viernes, 8 de noviembre de 2013

Arnáu (Castrillón)

12 d'Ochobre de 2013

Kíla pasándoselo xenial pente les peñes y l'agua

Sábadu pela mañana y así sobre la marcha, llevantámonos y decidimos facer una visitina a una escuela un tantu especial, la d'Arnáu. Nun la conocíemos y hai que dicir que'l llugar ye espeutacular, ya que poder esguilar al llau de la mar nun se pue dicir tolos díes.

Entamando la vía d'El Francés (IV)

Aparte, el sitiu ye perafayadizu pa Kíla, que pue correr y bañase llibremente nes poces que suelen quedar na esplanada de pedreru qu'hai delantres les víes, asína como pa descansar d'esguilar, poder xintar y tomar el solín un ratu pa dase un bañu na sablera enantes de marchar... perfeutu.

Ablucante llugar pa esfrutar de la escalada y les vistes

No que cinca al tema deportivu, la escalada nos parés d'estos cantiles ye rara, tirando a mui rara. Los agarres son mínimos y la roca paez esnidiar al tactu de les manes. Sacante d'esta roca rara, el seutor Francés ufréznos una escalada con ciertu toque alpinu al menos nes víes que probé.

Sonia nel Francés y yo en Lucas

Namái tuviemos tiempu pa prebar un par d'elles, El Francés (IV) y Lucas (V), les cuales percorren un diedru la primera y una fisura la segunda, obligándonos a movenos y colocanos a cada pasu, p'alcontrar los meyores agarres.

Rara roca y escalada pelín distinta a lo que tamos avezaos

En resume, una escuelina distinta pa esguilar, pero preciosa pa pasar el día, cola playa, colos pedreros, con unes vistes xeniales dende les reuniones, poro habrá que siguir intentando facer dalguna vía más, anque pa ello haya qu'andar fino, fino de pies.
La playa d'Arnáu... un paséu final perfeutu

Arnáu
Croquis modificaos por mi de la escuela d'escalada d'Arnáu, por mor de Piratas Free. Gracies y col so permisu.
 

 

4 comentarios:

  1. Bones nuechis collaciu,

    Atopé esti blogue per casualidá y agora que lu conozco, col to permisu quedome per equi pa seguir les tos evoluciones.

    Yo d'escalada nun se nin facer un nudu nuna cuerda, pero soi comu les cabres monteses, en cuantu veo una peña tiro p'arriba, asina que comu quiera que compartimos pasión poles montañes y por la nuesa llingua llariega, pongote na llista de blogues collacios.

    Por ciertu, Arnau conozcolo perbien, ya que diba de pequeñu a la playa y col muséu, la senda costera y dalguna otra meyora tan dexandolo perguapu.

    Alón,

    ResponderEliminar
  2. Munches gracies Rubén... un placer que descubrieses esti blogue y que te preste pues muncho más.

    Arnáu foi un gran descubrimientu, tantu pa esguilar como sobremanera pol sitiu que ye bien guapu

    Un abrazu, Berto.

    ResponderEliminar
  3. Hola Berto, veo que encontraste otru sitiu p'agarrate a la roca, además muy completu con la playa ahí mismo.

    Creo que te lo dije haz tiempu, "ganose un escalador, pero perdiose un montañeru" ultimamente nun faes mas que escalar y escalar jajajajaaa. Bueno alegrome por tí igualmente.

    Un abrazu, amigu

    ResponderEliminar
    Respuestas
    1. Que tal Monchu? Ya ves, hai más entraes d'escalada que de monte, pero simplemente son actualizaciones coles víes que voi algamando.

      Amás lleven muncho menos curro que les de monte, jeje. Aún así, siempre seré montañeru anque tea pelín más enfotáu na escalada agora mesmu.

      La siguiente ye de monte y de la to zona, a ver si te presta

      Un abrazu

      Eliminar