jueves, 26 de mayo de 2011

Tuíza Riba (L.lena) - Picu Tapinón

2 de Mayu de 2011

Track: Tuíza Riba (L.lena) - Picu Tapinón



Una vegada más tornamos al pueblu l.linizu de Tuíza Riba (campu base montañeru pa casi cualisquier ruta nel macizu de Penaubina). Asína pues, p'aportar a él, salimos de Xixón madrugando un pelín ya que'l tiempu paez ser qu'amenazaba lluvia a partir del mediudía, y garramos l'autovía minera hasta Mieres del Camín, onde siguimos hasta'l pueblu de Campumanes en L.lena.

Magar d'un cafetín rápidu, Carlos, Pangua y yo, tiramos pola carretera 8 de L.lena, pasamos pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin entramos en Tuíza Riba, onde nun día de folixa estatal, sorprendiónos ver tan pocu ambiente montañeru.


Nel parking de Tuiza Riba (1214 ms) col Siegalabá xixilando

A les 9 tamos preparaos ya, pa entamar a caleyar, y preséntasenos un día, de ñubes y claros, polo que tamos bien animaos pa da-y preste al nuesu oxetivu: El Tapinón. Pa ello, xubimos como siempre peles cais del pueblu, y nuna fonte desviámonos a la mandrecha, escaeciendo rutes anteriores al Meicín (Picos del Fontán o Penaubina), o la xubida más reciente pol Bocarón al Fariñentu.


Averándonos al Viso cola Pena Brita enriba nuesa

Nesti casu vamos dir bordiando pela Veiguellina, tol faldón del conxuntu que faen Siegalabá y el propiu Tapinón, per un senderu estráu de portielles, de fácil apertura (agradezse) y como siempre dexámosles zarraes como taben.

Entamamos col día friucu, pero aína vamos quitando capes y esfrutamos d'una temperatura perguapa pa tar en manga corta, amestándose poquín a pocu un esnalar de ñubes, que déxanos ver de xemes en cuando la impresionante Pena Ubina.


Asomando la gran Ubina penriba les ñubes

En media hora llarga, aportamos al Viso, onde como siguimos cola mosca tras la oreya, por mor, de la posibilidá de mal tiempu más tarde, decidimos atacar per una canal pente la Pena Brita y la Pena'l Fraile (cima sur del Foxón), p'arribar a la veiga'l Forcáu.


Canal perpindia de xubida a la veiga'l Forcáu

D'entamu paez qu'acolumbramos nidiu, cuala ye la vía a siguir, y paez asequible, pero magar de xubir los primeros metros, ya vemos que'l tarrén ta húmedu, y la tierra blanda, poro faise difícil apretar fuerte de pies. Si-y sumamos qu'a metá de canal, la vía empíndiase enforma, toca entos tirar de brazos agarrándose na yerba, roca o lo que se pille, lo cual pa dos esguilos como Pangua y yo, nun mos tien escesiva dificultá, pero si nos pusiéramos nel pelleyu de Carlos, con sus más de cien kilinos, sedría otra cosa.


El Castiel.lu col cordal de Tesa, Mesa y Magrera detrás y Charly fundíu

El casu ye que, sé que Charly pasólu mui mal, tuve al so llau tol tiempu, y lo pior ye nun poder echá-y un gabitu, porque si resbaría agarráu a mi, baxamos arollicando tola canal los dos, al nun tener agarre dalguno yo pa soportar so pesu. A la fín, sacólu too palantre, esguilando pela yerba, comos si fuera una vía de roca. Con dos coyones, Charly...


Caprichos de la ñatura enantes d'aportar a la veiga'l Forcáu

Dempués de descansar, mui merecidamente, cuando la canal suavizóse, Pangua y yo, separtámonos un pocu de Carlos, nun fuera que nos diése d'hosties por metelu nesi fregáu, jeje, y con un pocu más d'esfuerzu, topámonos fácil cola guapa veiga'l Forcáu, onde ya paramos un ratín más pa xintar y beber, col envís de facer l'ablucante y llarga ascensión al Tapinón.


El Tapinón ante nós con tola so ascensión

Pasarón una hora y tres cuartos dende que saliéramos de Tuíza Riba y tamos a 1705 ms d'altor, colo qu'a les clares vamos tener más de 400 ms de desnivel direutu, per una pala tan grande, que casi nun vemos lo que sería'l cumal del Tapinón ya que paez xuntase col propiu cielu.


