jueves, 30 de junio de 2011

Vega Urriellu (Cabrales) - Torre Carnizosu

10 de Xunu de 2011

Track: Vega Urriellu (Cabrales) - Torre Carnizosu



Primer día de montañismu, nun finde nel que vivimos la mayor parte del tiempu nel refuxu de Vega Urriellu, cuando nun tábemos polos altores claro ta, asína que na base del ablucante Urriellu, tendremos el nuesu puntu de partida pa les actividaes que teníemos na tiesta. P'aportar a esti llugar tenéis equí la info: Sotres (Cabrales) - Vega Urriellu

Dempués, d'una bona nueche nel refuxu,... hai que dicir que'l día anterior llegamos empapaos dafechu pol orpín, nun tiempu record (menos de dos hores) y cargaos de coyones,... colo que magar de cenar y tomar dalguna cerveza, metímonos al sacu inda con fríu nel cuerpu. Menos mal, qu'echamos a Fernan pa otra habitación ya Iván y yo, pudimos descansar nun silenciu casi relaxante, jeje.

Como ye normal, llevantámonos a les 7 descansaínos, y enantes de ponenos a desayunar, salimos pola puerta'l refuxu, y miramos pal día, cola desilusión de ver qu'inda siguía orpinando y col día emborrináu enforma. Con esto, quedónos casi nidiu, que la intentona a la vía sur directa de los Martinez nel Urriellu, diba tener que ser aplazada pal día siguiente.


Nel refuxu de Vega Urriellu (1942 ms)

Asína que, pusímonos a tomar el desayunu col cafetín selemente, ensín prieses, col envís d'asperar un ratín, a ver si'l día abre dalgo y déxanos facer daqué curiosu. Otros "habitantes" del refuxu, van averáse a la paré del Picu, pa ver les condiciones, pero nós ya desdexamos la posibilidá y preferimos esperar a German y Tito, que lleguen esta mesma nueche y dánmos mayores probabilidaes d'ésitu pal ataque al Urriellu.

Pero como non, tenemos un plan alternativu, y nun ye otru, que la Torre Carnizosu, ún d'eses torres nos Urrieles, que dante a pensar si ye factible la so xubida solo col agüeye de les sos parés verticales per uquiera que la miremos.


Canal de la Celada arriba, hasta aportar a la base de la Torre Carnizosu

Esta torre alcuéntrase nesa llínea peragreste, que dixebra los ḥoos de Treselpicu y los Machos, poro p'algamar la so base, tendremos que salir del refuxu d'Urriellu y ascender la "mítica Canal de la Celada", que fai de pasu ente'l Picu Urriellu y un vecín menor al que xubiéramos nuna etapa de la Travesera 2009-2010: La Morra Carnizosu

Asína que, poco enantes de les 10 de la mañana, averámonos al entamu de la Celada, y ellí dámonos cuenta, que dexamos el llibru col croquis de l'ascensión al Carnizosu nel refuxu, cola consiguiente pateada de Fernan, y el retrasu y espera d'Iván y mía na canal, onde ya nos dió tiempu a ver baxar a un grupu que fuera ver l'estáu de la paré del Picu, y yera malu dafechu.

Cuando llega Fernan, siguimos canal alantre hasta'l so final, pero sin arribar al colláu de la Celada, ya que nun ye la nuesa direición. Nós, vamos arrimanos hasta'l colláu Carnizosu (2099 ms), ente la Morra y la Torre. Siguiremos dende esti llugar, hacia la base de la Torre Carnizosu, avanzando pente llambries moyaes, bien cerquino de la caída hacia'l ḥou Carnizosu, hasta aportar a un balcón xusto embaxu del paredón de la torre.

N'esti puntu a unos 2160 ms d'altor, vamos descansar, que llevamos un hora y cuartu dende que saliéramos, anque tenemos que restá-y fácilmente media hora, por mor del llibru y apuntes escaecíos, y vamos con tranquilidá a ponénos l'arnés y dexar les mochiles nesti sitín tan afayaizu.


Dexamos trastos, que paez que sobra too y primeros trepes

Na nuesa mente, nun solo tan, los croquis de la xubida vistos nel llibru de Fernan (qu'a lo postreru nun mos valió pa nada nesta primer parte ya que xuben dende'l ḥou Carnizosu) y nos apuntes del GM El Maquis, colos graos de les trapes, sinon que tamos más sollertes del estáu de la roca moyao, ya qu'anque ya nun orpina, esta sigue entá pelín resbariosa. Poro, preferimos dir encordaos, col inconveniente, de facelu con una cuerda de 70 ms (pal día siguiente nel Urriellu), tornándose un auténticu coñazu avanzar.

