miércoles, 14 de abril de 2021

Val.le (Somiedu)

29 y 31 Marzu de 2021

Como ya comentara na entrada montuna de los puertos de Cuevameliz tuviéramos 3 díes pel Val.le, esfrutando d'unos díes d'escalada tranquilos y de tola guapura somedana. Nun tien preciu, espertar nel aparcaderu y acolumbrar munches de les cotes del Val.le ñevaes y con una meteo mediánamente agradable.

Cómodu pié de vía con vistes a los picos ñevaos del Val.le

El día qu'aportamos al Val.le, fuimos diréctamente a la Pena Blanca a trepar un ratín, aportando al seutor con solín, pero bien ceo, púnxose friu y tuviemos de tirar de térmica pa esguilar, cosa que nun suelo facer enxamás.

Un par de semeyes apretando en El OSo (6c+)
 
Esi día, entráremos dempués de calecer nun V a ún de les víes que faltaben por facer nel seutor, como yera El Oso, un 6c+ de pasu plaqueru, que por mor de lo guarro que taba, nun pudo salir a vista. Llueu de llimpialu y sacar la secuencia encadenelu al segundu pegue, non sin apretar durín.

Vidiu del pasu duru y finu de Pote con F1
 
Al día siguiente alboreciera, con un vientu fríu, que diba ponenos difícil esguilar a gustu. Viendo que'l día anterior ya ficiéramos dellos metrinos Andrea, Anna y yo, fuímonos a caleyar dexando l'últimu día al solín, otros tantos pegues enantes de despedir la estancia somedana con una merienda-cena pandémica.

Plaqueando fino en Pote con F1 (7a+)
 
Esi día, demientres Andrea, continuó faciendo metros y ventilando les víes más cencielles del seutor, Anna y yo probamos Pote con F1, un 7a+ pelín soft, que caún encadenó al so estilu, faciendo'l bloque en mi casu por monodeos ñaperos pela mandrecha y Anna, con un bloqueu brutal y manu-pié pela manzorga.

Guapa escuela la del Val.le na Pena Blanca

En resume, estos tres díes dexónos bon tastu montañeru y esguilador, como meyor tastu dexónos la cena precumpleañera mía en Casa Cobrana, onde namái que podemos da-yos les gracies pol tratu, tanto nos almuerzos, como na cena y la sidra post-actividá.
 
Pa que llueu digan, que los furgoneteros, nun dexamos perres...

Val.le
Croquis modificaos por mi de la escuela d'escalada del Val.le, por mor de Piratas Free y Camping L.lagos de Somiedu. Gracies y col so permisu.

------------------------------------------------------------------------------

19 Marzu de 2017  

Pues un día más, andamos tiraos per ehí, esfrutando de la vida furgonetera y dempués d'una ruta increyiblemente guapa per Somiedu, que ya contaré porque esa ye otra hestoria, despertámonos nel Val.le del qu'hai que dicir ye'l valle más guapu de too Somiedu, anque seya una pena dicir que'l de Saliencia o del Pigüeña lo seya menos.

El casu ye dempués d'almorzar como paisanos, averámonos a la Pena Blanca onde ta'l principal seutor de la escuelina d'escalada del Val.le. Y digo seutor cimeru, pero pocu aprovecháu porque nesta escuela pudiera abrise víes a lo ancho y a lo alto, sobretou a lo alto... que llargazos saldríen y cuantos metros de trepe.

Ablucante'l día... nun hai sitiu más guapu

Teniemos un par d'oxetivos durante'l día, reequipar ciertes chapes robaes, lo cual solucionamos esguilando un pocu pa calecer y facer dalguna de les 4 víes que tengo ensin probar siquiera, decidiendo meteme nel 6b+ que tien un pasu difícil de lleer.

D'esti xeitu, mandóme a la llona nel primer pegue a vista y tuve que da-y otru pa encadenalo y quedamos mui a gustu, porque la vía ye perbona y repetirela siempre que vaya pel Val.le a trepar pa calecer pa hestories más dures.

Semeyes del val.le dende'l paré con Zori trepando y Richar asegurando

El restu del día, enantes y dempués de facer la vía, dediqueme a reequipar les víes en mal estáu y a asegurar a Haritz que disfrutó munchísimu metíendose metros pal cuerpu nos quintinos tan guapos que tien esta escuelina.

