar la mañana conociendo una nueva escuela, pa nós, la de Priañes. Vamos cansaos, y con poques ganes d'apretar, asína que tomámoslu con calma y aportamos hasta'l pueblu de Priañes, averáu a Trubia.

Enantes del cartelu, hai aparcaderu y detrás d'él sal la sienda que llévanos hasta los dos seutores de Priañes. Como tamos de visita, a sabiendes que'l de la Cueva ye intocable pa nós, vamos conocelo pa ver onde cuélguense los pros d'esto d'esguilar.

Ablucante'l seutor La Cueva... nun aptu pa pininos como nós
El sitiu, anque mui húmedu y fríu, ye ablucante, la cueva ye espeutacular y ver per onde percorren les víes sinceramente dexa plasmáu. Nun tuviemos munchu tiempu, namái mirar too con tranquilidá y darme a mí una especie de tontuna, intentando a vista el Calentón (7a).

Una vegada que metíme a ello, al altor de la segunda chapa, dime cuenta que nin tenía ganes, nin taba preparáu pa esguilar víes tan a bloque y de fuercia. Nun ye que nun-y viese posibilidaes, pero paecíame que diba gastar munchísimu y llueu nun diba esfrutar nel otru seutor... asína que pa otru día... recoyer enantes d'enmarronase y p'abaxo.

Trabayando nel paré principal de Priañes

Tornamos so los nuesos pasos, hasta'l crucie onde dixébrense les siendes y esta vegada tomamos la de la mandrecha, que baxa en direición al ríu Nora. Hai pasamanos, porque ye un senderu húmedu y con barru, pero al aportar al pie de vía, el sol pega estupendamente y se ta de luxu.

Ponémonos manos a la obra, col envís de conocer un pelín les víes más cencielles (una, jaja), así qu'entamamos con Mea Culpa (V+), que vien perfeutu p'amoldase a los agarres planos y romos d'esta guapa escuela.

Sacámosla los dos a vista, liándose un poquiñín Berto na reunión, y llueu metíme yo en Patos Salvajes (6a+) saliendo tamién a vista y probando'l segundu llargu de 6b+ pero lo dicho, ensin ganes d'apretar val más nun arriesgar.

Asina cuelga una cuerda nos desplomes del seutor Principal de Priañes


Magar de la preba de Berto, cola cuerda penriba nel 6a+, restolé pente los croquis, viendo que dos de les víes son dafechu inesistentes, y la primer que tenemos ye Codicia (6a+), en la cual métome pola gochada esistente de los alimoches y salgo nun pasu duru hacia'l desplome p'aportar a la reunión que comparte cola columna de Hercules (7a).

Nel intre, recoyendo les cintes, nun m'engancho al arnés con una y al recoyer la primer chapa cercana a la reunión, esnalo como un alimoche, quedando colgáu del vacíu. Buff, que sensación y que desplome tien esti paré.

Tocó repetir la vía en toprope y recoyer toles cintes, quitándose-y les ganes a Berto de facela cola cuerda penriba, jaja. Despedímonos con un pegue de preba, pola mió parte a No Frost (6b), vía guapísima d'agarres grandes y planos, la cuál resolví casi entera, pero eses poques ganes de sofrir, ficiéronme descansar nuna chapa y dexar l'encadene pa otra visitina.

A ver cuando'l tiempu déxanos tornar.....

2 comentarios: