miércoles, 9 de abril de 2014

Recorva (Tinéu) - Picu Mul.leirosu

23 de Febreru de 2014

Track: Recorva (Tinéu) - Picu Mul.leirosu


Yera hora de tornar a tierres occidentales astures y nesti casu vamos averanos hasta'l conceyu de Tinéu. Ellí, vamos conocer el Picu Mul.leirosu, nomáu monte poles sos condiciones meteorolóxiques gafes y de perguapa forma cónica.

Saldremos de Xixón ceo, garrando l'autovía Y, hasta l'empalme n'Uviéu cola de la Espina (A-63) hasta'l so final en Corniana. Garraremos la N-634, travesando'l conceyu de Salas a la vera'l ríu Nonaya, llibrando la capital pelos nuevos tramos hasta La Espina, onde entama'l conceyu Tinéu.

Siguiremos camín, pela As-216 conociendo dellos pueblinos como La Preda, El Pedregal, Santolaya garrando en Tinéu la As-217 hasta Parafita, onde salímonos pela As-218 hasta l'altu Paratecha, onde baxaremos pela Ti-3, pasando per Veiga de Rei hasta Campiel.lu onde almorzaremos en Casa Herminia de luxu.

Partimos de Recorva (616 m)

Nun se nin cuantu tiempu taremos dándo-y al embutíu, tostes, mermelada, bizcochu... el casu ye que la fartura fue grande. Magar d'ella, siguimos camín pela Ti-3 hasta xuntanos cola As-219 hacia Ese de San Vicente, siguiendo carretera hasta Ricastiel.lu, onde tomamos la pista final que dexarános en Recorva.

Dexaremos el coche, más enriba d'un aparcaderu estupendu qu'hai nel pueblu, pero nun paga la pena, llibrar cuatru envueltes de pista porque nun ye cómodu dempués pa dexar el coche. Pela pista, aportaremos a un taller y detrás d'ésti, sal un camín que magar d'otra envuelta sal a la manzorga con bon firme pa caleyar.

Xubimos per bon camín cruciando los praos de la Sapera

Nun hai perda nenguna, poro xubiremos sele agüeyando los guapos y curiosos cortinos, onde zárrense los truébanos pa que los osos nun seyan a esgonciálos y puédase recoyer la miel tan bona qu'hai nesta fastera d'Asturies.

Tamíen, vamos encantaos caleyando coles vistes de los montes de Somiedu, que ya dende la Espina fueron a amosase dende una perspeutiva nunca acolumbrada pola mayoría de nós. D'otra miente, nunca nun tuviéramos de monte nestos conceyos, sacante Pangua y Rebe.

Fadremos una llarga envuelta hacia las Llagunas, onde abriremos les vistes hacial norte

Ensín danos cuenta, aportamos a los Praos de la Sapera, onde facemos una envuelta, col envís de ganar el colláu de las Llagunas. Nesta parte cabera, alcontraremos munchísima agua pel camín, faciendo más prestosa la xubida pa les perrines Kíla y Sua, que tan portándose de luxu.

Ensín escaecer les vistes al sur, entamamos l'ascensu al Mul.leirosu

Nos 1044 ms de las Llagunas, ganamos vistes al norte, anque ta'l día borrinosu y nun dexa ver la costa occidental astur. Pal sur, somos a pescanciar grandes cotes de Cangas del Narcea, como'l Cuitu Arbas o el Caniel.las.

Ensín mayores dificultaes, siguiremos ascendiendo pel Valabedul, que casi ensín colláu da pasu a la L.lana Mul.leirosu, per onde entamaremos l'ascensión final, llibrando per onde menos vexetación tengamos, hasta les lleres finales que tantes tormentes atraen nesti monte.

Ensín dificultá facemos cumal na pedrera del Mul.leirosu (1254 m)

Con pocu más esfuerzu taremos nos 1254 m del Picu Mul.leirosu, onde alcontrarémonos con milenta finxos de piedra, feches coles miles de piedres qu'encumen esti monte. El vientu nel cumal, fai pocu prestosu pasar munchu tiempu, poro sacaremos les semeyes ya intentaremos decidir que vamos facer pa la vuelta.

Semeya de grupu nel Picu Mul.leirosu

Llevamos dos hores de ruta y son les 12:15, poro camentamos cuala ye la meyor opción y pente pitos y flautes... too son gaites. Al final, nin siguir ruta con una baxada distinta, nin dir a xintar en dalgún pueblín nin na de na... baxamos pel mesmu llugar.

Personalmente, encamiéntovos a facer la ruta de los collacios de las Claras, que xubieron pela ruta de les aldegues abandonaes, conociendo los pueblos de Beisapía y Curriel.los, completando una guapa circular, ensín allargar la ruta muncho más d'una horina.

Baxamos del Mul.leirosu por mor del vientu gafu y avérome nuna carrina hasta la Peñamosca

Demientres baxamos otra vegada pel mesmu llugar, salí corriendo con Kíla hasta Las Llagunas col envís de xubir hasta la Peñamosca, alcontrándome na L.lana'l Fontón con unos cazadores que veníen per pista dende Ceceda.

Cumal na Peñamosca (1080 m)

Llueu d'unos minutinos de charra, indicándo-yos que nun teníen continuidá en touterrenu dende equí hasta La Marta como ellos creyíen, siguí l'ascensión hasta los 1080 m de Peñamosca, el cual tien una guapa vista del Picu L'Ablaniegu.

Baxamos a fueu pela Sapera hacia'l camín

Dende la Peñamosca, Kíla y yo, baxaremos a fueu pente la beriza y dalguna cotoyina, hasta qu'estes tomaben tamañu na Sapera, onde decidimos metenes nes lleres, faciendo un pocu d'entrenu p'ambos nesti tarrén inestable tan típicu de la montaña.

Aportamos a Recorva con tranquilidá

Con pocu más, qu'esperar sentáu pel restu'l grupu, reunímonos y baxamos hasta Recorva, onde mudámonos de ropa y decidimos baxar hasta Navelgas onde xintar los bocatas y tomar el vermú viendo qu'inda dábanos tiempu.

En resume, rutina corta con ascensión tranquilina, meyorable cola opción de la circular pel valle'l ríu Beisapía y Bárzana. Na nuesa percorrimos casi 10 kms nuna duración de 4 hores y cuartu, superando un pelín menos de 700 ms de desnivel, cuntando cola ascensión a la Peñamosca.

Camudando'l Camín en Tinéu

Nesta ruta ficimos: Picu Mul.leirosu (1254 m) monte prestosu astur y vértice xeodésicu de Tinéu

Ver progresos en: Retos montañeros

No hay comentarios:

Publicar un comentario