miércoles, 1 de octubre de 2014

L'Angliru (Riosa) - Gamonal - Monrasiellu - Fontazán

30 d'Abril de 2014

Track: L'Angliru (Riosa) - Gamonal - Monrasiellu - Fontazán


Un día más nel paru, no que se refier al trabayu, ya que teniendo bonos díes de sol, que meyor que dir al monte enmediu la selmana. Otra vegada, faigo compaña al mió pa demientres anda a la gueta de cogordes, nesti día tan guapu nel cordal de L'Aramo.

Namái aportar a L'Angliru, alcuéntrome con una pintadina nun finxu, que pa cualesquier nacionaliegu, pon-y la piel de pita un pocu, sobretou si llueu echamos una güeyada enrededor, topándonos con un de los llugares más guapos pa facer monte ensín desniveles descomanaos.

Partimos de L'Angliru en Riosa (1554 m)

Como siempre, partimos de Xixón pola autovía "Y" y arrodiamos Uviéu en direición Llión, hasta garrar la salida de Soto Ribera. Ellí travesamos esti pequeñu conceyu (La Ribera) pa entrar en Morcin onde pasaremos pel pueblu de La Partayera enantes de garrar direición Riosa, pasando por Les Maces, Llugar de Baxo, Llugar de Riba y a la fin llegaremos a La Vega.

Dende equí fadremos la mítica xubida hasta L'Angliru pasando per Viapará, contando caún de los milenta cartelos con información pal ciclista que lloñe d'animar, paezme a mí que déxente dobláu al ver la kilometrada que queda y los desniveles a superar. 

Ascendemos a la Gamonal ganando vistes a tol Aramo y macizu de Penaubina

Nel día de güei, escaeceremos rutes de muncho llargor como les feches per tol cordal y tiraré con Kíla a conocer la fastera norte de L'Aramo, col envís de tachar delles cotes morciniegues qu'inda nun conoce y nun tengo claro si entren dientro de les 4 más altes o non.

Pa entamar fadré l'ascensión a la Gamonal, a la cual sedrá como mínimu la tercer vegada na que toi nos sos 1710 ms d'altor. Dende ellí alcuéntrome con una mar de ñubes que-y da un toque si cabe más máxicu a estes rutes a la carrera.

Baxamos a la gueta l'ascensu al Picu Monrasiellu (1671 m)

Siguiendo direición norte, baxaremos la llinea de la Gamonal hasta'l colláu que sepártanos d'un monte con doble cumal casi del mesmu altor: El Monrasiellu de 1671 m. Un pocu de crestéu más, llévanos hasta'l segundu cumal, del que nun m'alcuerdo bien si tenía buzón o yera l'anterior a esti, pero nómase La Calzá (1670 m).

Facemos el tramu dende'l Monrasiellu hasta'l Fontazán

Darréu, baxamos del allargáu Monrasiellu, hacia la braña de Fontazán, la cual déxame ablucáu pol so allugamientu, non ensín enantes xubir al picu Fontazán (1460 m) dende'l cual entamamos a ver cumales más complexos como'l de Canal Furada.

Sicasí, tengo les mios duldes d'ascender a esti picu. Aparte del calter aéreu, voi topame con un amiesta de peña y broza pocu agradable, pero finalmente l'ascensu fadrelu con munchu curiáu siguiendo una traza de pasu d'animales.

Ascensión con curiáu al picu Canal Furada (1409 m)


Toi nel cumal de 1409 m, ensín saber mui bien sin pertenez o non a esos llistaos que tengo y qu'ainda sigo dándo-y vueltes sol altor de colláu que debería ser consideráu como cumal propiu o un hombru d'otru más altu.

Aún así, prestóme la trepada, anque tuve que dir reñendo a Kíla, pa qu'esta vegada nun m'acompañara detrás de caún de los pasos que diba faciendo. Nuna semeya podéis vela a la prubitina, esperando a que baxase al alcuentru.

Baxamos hacia'l Picu Canal Gües (1341 m)

Tengo que dicir que toi nuna fastera de L'Aramo quiciás dalgo desconocida pa la mayoría montañeros, ya que siempre somos a xubir peles cotes de más altor y dexar pa prau munches vegaes lo más guapu.

