jueves, 26 de marzo de 2015

La Peñona Bloque (Xixón)

21 y 28 de Payares de 2014

Finales de Payares, poca lluz quédanos pa esguilar de tarde, pero saliendo a les 3 de currar en la Felguera entá podemos aprovechar una migayina. Poro, de la que voi pela Minera hacia Xixón, hubo un par de díes que paré a apretar un ratín na Peñona.

Nun quedé con nengún collaciu pa da-y con cuerda, asína que tuve un par d'hores apretando nos milenta bloques. Como únicu llogru, dientro d'un claru descensu de nivel tanto nel bloque como na escalada en xeneral que toi sofriendo, algamé'l bloque d'El Camín.

Aún así, esti bloque abúltame duru como pa poder facelu cenciellu a mou de calentamientu nel intre, poro tocará siguir entrenando ya que nestos díes tampoco fuí a repetir nengunu de los bloques duros algamaos como Camudando'l Camín o Kíla.

Poro, lo meyor d'estos díes fué intentar recuperar sensaciones y tornar a facer bloque con Abel y Fredo que nun veía dende mediaos del branu lo menos.

La Peñona bloque (Bloques visitaos)
 
Croquis modificaos por mi de la escuela d'escalada de La Peñona, por mor del grupu Facebook esistente. Gracies y col so permisu.

-----------------------------------------------------------------------

9 y 20 Mayu, 16 de Xunetu y 6 d'Agostu

Dellos díes más volví pela Peñona a bloquiar, pero téngola pelín abandonada por varios motivos. El primeru d'ellos ye que nun tengo proyeutos con cuerda y eso que tengo material a la espera d'equipar el seutor de Mordor al completu.

Y el segundu ye que nun me presta dir ensín Kíla, a sabiendes de lo qu'esfruta corriendo como una lloca per tolos senderinos pente bloque y bloque. El tema ye que dímonos cuenta de que tolos problemes de pérdida de pelo de la perrina vien de beber agua gafo na fonte de la Peñona, la cual recibe agües del campu golf de Castiellu.

Poro pa nun llevala a ella, nos caberos meses cuéstame dir a mi tamién, anque seya a entrenar un ratín y resolver dalgún bloque de los munchos que t'abriendo Abel. Menudu trabayu que ta faciendo, visita tres visita nun faigo otra cosa que ver peñes nueves qu'enantes taben tapecíes de broza.

Si queréis siguir los avances nesta escuela lo meyor ye que miréis el grupu facebook de la Peñona.

Pelo mió parte, nos pocos entrenos que fice algamé dalgún bloque qu'otru qu'actualizo nos croquis míos de la Peñona, anque hai milenta más na páxina que lleven Fredo y Abel.

Como ún de los bloques duros y mui prestosos que saqué falar de Seo Mo Leaba, variante perdura de Kíla que sal de frente per una ñapina ínfima d'esquierdes y destacar la salida más dura de Camudando'l Camín y el míticu 50 Megatones d'Abel como proyeutos pa un futuru a trabayar.


-----------------------------------------------------------------------

15, 23, 29 y 30 d'Abril y 3 de Mayu de 2014

Nos últimos tiempos, la cuerda pasó a tener importancia de nuevu na Peñona, pero esa ye otra hestoria, anque nunca dexamos de da-y al bloque. Un par de bones amueses, fueron los encadenes de Camudando'l Camín como ya dixera anteriormente y d'un nuevu bloque que nomóse Kíla.

Tábemos probando'l bloque Abel y yo, a la gueta del primer encadene y Kíla nun paraba de tirar tierra y pasar pembaxo nuesa. El nome, taba más que merecíu... al final cayó la primer ascensión pa mí y al siguiente pegue Abel facíase col segundu.

Lo prometíu ye delda... dos vidios d'estos bloques que fáenme muncha ilusión...

Kíla



y Camudando'l Camín



Incomprensíblemente nun fice'l croquis de Camudando'l Camín, pero na próxima visita pondré-y remediu... anque na páxina de facebook de la Peñona, tenéislu de xuru, col megaproyeutu d'Abel... 50 megatones.

-----------------------------------------------------------------------

17, 19, 22, 27 de Febreru, 13 de Marzu y 1 d'Abril de 2014

Munchos son los díes nesti entamu de 2014, nos que tuvi na Peñona faciendo bloque. Tando'l día bonu, quien tien ganes de metese nel rocódromu a entrenar, pudiendo tener a Kíla corriendo como lloca y pasando la tarde apretando na estraña roca xixonesa.

Blocando en peñes grandes
Unos díes sólu, otros con Abel, otros con Pau y otros en grupu, ficimos lo que bonamente díbemos sacando y viendo. Siempre aconseyaos por Abel, que domina caún de los bloques d'esta escuelina, que va espoxigando mes a mes.

Y tamién n'otres más pequeñes

Como nota curiosa, Abel púso-y nome a un bloque con Camudando'l Camín, ya que fuí yo'l que lu visualicé. Díes más tarde, Abel fadría la primera ascensión y otros díes más tarde, fadría yo la segunda.

Espero poder facer un vidiu y semeyes d'esti bloque tan duru y guapu, anque sólo seya pola ilusión de que lleva'l nome del mio blogue. Entá, nun apaez nos croquis de los bloques como voi faciendo y añadiendo a la carpetina d'algamaos y pola que podéis guiyavos p'apretar un puquiñín.

-----------------------------------------------------------------------

28 d'Avientu de 2013 y 15 de Febreru de 2014

La Peñona, pudiera paecer un llugar pelín raru, pa la esguilada, pero ye un pequeña ayalga pa un conceyu ensín bona caliza como Xixón. Col tiempu fuí garrando-y munchu gustu, a esti llugar de bloques unos pergrandes que dan xuegu pa usar cuerda y otros más pequeños, que dan tanto o más xuegu pal bloque.

Abel, ye ún de los culpables, de qu'esti requexu xixonés, tea llimpiu y en condiciones pa trepar, y nun sólo eso, sinon que ca pocu, encárgase de descubrir nuevos bloques pente la broza y los escayos. Aparte, siempre que coincidíamos na escuela, intentaba picame con prueba esti u otru bloque.

Entamando a apretar nos bloques

Nun cayía nes sos tentaciones, ya que taba enfotáu nes víes de cuerda, pero col tiempu, ya nun me queden víes que probar o encadenar, sacante'l retín y el retón na propia peñona y que rondarán el 7a+ o 7b de xuru.
Poro, pa nun escaecer esta escuelina, al llau de casa, tocaba entamar nel xuegu del bloque, qu'hai que decilu too, val pa ponese como un burru y practicar un pelín esos pasos qu'en vies d'altura nun suelen apaecer dacuando.

N'otru bloque probando cosines

El 28 d'avientu, coincidiendo con que diba pasame los vieyos croquis d'El Portalgo, tuve faciendo una primer sesión de bloque con él. Esti mesmu fin de selmana, torné a la Peñona, con tola xente'l grupu, pa facer una variante d'una vía de cuerda... Jerjes (V+) que sigue nel mesmu grau y da-y un pocu al bloque.

La verdá ye que pasámoslo en grande, probando pasinos y movimientos.... poro, déxovos la mió pequeña aportación en 5 bloques nos que tuvimos echando unes rises. Convídovos a siguir la páxina de Facebook d'esta escuela d'esguilada onde tenéis tola información.

No hay comentarios:

Publicar un comentario