viernes, 21 de diciembre de 2012

Llamorgal (Llanera) - Santufirme

8 de Payares de 2012

Track: Llamorgal (Llanera) - Santufirme


Bono... quiciábes debería entamar un nuevu apartáu del blogue... d'ascensiones express o carreres de montaña o metela na parte de MTB, pero como ya nun tengo en que facer la estaya bicicletera, ya que robáronme va unos años mi bici, vamos dexala nel apartáu de monte.

El casu ye, que tenía que tachar el Santufirme en Llanera y teniendo como compañeru de trabayu a Jose, qu'anda en bici un güevu y parte l'otru y agora dío-y por correr pela montaña, decidimos facer l'ascensión al Santufirme dende al llau del trabayu, en Llamorgal.

Saliendo de Llamorgal (156 ms) col Santufirme al fondu

Poro, poco dempués de les dos de la tarde, mudámonos de ropa nes instalaciones de Llamorgal y salimos corriendo unos pocos metros pela As-241 pa meténos a la manzorga nel Pondal, xubiendo poquín a pocu hacia'l pueblu de Truébanu, onde dellos perros lladren ensín descansu.

Travesamos a bon ritmu'l pueblu de Truébanu

Magar del pasu pel pueblu, entama a ponese la cosa pindia y xústamente nel crucie que va hacia'l Mundín, camudamos el sen, hacia la manzorga, pasando al llau d'un depósitu d'augua y garrando los mayores desniveles hacia l'area recreativa de Santufirme.

Tramu perpindiu nel área recreativa de Santufirme

Bordiaremos esti guapu llugar d'esparcimientu pela mandrecha con una amplia envuelta y vamos dexar a la fín l'asfaltu, pa metenos en pista de tierra, onde tendremos dos envueltes pente los ocalitos enantes de garrar una recta final hacia'l cumal del Santufirme.


A la fín, veremos ún d'estos vértices xeodésicos a los que siempre presta xubise y comprobar l'altor que nesti casu yera de 437 metrinos, lo que nun ta mal del tou. Les vistes, pues realmente, nenguna ya que los gafientos ocalitos nun dexen ver gran cosa, aparte del esbarrumbe de les antigues mines.

Nel cumal del Santufirme (437 ms)

Nun tenemos munchu tiempu de descansu qu'a les 4 entramos a currar otra vegada, así que baxamos a fueu, pela pista de tierra y nesti casu travesaremos l'área recreativa penmediu, garrando de nuevu les pistes asfaltaes qu'han de llevanos per Truébanu hasta les instalaciones de Llamogal.


Como agasayu al esfuerzu de xubir corriendo, la baxada más llanzada y relaxada da pa echar una güeyada nun día claru a tola Asturies montañosa (dende L'Aramo, hasta Picos al fondu, con Peñamayor, Peña Mea, Retriñón...), prestando enforma.

Finalmente, nun vos fiéis de los tiempos que correr, nun ye lo mesmo que dir andando nin dir en bici, así que quedaros nun intermediu aproximáu como puntu de partida a un posible paséu. Eso sí, les cuestes en bici, tienen que mancar pero bien.

Nós, ficimos los 9,1 kms de percorríu en 48 minutinos, superando un desnivel positivu d'unos 300 ms aproximáu y sacando-y un bon partíu a eses dos hores que tenemos pa xintar nes horrendes xornaes partíes.

Camudando'l Camín yendo a duchase en Llamorgal

Carrera per Llanera pa tachar el vértice xeodésicu del: Santufirme (437 ms)

Ver progresos en: Retos montañeros

10 comentarios:

  1. Coño Berto, Así que corres también! y en el descansu de la jornada partida. Robastei el tiempu a la comida, pero creo te prestó igual mas!

    Un saludo amigo y Felices Fiestas y que el 13 se buen año montañero.

    ResponderEliminar
    Respuestas
    1. Si ho!! Estos montinos, son mui afayaizos pa entrenar y de pasu tachalos, jeje.

      L'afición de correr pol monte, vienme de salir col perru en tierres sorianes qu'hai desniveles menos indecentes que n'Asturies, jeje.

      Estos montes son lo más paecíu pa son arreventar nel intentu.

      Un abrazu y que tengas un añu que vien bayurosu y prestosu pa la to familia y pa ti!!!

      Eliminar




  2. !!!!!!!Zorionak eta Urte Berri On¡¡¡¡¡¡¡¡¡

    ResponderEliminar
  3. Eso son ganes. Pe la mañana trabayu, pe la tarde trabayu y pol mediu, en vez de xintar sele, a correr pol monte, ja, ja.
    Un saludu

    ResponderEliminar
  4. jajaja, pues sí Javi... y ya tengo otra ascensión express preparada en Llanera, jeje. A ver cuando toca...

    Un saludu

    ResponderEliminar
  5. El toponimu correctu de La Morgal ye LLAMUERGAL ``barrizal´´ esto ye otru de los munchos exemplos que tenemos n´Asturies de deformacion de los nomes de los pueblos dende epoca franquista...SALÚ ya DIXEBRA ¡¡

    ResponderEliminar
    Respuestas
    1. Gracies polos comentarios... voi quedáme col topónimu de Llamorgal como vien desplicáu na páxina de Xose Lluis García Arias pel momentu.

      Un saludu

      Eliminar
  6. Mira yo nun conozo lo que diz Xose Lluis,pero a la vista ta que ye una clara deformacion. N´Asturianu un ``Barrizal´´ ye un LLAMUERGAL.Muncha xente que conozo desa zona emplega esi toponimu ,y digote mas,dende guaje acudo pel branu a les piscines,y son munches les veces que los cartelos que tan a la entrada fueron iguaos con esi nome.[inda tan asi]

    ResponderEliminar
  7. A esto referíame... http://mas.lne.es/toponimia/index.php?leer=556&palabra=Llamorgal

    ResponderEliminar