Les canales de Furada o Gües quedarán pa otru día, ya que quiero siguir de cumal en cumal, así que magar de baxar del Picu Canal Furada, sigo hasta'l de la Canal Gües (1341 m), pelín más baxo pero con un ampliu colláu y unes vistes ablucantes del paré norte del picu de la Canal Furada.

Caleyamos de Brañacé hacia L'Ortigal

Na baxada del Gües, entamará a metese la borrina dende lo baxo, diciéndome quiciabes que ya tuvo bien d'andar per ehí engoláu, poro pasaré pel cumal del Mosquil (1295 m) y entainaré'l descensu hacia'l colláu de Pandelaforca.

Dende ellí, a tramos más zarráu y otros más claro, pasaré per Brañacé, onde va munchos años xintáramos el bocata, Simón, Raúl y yo, dempués de da-y la vuelta a tol cordal a la gueta de l'ascensión a la Gamonal dende Cobayos... coses de ser novatos.

Del guapu mayáu de L'Ortigal al de Cobayos

Pali pali, Kíla y yo, vamos ganando-y tarrén a la vuelta al coche al igual que'l sol lo fai cola borrina. Conoceremos a la carrera, la guapa braña de L'Ortigal faciendo camín hasta Covayos, onde Kíla decide parar un pelín a refrescase, ya que Llorienzu pega con ganes nesta dómina del añu.

En Covayos, onde daquella dexaramos el coche pa facer una ruta d'aniciu cenciella, alcontré'l camín per onde tendríemos de dir cuantayá. Namái, había que salir penriba les cabañes, casi al llau de la carretera en direición a una pequeña braña la de L'Ánganu.

Xubimos por L'Anganu pasando pol Toyu la Veguellina hasta agüeyar L'Angliru de nuevu

Llueu ascenderemos un pelín más, dexando la carretera y les sos envueltes y pindies rectes bien baxo, topándonos pocu más alantre al salir al llanu del cordal, la llaguna artificial del Toyu la Veguellina.

Dende equí, navegaremos pente foyos, hasta acolumbrar el valle que tien de llevanos de nuevu hasta L'Angliru, dexando a la nuesa mandrecha, tola faldera de la Gamonal y a la manzorga un pequeñu altu, el d'Ovia, baxando con pocu más hasta'l puntu de partida.

En resume, ruta perguapa col envís de conocer la fastera norte d'esti cordal central d'Asturies. Nós, mediu corriendo cuando podíase mediu andando, tardamos 4 hores y cuartu en percorrer casi 11 kms, superando a la fín un desnivel acumuláu de 1180 m... nun ta nada mal.

Que vos preste!

Camudando'l Camín pente les ñubes

Nesta ruta ficimos cuatru cotes de Morcín: La Gamonal (1710 m), El Monrasiellu (1671 m), Fontazán (1460 m) y el Picu La Canal Gües (1341 ,m)
Ver progresos en: Retos montañeros

4 comentarios:

  1. Animalitos, si pudieran hablar, a veces las mías me miran con una cara como diciéndome: "a donde cojones me has traído" jajaja.
    Buena ruta, que demuestra que muchas veces para disfrutar de buenos paisajes no es preciso subir cotas muy altas.

    Un abrazo.

    ResponderEliminar
    Respuestas
    1. Que tal Dani? A ver cuando t'animes a venir p'Asturies... se que pilla un pocu lloñe, pero nun ties que conocer esto... o al menos un pocu d'ello, jeje.

      Kíla ye una santa... aún así, cuando me dí cuenta teníala detrás a la mui cabrona.

      Un abrazu

      Eliminar
  2. Muches gracies por publicar esta rutuca tan guapa por el angliru riosanu. Oye quería preguntate a ver si me podies decir onde se pueden conseguir o comprar los mapas esos de relieve de la tierrina asturiana con les curvines de nivel como el que publiques arriba . Muches gracies y a seguir pateando les montañés de esti paraíso

    ResponderEliminar
    Respuestas
    1. Gracies pol comentariu Xuacu.

      Son mapes qu'hai na rede pal software de Garmin Mapsource, col que preparo les rutes pal GPS y demás.

      Si quiés dígote onde pues descargalos, pero sin el programa nun te val de muncho.

      Un saludu

      Eliminar