Tamos preparaos, y entamamos por facer una fácil trepada, p'asomanos a lo que se supón unes caídes acoyonantes, pero como nun vemos nada pola borrina, siguimos alantre hacia la mandrecha, empobinándonos hacia'l final d'un canalizu que ta permoyáu. Equí tendremos una trepada pelín fea por mor, de lo húmedo de la caliza, pero que nun tendría mayor dificultá n'otres condiciones.


Abre o nun abre d'una vegada

Dende equí, tendremos un ratín de descansu, nel que siguiremos pente la ñeblina los ḥitos con facilidá, o aparente facilidá, ya qu'a Fernan-y paez ver el camín hacia una aguḥa, con una pinta tremenda en tolos sentíos, y con ello gana cenciellamente l'arista que llevarános hasta'l mesmu llugar al qu'aportaremos Iván y yo, qu'albidrando otros ḥitos, tuviemos que pasar dalgún pasín qu'otru penriba de llambries dalgo barrigueres.

Trepaes divertíes y Fernan con una aguh.a del Carnizosu

Cuando nos xuntamos de nuevu, el día paez qu'abre un pelín o al menos ta col envís d'ello, anque siguimos teniendo una temperatura fresca, que fai que nun dexemos nin un ratín el forru polar. D'otra miente, como noticia positiva, vemos que la roca camuda'l so sentir húmedu, pol agarre calizu que tanto-y presta a la suela de les botes de montaña.


Asegurando dalguno de los pasos más difíciles

Darréu, vamos alcontranos col primer pilancu seriu de la xubida, y ye qu'alcontrámonos con un pasín esixente, pero nada espuestu, ya que ta protexíu de la caída por un paré a la nuesa mandrecha. El secretu tienlo en garrase, a esa paré, y llantar un pie, nun cazu de la paré frontal pa superálu ensín problemes.

Magar d'esti pasu, tendremos un ratín de tranquilidá con un estrechu paséu pola arista, pegaínos a la paré (nestes xeres la cuerda de 70 m da por culu que ye un primor) hasta una h.orcada, na que tenemos el placer de conocer de primer man, el h.ou treselpicu a lo fonderu.


Preparándose pa una trepada pelín cabrona

Nel intre, tamos ante un doble canalizu espuestu, separtáu per una rocona qu'a lo postreru paecióme'l pasu más difícil del ascensu, o al menos onde pior lo pasé. Tírome p'arriba, cola puta cuerda colgando,... ye mui divertíu ver a Iván y a Fernan, "asegurándome" como si valiése pa dalgo, jaja,... eso sí... hasta'l h.ou nun baxo, pero la hostia diba ser fina igual, canalizu abaxo.

En fin, paez de primeres que nun hai problema, hasta que toi embaxo la rocona, y decido tiráme a la mandrecha,... mal... error. Xubir siempre pola esquierda y nun tien nenguna dificultá, ya que la puta roca, va sacándote hacia l'aéreu, y amás ye que nun hai grandes agarres que den confianza,... conclusión... ratín de nervios, l'echo güevos y p'arriba.


Recoyendo un pocu la cuerda que ya casi nun fai falta

Garro aliendu un par de vegaes, y ya mando xubir a Iván, pel sitiu correutu, aseguráu dende riba, y dempués Fernan, los cuales nun tienen nengún problema pa da-y preste al pasu. Siempre a la esquierda coño, la puta drecha nunca nun trai nada bono, como si non lo supiera, jajaja.

En fin, ya pasó lo pior, agora toca recoyer un pocu la cuerda pa tar más cómodos, y siguir los h.itos, pa xubir fácilmente como arrodiando lo que paez la cume pola esquierda, hasta qu'apez l'aéreu hacia'l h.ou de Los Machos. Ellí, tendremos un trepe dalgo vertical pero mui facilón, que ya déxanos en disposición d'abandonar la cuerda hasta la baxada.


