miércoles, 3 de octubre de 2012

El Vau (Navia) - Costa de Navia - Navia (Navia)

18 d'Agostu de 2012

Track: El Vau (Navia) - Costa de Navia - Navia (Navia)


Dempués de les vacaciones por tierres sorianes, nes que-y metí caña a un bon monte como ye'l Moncayo, tocaba pasar de lo "seco" a lo "moyao" y pa ello, Pau y yo, fuímonos unos díes a descansar a Ortigueira, onde pudimos tar asoleyando en guapes sableres como Penarronda y Barayu.

Pero como non, tamién tenía ganes de caleyar un pocu y que meyor qu'amestar una nueva ruta costera d'Asturies al bolsiellu y si yera la más antigua del país, pues muncho meyor, asína que fuímos a da-y preste a la costa naviega.


Nes cercaníes al Vau (99 ms)

Lo que tien tar de vacaciones ye que faeste un líu coles allarmes del móvil y alboreces a les 11 la mañana... primer problema, jeje. Na, un par de focicos torcíos y decidimos siguir col plan, que d'otra miente yera bien cenciello, dexar el coche en Navia y garrar un taxi hasta la llende del conceyu naviegu col de Valdés, n'El Vau.


Baxando hacia'l ríu Barayu

Asína ficimos y magar del pequeñu viaxe hasta El Vau, déxanos el taxista, pelín más alantre del crucie pente la N-634 y la carretera que va pa Veiga, onde nesa propia carretera NV-2 saldrá'l camín que va facenos baxar hasta l'altor del ríu Barayu pente la solombra d'una guapa viesca.


Perguapes vistes de la sablera de Barayu

El senderu como yera d'asperar, ta perfeutamente señalizáu, asína que caleyaremos a la vera'l ríu primeru y llueu dexándolo mui abaxo, vamos esfrutar d'unes increyibles vistes de la sablera de Barayu, na cual unos díes enantes pudimos tar dándonos un bañín y tomando'l sol.


Pasamos penriba de Barayu y costa de las Altas

Dexaremos atrás Barayu, pa caleyar sele hacia'l Cuernu, pa dempués desvianos del camín marcáu, el cual siguiría pela costa hacia les puntes de Las Altas (Patarroxa, Romanellas, Puntona...), yendo nós un pocu más pel centru pa visitar el vértice xeodésicu del Altu del Salgueiru de 56 ms.


Altu de Salgueiru y el pueblu de Vigu

Nesti puntu, tendremos una guapa vista del pueblu de Vigu y de les cotes altes del conceyu de Navia, pero aína, tornaremos de nuevu hacia la costa baxando per una amplia pista, que dexarános una vista preciosa de los distintos azules del cielu y de la mar, hasta topános col camín davezu en Canares.


Baxando hacia la costa naviega otra vegada

Canares ye una pequeña cala de piedra gris, que darános pasu a un tramu preciosu de verdes rases con cantiles verticales que fae una gozada caleyar penriba dellos, col nordés soplando sele, faciendo soportable'l sol a les 2 de la tarde.


Pasando pola playina de Canares y la punta'l Castru detrás

La verdá, ye que tenemos dalgo de suerte nesi sen, ya qu'entamando a tan mala hora la ruta, el vientu ta dándonos aliendu y vamos tirando meyor de lo esperáu, anque tamién les guapes vistes faen una bona xera tamién.


La mar protagonista del día y los pesquinos nel Asteiru

Magar del caleyar raseru, siempre de secute toca baxar casi a tocar la mar y nesti casu foi nel Asteiru, onde pudimos alcontrános con un pesquín, que taba apostándose pa pasar una tarde tranquila al cabu la mar.


Siguimos camín pegadínos a la costa na fastera del Poyau

Nós, xubimos un pelín de nuevu pa meténos nun tramu tranquilu, peles rases del Poyau, que va dir llevándonos penriba de los barrios d'Estabanda y Cavornu, pertenecientes al pueblu pesqueru de Veiga, que bona rivalidá tien col míu d'Ortigueira, jeje.

