martes, 22 de octubre de 2013

Premoñu (Les Regueres)

1 d'Ochobre de 2013

Seguimos intentando "escapar" de les escueles más visitaes por nós esti branu, y tenía munches ganes de quitame una espina na escuelina de Premoñu. La última visita, metíme un vuelu de los de quedar n'alcordanza y metémelu nun 6a, pues duel un pocu.


Así que plantámonos ellí, Sonia, Berto y yo y namái llegar métome a por ella ensín miramientos y llega'l pasu clave col alexe de chapes y el tactu de la roca, que nun me presta na de na, y enantes de salir volando prefiero salime pel V+ de la mandrecha y quedame col pasu bien.

Sonia sufriendo de primera en Vieja Pelleja(V+)

Descansu un pelín, miro'l pasu, alcuentru un agarre que vienme estupendo y p'abaxo. Sigue ensín gustame res, el tipu de caliza, con un toque a cementu que paez facer sudar les manes y nun tener l'agarre que más me prestare.

Al siguiente pegue, va too ensín problemes hasta riba y fáigome con Sólo para Catedráticos (6a) qu'al menos pueu dicir que quitémela d'enmediu. Demientres tanto Sonia como Berto, tuvieron pegándose con Vieja Pelleja (V+), na cuál Sonia pásalo pelín mal y llega hasta riba a tramos y Berto faila en toprope qu'anda tocáu de la rodiella.

Berto a la preba la Vieja Pelleja

Tamos n'Ochobre y nótase muncho que los díes son curtios, poro pocu más tiempu tenemos pa encadenar de nuevu yo, Luna (6a) quedándome más a gustu que l'anterior encadene, anque tamién apreto como un putu animal.

La verdá ye que nun pueu creyer qu'estos graos tean bien, bien puestos ya que los movimientos que tuve que facer pa encadenar otra vegada Luna, nun los tengo que facer en munches víes d'otres escueles. Otra amuesa d'esto ye que Sonia y Berto nun fueron capaces de pasar de la primer chapa de La de Calentar (V).

Quitándome la espina de Solo para catedráticos (6a)

En fín, otra escuela d'estes que te pon nel to sitiu y que cuando crees que ties un grau afitáu, báxatelu d'un güelpe y vuelta a entamar otra vegada....

Premoñu
Croquis modificaos por mi de la escuela d'escalada de Premoñu, por mor de Piratas Free. Gracies y col so permisu.


--------------------------------------------------------------------------

El pueblu de Premoñu nel conceyu de Les Regueres ye'l llugar onde menos pudiérase albidrar una escuela d'escalada, pero nun ye así, ya qu'al llau del calce del ríu Nalón, tenemos una peñona caliza na que tan equipaes delles víes.

Pa llegar a Premoñu, nós garramos l'autovía "Y" en direición Uviéu y siguimos dempués en direición Grau pola As-63, hasta la salida de Llera, al cual aportamos pela N-634 empobinándonos hacia la Vega d'Anzó, pero enantes desviámonos a la mandrecha pa cruciar primeru la vía'l tren y el ríu Nalón per una estrecha puente, pa pasar primeru per Valdunu y llueu aportar a Premoñu.


Vista del ríu Nalón dende Premoñu

El camín, sal xustu enfrente d'un guapu horru y pa dexar los coches hai que tener un pocu de suerte, pero más alantre o más atrás pela carretera o entrada de dalgún camín, pue arrimase ensín molestar.

Per esti camín, caleyaremos, hasta pasar una portiella d'allambre y metíos nun prau saldremos en diagonal hacia la parte baxera'l prau, onde sal un camín que déxanos en menos de cincu minutinos nes víes de la peña y cola guapa vista sol ríu Nalón.


Pie de vía bastante cómodu

Hai un total de 9 víes, que van dende'l V hasta'l 7a+ pero nun fiarse muncho de los graos, ya que ye una graduación pelín más baxa que nel L.lano u Otura y aparte l'adherencia y la bona téunica de pies ye imprescindible.

Tol munciu pegándose cola de calecer músculos (Berto, Gus, Pau y Sonia)

Tengo que dicir, qu'esta escuela tien el placer de proporcioname'l mayor vuelu de mi hestoria esguiladora y el grau de la vía yera un 6a, poro quiero amosar que'l grau en toles víes nun ta regaláu nin muncho menos y que si vos presten los cazos y tirar de brazu, nun ye'l llugar más afayaizu entos.


Pepín en dos víes distintes

Personalmente, como préstame esguilar en tolos tipos posibles d'estilu y l'adherencia siempre dióseme bien, esti llugar motívame abondo y la equipación, con chapes dalgo distanciaes (más de lo que me gusta) da-y un puntu d'aventura y mieu, ca vegada que méteste nuna vía.


Pau nun V+ bien guapu

Con tou, a pesar de nun ser un gran llugar pa escolinos na escalada, si que'l V+ (Vieja Pelleja) preciosu da la posibilidá de continuar la vía hasta una segunda paré más alta, onde hai un bon descuelgue que da'l xeitu perfeutu pal top-rope en toles víes de la mandrecha.

En resumen, escuela llocal, pocu visitada, nel que pues pasar un día o una tarde o mañana, casi meyor, con bona tranquilidá y l'acabar frayáu física y mentalmente t'aseguráu al final de los pegues téunicos.

3 comentarios:

  1. Hola, me llamo David Pascual, pertenezco a la Coordinadora Ornitolóxica d´Asturies (COA). Quiero informaros de que entre el 1 de marzo y el 31 de Julio no está permitida la escalada en Priañes para evitar molesrtias a la pareja de alimoche que suele criar allí. Las limitaciones a la escalada en esta escuela y en otras de Asturias para evitar molestias a aves rapaces en epoca de cría están publicadas en el BOPA Nº95 de 25 de abril de 2012.Escalar en estas fechas es objeto de sanción, así que los ecaladores podrán ser denunciados por guardería del Principado o por el SEPRONA. Os lo comunico para vuestro conocimiento y os agradecería lo comunicarais a los escaladores que conozcais.

    un saludo

    David Pascual

    ResponderEliminar
  2. Que metedura de pata¡ En una vista rápida pensé por las fotos que era en Priañes, y ahora me doy cuenta de que no es esa zona, sino aguas abajo en el Nalón.

    David Pascual

    ResponderEliminar
  3. Non, non, conozco Priañes y esta ye otra escuela más arriba y na marxe contraria a la de Priañes.

    Un saludín

    ResponderEliminar