Arista final del Carnizosu

El final, hasta la cume del Carnizosu, será mui fácil ya, sacante quiciás l'arista cimera que fai pasu pente una antecima y la propia cume, siendo ésta pelín aérea. Será Iván, el que la vaya sacando alantre, seguío por mi y por Fernan, llegando los tres a los 2421 ms de la Torre Carnizosu (paezme que'l gps taba poco positivu, por dar una cota tan baxa), henchíos d'arguyu y satisfacción como los reis.


Camudando'l Camín nel cumal de la Torre Carnizosu (2421 ms)

Que pena de día, h.oder!!!. Encumar una torre tan prestosa, merecía un pocu más de respetu pol nuesu Xuan de la Borrina, pero bono,... el ye quien nos da y nos quita, asína qu'agradecerémos-y esta ascensión (como toes!!) na que fuimos restolando h.itos na ñebla, como si fuéramos Dian Fossey, a la gueta de goriles.


Les poques vistes: Urriellu y Tiros de la Torca y H.ou tres el Picu

Son les 2 y cuartu de la tarde y si nun m'alcuerdo mal, dexáremos les mochiles a les 11 y cuartu, colo que tenemos nes manes y los pies, 3 hores esactes d'actividá que ta na llende entre lo montañeru y lo alpinu, anque camiento que con un día espeyáu, soleyeru y cola roca en bones condiciones, nun usaríemos la cuerda pa xubir en nengún momentu.


Rapelando pa baxar

Eso sí, dempués de cargar con una cuerda de 70 ms y habiendo 3 rápeles disponibles (Hai cordinos en toos ellos, unos meyor otros pior, pero dan confianza), nun mos saltamos nin unu, jaja. El primeru d'ellos ta xusto onde dexáremos descansando la cuerda, y que fáinos llibrar ese trepe vertical hasta'l mirador aéreu del H.ou Los Machos. Ye'l menos necesariu, pero pa calentar siempre ye afayaizu de facer.


Más destrepes y preparando l'últimu rapel

El segundu, faínos llibrar el canalizu complicáu, y cola nuesa cuerda déxanos na h.orcada onde tenemos bon seguru, pola posible caída de piedres. Dende equí, toca la baxada pola arista, hasta qu'aportamos al tercer y últimu rapel, nel "pasu de búlder" comentáu na xubida.


Caberos rápeles y destrepes

Tola baxada, vamos facela cola cuerda atada de mochila na espalda, polo qu'agüéyase a les clares que los destrepes son cenciellos, salvo los casos puntuales del rápel. Tan sólo, quedábanos por comprobar el pasu moyáu del canalizu que vien del h.ou Carnizosu, y como albidrábemos, el día fizo'l so trabayu y ya taba muncho más seco, faciéndose con seguridá y sin problemes.


Recoyendo les mochiles y p'abaxo pola Celada que ya tuvo bien

Con ello, aportamos de nuevu a les mochiles onde xintamos daqué que son les 4 y media y tenemos fame. Relaxaos y mui satisfechos, tenemos la casi absoluta certeza que fuimos casi los únicos que-y dieron a dalgún picu, nun día tan feu, húmedu y pocu afayaizu,... y más pa una actividá d'estes carauterístiques.


Vía d'ascensión de la Torre Carnizosu (ORTZAMENDIREN SUA)
Info téunica so l'ascensión (Grupu de Montaña El Maquis): Torre Carnizosu
Track míu modificáu: Nun facer casu a los tiempos, pero'l camín ye correutu

Agora sí, nun mos quedaba más que baxar pola canal de la Celada, y xubir el tramín hasta'l refuxu de Vega Urriellu pa poder cellebrar una torre tan guapa, aérea y con un toque téunicu tan prestosu. A la fín, foron 7 hores y media d'actividá (mui pero que mui rebaxables en tiempu), nos que superamos unos 546 ms de desnivel direutu, con casi 300 de trepada y caleyamos unos 4 kms.


Camudando'l Camín con Iván y Fernan

Nesta ruta dimos preste a la Torre Carnizosu de 2421 ms que ye: dos mil de Cabrales y pertenez al Club 111 de Picos d'Europa.

Ver progresos en: Retos montañeros

jueves, 23 de junio de 2011

Tuíza Riba (L.lena) - Picu Siegalabá

4 de Xunu de 2011

Track: Tuíza Riba (L.lena) - Picu Siegalabá


Como non, vamos de ruta pal pueblu l.linizu de Tuíza Riba, y agora debería dicir lo de "preciosu campu base montañeru pa casi cualisquier ruta nel macizu de Penaubina", pero ye qu'a mi paezme que-y falta dalgo a esti pueblín, nun se... quiciás un chigre con mayor ambiente montañeru.