Aportamos a Veiga pa travesala con tranquilidá

Baxaremos al puertu, poles puntes del Castiellu y la Farola, pa metenos peles cais, estraes de xente tomando'l vermú, xubiendo dempués hacia la parte alta'l pueblu col envís de garrar dende la Paloma'l camín, que tien dexanos na costa, na playina de la Llosera.


Dexamos Veiga y siguimos camín hacia la Soirana

Esta opción que tomamos, foi un tanto rara, ya que'l camín guapu sería siguir pel puertu alantre y xubir hacia l'Atalaya, pa enllazar na Llosera calteniendo'l senderu costeru. El casu ye qu'ente'l track que llevaba, que mandónos p'arriba y que paecía una bona opción tomar el vermú, cosa qu'al final nun ficimos, llevónos a perder esi guapu tramu.


La llosera y l'islla de Soirana

Son casi les 3 de la tarde y el sol entama a apretar enforma, aún así, tenemos na tiesta llegar hasta la sablera de Frexulfe a xintar y dános un bañu qu'amatague'l calor. Pamidega, va ser el tramín más duru de tola ruta, y nun ye por dengún motivu axeno al propiu calor y a ver dende Veiga un cartelu de Frexulfe a dos kilómetros, cosa alloñada de la rialidá pel senderu costeru.


Perguapa costa nos altos del Barrosu

Con estos datos y el solanu caleciendo, la preciosa islla de Soirana, los cantiles del Barrosu o l'entrante de mar de Cofente, per desgracia casi pasaron a un segundu planu, ya que les ganes de metese na mar pa enfrescar un pocu foron faciéndose más y más fuertes y el tramu fízose más llargu de deseáu.

Cofente y la playa de Frexulfe

Aún así, los más de 3 kms dende Veiga a Frexulfe son bien guapos y acolumbrar la llarga playa de Frexulfe, bien paga la pena l'esfuerzu. Magar de baxar a la sablera, quitámos les botes y travesamos el ríu y nunca me prestó tanto poneme'l bañador y metéme nel augua, que taba a una anormal temperatura polo caliente.


Descansu nel camín y xinta en Frexulfe

A Pau, nun pueu dicir lo mesmu... porque llevaba de mala hostia dende l'entamu nel Vau, por facer esta ruta tan tarde y tar comiéndonos tol calorazu. Ye más, ella quería siguir alantre, poniéndose en mou... "nun queríes caminar, pues...", pero'l plan ye'l plan y a testerón nun se me gana fácilmente.

Xubimos dexando'l sablón de Frexulfe atrás

Menos mal, que'l descansu de más d'una hora, con bocata y cerveza, vínonos xenial pa templar los ánimos y rondando casi les 5 la tarde, salimos de Frexulfe, onde dase una nota toponímica curiosa, ya qu'el ríu Frexulfe paez marcar el fín de la terminación en -u de los topónimos na costa occidental astur.


La punta'l Pico si que ye un peine de los vientos

D'otra miente, de lo más guapu que vamos tener nesta segunda parte de la ruta ye una especie de "peine de los vientos" qu'hai na punta'l Pico. Y nun solo eso, sinon qu'a partir d'esta punta, la sienda va dir dafechu pegadina a la mar y ye hasta relaxante caleyar tan cerquino del mar.

Averándonos a la playina de Fabal

Poro, avanzaremos encantaos pasando pola punta de Cereizo, pa xubir penriba de la sablera de Fabal, y na fastera de los Chaos, al altor de la Punta Fabal, vamos separtanos Pau y yo, ya que voi averame hasta otru vértice xeodésicu nel Cierro de Sienra d'Arriba y ella va siguir col senderu alantre.

Faigo un recesu na costera pa dir al vértice de Sienra d'Arriba

Ensín más, desvíome pel camín peatonal que va a esta playina dende'l pueblu de Téifaros y rápidu voi topame col vértice de 70 ms d'altor. Nun paro nin un segundu y tiro hasta'l pueblu pa garrar una caleya asfaltada que va poneme nel enllaz col camín costeru que baxará hacia la playa de Coedo.