Xubiendo de la veiga'l Forcáu pol paredón del Tapinón

Que dicir de l'ascensión??? Pues na..., calma, paciencia y ritmu, nun tien namái qu'eso, garrar un ritmu y dir restolando pente les roques calices y la yerba, el camín n'envueltes que va depositanos nel cumal del Tapinón.


Les ñubes avanzaben sobre nós

Asína que, con un güeyu nel suelu y otru pa les ñubes, les cuales dexaben ver les vistes un ratín y otru tapeciénles, fuimos ganando altor hasta que Pangua y Carlos averáronse al cumal cimeru del Tapinón, y yo tireme hasta'l sur, pa ver si tenía un segundín pa ver la cresta qu'aporta al picu Siegalabá, pa posteriores incursiones.


Pangua y Carlos encumando'l Tapinón y Berto llegando de la segunda cima

Nun pude ver muncho, y de secute, fuime al alcuentru colos mios collacios, pa cellebrar con un tragu d'augua, un cumal tan prestosu como'l Picu Tapinón de 2113 ms. Aparte'l tragu d'augua, tamién la casi hora y cuartu de xubida a güevu, fízonos merecer un señor bocata y una estancia na cume de venti minutinos.


Enriba los 2113 ms del Picu Tapinón

Son les 12 y cuartu y ya zampamos tola xinta y como les ñubes, tan apropiándose de toles vistes, y cada segundu tan más altes, decidimos baxar darréu pa nun tener mayores complicaciones. La baxada esta vegada, fadrémosla más en direición noreste, pa baxar per una especie de contrafuerte nomáu como los Camparones.


Baxando polos Camparones y la veiga'l Forquéu cola Carba Valsecu enriba

Baxamos selemente falando, y de xemes en cuando, abre un puquiñín, p'amosanos dalgún requexu tan guapu como la veiga'l Forquéu y braña Valsecu, enmurallaos pente la Carba Valsecu y los crucies de Fondós. Nel intre, metiósenos casi dafechu les ñubes y dempués de 45 minutos, toparémonos al fin, con un camín que lleva al l.legu y braña Valsecu. Esta baxada tan llarga, dióme a pescanciar, lo h.odío de la xubida que diben tener "a estes hores" un par de montañeros, que nun teníen mui nidiu per onde yera'l picu.


Bordiando la Pena'l Foxón y el val.le'l ríu Güerna

Dempués d'indicalos un pelín per onde ta'l picu, xubimos un pocu una llomba que fai la cabera estribación del Foxón, y lo baxamos pa bordiar ya definitivamente'l Foxón, empobinándonos per tola so falda, hasta la Braña'l Foxón, y d'ellí a la Col.lá'l Viso, pasu natural ente'l Foxón y la Pena Castiel.lu.


Tuíza Riba dende la col.lá'l Viso

Son les dos de la tarde, cuando tornamos al mesmu camín, qu'usáremos pa xubir, y onde desviáramonos hacia la canal de xubida, pela que tanto sofrimos. Dende equí, en menos de media horina, aportaremos de nueu al pueblu de Tuíza Riba, onde namái pisar l'asfaltu del aparcaderu, entamen a cayer les primeres gotes del día.

Camiento, que nunca entainara tanto pa mudame la ropa, ya qu'entamó a esbastiar nun segundu tola lluvia que nun mos cayera en tol día. Magar d'ello, salimos corriendo pal chigre, onde tomámonos unes cerveces y nos metieron un bon palu, por una tabla embutíos, ya que les dos y media yera una hora pa tener fame inda.

A la fín, ruta prestosísima, con un picu perguapu, que si aciértase nun día espeyáu pa tener vistes de les caídes a la xoyas de Siegalabá o les vistes del propiu Siegalabá, Pena Ruea, Fariñentu,... pues ser lo másimu. En total fueron unes 5 h y 25 minutos, pa facer 10, 30 kms superando un desnivel acumuláu de "sólo" 950 ms, ya que ye una ruta mui directa.


Camudando'l Camín una vegada más nel macizu Penaubina

Nesta ruta dimos preste al Picu Tapinón de 2113 ms que ye: dos mil de L.lena y Quirós, picu "prestosu" d'Asturies y pertenez al Club 58 del Macizu de Penaubina.