Richar también se enchufó delles víes que tenía ensin probar con un primer quintín que-y costó pa tomar sensaciones y dempués enchufó un 6a brutal con un tramu de fisura y un par de travesíes pa chiflar... viote pal grau que tien.

Así va esto... faltába-y la batina

Y pa nun ser menos Zori, que tovía tien qu'ameyorar la cabecina a la hora de dar los pasos duros apretando y dándolo too, aportó a cadena nun V+ en top, saliendo per un techín, que nunca lo ficiera enantes... así que colamos d'ellí toos encantaos y con ganes de volver.

Dende equí, dar les gracies al chigre d'embaxo la escuela, Casa Cobrana, que dexónos xintar el bocata nes meses de fuera moyando'l gargüelu con una sidre de restallu que tenía. Que rises tar al llau d'unos pih.eres de la capi toos engalanaos y nós enllenos de magnesiu per tolos llaos y dándo-y al sidreu con un bocata de bonito con mayonesa jeje.

------------------------------------------------------------------------------
 31 d'Avientu de 2016 y 1 de Xineru de 2017

Llegaba a la fín l'añu 2016, un añu complicáu, un añu de cambios pero como tolos años d'esta vida que nos tocó vivir, un añu qu'intentamos facer les coses lo meyor posible, colos nuesos erros y los nuesos aciertos.

Pepa, Jose y Kíla... el grupín adelantáu

Erros hubo munchos, pero aciertos tamién y munchos tuvieron que ver cola amistá, con centrar la vida lo qu'un quier facer, con esfrutar de cada minutu de vida porque nunca sabemos que coño nos va traer el día siguiente.

Trepando nun día perfríu nos val.les pero calentín nel paré

Como non, había qu'acabar l'añu faciendo lo que más-y presta a esti paisanu que lleva escribiendo fataes dende'l 2009, tar al aire llibre, de monte, esguilando o agora corriendo... pero al aire llibre. Nun díbemos ser menos y decidimos dir pal Val.le a trepar y pasar un fin d'añu distintu.

Pepa, Jose y Richar apretando en víes guapísimes

Lo de menos ye cuanto trepamos, si más o menos, pero dicir que cauna de les víes que probamos nel Val.le fue una pasada, tan sólo podemos dicir que nun pagaba la pena metese na de la manzorga'l too del paré... por gocha y con un percorríu pelín gafu.

Preciosos díes nel Val.le... pena nun pasar más díes

Lo demás, fue probar una bona vía tres d'otra y anque nun tuviemos en grandes graos, si qu'esfruté trepando a vista, al sol, na nuechebona y el primer día de l'añu, ensin resaca o con resaca fina, pero pente collacios.

Esguilando al sol el fín d'añu

Poro, quedamos con ganes de tornar al Val.le p'apretar nes víes más dures, al menos yo, tengo munches ganes de probar les plaques téuniques más dures de la escuelina, que siendo sinceros bona falta-y facía dir con taladru y ampliala a lo ancho y sobretou a lo alto... porque hai metros enforma p'arriba.

Hasta la próxima....

----------------------------------------------------------------------------

Hestoria na escuela del Val.le

Nun solo de montañes vive l'home, nin la muyer, nin tampoco'l perguapu pueblu del Val.le en Somiedu... ya que tamién vive de la escalada. En realidá, el pueblu vive de la ganadería y del bon usu turísticu, que se-y te dando, con cases rurales, camping y chigres allugaos nun valle d'una guapura solo esistente en Somiedu.

Montañéramente falando ya conocíemos esti Val.le, de rutes nos nuesos entamos hasta'l L.lagu'l Val.le y con un pelín más d'esperiencia, nes ascensiones a los Albos y na increyible ruta a la Pena Orniz y les cos collacies.

Pau nel seutor de la Fuente... guapísimu

Pero esta vegada, queríemos facer ambes coses pasando un fin de selmana de relax nuna casa rural. Allá que nos fuimos Pau y yo, y tuviemos la grandísima suerte de dir nel finde de la folixa llocal del pueblu, jeje. Así qu'al deporte xunimos-y tamién les vérbenes y los vermús musicaos.

