viernes, 5 de septiembre de 2014

La Vana (Cuideiru) - Monte Gamonéu - La Peñona

27 d'Abril de 2014

Track: La Vana (Cuideiru) - Monte Gamonéu - La Peñona


Díes raros, hailos a pataes y esti fué ún d'ellos. Deberíemos tar en Somiedu xubiendo la Penouta, pero a cambiu tamos en Cuideiru pa xubir un vértice d'ún d'esos montes d'ocalito qu'hai cerquino la costa.

Ye lo malo de xuntase dende abenayá tolos collacios, que la cosa líase y llueu nun hai quien seya a llevantase. Pa quitar el mal tastu de nun cumplir col grupu montaña, tiramos Pau, Kíla y yo, a dar un paseín ya que'l día taba guapu pa la costa y nun yera cosa de perdelu enteru.

Cartelu de la ruta L'Ocalitón

Asina que tiramos pal occidente pela As-8 hasta la salida de Muros y Somao, onde garraremos la N-632 hasta un apartaderu enantes del crucie con La Vana. Nesti puntu, alcontrámonos col cartelu de la ruta del Ocalitón, qu'ensín sabelo va llevanos perbien hasta'l vértice oxetivu del día, el de la Peñona.

Xubimos per una pindia pista hasta topanos col Ocalitón

Ensín perda dalguna vamos xubir per pista, caleyando sele, demientres Kíla corre como si nun hubiese mañana. Magar de delles envueltes, topámonos col Ocalitón, quiciábes ún de los pocos exemplares que se podría dexar ante un hipotéticu desaniciu d'esti árbol malditu pal monte asturianu.

Demientres alcontrámonos ciclistes agüeyamos la mariña pixueta

Hai que dicir, qu'anque diga que salimos de La Vana en Cuideiru, nun llegamos a cruciar la riega del Aguilar y poro taremos en Pravia tol primer tramu de ruta, jeje. Ensín mayores problemes que salvar el pocu desnivel y conseguir que Kíla nun vaya a saludar a tolos ciclistes del desafiu Somao de BTT, aportamos a la cumera del Monte Gamonéu, nel altu la Cortina.

Empobinámonos per bona pista hacia la cumera'l monte

El día nun ta tan guapu como quixéramos, pero al menos dalguna vista pa la costa tenemos cola Islla la Deva como máximu atractivu. Siguiremos pela llende entre Pravia y Cuideiru, siempre per pista hasta acolumbrar una llomba de yerba onde suponemos qu'alcuentrase'l vértice naguao.

Averámonos al area recreativa de la Peñona

Enantes d'esti arribaremos hasta l'area recreativa de la Peñona, la cual tien bon equipamientu y mui bones vistes de la costa. L'aparcamientu quiciabes ye escesivu, ya que nun albidro cuanta xente suel xuntase equí... nun había naide.

Aportamos al cumal del monte Gamonéu: La Peñona (508 m)

Pa finar, metémonos na llomba herbosa, coincidiendo con más ciclistes, ya que'l monte Gamonéu, estráu de pistes forestales, ye un clásicu pa los amantes del Btt. Semeyes varies col vértice y rises con Kíla y los ciclistes y tornamos pel mesmu camín con más tranquilidá si ye posible.

En resume, ruta perfecta, si engañamos a dalguien pa xubir col coche enlleno caxes de sidre y carne pa facer una bona parrillada. Mentanto, los aguerridos montañeros, fadremos fame durante poco más de dos hores y media, nes que superaremos 450 ms de desnivel acumuláu caleyando un pelín más de 9 kms (faciendo ida y vuelta).

Camudando'l Camín con Kíla pixueta

Nesta ruta ficimos: La Peñona (508 m) vértice xeodésicu de Pravia.

Ver progresos en: Retos montañeros

No hay comentarios:

Publicar un comentario