Ver progresos en: Retos montañeros

lunes, 23 de mayo de 2011

La Campa Torres (Xixón) - Costa de Xixón - Playa La Ñora (Villaviciosa)

30 d'Abril de 2011

Track: La Campa Torres (Xixón) - Costa de Xixón - Playa La Ñora (Villaviciosa)



Entamamos lo que podría nomáse como "rutes costeres d'Asturies" col envís de conocer toles posibles siendes que nos dean la posibilidá de caleyar la costa de cada conceyu asturianu. Como non, vamos dar aniciu en casa, en Xixón, y pa ello, vamos madrugar Paula y yo, ya que tenemos que facer una travesía col consiguiente acesu en coche al entamu y final.

Poro, salimos colos dos coches del centru de Xixón, más en concretu del barriu de Laviada, y vamos garrar l'autovía del Cantábricu, en direición al conceyu de Villaviciosa, y más en concretu a la Playa La Ñora, entamu d'esti. Pa ello, abandonaremos l'autovía, na salida de Quintes y Quintueles, pasando unes retondes y tomando una carretera hasta'l crucie cola N-632, onde tiraremos a la manzorga hasta garrar la VV-1 en Friúz, y nun abandonala hasta la propia playa, pasando polos pueblos de Cazamular, Capellanía, San Clemente y a lo cabero, El Peñucal, xustu enriba la Ñora.


Partimos de La Campa Torres y el so vértices xeodésicu (124 ms)

Equí dexamos un coche, y damos vuelta atrás, hasta l'autovía onde conduciremos en direición Avilés, hasta la salida de Tremañes, onde garramos la As-118 que va a Candás, pasando al llau de la Xuvería y el polígono industrial de los Campones, hasta qu'en Veriña, tomaremos a la mandrecha'l cruce a la As-17, pa unos metros más alantre, tomar la carretera a la manzorga que nos dexará en La Campa Torres, dempués travesar el barríu de Les Cabañes.

Dexaremos nel aparcaderu'l coche, y garramos mochila col augua y sobretou chubasqueru, porque'l día ta murniu enforma, y nun tenemos nidiu si llibraremos de moyanos. D'aniciu, vamos xubir un pelín hacia la parte más alta de La Campa Torres, hasta alcontrános col vértice xeodésicu de 124 ms, y coles vistes de les playes carreñes d'Aboño y Xivares como meyor vista, ya que lo demás, son aberraciones como les bombones de gas, la térmica d'Aboño,l'horrendu y sobrecostosu muselón, etc, etc,...


Playes d'Aboño y Xivares y l'horrendu Muselón

Nun ye la meyor vista, así que casi presta que tea'l día dalgo borrinosu, pa nun acolumbrar a les clares tol fedor industrial, anque nesta fastera de Xixón, paezme a mi, que nunca ta'l día nidiu, nin llimpiu mediuambientalmente falando. En parte, esta semeya, faínos refugar la baxada hasta'l faru, y d'elli baxar más al Musel, y escoyemos baxar pola carretera dexando'l barriu La Campa Torres pa metenos nel de Les Cabañes y más tarde, baxando per un caleyu asfaltáu a la manzorga, nel barriu de Xove de Riba.


Dexamos la parroquia de Xove p'aportar a la playa L'Arbeyal

El camín de Xove de Riba hasta la parte baxera de Xove, fízosenos de lo más entreteníu, fixándonos en cases de tou tipu, dende grandes a pequeñes, esbarrumbaes, solares abandonaos, chalés nuevos, pequeñes urbanizaciones,...too ensín xacíu, hasta aportar bien cerquino de la retonda d'al llau de la Playa L'Arbeyal, la cual percorreremos ensín priesa, empobinándonos hacia la cai principal de La Calzada.

Llevamos una horina caleyando, cola amenaza incierta del tiempu, y entamamos a sentir dalgo que ruxe más que'l ñuberu penriba, y nun ye otru que l'estómagu, colo que toca restolar una cafetería abierta y metése un cafetón con dalgo que lleve bien d'azucre. Venti minutinos dempués tábemos de nueu caleyando dende'l barriu de Santolaya hacia El Natahoyo, onde pasaremos pente los "edificios barcu" que faen risión del pasáu industrial astilleru xixonés, pa topanos cola otra playa artifical de Xixón, Poniente.


Caleyando hacia la playa de Poniente

Dexamos atrás tanta especulación urbanística, y vamos mudanos al papel de turista típicu foriatu de Xixón, pa facer camín pela playa Poniente y el puertu deportivu, hasta garrar la Cuesta'l Cholo, xubiendo a L'Atalaya de Xixón, onde asítiase l'Eloxu l'Horizonte, y quiciás la vista más guapa de Xixón acolumbrando tola so costa d'ocidente a oriente.


