lunes, 30 de agosto de 2021

Valverdín - Pedrosa (Los Argüeyos)

31 de Xunetu de 2021

Continuábemos de finde per Llión y dempués de la escalada apretona y física de Cerulleda, quisimos cambiar un pocu l'estilu y fuimos hasta Valverdín onde facía dellos años que nun trepaba. Nesti casu, aportamos a esti pueblín de Los Argüeyos, aldericando so les posibles restricciones por añeramientu y onde podríemos trepar al solín.

Mirando la guía Roca Verde 3 vimos que fuera del paré cimeru de Valverdín - Pedrosa había un nuevu seutor nel que nun teníemos restricciones, poro colamos hasta La Piedra, nun pateín per pista abondo agradable, dando vista al guapu paré, nunos 45 minutinos.

Averamientu pelín llargu dende Valverdín hasta'l paré

Cola suerte de tener dalgo de brisa, pudimos esguilar ensin quedar tolilis del calor, probando una típica vía de placa gris llionesa de 6a+, Esperanza, na qu'apreté pa encadenala como si fuera un malditu sétimu... siempre prestóme esguilar en Llión, pero la paciencia cola adherencia non adherente va agotándose pali pali.

Anna trepando nesti guapu muru

Viendo que'l paré daba un pañu de roca coloradina, nun lo pensamos más y fuimos a probar un 6b+ (Cículo de Hierro) de bones preses, mui divertíu de trepar, pringándolo arriba'l too, cuando la roca colorada tornóse en gris y entramos de nuevu nel mou adherente pero con polvín guarru, onde la pringué, teniéndo qu'encadenala al siguiente pegue.

Camudando'l Camín per Valverdín

Nun sé mui bien por qué, pero'l llugar prestóme polo tranquilu del pié de vía, contando nun alcontrar más cordaes nin de broma pol patéu. A simple vista y de la que baxamos del 6b+ ya se veía a los llaos en tol pañu coloráu, mui bona pinta nel restu de víes que rondaben pente'l 6c y el 7a+.

Tamién pa tolos públicos y los amantes de la adherencia había más víes de placa gris a la manzorga'l paré, con graos dende'l V hasta'l 7a, así que pa les 14 víes que caltién el paré, tien de too pa pasar un día trepando, eso sí, al solín ya como tol pañu ye Sur dafechu.

Valverdín - Pedrosa
Croquis de la escuela d'escalada de la escuela de Valverdín-Pedrosa, por mor de La Montaña Leonesa o Escalada León Gracies y col so permisu.
 
 

-----------------------------------------------------------------------------

3 de Xunu de 2017

Entamu del tiempu d'escalada a fueu, como ye l'horariu de branu y como suel ser vezu n'Asturies, anda'l tiempu revueltu nesti final de la primavera. Aún así, andábemos con ganes y tiramos hasta Llión que daben meyor tiempu... y más en concretu, teníemos ganes de tirar pa Valverdín onde tuviera va unos añinos trepando.

Zori trepando con vistes a Valverdín

Esta vegada, pa cuando aportamos les víes más cencielles de placa taben ocupaes, asína que tiramos hasta'l seutor de los Bordillos, metíu dientru de No es lo que parece. Ellí, tuviemos trepando Zori, Richar y yo, toles víes hasta que más menos, siempre teníen un pasín apretón.

Richar plaqueando nel seutor de los Bordillos

Un ratín más tarde, apaecieron per ellí Haritz y Jeni y Pepa y Jose , aprovechando pa trepar per dalguna vía que teníemos tovía montada, hasta que llegó la hora de xintar el bocata. Nel intre, la meteo aguantaba con un salín que calecía l'ambiente un pocu pero tiraba un airín que nun yera precísamente mui agradable.

Faciendo un par de víes perbones Richar y yo

Na segunda parte del día, fué nublándose poniéndose un pelín feu y fríu enforma, tolo contrario que la escalada qu'entamó a ganar enteros, pasándonos a un planchón dientru de No es lo que parece onde enchufé tres víes que paeciéronme d'una calidá tremenda pa los sos graos (6a+, 6b y 6b+).

Haritz y Jeni apretando nunos sestos increyibles

Si esfruteles faciéndoles a vista, los collacios en polea nun fueron menos, baxando d'elles con ganes de xubir un pelín el nivel y poder probales de primeru dalgún día. La verdá ye qu'en Llión, tengo la sensación de que les plaques tan graduaes perdures pero lo vertical déxase esguilar muncho más.

Kíla a lo suyu... tar tiradina nel prau cuando-y apetez

-----------------------------------------------------------------------------
 
8 de Setiembre de 2013

Magar d'una escapadina hasta Llión capital, pa tar tapeando y tomando cortos de vienres y sábadu, averámonos el domingu Pau y yo, hasta la escuela de Valverdín na fastera llionesa de los Argüeyos.

Nun teníemos munches intenciones d'esguilar tiempu, pero al menos si que nos apetecía conocer el llugar y que Kíla corriese suelta un ratín, ya qu'en Llión, sacante del paséu al llau del Bernesga nun la pudimos soltar na.

Guapa y soleyera escuela de Valverdín-Pedrosa

Poro, aportamos hasta'l pueblu de Valverdín y vemos los parés, bien cerquina nuesa. Tolos seutores miren al sur, así que ye un llugar estupendo pal iviernu, ya qu'anque faiga fríu, si'l día ta espeyáu, ta garantizáu tar más que calentín esguilando col sol a la espalda.

No deportivu, namái que prebamos dos víes de IV grau, a la manzorga del seutor No es lo que parece. Con ello, ya tuvimos más que suficiente pa conocer el tastu de la peña y el tipu d'esguile que faise nesta escuela... l'adherencia.

Prebando l'adherencia fina d'esta caliza

La verdá ye que fícimos alcordanza de la escuela de la Uña, al paecénos un xeitu d'escalada mui asemeyáu al de la placa de la mandrecha, con esos planos de roca ensín agarre de manes nos qu'hai que fiase de los gatos al cien por cien.

Con pocu más, decidimos colar, ya que nun teníemos nin muncha agua pa soportar el calor, nin croquis pa enguedeyanos en denguna vía más, y como Kíla ya corriera tamién abondo pelos pies de vía de la escuela y nun tenía muncha sombra pa tar tiradina un ratu, yera'l momentu.

Un llugarín más onde esguilar cuando te malo p'Asturies

En xeneral, valiónos pa descubrir otru sitiu nel que venir, cuando n'Asturies ponse'l tiempu imposible pa facer dalguna actividá al aire llibre, así que tornaremos encantaos y preparaos pa pasar un día enteru prebando víes una tres otra.

2 comentarios:

  1. Otru lugar nuevu pa esguilar. Muy bien Berto
    Jorndada corta pero guapa, no?
    Un saludu

    ResponderEliminar
    Respuestas
    1. Na, Monchu, conocer el sitiu y pocu más.

      Va prestate más les siguientes entraes, jeje

      Eliminar