Sacante d'esto, p'aportar a él, salimos de Xixón y garramos l'autovía minera hasta Mieres del Camín, onde siguimos hasta'l pueblu de Campumanes en L.lena, onde últimamente ta tornándose difícil desayunar ceo, ya que nin siquiera pasáes les 8 la mañana t'abiertu dalgún chigre onde díbemos enantes.



Nel aparcaderu de Tuíza Riba, col Siegalabá detrás y Ubina asomando tamién

Magar d'un cafetín rápidu nel primeru qu'alcontramos, Carlos, Pangua y yo, tiramos pola carretera 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde esta vegada si ta petáu l'aparcaderu del pueblu.

Demientres, mudámomos de ropa, doíme cuenta que nin na montaña, ún ye capaz de llibráse de la cantidá de xentacaya qu'hai pel mundiu, y ye que tuviemos la suerte de tener al llau, a unos megapros del BTT, con sus bicis de 2000 pavos, y comos son tan xefes, tienen qu'ocupar 3 sitios d'aparcar poníendo la so furgo en horizontal, vamos p'alloriar.


Xubiendo altor sol pueblín de Tuíza Riba

Escaecemos esto, y como na xubida al Tapinón, metémonos nes primeres rampes de formigón del pueblu, pa garrar el camín que sal de la fonte, en direición a la Cochá'l Viso, pasando por toles portielles de la Veiguellina, hasta topános con una, que tien una muria de piedra llarga, que xube hacia la falda del Siegalabá.


Enmediu de la mar de yerba

Tamos falando de quiciás la ruta más xabaz y lloca, nel sen de desnivel direutu, y ye que dende'l propiu pueblu ya tienes enriba la tiesta'l cumal del Picu Siegalabá tol tiempu. Pa entamar, solo ties esti caminar sele, hasta la última portiella de la Veiguellina, y nel intre aníciase una ascensión dafechu descontroláu per una mar de yerba alto.

Y cuando falo de descontroláo, ye porque ye práuticamente imposible, alcontrar una sienda, que nos guíe dalgo. Nun vos pueu indicar nin meyor nin pior, lo únicu qu'hai que facer, ye clavar bien el palu, y dir faciendo envueltes per onde meyor-y paeza a caún.


Aportando a la roca al fín

Menos mal, que tenemos les ablucantes vistes del val.le'l Meicín, cola Ubina siempre desafiante, y con tolos cumales que van a los picos del Fontán, como segunda cota alta d'esti macizu. Tamién, puen descansáse los xemelos un ratín, mirando pal pueblu a lo baxo, o al perguapu cordal de los puertos de la Val.lota cola Tesa, Mesa y Magrera.

N'otres ocasiones, nun ye tan necesariu, pero nesti picu, parar y dar la vuelta, pa nun petar de pates, ye obligáu ya que taremos casi 2 hores dende la partida de Tuíza Riba, hasta que dexaremos d'ascender per praos de yerba alto, cola pesadez que conlleva.


Ya, ya... tenemos paré de roca y pue tocáse y too

Nel nuesu averamientu a les parés de Siegalabá, aparte del cansanciu polos más de 500 ms de desnivel ganaos, tamién fuimos a pescanciar que lo más correutu, yera atacálu pola esquierda a ser posible. Llueu, aportaremos a la primer paré d'ésti, la cual va dir empobinándonos poquín a pocu, hacia una canal perpindia de yerba y piedra.


Ascenciendo per una guapa y pindia canal

Quiciás seya la parte más difícil téunicamente, ya que lo pindiu de la canal, fai necesariu l'emplegu de les manes, y apretar fuerte de píes en dalgún pasín, lo cual dizme a les clares, qu'en condiciones de moyáu o ivernal con ñeve, faime albidrar una dificultá curiosa.


A más altor, más ñubes,...

Lo nueso foi ensín más, diversión y agradecióse'l perder de vista la yerba por un ratín, ya que'l final d'esta canal, sacábenos a una especie d'hombru de yerba, na que les ñubes apropiáronse de tol protagonismu, faciéndonos el restu d'ascensión hacia la zona más agreste del Siegalabá, ensín ver mui nidiu per onde yera'l camín a siguir.


