lunes, 11 de febrero de 2013

El Valle (Carreño) - Monte Areo

8 de Xineru de 2013

Track: El Valle (Carreño) - Monte Areo


Martes de Xineru y sigo gastando los últimos díes de vacaciones del añu. Teníemos pensáu dir a esguilar a dalguna escuela, pero llevantámonos agalbanaos y so la marcha, decidimos salir a caleyar un pocu cola perra.

Mirando un pocu un llibru y alcordándome de les coses que tenía que tachar en Carreño, decidimos dir a pasiar pol monte Areo, asína que salimos de Xixón pela Y, desviánmonos hacia Candás pela As-118, pa garrar la CE-6, que fadrános pasar per Xelaz, Mazaneda, Quimarán y n'El Valle, dexaremos el coche al llau de la carretera.

Salimos d'El Valle (53 ms) llibru en manu

En realidá, dexamos el coche práuticamente, na llende de les parroquies de Quimarán y el Valle, y saldremos caleyando n'ascensu p'El Fondo, pa facer una xiru a la manzorga, empobinándonos hacia una pista asfaltada que vien de les cases y de la capiya de los Remedios.

De paséu con Kíla, hacia'l monte Areo

Esta pista, pindia enforma, fadrános xubir pente l'arboláu del Picún, hasta Ramos, onde fadremos un últimu esfuerzu, p'aportar a la enorme llana que ye'l monte Areo. Na cumera'l monte, habrá un montón de pistes que traviésenla y siguiendo los cartelos, visitaremos en primer llugar el mirador de la Peña'l Carro.

Xubimos hacia'l Mirador de la Peña'l Carro

Dexaremos les vistes hacia'l cabu Peñes d'esti mirador, p'adientranos de nuevu nel monte Areo, pa visitar lo que ye'l puntu más míticu d'esti llugar, el Cierru Los Llanos, onde alcuéntrase'l dolmen meyor conserváu, de tola necrópolis.

Llaneando al Cierru Los Llanos

Como nun diba ser d'otra manera, ficímonos la semeya col dolmen, na qu'hasta Kíla paecía intrigada por saber, que yera aquello, jeje. Daba gustu tar al solín nesti puntu, anque'l día en rialidá taba friucu, faciéndonos poner y quitar capes según caminábemos pela solombra o al sol.

Mítica semeya col dolmen del Cierru Los Llanos

Como madrugadores nun fuimos y diéramos los primeros pasos casi a la una la tarde, ya teníemos ganes de xintar daqué, poro, siguimos camín, hacia l'area recreativa. Guapu llugar esti, nel qu'aparte, de les meses de madera, tenemos pa facer parrillaes y una pequeña llaguna.

Pasiamos hasta l'area recreativa pa xintar un pinchín

Casi media hora, taremos asoleyando y xintando un sandwich, hasta que decidimos dir a la gueta'l vértice perdíu. Mira que llevo tiempu, de vértice en vértice per Asturies y nunca nun me costara tanto alcontra el supuestu puntu más altu d'un monte, jaja.


Restolamos hasta alcontrar l'Altu d'Areo (262 ms)

Ye lo que tien dir, sin mapes nel gps y sin llevar la ruta preparada, que nun hai quien s'oriente. Menos mal, qu'al traviés del móvil, Charly diome les indicaciones y nun crucie, gárrase un camín a la manzorga, nel que veremos un prau a la mandrecha y al final d'esti, tomáu pelos ocalitos, tará'l vértice de 262 ms d'altor, del Altu d'Areo.

Magar, de cotar tala maraviya, na que los árboles nun me dexaron ver la viesca nin namás, jeje, tornó so los mios pasos al crucie y tiramos ya en descensu hacia'l llugar de San Pablo, onde pocu enantes alcontrermos unos túmulos y dólmenes de bon interés.

Pasamos a echar una visitina a les Güelgues de San Pablo

Agora sí, con tola visitina al Monte Areo, completa, vamos baxar per pista asfaltao pasando peles cases de San Pablo, pa pocu dempués abandonar esta pista en la Reguera, onde tomamos un camín a la manzorga que pasará, penriba d'una guapa casería y llevarános hasta'l llavaderu remocicáu de la Reguera. 

Baxamos por San Pablo hacia'l Valle

Dende equí, xubiremos al barriu de la Cespedera, onde tomamos de nuevu la carretera CE-6 pela que caleyaremos cola visión del Gorfolí y el Taborneda, hasta la llende de les parroquies de Quimarán y el Valle, onde dexáremos el coche 3 hores y media enantes.

En resume, paséu guapu, nel que podremos estirar un pocu les pates y conocer dalgo d'hestoria neolítica. Demientres los casi 9 kms de ruta, fadremos tan solo un desnivel acumuláu de 275 ms, que se superen práuticamente nel entamu de la ruta.

Camudando'l Camín nel monte Areo

Nesti paseín con Kíla dimos preste al Altu d'Areo (262 ms): vértice xeodésicu de Carreño y primer cota del conceyu

Ver progresos en: Retos montañeros

No hay comentarios:

Publicar un comentario en la entrada