Equí vamos tener l'anéudota del día, ya que cuando aporté al crucie corriendo, nun sabía si Pau, pasará p'abaxo ya o non. Dempués de dalgún glayíu y que nun me contestase naide, baxé corriendo a Coedo, entrugué si vieren a dalguién de mariellu y al ser negativa la rempuesta, volví a xubir y llegué hasta onde la dexara, lo que supúsome volver a baxar con cara d'imbécil. 


Tramu menos costeru pola Valleira

El siguiente tramu dende Coedo, nun lo tuve mui en mente, ya que foi fechu corriendo a la gueta de Pau. Asína que pasé pela fastera de la Valleira na qu'hai un desvíu al pueblu d'Andés y pasé pela playina de las Rubias, metía pente les puntes d'El Castello y la Bragada y a la fín, Pau escuchó dellos glayíos y paróse a esperame, viéndome llegar como un alloriáu, con una sudada de correr nun se cuantos kilómetros p'alantre y p'atrás.

Mediu llitru d'augua dempués, ya volví a ser persona y pudimos continuar la ruta, na que tendremos de les vistes más guapes pal mio pueblu, con tola rasa d'Ortigueira y el cabu San Agustín, nun atapecer preciosu.


Perguapa visión del cabu San Agustín n'Ortigueira

Ya nos quedaba menos y la verdá ye que la baxada del calor, fizo que fuéramos pasándolo perbien nestos últimos metros de ruta. Namái, quedábanos pasar pola punta Barrosas dende la cual teníemos vista de la sablera del Mouro, la cual tien baxada dende l'altu de la Barcúa.

Penriba la sablera del Mouro

Hasta ellí aportamos, pasaes les 6 y media de la tarde y cola tranquilidá de tar cerca del final, dedicámonos a esfrutar de cada pasu y de cada vistazu al paisaxe, tresformáu pol escurecer del día, dando pasu a les últimes hores de lluz.

Playa d'A Veiga d'Arenas y faru del cabu San Agustín

Cola guapa vista de la sablera d'A Veiga d'Arenas o playa de Navia y del faru del cabu San Agustín, aportaremos al mirador que dará pasu a la baxada a la veiga, onde agora sí, casi damos per finada la ruta, parando a tomar unes cerveces bien merecíes, na terraza de los chigres playeros.


Baxando a la veiga d'Arenas y na Poza de Navia

Con esto y pocu más, que caleyar al llau d'A Poza, vamos facer camín hasta l'aparcaderu onde dexáremos el coche 6 hores y 40 minutinos enantes, nes que ficimos un total de 18,5 kms y superamos un desnivel acumuláu d'unos 510 ms.

En definitiva, una ruta que va faceros descubrir una costa occidental espeutacular y pa los amantes de les playes, van conocer como mínimu dos sableres: Barayu y Frexulfe que nun tienen absolutamente nada qu'envidiar a delles orientales.

Asína que dende equí... vamos reivindicar l'occidente astur y como non, la so ablucante costa.

Camudando'l Camín a la fin nel coche... una costera más

Nesta guapa ruta costera ficimos dos vértices xeodésicos de Navia: Altu del Salgueiru (56 ms) y Cierro de Sienra d'Arriba (70 ms)

Ver progresos en: Retos montañeros

6 comentarios:

  1. Refrescante paseo, pero las playas orientales son más guapas. Aunque cada uno tira para donde más le duele.

    Un abrazu pareja.

    ResponderEliminar
  2. Ehhh, que tu del occidente solo conoces la fastera sur, jeje. Ties que venir a descubrir les playes occidentales.

    Vémonos pronto

    ResponderEliminar
  3. Gracies Pangua. Ya sabes les playes occidentales muncho más guapes que les orientales, onde va parar, jeje

    ResponderEliminar
  4. Gracias por ferlo tan ben. Volve pronto; nos esquezas el Occidente.

    ResponderEliminar
  5. Nun lo escaecemos non, jeje. Tengo muncho que facer per ellí inda.

    Un saludu

    ResponderEliminar