viernes, 26 de abril de 2013

La Uña (Maraña - Llión)

Actualización 2012

Nin siquiera se que día del branu pasáu, averámonos de nuevu hasta esta escuelina llionesa de la Uña. Solo sé que daben lluvia p'Asturies y pal sur del cordal, teníemos solín y bon tiempu, poro p'allá que fuímonos Pau y yo, con tola tranquilidá del mundiu.

De camín, como non, ficimos un pocu de visita a la escuela de Cueva Deboyu, más como turistes que como escaladores, porque quédanos dafechu fuera del nuesu alcance, jeje. Anque dalgún día, habrá que probar esi únicu V+ esistente na cueva, por dicir que tuviemos ellí dalguna vegada.

Lo siguiente como non, foi tomar el vermú nel Campu (Casu) y siguimos alantre pel puertu Tarna, pa trespasar la llende con Llión, averándonos nun ratín hasta Maraña a mercar pan, alcordándonos d'esi finde tan prestosu que pasásemos va un añu d'aquella.

Dempués tornamos hasta'l pueblu de la Uña y ellí hasta la Peña Torbenera, onde falamos col dueñu'l prau, el cual amosóse bien amable y comentónos la muncho que la xente avérase a esta peña a esguilar, inclusu con rapacinos.

Magar de ponenos cómodos ya tocó calecer manes y gatos, qentamando col V- de la esquierda. Ye la vía más cenciella del seutor de placa más pegáu a la carretera y paga la pena metese nella a tomar contactu, ya que la mayor dificultá d'esta placa ye saber movese n'adherencia.

Dempués de pegame coles d'al llau cola cuera penriba y nun llegar enriba como pa encadenales, metime nes del canalizu del mediu, prebando les tres víes que xuben nesi tramu, sacándoles toes a vista, con graos dende'l V+ al 6a+, perguapes toes.

A destacar, el 6b (Calma Chicha) que probara la otra vegada y qu'esta vegada salió al primer pegue, pero con ciertos nervios por parte de Pau asegurándome y de mió, ya que nun pude chapar hasta mui arriba del pasu clave y el vuelo diba ser de los guapos, jeje.

Como variante, tamién saqué un V+/6a qu'entama más a la esquierda de Calma Chicha, que tien como pasu más difícil la salida penriba d'una barriga na qu'enmarroneme un pelín y quiciás cotela de más de lo que debería ser.

Nun lo se, como digo, simplemente pongo les mios impresiones, que como les de Pau, siguen siendo bonísimes y anque nun quiso metese de primera en nenguna vía, xubió varies cola cuerda penriba, dándome tamién les sos impresiones al respeutu.

Dicir que les rises qu'echámonos viéndome patinar de manes y pies nes víes más dures foron munchos, nun soi a pescanciar como coyones dalguien pue xubir per dalgunes d'elles, d'ehí, que simplemente seyan impresiones de cotes nes que nun tengo encadenaes.

En resume, presta y muncho tornar hasta un sitín tan curiosu, poro tuviemos tamién mirando los otros seutores más verticales, anque por falta de tiempu y croquis nun fui a meteme en denguna de les munches víes esistentes.

La prósima vegada más y meyor... y con semeyes que dos persones nun puen facer maraviyes, jeje

La Uña (Seutores visitaos)

Croquis  inesistentes, simplemente son semeyes y les cotaciones de les vies encadenaes a güeyu y polos intentos a les otres lo que pudiera llegar ser. A sabiendes que ye una escuela que nun se quier espublizar, si l'equipador quier que retire les mio impresiones, tan solo tien de decilu.


-----------------------------------------------------------------------------------------------------------------

Como díbemos a pasar un finde enteru en Llión, y Paula ta enganchadísima a la escalada, al igual que yo, tuve restolando na rede, col envís d'alcontrar una escuela asequible al nuesu nivel peles cercaníes.
Al final alcontré una mui nueva en La Uña, bien cerquino del Puertu Tarna, colo que veníanos de luxu, pa pasar la mañana-tarde del domingu... la pena foi que'l tiempu como siempre manda, y pola mañana nun mos dexó facer nada, ya que taba'l día de lo más tormentosu.

Semeya del sector de placa tumbada na Torbenera

Solución, pues tirar de vuelta a la casa, pero eso sí, enantes pararíemos en Riañu a tomar el vermú, pa dempués facer la xinta na casa rural de Boca de Güerganu: Casar del Puente. Magar de la guapa fartura, ya recoyimos tou, pa colar definitivamente de la casa y al pasar pola Uña, vimos que taba'l día dalgo más estable.

Primer vía del sector de placa tumbada (V-)

Asína que preparámonos y cola info que tenía nesti foru Info sobre la escuela de la Uña, pudimos tar un ratín, pegándonos sobre tou con un de los sectores de la Peña Torbenera: el de placa tumbada. Solo diónos tiempu, a facer lo que yo creo yera un V-, y a pegame con otra que paecía menos h.odía de lo que yera rialmente (6a+/6b de nome Calma Chicha, jeje).


Esos pegues que se metiron César, Canta y Paula

Una pena, porque ye un sitiu increyible, pegáu a la carretera, y que pola tarde pega la solombra, colo que tase perbien, pa facer pegues hasta reventar. Nesti casu, nun voi poner croquis, porque nun tan disponibles, pero prometo tornar, ya que'l llugar dexóme encantáu y picáu coles parés a más non poder, pa siguir dando la mio visión de dificultaes.


Camudando'l Camín en La Uña (Llión)

4 comentarios:

  1. Respuestas
    1. Bon sitiu pa dir a pasar el día, cuantos más meyor pa probar munches víes, jeje

      Eliminar
  2. Se ve que disfrutáis de lo lindo en la pared!!!
    Muy bien pareja
    Un saludo

    ResponderEliminar
    Respuestas
    1. Gracies Monchu... ehí vamos, unos díes al monte otros a engolase na paré, jeje.

      Mientres seya al aire llibre too nos val.

      Un abrazu

      Eliminar