Abre o nun abre, paez que nun se decide...

Menos mal, qu'ente los h.itos y dalgún clarín qu'apaecía, fuimos ganando-y altor pol bon camín al picu, hasta meténos al fín, na fastera más rocosa y xabaz del Siegalabá. La verdá ye qu'aparte del gran desnivel, nun ye un picu que presente dificultá teúnica, y siguimos avanzando fácilmente, pente xendarmes de roca y pasos menos o más estrechos hacia'l cumal.


Restolando la vía de xubida pente les calices

Sólamente, al final del ascensu, vamos abandonar esa parte esquierda de la arista del Siegalabá, pa facer una envuelta a la mandrecha hasta empobinanos per una canal-pedreru ancha, que pol centru va dexános ensín nenguna dificultá na cume del picu Siegalabá.


Al final de la borrina, siempre ta'l cumal

Los primeros en aportar seremos Pangua y yo, y namái da-y cota, ya quedamos plasmaos pola guapura de les vistes que tenemos, ya qu'a pesar de les ñubes, los claros déxanmos enfrente la Pena Ruea o a la mandrecha'l Picu Tapinón, o a la manzorga tola fastera norte del macizu Penaubina, o los Picos del Fontán, o la Ubina o... o los puertos d'Agüeria, o... yo que sé... hai que xubir pa velu.


Apih.otaos col paisaxe demientres tamos toos na cume

Llueu ya lleguen Canta y Carlos, y desátase l'allegría, ya que'l día finalmente, déxanos tranquilos, y el sol faise'l meyor compangu a tan prestosa cume. Unos abrazos, y ya toca esfrutar de los 2146 ms del Siegalabá, y de les 3 hores esáutes d'esfuerzu p'algamala.


Nel cumal del Siegalabá (2146 ms) col Tapinón detrás

Yera ún de los retos d'esti añu, puestos por mí, y el ñúcleu duru de Xuan de la Borrina, fuimos a facélu, ensín mayores dificultaes nin físiques nin téuniques, asína que tamos felices, tranquilos y afamiaos, poro nun queda otra que sentáse cola mayor relaxación y xintar el bocata, chocolate y lo qu'alcontrásemos pola mochila.


Tapinón y acolumbrando los picos d'Ubina Norte (Sol Tambarón, Amenu, Güertu'l Diablu,..)

Pocu más que dicir que, ye una d'eses cimes qu'esfrútase dafechu, caleyando per tola so estensión p'agüeyar el pasu hacia'l Tapinón, o la caída hacia los xoyos de Siegalabá, o hacia la Pena L.lana,... simplemente, pue tase nella un tiempu indefiníu.


Entamamos la baxada poquín a pocu

Media horina, dános pa descansar, y metémonos nuna baxada que sábemos va ser mui dura, ya que si xubimos casi mil metros direutísimos, tenemos los mesmos p'abaxo, y ver como Tuíza Riba, ta tan lloñe y tan abaxo, nun aída nin lo más mínimu.

El descensu... nun tien más secretu, que siguir el mesmu camín qu'utilizamos pa xubir, y nós al altor d'esi hombru del que falábemos al xubir, como llevábemos un track pal que nun-y ficimos nengún casu, esta vegada siguímoslo, pero la verdá ye que nun mos paeció nin una meyor xubida nin tampocu una meyor baxada.


Increyible lo abaxo que ta Tuíza y el palu entre'l Foxón y el Castiel.lu

Casi qu'encomiendo a siguir siempre, la parte de la esquierda del track, siempre más pegaos a l'arista que metése peles cuestes de yerba y piedra, anque llibremos la pindia canal pa baxar.

Asína que, sin mayor novedá qu'una carga fina, fina de pates, por mor de retener y retener y más retener na baxada, plantámonos en Tuíza Riba, a les 4 de la tarde, faciendo un tiempu total de casi 6 hores y media de ruta, na que salvamos un desnivel direutu de 960 ms y tan solo percorrimos 6,6 kms, amosando lo ablucántemente píndia que ye esta ascensión.

Más nada, .... esfrutáila.


Camudando'l Camín dende'l macizu de Penaubina

Nesta ruta dimos preste al Picu Siegalabá de 2146 ms que ye: dos mil de L.lena y pertenez al Club 58 del Macizu de Penaubina.

Ver progresos en: Retos montañeros