Puertu deportivu y Eloxu L'Horizonte en L'Atalaya

Escaecemos semeyante mole de formigón, pa baxar pel llau de la Ilesia de San Pedro, y tomar d'entamu a fin, el Muro San Llorienzo, onde entretenémonos viendo dalgún partidín de futbol playa, con paisanos de muncha edá, corretiando pel sable.


Playa de San Llorienzo

Llevamos dos hores y media de camín andáu, y tamos nel Piles, onde siguiremos la sienda costera que va llevanos pel Rinconín, onde vamos echá-y un saludín a la Lloca, que sigui acolumbrando pa la llende'l mar, a la gueta d'un requexu d'esperanza.

Pocu más enriba, vamos meténos n'otra continuación de la sienda, ya col firme empedráu, que suel ser onde doi la vuelta cuando salgo a correr un ratín dende'l gimnasiu, ya qu'hai una fonte afayaiza pa echar un tragu.


La lloca'l Rinconín y escultura prestosa

Como nun ta'l día mui calurosu pa paráse a beber que digamos, vamos de secute a meténos na parte más "dura" de la ruta, con dellos xube-baxa, al tomar la sienda continuidá penriba de los acantilaos de delles pequeñes sableres.

Fadremos dalguna ascensión pindia, y tendremos a lo lloñe'l nuesu prósimu oxetivu tachable, la Providencia, onde alcuéntrase l'últimu vértice xeodésicu de Xixón que-y da xacíu a esta ruta. Pero enantes, tendremos bon camín averandonos a la baxada a la playa de Peñarrubia, y xustu dempués d'ésta tendremos una xubida n'envueltes, a la que sumóse-y una xarazada que mos puso pingando a pesar del chubasqueru.


La Providencia col so vértice xeodésicu

Bordiando'l mediudía marcábemos col gps y baxo una lluvia pelín incómoda los 95 ms d'altor d'esti cabu xixonés, y nel puntu nel que tábemos nun mos quedaba otra que siguir baxo la lluvia hasta'l conceyu vecín de Villaviciosa.


Pingando nel vértice de la Providencia (95 ms)

Asína que, moyáos pero contentos, vamos garrar la carretera hacia la capilla de la Providencia, pa tomar de nuevu la sienda costera, qu'abandonáremos pa dar preste al vértice, ya qu'esta sigue más baxa pegada a la mar. Nós, caleyaremos un pelín per carretera y detrás de la capilla, tornaremos al camín, al llau d'un nuevu hotel de gustu pelín sosu y espartanu.

Darréu, meterémonos nuna parte desconocida pa mi, ya que corriendo si que llegara hasta la Providencia, pero nun sabía que tal taba'l restu'l senderu, y sinceramente, paezme casi lo más guapu, sobretou pol toque rural de la zona, alloñada ya del Xixón más urbanu.


Costa xixonesa y mirador de la Playa Serín

Nesti tramu, vamos caltener l'altor nel nuesu caminar y tener la suerte de poder ver el sableru de Serín dende un mirador bien guapu, pa posteriormente xubir al monte Serín y baxar hasta l'arroyu que fina na sablera d'Estañu, la cual acolumbramos tamién dende riba.

Nesti puntu, ya tamos mui averaos al final de la ruta, y ya ensín llover, y dalgo más secos, vamos baxar hasta La Ñora, onde fina esti senderu, que por poner pegues diría que'l firme de piedra, faise pelín peligrosu nos díes de lluvia, aumetando la posibilidá nes baxaes de pegáse una culada perguapa.


Aportando a la Playa La Ñora

Finalmente, el total de costa xixonesa foron casi 19 kms, fechos en 4 hores y media clavaes incluyendo'l desayunu de 20 minutinos. D'otra miente paez mentira, pero estes rutes de costa tamién tienen un desnivel acumuláu potente, 530 ms, ya que vamos dir xubiendo a cabos y acantilaos y baxando a sableres, colo que ye un terrén pelín quebrapates.

Ensín más, pueu recomendar y recomiendo, facer esta ruta, pero si garráis un día soleyeru de branu, nel que podáis pegavos un bañín de xemes en cuando, y aparte'l desayunu parar a tomar una botellina sidre en dalgún qu'otru sitiu, faciendo de la ruta, pasar el día enteru, ya tórnase perfeutu.


Camudando'l Camín peles cais de la Calzada

Nesta ruta dimos preste a dos vértices costeros de Xixón: La Campa Torres (124 ms) y La Providencia (95 ms)

Ver progresos en: Retos montañeros