El sábadu pela mañana, averámonos hasta'l seutor de la Fuente, caleyando pel pueblu en direición al barriu de L'Outeiru y al llau d'una fonte, entamen les víes de la mesma carretera, alcontrándonos con que tamos asegurando demientres pasen los coches y queden ablucaos, jeje.

Así queden les manes dempués d'un 6b

A pesar de tar llibrando tratores, demientres aseguramos, les víes son una pasada. El IV+ y el V, encadenámoslos los de primeros siendo mui disfrutones y el 6b saquelu al segundu pegue teniendo qu'apretar al final pa salir penriba, pero siendo una pasada tamién.

Como nun madrugamos, ya que la nueche anterior tuviemos de folixa nel pueblu, llegó ceo la hora'l vermú y como ya tábemos a gustu colo que ficimos, fuímonos al chigre ensín nengún remordimientu a tomar unes cerveces y ver a los escaladores esguilar na Pena Blanca.

Vermutín con musiquina viendo la Pena Blanca


Magar de la siesta, teníemos pensáu dir hasta la Pena Roxa, a probar un par de víes (V+ y IV+) pero tan solo les fice yo, ya que Pau namás veles nun quiso saber nada. La roca ye rara, con cantos mui afilaos y el IV+ ye una fisura-diedru que saqué a vista, al igual que'l V+, pero esta última prestome muncho menos inda.

Ye una vía práuticamente d'alpina con tres chapes separadísimes, cola sección clave nuna placa que ye lo que-y da'l grau, pero nun paga la pena metese nella, ya que la piedra suelto de la parte cimera y el descuelgue con vuelu hacia la mandrecha nun presta res.

La verdá ye que ye un seutor pocu encomendable... anque paez tener xuegu pa más víes de mayor dificultá verticales y quiciás más segures por mor d'ello. Lo que ta equipáu.... nun mos prestó res, pol posible vuelu y rocea de cuerda.


Asína vese a la xente dende'l pueblu na Pena Blanca, jeje

Col tiempu perdíu na Pena Roxa, pocu quedónos de tarde pa dir a l'ayalga del Val.le, que nun ye otra que la Pena Blanca, onde una enorme pena tumbada, pide a gritos la so trepada, por plaques d'adherencia de tolos graos, dende'l V al 7b+. Guapísima la trepada equí.

Esa tarde pa pocu más diónos que conocer a un par de collacios galegos, colos que tuviemos de rises. Si nun m'alcuerdo mal, tuviemos encadenando a vista, Maya y Max (V´s) hasta que decidimos baxar al pueblu ya que queríemos cenar nel chigre.

Al día siguiente, con un calor insoportable xuntámonos a varies cordaes, colos galegos al llau nuesa tamién. A Pau quedára-y una pendiente por encadenar del día anterior, asína que fízola y llueu metíme nun 6a perguapu, con un final en babaresa que-y da un puntu d'emoción al final.

Sesión mañanera de placa na Pena Blanca

El restu, tuve de cámara n'altura, faciéndo-yos semeyes a los collacios, na vía d'al llau, el Castiel.lo. La verdá ye que queden perbien estes semeyes dende riba, asína qu'espero que-yos presten, si son a alcordase dalguna vegada d'esti blogue, los galegos. Un saludu pa ellos dende equí.

Ensín más, el calor taba acabando con nós y el sabor de la Mahou, glayábanos dende'l chigre, poro decidimos abandonar les restantes 13 víes que quédenme por probar d'esta escuela. Esperamos poder volver esti añu, otra vegada a da-y pegues hasta gastar la goma de los gatos.

Estes son les vistes dende l'altura... ablucante'l Val.le

2 comentarios:

  1. Cuando yo digo que perdimos un montañeru! ;-)
    Muy guapa esa pared
    Un saludo amigo

    ResponderEliminar
    Respuestas
    1. Jeje, si que ye guapa la paré y el pueblu y el valle y too, como presta Somiedu.

      Nun t'esmolezas que tengo muncho por andar y trepar tamién, jeje

      Un abrazón

      Eliminar